Lëvizja Vetëvendosje e Albin Kurtit i fitoi zgjedhjet e parakohshme parlamentare në Kosovë, të mbajtura më 14 shkurt.

Referuar rezultateve preliminare të Komisionit Qendror të Zgjedhjeve, Vetëvendosje fitoi 47.7 për qind të votave, e pasuar nga Partia Demokratike e Kosovës me 17.40 për qind, Lidhja Demokratike e Kosovës me 13.29 për qind dhe Aleanca për Ardhmërinë e Kosovës me 7.50 për qind, transmeton albinfo.ch.

Theksohet se në rezultatet preliminare nuk përfshihen votat me kusht, votat me postë dhe votat e personave me nevoja të veçanta.

Kurti, në një konferencë për media nga selia e partisë së tij në Prishtinë, e cilësoi si “madhështore” fitoren.

“Ky referendum për drejtësi dhe punë, e kundër kapjes së shtetit dhe korrupsionit u fitua. Është diçka e pashembullt në Kosovën e pasluftës”, tha ai.

“Nga nesër fillon një ditë e re. Na presin shumë punë dhe angazhime, sepse vendi është në kriza të shumëfishta”.

“Secili prej nesh duhet ta marrë përgjegjësinë që i takon, për ta bërë vendin tonë një vend të jetueshëm për të gjithë, ashtu siç është i dashur për të gjithë”, tha Kurti, duke u zotuar se do të udhëheqë “pa inate dhe pa revanshizëm”.

“Prioriteti ynë është drejtësia dhe punësimi”, theksoi ai.

Vjosa Osmani, kandidate e listës së Vetëvendosjes për presidente, tha se me fitoren e kësaj partie “Kosova do të ndryshojë”.

“Institucionet e reja do të drejtohen nga drejtësia”, tha ajo.

Lëvizja Vetëvendsoje ka mbajtur konferencë për media pas publikimit të përqindjeve të para të dala nga rezultati i zgjedhjeve të sotme.

Para mediave ka folur lideri i VV-së, Albin Kurti bashkë me Vjosa Osmanin.

Kurti ka thënë se u vërtetua se zgjedhjet e sotme ishin referendum i cili u fitua.

“Qytetarët morën pjesë masivisht në zgjedhje dhe u vërtetua se ato ishin referendum. Ky referendum për drejtësi dhe punë u fitua. Është diçka e pashembullt në Kosovën e pasluftës. Dua t’i falënderoj të gjithë qytetarët që kanë votuar sot. Të gjith ata që mundësuan që të kemi një proces të rregullt e drejt zgjedhor. Dua të falënderoj mërgatën tonë, për qindra eurot e shpenzuara për postë, e për mijëra kilometrat e kaluara vetëm për ta sjellur votën e tyre. Ju i keni dhënë kurajo dhe shpresë një kombi të tërë. E falënderoj presidenten dhe kolegen time për përkushtimin dhe angazhimin e saj. Dua të falënderoj policët që kanë qëndruar në secilin vendvotim”, tha ai.

“Mediat dhe të gjithë gazetarët që kanë informuar publikun drejtë dhe paanshëm. Dhe nuk kam se si t’i harrojë ata që i dua më së shumti, aktivistët. Falënderoj dhe oponentët politik për një garë pa incidente, dhe i uroj për reforma. Kjo fitore madhështore është mundësia që ne ta fillojmë ndryshimin. Rruga përpara është e gjatë, do të kemi pengesa dhe do të bëjmë ndonjë gabim, mirëpo qëllimin e kemi të mirë. Nuk do të hakmerremi ndaj askujt, por do të kërkojmë përgjegjësi ndaj kujtdo. Kjo fitore është e juaja, prandaj edhe ndryshimi na takon secilit prej nesh”, tha Kurti.

“Pa inate, pa ryshfet, pa nepozitën e pa korrupsion, do ta zhvillojmë dhe demokratizojmë vendin tonë”, tha tutje Kurti.

Kandidatja e listës së Vetëvendosjes për presidente, Vjosa Osmani, ka thënë se me fitoren e kësaj partie “Kosova do të ndryshojë”. Në një konferencë për media, bashkë me kandidatin e Vetëvendosjes për kryeministër Albin Kurti, Osmani ka thënë se me qeverisjen e VV-së do të krijohen mundësi të barabarta për të gjithë.

Ajo ka thënë se me fitoren e VV-së nuk është fituar “një mandat për hakmarrje apo kthim prapa, por është kapitull i punëve që do të kryhen”.

“Nëse ka ende që mendojnë se vështirë bëhen ndryshimet, fitorja jonë është përgjigja më e sinqertë. Qytetarët e Kosovës e ndëshkojnë keqqeverisjen, e dinë kur është mjaft e kur është koha për kapitull të ri. Kosova do të ndryshojë. Do të zhvillohet duke krijuar mundësi të barabarta për të gjithë”, ka thënë ndër tjerash ajo.

Kandidati për kryeministër nga radhët e Lidhjes Demokratike të Kosovës, Avdullah Hoti, ka thënë se i kanë marrë vlerësimet preliminare dhe Kosova ka mbyllur një proces demokratik.

Ai ka shtuar se rezultatet janë tjera nga ato që ka pritur, duke shtuar se do ta marrë përgjegjësinë për rezultatin e këtij procesi zgjedhor.

“Para jush dua të them se e marrë përgjegjësinë e plotë për rezultatet dhe do të diskutojë me organet e partisë. Unë pres që KQZ sa më parë të përmbyllë procesin e numërimit të votave. Unë jam gjithmonë mirënjohjes për mundësinë që më është dhënë nga LDK-ja dhe dëshiroj që të shpreh që do të jemi mbrojtës të interesit të shtetit si opozitë konstruktive”, ka thënë ai.

Kandidati për kryeministër nga radhët e PDK-së, Enver Hoxhaj, ka thënë se qytetarët e Kosovës kanë folur dhe vullneti i tyre duhet respektuar.

Ai ka uruar Lëvizjen Vetëvendosje për rezultatin, derisa ka bërë të ditur se nuk do të jenë bashkë me ta në qeverisje.

“Rezultati e vë VV në vend të parë dhe PDK në vend të dytë. Unë dua që ta urojë Vetëvendosjen për rezultatin e arritur dhe dua që t’i ftojë që të punojnë që ta forcojnë shtetin e Kosovës. PDK nuk do të jetë pjesë e Qeverisë me Lëvizjen Vetëvendosje, sepse jemi larg me orientimet tona politike”, ka thënë ai.

Ai ka thënë se Kosova ka nevojë për stabilitet, dhe PDK zotohet që të jetë faktor i stabilitetit nga pozita kryesore në opozitë.

Hoxhaj ka thënë se kjo fushatë nuk ka qenë e lehtë për PDK.

“Jam krenar për unitetin dhe përkushtimin e pashembullt që kemi treguar si PDK”, ka thënë ai.

Vjosa Osmani ka bërë paraqitjen e parë pas fitores në zgjedhje të VV-së.

Ajo është shfaqur në një fotografi me Haxhi Avdylin dhe Faton Pecin.

Ish-deputeti i LDK-së ka shkruajtur se fitorja i dedikohet qytetarit, por se sipas tij kjo është një revoltë e qytetarit kundër një kaste sipas tij të papërgjegjshme politike.

Postimi i plotë i Avdylit:

Kjo fitore i dedikohet qytetarit. Kjo ka tejkaluar edhe partitë por i ngjan zgjimit qytetar. Kjo është revoltë e qytetarit kundër padrejtësive nga një kastë e papërgjegjshme politike. Ne do e lexojmë drejtë këtë përkrahje masive. Ne do veprojmë me urtësi, pa inate por me përgjegjësi të shtuar shtetërore. Na priftë e mbara për punë të mira për Kosovën. Faleminderit secilit prej jush që me votën tuaj po shkruani historinë.