Pavarësisht pandemisë COVID-19, qytetarët nga Kosova vazhdojnë të zgjedhin Shqipërinë si destinacion për të kaluar ditët e vikendit.

Gjatë së premte dhe të shtunës, në vendkalimin kufitar të Morinës, nga Kosova për në Shqipëri, kanë kaluar 41 mijë e 146 persona dhe rreth 12 mijë automjete, bazuar në të dhënat e Policisë së Kosovës.

Nga policia kanë bërë të ditur për Telegrafin se gjatë ditë së premte kanë kaluar 5 mijë e 574 vetura me 19 mijë e 374 qytetarë. Ndërsa, vetëm gjatë ditës së djeshme, janë 6 mijë 158 vetura me 21,772 pasagjerë.

Po ashtu, gjatë kësaj periudhe kanë kaluar 261 autobusë.

Policia tregon se në tri rajonet kufitare gjatë këtyre dy ditëve kanë kaluar gjithsej 23 mijë e 3 vetura me 74 mijë e 567 persona.

Ministria për Evropën dhe Punët e Jashtme e Shqipërisë ka njoftuar se të gjithë ata që duan të udhëtojnë drejt Shqipërisë, nuk kanë asnjë kufizim qoftë për test COVID-19 apo ndonjë dokument të veçantë.

Sipas njoftimit zyrtar ky vendim ka hyrë në fuqi nga data 1 qershor. Po ashtu, duke filluar nga 1 korriku, ora policore shtyhet në orën 24:00 – 06:00.

Ushtruesi i detyrës së kryetarit të Organizatës së Veteranëve të Luftës së UÇK-së, Faton Klinaku, ka kërkuar menjëherë lirimin e Faik Fazliut, ish-kryetarit të OVL UÇK-së, i cili është arrestuar mbrëmë nga policia në një lokal në Prizren.

Ai me anë të një postimi në rrjetin social Facebook ka shkruar se Fazliu nuk kishte kanosur zyrtarët policor siç kanë thënë nga Drejtoria Rajonale në Prizren, duke shtuar se ishte ushtruar dhunë ndaj veteranit.

“Së pari, sqarim për mediat që raportuan se i arrestuari Faik Fazliu është anëtar i kryesisë së OVL UÇK-së, sepse ai ka qenë vite më parë në kryesi dhe ish kryetar, dhe së dyti në videon që më erdhi, nuk shihet kanosje ndaj zyrtarit policor, por shihet dhunë e ushtruar ndaj një invalidi me shkallë të rëndë nga ana e zyrtarit policor”.

“Kërkoj lirimin e menjëhershëm të tij dhe rasti të shkoj në procedurë të rregullt, si dhe duhet që të hetohet edhe dhuna e ushtruar nga ana e policisë apo e zyrtarëve policor”, ka shkruar Klinaku.

(KosovaPress) – Qeveria Kurti vazhdon ta kundërshtojë minishengenin ballkanik. Në ekzekutiv thonë se janë pro bashkëpunimit rajonal, por vetëm mbi bazën e barazisë dhe moszëvendësimit të projektit të BE-së.

Por, mbështetje ndaj minishengenit po kërkon Maqedonia e Veriut, e cila e sheh këtë nismë profitabile për të gjithë rajonit. Ndërkohë, njohësit e marrëdhënieve ndërkombëtare thonë se minishengeni nuk është çështje prioritare për vendin.

Zëdhënësi i Qeverisë së Kosovës, Përparim Kryeziu duke kundërshtuar këtë nismë, thotë për KosovaPress se çështja e minishengenit ballkanik nuk ka qenë asnjëherë temë në ekzekutiv.

“Për Qeverinë e Republikës së Kosovës nuk është riaktualizuar minishengeni, për shkak se nuk ka qenë aktual asnjëherë. Ju e dini qëndrimin e qeverisë sa i përket projektit të mini-shengenit, i cili meqenëse vendlindjen e ka në Novi Sad më saktë është t’i themi ideja e zonës së Novi-Sadit. Ne si qeveri dhe si shtet jemi të hapur për bashkëpunim rajonal, mirëpo vetëm mbi bazën e barazisë dhe reciprocitetit. Po ashtu jemi të hapur për bashkëpunim rajonal në atë mënyrë që ai nuk e zëvendëson projektit e BE-së dhe integrimit tonë në të. Por veçse e fuqizon dhe avancon përpjekjen e shtetit tonë pro Ballkanit për anëtarësim në BE”, thotë ai.

Ai arsyeton edhe miratimin e dy nismave nga Qeveria Kurti, për nënshkrimin e marrëveshjeve ndërkombëtare që do të lehtësojnë lëvizjen e qytetarëve brenda rajonit të Ballkanit Perëndimor.

“Kjo çfarë po bëjmë ne është në kuadër të procesit të Berlinit, i cili si proces ka lindur në Berlin e mbështetët ka zyra e kancelarës Merkel dhe ka për synim dhe qëllim mbështetjen e Ballkanit Perëndimor për integrim në BE. Gatishmëria jonë për të qenë të hapur për bashkëpunimin rajonal është e tillë që t’i shërbejë Kosovën në integrim të BE-së dhe jo të zëvendësojë me ide të që kanë lindur në Novi Sad”, shton ai.

Ndërsa, përkrahje nga Kosova për këtë nismë rajonale po kërkon zëvendëskryeministri i Maqedonisë së Veriut, Fatmir Bytyqi.

“Çdo iniciativë e cila do të rritë mundësitë për qytetarët tonë të Ballkanit Perëndimor mendoj se duhet të përkrahet. Duhet të shohim se cili është benifiti ekonomik dhe mendoj se zanafilla e bashkëpunimit rajonal ngërthen në vete mundësi dhe benefite ekonomike. Prandaj, të gjitha shtetet e Ballkanit Perëndimor i shoh të njëjtë, të barabartë, sepse vetëm ashtu mund të ecim përpara në sfidat që na presin”, thotë ai për KosovaPress.

Jo prioritare për Qeverinë këtë çështje po e sheh Emir Abrashi nga Demokracia Plus. Megjithatë, ai nuk e sheh të “vdekur” si ide minishengenin ballkanik.

“Sa i përket çështjes së minishengenit unë nuk mendoj që është çështje e vdekur, megjithatë nuk është çështje prioritare, as për qeverinë as për qytetarin e Kosovës. Çështjet e bashkëpunimit rajonal janë jashtëzakonisht të rëndësishme, prandaj unë pres që qeveria t’i shqyrtojë të gjitha nismat për themelimin e bashkëpunimit rajonal. Megjithatë, sa i përket çështjes konkrete nuk është që pres nga qeveria ndonjë hap tash për tash”, deklaron Abrashi.

Ideja e minishengenit Ballkanik është prezantuar në fund të vitit 2019, derisa në fillim i gjithë spektri politikë në Kosovë është shprehur kundër saj. Ndërsa, në marrëveshjen e Uashingtonit, ish-kryeministri Hoti në njërën ndër pikat ishte zotuar për mbështetje karshi minishengenit.

Pas takimeve të Presidentes me liderë partiakë u tha se muaji kur duhet të mbahen zgjedhjet është tetori, pasi atëherë edhe iu përfundon mandati kryetarëve të zgjedhur më 2017. Në zgjedhjet nacionale është zhvilluar një dramë me kandidatët për deputetë që kishin problem me ligjin – përfshirë këtu edhe Albin Kurti – të cilët nuk mund të garonin. Kujt i lejohet e kujt i ndalohet kandidimi në zgjedhjet lokale?

Më 22 tetor të vitit 2017 janë mbajtur zgjedhjet lokale në Kosovë. Tani, kur kanë kaluar katër vjet nga mandati i kryetarëve të komunave dhe asamblistëve të zgjedhur atëherë, do të mbahen zgjedhje të reja lokale, shkruan Express.

Partitë politike tashmë kanë filluar t’i zyrtarizojnë kandidatët e tyre për zgjedhjet komunale, por personat që kanë probleme me ligjin në tri vitet e fundit, nuk do të certifikohen për të kandiduar në zgjedhje.

Kështu ka deklaruar për Express Ehat Miftaraj nga Instituti i Kosovës për Drejtësi (IKD).

Miftaraj ka thënë se Ligji për zgjedhjet vlen edhe për kandidatët për kryetarë të komunave dhe për asamblistë, njëjtë si për kandidatët për deputetë në Kuvendin e Kosovës.

“Ligji për Zgjedhjet vlen në mënyrë të barabartë dhe zbatohet përshtatshmërisht njëjtë si për kandidatët për deputetë në Kuvendin e Kosovës, ashtu edhe për kandidatët për kryetar të komunave dhe për asamblistë. Në kuptim të vendimit të Gjykatës Kushtetuese dhe vendimeve të Gjykatës Supreme çdo kandidat që është i dënuar në tri vitet e fundit i kufizohet e drejta për të kandiduar në zgjedhjet lokale”, ka deklaruar Miftaraj.

Kështu thotë edhe Ligji për zgjedhjet e përgjithshme i Republikës së Kosovës, të cilit i referohet Ligji për zgjedhjet lokale në Republikën e Kosovës.

E në Ligjin për zgjedhjet e përgjithshme, thuhet se kandidati që është shpallur fajtor për vepër penale me një vendim përfundimtar në gjykatë në tri vitet e fundit, nuk do të certifikohet nga Komisioni Qendror i Zgjedhjeve. Kjo theksohet edhe në aktgjykimin e Gjykatës Kushtetuese, me të cilin u rrëzua Qeveria e Avdullah Hotit.

Njëjtë pati ndodhur edhe në zgjedhjet parlamentare të mbajtura në shkurt të këtij viti.

Sipas nenit 29 të Ligjit për zgjedhjet e përgjithshme, iu ndalua kandidimi në zgjedhje kreut të Lëvizjes Vetëvendosje, Albin Kurti, dhe disa prej anëtarëve tjerë të partisë së tij.

Përveç në VV, edhe në partitë tjera pati kandidatë të cilët nuk u certifikuan për t’u futur në listat e zgjedhjeve, rrjedhimisht, ata nuk u votuan nga qytetarët në këto zgjedhje.

Cilat janë procedurat deri te shpallja e zgjedhjeve, sipas Ligjit për zgjedhjet lokale

Pas konsultimit me partitë politike, Kryetari i Kosovës cakton dhe shpall datën e zgjedhjeve lokale.

Zgjedhjet për organet vetëqeverisëse lokale mbahen ditën e diele për çdo katër (4) vite. Zgjedhjet nuk mund të mbahen më herët se gjashtëdhjetë (60) ditë para përfundimit të mandatit dhe jo më vonë se tridhjetë (30) ditë pas përfundimit të mandatit.

Sipas kompetencave të Presidentit të Kosovës të përcaktuara me Kushtetutë, vendimi i Kryetarit për të caktuar datën e zgjedhjeve bëhet jo më vonë se katër (4) muaj dhe jo më herët se gjashtë (6) muaj, para datës së zgjedhjeve.

Zgjedhjet e parakohshme qeverisen përmes ligjeve të njëjta dhe rregullat e KQZ-së sikurse edhe zgjedhjet tjera, përveç se KQZ-ja mund të ndryshojë afatet kohore në rast se kjo nevojitet për shkak të rrethanave.

Vendimi për caktimin e zgjedhjeve bëhet publik në ‘Gazetën Zyrtare të Kosovës’.

Si zgjidhet kryetari i Komunës, sipas Ligjit për zgjedhjet lokale

Kandidati për Kryetar të Komunës duhet të kualifikohet sipas nenit 30 të Ligjit për zgjedhjet e përgjithshme dhe për së paku tre (3) vite duhet të ketë qenë banor i komunës në të cilën ai apo ajo është duke garuar për t’u zgjedhur si Kryetar i Komunës.

Kandidati i subjektit të certifikuar politik për pozitë të Kryetarit të Komunës mund të certifikohet si kandidat në zgjedhje tjera siç janë ato për Kuvend të Kosovës apo Kuvend të Komunës, por do të mbajë vetëm një pozitë të zgjedhur. Nëse zgjidhet si Kryetar Komune, kandidati nuk do të këtë të drejtë të mbajë vendin në Kuvendin e Kosovës apo Kuvendin e Komunës.

Secili Kryetar i Komunës zgjidhet drejtpërdrejt nga votuesit të cilët janë të regjistruar për të votuar në komunën ku mbahen zgjedhjet për Kryetar të Komunës.

Kandidati zgjidhet Kryetar i Komunës nëse ai apo ajo fiton më shumë se 50%, plus një (1) votë të numrit të përgjithshëm të votave të vlefshme të hedhura në atë komunë.

Nëse asnjëri nga kandidatët nuk fiton më shumë se 50%, plus një (1) votë të numrit të përgjithshëm të votave të vlefshme të hedhura në atë komunë, KQZ-ja organizon raundin e dytë të zgjedhjeve në mes të dy kandidatëve të cilët kanë fituar më së shumti vota të vlefshme. Raundi i dytë i zgjedhjeve mbahet ditën e diele katër (4) javë pas raundit të parë.

Kandidati i cili fiton shumicën e votave të në rrethin e dytë zgjidhet Kryetar i Komunës.