17 shkurti 2021 shënon ditën kur shteti i Kosovës mbush 13 vjet prej kur është shpallur i pavarur.Të dielën e 17 shkurtit 2008 në orën 15:39 në Kuvendin e Kosovës u lexua Deklarata e Pavarësisë.Nga ai çast, Kosova u shpall e pavarur derisa në Ballkan u konfirmua edhe një shtet i ri.

Kosova e pavarur menjëherë nisi të njihej nga shtetet mike.Ky proces u bë i zakonshëm në ditët e para pas pavarësisë, ndërsa deri më tash Kosovën e kanë njohur 117 shtete.Vendi i fundit që e njohu Kosovën është Izraeli.

Prizreni Weather ka publikuar parashikimin e motit për sot dhe ditët e ardhshme.
Sipas njoftimit, sot në Kosovë pritet që të mbahet i ftohtë.Në mbrëmje priten edhe reshje bore apo shiu.

“17.02.2021 – Pjesërisht vranët dhe ftohtë në mëngjes. Ditën vransirat do të shtohen, e në mbrëmje shkurtimisht priten edhe reshje të dobëta bore apo edhe shiu të akullt. Temperaturat në vise të ulëta -7C deri 5C, e në vise malore -10C deri 3C. Kryesisht qetë, me erëra të lehta drejtimesh të ndryshme 1-2m/s. Indeksi UV: 3. Indeksi i cilësisë së ajrit në vlera të dobëta dhe shumë të dobëta, kohëpaskohe edhe në jashtëzakonisht të dobëta”, thuhet në njoftim.

Ish presidenti i Kosovës dhe ish kryetari i LDK-së, Fatmir Sejdiu në emisionin “Debat” të RTK-së e ka komentuar edhe humbjen e thellë të LDK-së në zgjedhjet e së dielës.

Duke folur për dorëheqjen e Isa Mustafës nga pozita e kryetarit të partisë dhe kryesisë së partisë, Sejdiu ka thënë se nuk ka shumë shpjegim për dorëheqjen e Mustafës dhe kryesisë së LDK-së.

“Është një temë që kërkon trajtim të thellë. Çështjet që ua kam adresuar që 11 vjet, kanë qenë të rendësishme e që LDK-ja me këtë lidership nuk i ka kushtuar kujdes. Është e dhimbshme kjo që ka ndodh me LDK-në”, ka thënë Sejdiu.

Ai e ka quajtur “me bisht” dorëheqjen e Mustafës.

“Është dorëheqje me bisht, sepse i treti, i katërti nuk e çmojnë që të jetë përgjegjësia e të gjithëve. Duhet të jetë barrë e secilit në kryesi për këtë që ka ndodh në LDK. Ka qenë një kohë që personalisht kam kërkuar që njerëzit që kanë pasur humbje, të reflektojnë. Atë nuk e kemi parë të rëndësishme”, ka thënë Sejdiu.

Ai tutje tha se nuk është një reflektim i plotë për atë që ka ndodhur me rezultatin zgjedhor të LDK-së.

“Është diçka që secili që LDK-në e ka konsideruar shtëpi të vet, është një goditje që duhet të shtojë përgjegjësinë. Ka shumë çështje që duhet analizuar thellë. Aktualisht s’mund të paragjykojë se si do të reflektojnë drejtuesit e LDK-së. Është një tip nokdauni (nokaut). Këtë e sheh edhe të qytetarët”, ka thënë ish kryetari i LDK-së.

Sejdiu nuk ka dashur të flas sonte për një rikthim të mundshëm në kryer të LDK-së. /RTKLive/

Kandidati për deputet nga radhët e Partisë Demokratike të Kosovës (PDK), Xhavit Haliti ka thënë se pika më e vështirë e kësaj qeverie do të jetë zhvillimi ekonomik dhe bisedimet me Serbinë.

“Pika më e vështirë është zhvillimi ekonomik dhe bisedimet me Serbinë, janë pika më sensitive tash ta shohim si do të zhvillohet”, ka thënë Haliti për IndeksOnline.

Haliti ka thënë se nuk ka prirje për t’i besuar kundërshtatit politik.

“Varet qysh dhe me kënd do me bo koalicon, a po don vet nëse i siguron vototat, kështu është deklaru. Unë nuk mundem me parashiku çka bën ai. Ne nuk i kemi fitu votat dhe nuk mund të flasë për të tjerët. Nuk i interpretojë mendimet e atij dhe nuk kam prirje me i besu kundërshtarit politik, ai i ka fitu zgjedhjet dhe ne do ta shohim sa do të jetë koshient me ato që i ka premtu, çfarë qeverie do të krijojë, cilat do të jenë politikat e saj të brendshme dhe të jashtme, të zhvillimit ekonomik, shëndetësia, ekonomik”, ka theksuar tutje ai.

“Pika më e vështirë zhvillimi ekonomik dhe bisedimet me Serbinë, janë pika sensitive tash ta shohim si do të zhvillohet. Kosova nuk është e Vetëvendosjes dhe as e liderit të LVV-së, Kosova është e kosovarëve dhe Kosova ka një kushtetutë dhe ligjet e saj, dhe konform kushtetutes do të veprojë edhe ai, nëse i shkelë dihet ajo punë”, ka theksuar tutje ai.

Tutje, Haliti ka thënë se ende nuk është në dijeni se sa vota ka arritur t’i sigurojë në zgjedhjet e 14 shkurtit.

Vlen të përmendim faktin se në zgjedhjet që u mbajtën këtë të diel, Lëvizja e Albin Kurtit bindshëm ka fituar më së shumti vota në vend. Nga ana tjetër Komisioni Qëndror i Zgjedhjeve pritet t’i numërojë edhe votat nga diaspora, ato me kusht dhe të personave me nevoja të veçanta.

Kryeministrja e Serbisë, Ana Bërnabiq ka thënë se është për keqardhje që lideri i partisë fituese të zgjedhjeve në Kosovë, njëherësh kandidat për kryeministër, Albin Kurti ka thënë se vazhdimi i dialogut me Serbinë nuk është një përparësi e tij.

“Mendoj se ky është joseriozitet i elitave politike në Prishtinë. Dialogu është mënyra e vetme për të pasur një marrëveshje për normalizim, që do të nënkuptonte më shumë begati, përparim ekonomik dhe stabilitet. Unë nuk e di se çfarë tjetër mund të ishte prioritet më i madh”, tha Bërnabiq.

Ajo tha se arritja e një marrëveshjeje për normalizimin e marrëdhënieve duhet të jetë një përparësi për Prishtinën. Sipas saj Kosova nuk ka “perspektivë” pa dialog dhe marrëveshje me Beogradin. Këtë e argumentoi me faktin se më shumë se gjysma e botës nuk e njohin Kosovën. Bërnabiq shtoi se Kosova “nuk mund të negociojë anëtarësimin në BE” pasi pesë vendet anëtare të bllokut nuk e njohin si shtet.

“Ne jemi këtu për dialog”, tha ajo në një konferencë për media.

Pas daljes së rezultateve preliminare nga zgjedhjet e parakohshme parlamentare të mbajtura të dielën në Kosovë, lideri i Vetëvendosjes, Albin Kurti, tha se formimi i një ekipi negociues për dialogun me Serbinë nuk është përparësi e tij, pasi siç tha, kjo është një përparësi e gjashtë apo e shtatë për qytetarët e Kosovës.

“Prioriteti ynë është punësimi dhe drejtësia”, tha Kurti, duke shtuar se nëse Kosova është e dobët në aspektin ekonomik, Serbia nuk do të respektojë asnjë marrëveshje.

Dialogu mes Kosovës dhe Serbisë i lehtësuar nga Bashkimi Evropian kishte filluar para dhjetë vjetësh. Pas një ngecjeje gati dyvjeçare, procesi rifilloi verën e vitit të kaluar. Por, për shkak se Kosova shkoi në zgjedhje të parakohshme parlamentare, raunde të reja të bisedimeve në nivel të lartë nuk ka pasur që nga vjeshta e vitit të kaluar, ndërkohë që janë zhvilluar vetëm disa takime në nivel të ekspertëve.

Deri në zgjedhjen e Qeverisë së re të Kosovës, Brukseli zyrtar ka paralajmëruar se nuk do të ketë takime në kuadër të dialogut.

U.d së presidentes Vjosa Osmani ka falenderuar Mbretëreshën Elizabeth II të Mbretërisë së Bashkuar, presidentin gjerman Frank-Ëalter Steinmeir, presidentin francez Emmanuel Macron dhe atë Italian Sergio Mattarela për urimin e 13 vjetorit të pavarësisë së Kosovës.

Ajo tha se “prezenca e afërsia e miqve tanë është po aq e dalluar e e çmueshme sa ç’ishte në momentet vendimtare të shpalljes së Kosovës një vend i pavaruar”.

“Në prag të 13 vjetorit të pavarësisë së Republikës sonë, prezenca e afërsia e miqve tanë është po aq e dalluar e e çmueshme sa ç’ishte në momentet vendimtare të shpalljes së Kosovës një vend i pavaruar.”

“Falenderoj përzemërsisht Mbretëreshën Elizabeth II të Mbretërisë së Bashkuar, presidentin gjerman Frank-Ëalter Steinmeir, presidentin francez Emmanuel Macron dhe atë Italian Sergio Mattarela si dhe aleatët e tjerë të shumtë për fjalët e sinqerta dhe konfirmimin e përkushtimit të tyre për fuqizimin e shtetit tonë brenda dhe jashtë kufinjve.”

Shteti i fortë bëhet me miq të mirë, e miqtë Kosovës nuk i kanë munguar kurrë!”, tha ajo.

Anëtarja e Këshillit të Përgjithshëm të LDK-së, Melihate Tërmkolli ka deklaruar se mundet të kandidojë për kryetare të LDK-së.

Ajo tha se mundet të jetë njëra nga kandidaturat për kryetare të LDK-së.

“Mundet, kur kanë mundur njerëz që kurrë s’kanë qenë në LDK, që kanë qenë anti LDK e anti Rugovë, pse nuk u dashka unë, pse nuk paskam mundësi me qenë unë një prej kandidatëve të mundshëm. Udhëheqja e LDK-së tash e 10 vite i ka largu të gjitha vlerat ma të fuqishme që i ka LDK-ja brenda vetes. Ne jemi aty por nuk jemi në pjesën udhëheqëse” tha Tërmkolli për Gazeta Blic.