“Personat e moshuar dhe ata me sëmundje kronike do të kontaktohen nga njësitë e vaksinimit në çdo komunë për tu vaksinuar”.
Ministria e Shëndetësisë e ka lëshuar një njoftim për qytetarët e moshuar rreth vaksinimit kundër COVID-19.

Kjo ministri iu ka bërë thirrje personave të moshës mbi 80 vjeçare dhe atyre me sëmundje kronike, që të presin thirrjen për vaksinim nga njësitë e vaksinimit dhe mos të drejtohen në qendrën e vaksinimit në sallën “1 Tetori” në Prishtinë dhe në qendrat e tjera të vaksinimit, para se të marrin ftesën për marrje të vaksinës, njofton Klan Kosova.

Më poshtë mund ta lexoni komunikatën e plotë të MSH-së:

Me qëllim të mbarëvajtjes së procesit të vaksinimit kundër COVID-19 dhe lehtësimit të qasjes në këtë proces, sidomos për grupet prioritare që do të vaksinohen me dozat e para të vaksinës kundër COVID-19, Ministria e Shëndetësisë u bën thirrje personave të moshës mbi 80 vjeçare dhe atyre me sëmundje kronike, që të presin thirrjen për vaksinim nga njësitë e vaksinimit dhe mos të drejtohen në qendrën e vaksinimit në sallën “1 Tetori” në Prishtinë dhe në qendrat e tjera të vaksinimit, para se të marrin ftesën për marrje të vaksinës.

Të parët që do të vaksinohen, sikur është bërë e ditur, janë të gjithë profesionistët shëndetësor, ndërsa menjëherë pas tyre, do të vaksinohen grupet e tjera sipas Planit shtetëror të vaksinimit kundër COVID-19, përfshirë personat e moshës mbi 80 vjeçare.

Personat e moshuar dhe ata me sëmundje kronike do të kontaktohen nga njësitë e vaksinimit në çdo komunë për tu vaksinuar, sipas listave të siguruara nga institucionet e vendit, derisa për t’u siguruar përfshirja e plotë e tyre në lista, gjatë ditës së nesërme, në dispozicion të qytetarëve do të jetë edhe një platformë elektronike, krahas regjistrimit klasik të tyre.

Prandaj, me mirëkuptimin e plotë, MSh u bën thirrje personave të moshuar, që të presin thirrjet për vaksinim dhe të veprojnë sipas udhëzimeve që do t’i marrin gjatë gjithë procesit të vaksinimit të tyre kundër COVID-19.

Ish-deputeti i LDK-së, Shkëmb Manaj, ndërsa flet për çështjen e presidentit, ju çon mesazh deputetëve të partisë së tij se pavarësisht bindjeve dhe arsyeve të tyre, duhet ta marrin parasysh vendimin e Kryesisë për pjesëmarrjen në procesin e votimit për të zgjedhur Presidenten/in.

Ai thotë se mos zgjedhja e Presidentit të Republikës në këtë fazë kur vendi ka ushtrues detyre të Presidentit, e fut vendin në krizë kushtetuese dhe institucionale, shkruan Reporteri.net.

Postimi i tij i plotë:

Në parim, deputeti nuk i nënshtrohet asnjë detyrimi sepse kështu e përcakton norma e Kushtetutës.

Por, në kuadër të rregullave të përfaqësimit politik dhe partiak, deputeti duhet të marr parasysh qëndrimet dhe vendimet e organeve partiake.

Në legjislaturën e kaluar, Ne i kemi marr parasysh vendimet e partisë për disa çështje të ndieshme, edhepse me disa prej tyre nuk jemi pajtuar, madje disa prej nesh kemi pas arsye të mëdha që të mos pajtoheshim kurrë. Por, e kemi tejkaluar vetvetën.

Prandaj, në këtë frymë, mendoj se kolegët tonë, pavarësisht bindjeve dhe arsyeve të tyre, duhet ta marrin parasysh vendimin e Kryesisë së LDK-së për pjesëmarrjen në procesin e votimit për të zgjedhur Presidenten/in sepse kështu do të tregojnë respekt, maturi politike dhe disiplinë partiake, por edhe përgjegjësi do të thoja për të ushtruar detyrën e përfaqësimit të popullit në Kuvend të Republikës.

Mos zgjedhja e Presidentit të Republikës në këtë fazë kur vendi ka ushtrues detyre të Presidentit, e fut vendin në krizë kushtetuese dhe institucionale. Kjo gjendje nuk i duhet shtetit të Kosovës dhe këtu përgjegjësia i takon secilit subjekt politik parlamentar, respektivisht secilit deputet të Kuvendit.

Eurodeputeti austriak, Lukas Mandl, ka shkruar për pesë vjetorin e marrëveshjes së Stabilizim Asociimit me Bashkimin Evropian.
Me anë të një postimi në Twitter ai ka thënë se kjo ishte marrëdhënia e parë kontraktuale mes BE-së dhe Republikës së Kosovës.
Ai thotë se përveç kësaj, ky ishte një moment historik në rrugën e Kosovës drejt anëtarësimit në BE.

Në këtë kontekst, ai thotë se liberalizimi i vizave është vonuar dhe duhet të ndodhë tani.

“Pesë vjet më parë, Marrëveshja e Stabilizim-Asociimit me #Kosovën hyri në fuqi.

Si marrëdhënia e parë kontraktuale midis EU dhe RKS kjo ishte një moment historik i rëndësishëm në rrugën e Kosovës drejt anëtarësimit në BE. Liberalizimi i vizave është i vonuar dhe duhet të ndiqet tani”, ka shkruar ai.

Një person është arrestuar në qytetin e Gjilanit pasi që i njëjti në rrugë e ka sulmuar fizikisht ish- bashkëshorten e tij.

Në lidhje me rastin është konsultuar prokurori i shtetit me urdhër të së cilit i dyshuari është dërguar në mbajtje.

Hetimet për rastin po vazhdojnë, thuhet në raportin 24 orësh të policisë, transmeton Klan Kosova.