Ministri i Mbrojtjes, Armend Mehaj ka njoftuar se ka zhvilluar një takim virtual me gjeneralin amerikan, Wesley Clark, derisa ka bërë me dije se ky i fundit ka pranuar ftesën për vizitë në Kosovë.

“Gjeneralin Clark e ftova për vizitë në Ministrin e Mbrojtjes dhe FSK , të cilën ma konfirmoi me kënaqësi, vizitë kjo që do të realizohet së shpejti”, ka njoftuar ministri i dikasterit të mbrojtjes përmes ‘Facebook’-ut.

Mehaj ka thënë se për të ishte nder i madh dhe privilegj i veçantë, të takohet me gjeneralin historik amerikan, Clark me të cilin biseduan përmes video-lidhjes, për rreth një orë.

“I thashë se ju jeni Heroi i Kombit dhe të gjithë qytetarëve liridashës të Kosovës dhe i tillë do të jeni gjithmonë. Gjeneral Clark më bëri nder të veçantë në jetë dhe karrierën time duke shprehur vullnetin e tij të plot për këshillim nga eksperienca e tij ushtarake dhe diplomatike, si dhe autoriteti i tij i jashtëzakonshëm në qendrat e vendimmarrjes botërore”, ka pohuar Mehaj.

Tutje, ministri ka bërë të ditur se “gjenerali Clark shprehu gatishmërinë e tij të plotë të mbështes me këshillimin e tij në realizimin e qëllimeve të mia strategjike dhe objektivave të mi operacional për zhvillimin e Ministrisë së Mbrojtjes dhe FSK-së”.

Mbrojtja e Kadri Veselit ka kërkuar sërish nga gjyqtari i procedurës paraprake, Nicolas Guillou, që të urdhërojë lirimin e klientit të tyre nga paraburgimi.

Mbrojtja këtë e ka bërë përmes një parashtrese, me anë të së cilës ka dhënë kundërpërgjigje ndaj Zyrës së Prokurorit të Specializuar (ZPS), të cilët kanë kërkuar që Veselit t’i vazhdohet masa e paraburgimit.

Në këtë shkresë të mbrojtjes, thuhet se kur mbrojtja i ka shkruar Drejtorit të Policisë së Kosovës, ai nuk ka propozuar një listë të detajuar të kushteve.

Sipas mbrojtjes, emaili i datës 31 maj 2021, të cilën ZPS e ka konsideruar si një përsëritje të “vullnetit të përgjithshëm për implementim të urdhrave juridik”, ishte shkruar me anë të një përgjigje specifike ndaj një letre të avokatit të datës 26 maj 2021, në të cilën ai përcaktoi kushtet e hartuar nën dritën e vëzhgimeve të bëra nga Dhoma e Apelit.

Sipas mbrojtjes, gjykatësi i procedurës paraprake duhet të ketë parasysh se nuk ka vetëm supozim të pafajësisë, por edhe supozim të lirisë.

“Këto dy supozime duhet të kundërshtohen në mënyrë që të justifikojnë ndalimin e vazhdueshëm. Nëse shkurtësia e përgjigjes së Drejtorit kërkon shtjellim të mëtejmë, Mbrojtja me respekt parashtron që përgjegjësia tani bie te gjykatësi i procedurës paraprake për të kërkuar çfarëdo qartësimi të nevojshëm sipas procedurës në rregullën 198”, thuhet në këtë shkresë, raporton “Betimi për Drejtësi”.

Tutje, thuhet se nëse është e nevojshme, drejtorit të Policisë së Kosovës duhet t’i kërkohet që të komentojë, qoftë koment pohues apo negativ, rreth zbatueshmërisë së secilës prej kushteve të propozuara.

Sa i përket intervistës të ushtruesit të detyrës së kryetarit të Shoqatës së Veteranëve të Luftës së UÇK-së, Faton Klinaku, që ZPS e kishte përmendur në parashtresën e saj, ku kishte kërkuar që t’i vazhdohet paraburgimi Veselit, mbrojtja ka konsideruar se ZPS asnjëherë nuk ka pretenduar se Veseli ishte në një farë mënyre i lidhur me “përpjekjet e pengimit”

ZPS në parashtresën e saj kishte përmendur një intervistë të Klinakut të dhënë me 4 qershor

“Më 4 qershor 2021, Faton Klinaku, ushtruesi i detyrës së kryetarit të Shoqatës së Veteranëve të Luftës së UÇK-së dha një intervistë me të cilën ai premtoi se do të publikonte dokumente konfidenciale të Dhomave të Specializuara të Kosovës në Hagë nëse do t’i posedon ato”, thuhej në shkresë të ZPS-së.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës së ngritur, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.

Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.

“Ndër anëtarët e tjerë të ndërmarrjes kriminale të përbashkët ishin Azem SYLA, Lahi BRAHIMAJ, Fatmir LIMAJ, Sylejman SELIMI, Rrustem MUSTAFA, Shukri BUJA, Latif GASHI dhe Sabit GECI, si dhe disa udhëheqës të tjerë politikë dhe ushtarakë të UÇK-së dhe QPK-së, ndër të cilët edhe anëtarë të tjerë të Shtabit të Përgjithshëm; ministra dhe zëvendësministra të QPK-së; komandantë të zonave të UÇK-së, zëvendëskomandantë të zonave dhe anëtarë të tjerë të shtabeve të komandave të zonave; komandantë të brigadave dhe njësiteve; komandantë dhe anëtarë të shërbimeve policore dhe të zbulimit të UÇK-së dhe QPK-së; ushtarë të tjerë të UÇK-së dhe zyrtarë të tjerë të QPK-së; si dhe të tjerë që vepronin në emër të UÇK-së dhe QPK-së (së bashku me Hashim THAÇIN, Kadri VESELIN, Rexhep SELIMIN dhe Jakup KRASNIQIN, bashkërisht, ‘anëtarët e NKP-së’). Të gjithë këta individë, me veprimet dhe mosveprimet e tyre, kontribuan në arritjen e qëllimit të përbashkët. Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues.

Kryeministri i Kosovës, Albin Kurti, ka thënë se Qeveria që ai udhëheq qëndron prapa deklarimeve që kishte bërë në kohën sa ishte opozitë, sa i përket çështjes së menaxhimit të liqenit të Ujmanit, që ishte përfshirë si pikë në kuadër të Marrëveshjes së Washingtonit, të 4 shtatorit 2020.

Ditë më parë, Shtetet e Bashkuara të Amerikës nxorën katër rekomandime për menaxhim të Ujmanit, ndërsa deri tash Qeveria ka qëndruar e heshtur për to.

“Ne qëndrojmë prapa qëndrimeve tona që i kemi thënë deri më tani ndërkaq raportin më i ri që ka dalë duhet ta lexojnë ekspertët tanë profesionistë, dhe nuk mendoj që duhet t’i bëjmë tre hapa përnjëherë. Dialogu do të ketë kapitull të ri, tri hapa përnjëherë si bëjmë dot”, ka thënë shkurt ai për gazetarët gjatë vizitës që ia bëri Muzeut Kombëtar të Kosovës të premten.

Vetëvendosje, e udhëhequr nga Kurti, sa ishte në opozitë pati kundërshtuar Marëveshjen e Washingtonit, që qe nënshkruar nga ish-kryeministri Avdullah Hoti. Atë kohë Vetëvendosje pati deklaruar se për Ujmanin nuk ka nevojë të flitet me Serbinë.

I pyetur nëse për kjo do të përfshihet në kuadër të dialogut me Serbinë, Kurti ka thënë se duhet të ketë dakordim për agjendë në mënyrë që të hapen tema.

IKD në kuadër të programit qasje në drejtësi ka për qëllim promovimin e të drejtave dhe lirive të njeriut në Kosovë. Në këtë drejtim, IKD që nga fillimi i fushatës së vaksinimit kundër COVID-19 ka bërë monitorimin e situatës edhe tek komunitetet rom, ashkali dhe egjiptian. Në bazë të monitorimit dhe takimeve në teren me qytetarët, IKD ka gjetur se ka mungesë të informimit dhe vetëdijesimit adekuat rreth procesit të vaksinimit tek këto komunitete.

Për më tepër, IKD konsideron që kërkesa për regjistrim në portalin e-Kosova është shpesh e parealizueshme për shumë qytetarë nga grupet e margjinalizuara, për shkak të mungesës së qasjes në internet, telefon, apo kompjuter, vështirësive që një numër i tyre kanë me shkrim dhe lexim, si dhe mungesës së informatave në gjuhët e të gjitha komuniteteve që jetojnë në Kosovë.

Gjithashtu, fakti që institucionet nuk mbajnë statistika se sa persona nga secili komunitet janë vaksinuar, lë hapësirë për një trajtim jo të barabartë të të gjitha komuniteteve në këtë proces.

Institucionet kanë për obligim të arrijnë tek të gjithë qytetarët, pa dallim, dhe nuk mjafton vetëm plotësimi i standardeve minimale. Një e drejtë, përveç që duhet të jetë e qasshme, duhet të jetë edhe efektive dhe e realizueshme në praktikë.

Mos marrja e masave për rritjen e vaksinimit tek grupet e margjinalizuara thellon pa-barazitë shoqërore dhe vendosë në rrezik shëndetin e këtyre qytetarëve.

Andaj, IKD i bën thirrje Ministrisë së Shëndetësisë për një proces gjithëpërfshirës të vaksinimit kundër Covid-19, duke ndërtuar mekanizmat përkatës që gjatë këtij procesi të mos krijohen pabarazi mes komuniteteve dhe të mos rrezikohet shëndeti i qytetarëve të asnjë komuniteti.