Sot rreth orës 07:10 ka ndodhur një aksident në magjistralen Pejë-Rugovë.Si pasojë e këtij aksidenti kanë mbetur të lënduar tre persona.
Rastin e ka konfirmuar për “Gazeta Blic” zëdhënësi i policisë për rajonin e Pejës, Driton Rugova.
“Sot rreth ores 07:10 Policia është informuar për një aksident të ndodhur në kilomentrin e tretë të magjistrales Pejë- Rugovë. Të lënduar janë tre persona të cilët janë duke marrë tretmane mjekësore”, tha Rugova.
Një rast i rëndë ka ndodhur në qytetin e Prizrenit, ku një vajzë e mitur është sulmuar seksualisht nga një person.
Atje një grua bashkë me vajzën e saj kanë denoncuar në polici një burrë, i cili, sipas nënës së të miturës, e ka sulmuar seksualisht të bijën e saj.
Për më tepër, policia bën të ditur që ajo ka deklaruar se këtë sulm i dyshuari e ka kryer derisa kishte qenë në shtëpinë e tyre.
Dogana e Kosovës në gjashtëmujorin e parë të vitit 2021 ka shënuar rritje të të hyrave dhe prurjeve në krahasim me vitin e kaluar.
Zëdhënësi i Doganës, Adriatik Stavileci, tha se të hyrat janë 28 përqind më të larta se në periudhën e njëjtë të vitit 2020.
“Ne kemi arritur që të mbledhim një sasi të konsiderueshme të të hyrave. Mund të ju them që deri tani kemi mbledhur rreth 580 milionë euro që në krahasim me vitin e kaluar janë rreth 28 % më shumë, por duhet të kemi parasysh që viti i kaluar ka qenë pandemik dhe të hyrat nuk kanë performuar aq mirë, por edhe në krahasim me vitet paraprake të hyrat janë në rritje e sipër. Rritja e të hyrave nuk varet nga Dogana, por nga performanca e ekonomisë së Kosovës dhe bizneseve që operojnë në Kosovë dhe paguajnë tatimin”, ka thënë Stavileci.
Ai, në Klan Kosova, ka folur edhe për kontrabandën.
“Nuk mund të themi se kemi rritje të kontrabandimit se nuk mund të kemi edhe rritje të të hyrave e në anën tjetër të kemi edhe rritje të kontrabandës, sepse po të kemi rritje të kontrabandës atëherë të hyrat automatikisht do të ulen”, ka pohuar ai.
Stavileci ka deklaruar se akciza është njëra ndër arsyet se pse disa produkte si duhani dhe alkooli tentohen të kontrabandohen.
“Duhani apo nafta të cilat kanë taksa shumë dhe për këtë arsye ato kontrabandohen. Nëse arrijnë të kontrabandohen, fitimi i një kontabandisti është shumë me i madh me këto produkte sesa të kontabandojë shishe të ujit”, është shprehur Stavileci.
Stavileci tha se presin që gjatë gjysmës tjetër të këtij viti të ketë një rritje edhe më të madhe të të hyrave sesa në gjashtëmujorin e parë./FrontOnline
Projekti i “Mini-Shengenit”- Rama, Zaev dhe Vuçiq mbajnë sot takim për këtë temë!
Kryeministri i Shqipërisë, Edi Rama, ai i Maqedonisë së Veriut, Zoran Zaev dhe presidenti i Serbisë, Aleksandar Vuçiq, do të marrin pjesë në konferencën “Mini-Shengeni” përmes një video konference.
Sipas zyrës për media të kreut të shtetit serb, kjo konferencë nis në orën 10:00, raporton Tanjug.
Kujtojmë se kryeministri Kurti është shprehur kategorikisht kundër idesë së “Mini-Shengenit” raporton Gazeta Blic.
Sipas drejtuesve të Spitalit Rajonal të Prizrenit, në këtë institucion shëndetësor prej muajit të prill të vitit të kaluar kur janë pranuar pacientët e parë të infektuar me Covid-19, ditëve të fundit nuk ka asnjë pacientë të hospitalizuar nga virusi famëkeq.
Drejtori i Spitalit të Prizrenit, Afrim Avdaj, njofton se prej fillimit të trajtimit të rasteve të para të të infektuarve me Covid-19 në fillim të muajit prill të 2020-es, në këtë institucion nuk ka më asnjë pacientë të hospitalizuar me virusin Sars Cov-2 pozitiv. Ai njofton gjithashtu se është inkurajues fakti, pasi gjatë 24 orëve në këtë Spital është regjistruar vetëm një vizitë për Covid-19 dhe se pacienti fatmirësisht nuk ka pasur indikacione për hospitalizim dhe trajtim të mëtejmë.
Drejtori Avdaj, njofton gjithashtu se që nga prilli i vitit të kaluar, në këtë institucion shëndetësor kanë qenë të hospitalizuar mbi 3000 pacientë për Covid-19, 100 prej tyre nga Veriu i Shqipërisë, ndërsa janë realizuar mbi 20000 vizita ambulantorike.
Ai tha se si rrjedhojë e përmirësimit të gjendjes dhe rënies së numrit të të hospitalizuarve, pas angazhimeve voluminoze të punonjësve shëndetësor, shumica prej tyre pas dy vitesh tashmë po shfrytëzojnë të drejtën e pushimeve të merituara.
Por, përkundër njoftimeve inkurajuese për përmirësim të gjendjes, pandemia e Covid-19 ende vazhdon të jetë e pranishme, dhe drejtori Avdaj apeloi që të respektohen rekomandimet e autoriteteve përkatëse.
Vlen të përmendet se në mesin e pacientëve të hospitalizuar me Covid- 19 ka patur edhe punëtorë shëndetësorë të këtij institucioni, disa prej të cilëve fatkeqësisht edhe kanë humbur betejën me virusin famëkeq.
Fshati i banuar me shqiptarë në Zaporozhia të Ukrainës, Divinske, ka festuar 160-vjetorin e themelimit të tij, përcjell albinfo.ch.
Thuhet se fshati u themelua në vitin 1861, nga familje shqiptare të ardhura nga fshati Karakurt, i banuar nga shqiptarë në rajonin e Odesës.
Shef i Misionit Diplomatik shqiptar në Ukrainë, z. Fation Peni, së bashku me Konsullin e Nderit të Shqipërisë në Ukrainë, z. Shahin Omarov, morën pjesë në festimet e zhvilluara për këtë rast.
Për më shumë:
http://ambasadat.gov.al/ukraine/sq/vizit%C3%AB-n%C3%AB-fshatin-divinske-n%C3%AB-zaporozhia-%E2%80%93-ukrain%C3%AB?fbclid=IwAR2PYYrNJtTvKhl1O6kMhMd_d-CzL4bkJR2VRBossO_kNd-zpl4KJtRDyjI
Granit Xhaka ka zhvilluar njërën nga ndeshjet më të mira në karrierën e tij. Ylli shqiptar, Granit Xhaka ka zhvilluar njërën nga ndeshjet më të mira në karrierën e tij, shkruan albinfo.ch.
Koha e rregullt mes Zvicrës dhe Francës përfundoi 3:3, por në penallti, Nati eliminoi kampionët e botës. Xhaka bëri një super asistim për Gavranoviq në golin e tretë. Kapiteni i Zvicrës në tërësi bëri një lojë të jashtëzakonshme, madje, po komentohet si ndeshja më e mirë në karrierën e tij.
UEFA.com e ka zgjedhur Lojtarin e Ndeshjes, duke i dhënë vlerësime maksimale. Edhe mediat ndërkombëtare e kanë lavdëruar paraqitjen e mesfushorit shqiptar.
Gjithashtu Xhaka në vazhdime dhe para penalltive, ka mbajtur një fjalim, duke motivuar bashkëlojtarët për të qenë një lider i vërtetë.
Lajmi i vetëm i keq ishte se u ndëshkua me karton të verdhë dhe do të mungojë në çerekfinale ndaj Spanjës.
Kryetari i Kuvendit të Kosovës Glauk Konjufca deklaroi se bllokimi i procesit të liberalizimit të vizave nga disa shtete anëtare të Bashkimit Evropian është i paarsyeshëm dhe si të tilla zvogëlojnë frymën e vlerave evropiane në vendin tonë.
Ai këto komente i bëri sot në Samitin e Dytë të Parlamentit Evropian me kryetarët e Parlamenteve të Ballkanit Perëndimor, në të cilin u diskutua për rolin themelor të parlamenteve në procesin e zgjerimit të BE-së në epokën pas COVID-it dhe forcimin e mëtejshëm të bashkëpunimit parlamentar.
Konjufca tha se vonesat e BE-së për heqjen e vizave për qytetarët e Kosovës nuk duhet të shërbejnë si justifikim për moskryerjen e detyrave shtëpiake.
“Reformat në drejtësi, ekonomi, administratë e arsim janë të pazëvendësueshme. Forcimi i demokracisë dhe sundimi i ligjit, lufta e vendosur kundër korrupsionit dhe fuqizimi i transparencës, si dhe mbrojtja e pa kompromis e të drejtave të njeriut dhe pakicave janë ‘sine qua non’ i shoqërive të lira e të hapura”, tha Konjufca.
Ndër tjera Konjufca foli për sfidat që i sollën botës virusi Covid-19 dhe dëmet që ai u shkaktoi shteteve në njerëz dhe ekonomi. Ai tha se Qeveria e Kosovës ka paraqitur një plan ambicioz të vaksinimit masiv të popullatës që do t’i përfshinte 60% të atyre që kanë nevojë për vaksinim deri në fund të këtij viti.
Ai shtoi se pavarësisht vështirësive të mëdha që i solli pandemia, kurrë nuk duhet të lihet në harresë projekti më i rëndësishëm – kompletimi i BE-së.
Konjufca tha se paqja dhe stabiliteti në Ballkanin Perëndimor janë të lidhura në mënyrë qenësore me qasjen e BE-së ndaj këtij rajoni të ndërlikuar e sensitiv.
“Në të njëjtën masë që për ne është domosdoshmëri bashkimi në familjen evropiane, po sipas të njëjtës nevojë BE-ja e ka të domosdoshme përfshirjen e Ballkanit Perëndimor në gjirin e vet. Mësimet e duhura i kemi të gatshme në histori”, tha Konjufca.
Ai tha se në fillim të viteve ’90-të në Evropë ka pasur edhe forca politike shkurt-pamëse të cilat krizën e shpërbërjes së Jugosllavisë e shihnin si një zjarr të jashtëm ndaj të cilit kërkohej mbajtja e një distance të sigurt.
“Pse t’i djegim duart pa nevojë në një mori luftërash që nuk janë tonat – thoshte motoja e tyre. Por pikërisht kjo qasje rrezikoi që zjarri të përhapej përtej Ballkanit. Ishte pikërisht ndërhyrja ndërkombëtare politiko-ushtarake në Ballkan më 1995 e 1999 ajo që i dha shans paqes dhe e stabilizoi rajonin tonë”, tha Konjufca.
Qe 22 vjet, shtoi ai, nuk ka më luftëra, ndërsa ato pak çështje të hapura që kanë mbetur po zgjidhen me bisedime. Por, siç tha Konjufca, optimizmi dhe entuziazmi i popujve të Ballkanit Perëndimor për BE-në nuk është një adhurim i pa kondicionuar. Sipas tij, në kushtet e sotme vendet e Ballkanit Perëndimor mund të ndjehen të lëna anash e të dezorientuara vetëm nëse shtetet kryesore të BE-së e aplikojnë doktrinën e cila quhet “njëherë thellim, pastaj zgjerim”.
“Nëse krijohet një konsensus evropian ndaj kësaj strategjie, dëmi që do t’i bëhet Ballkanit Perëndimor do të jetë kolosal. Shpresoj shumë që projektet të cilat po shfaqen këto dy vitet e fundit nën formën e platformave të ‘bashkëpunimit rajonal’ si puna e mini-Shengenit, nuk e kanë funksionin e biberonit që e zëvendëson integrimin e BP në BE me një moratorium deri sa BE-ja ta kryejë thellimin e vet”, theksoi kreu i legjislativit të Kosovës.
Procesi i vaksinimit të qytetarëve me vaksinën antiCOVID-19 është duke vazhduar në Kosovë.
Si rezultat i kësaj, tash e më shumë se një muaj numri i rasteve të reja me coronavirus por edhe i vdekjeve ka rënë dukshëm.
E në kuadër të procesit të imunizimit, mbrëmë në vendin tonë ka arritur kontingjenti i parë prej 81 mijë e 900 dozave të vaksinës Pfizer të blera nga Qeveria e Kosovës.
Kjo dozë e vaksinës është pjesë e 1 milion e 213 mijë e 290 dozave të cilat pritet të arrijnë deri në fund të vitit nga Pfizer pas nënshkrimit të kontratës me Qeverinë e Kosovës.
Ministri i Shëndetësisë, Arben Vitia pas arritjes së këtij kontingjenti u shpreh se imunizimi është kyç për mbrojtjen e shëndetit të të dashurve tanë.
“Këtë verë do ta mbajmë mend si vera e vaksinimit masiv në Kosovë”, u shpreh ai.
Ndryshe deri më sot janë vaksinuar 160 mijë e 410 qytetarë, kurse me dozën e dytë të vaksinës janë vaksinuar 32 mijë e 975.
Procesi i vaksinimit do të vazhdoj edhe sot në sallën “1 tetori” në Prishtinë, si dhe në komunat tjera.
Qeveria greke ka menduar të stimulojë vaksinimin e të rinjve duke shpërndarë një lloj financimi.Sipas kësaj mase, qeveria do të paguajë paraprakisht 150 euro të rinjtë e moshës 18-25 vjeç që ata të marrin të paktën një dozë vaksinimi dhe shuma do të akordohet në formën e një karte të quajtur “liria e kalimit” e cila mund ta paraqitet në mjedise publike.
“Ky është një borxh ndaj të rinjve, një dhuratë mirënjohjeje, veçanërisht para verës. Është një falënderim për durimin dhe këmbënguljen e tyre”, është shprehur kryeministri grek, Kyriakos Mitsotakis.
