Komisioni Qendror i Zgjedhjeve ende nuk ka pranuar asnjë aplikim nga ana e subjekteve politike për të marrë pjesë në zgjedhjet lokale që do të mbahen me 17 tetor të këtij viti.

Zëdhënësi i KQZ-së, Valmir Elezi, thotë se ende nuk kanë pranuar ndonjë aplikim, por që potencon se partitë politike kanë afat për një gjë të tillë deri me 16 gusht.

Partitë politike, iniciativat qytetare dhe kandidatët e pavarur, përveç aplikimit për të marrë pjesë në zgjedhje duhet të dorëzojnë edhe listën me emrat e kandidatëve për Kuvendet Komunale.

“Deri në këto momente që po flasim nuk kemi pranuar akoma ndonjë aplikim nga ana e subjekteve politike të cilat duan të marrin pjesë në zgjedhjet lokale. Natyrisht se koha kur subjektet politike ku bëjnë pjesë partitë politike, koalicionet, nismat qytetare si dhe kandidatët e pavarur ka filluar ky afat për aplikim dhe kjo kohë përmbyllet me datë 16 gusht. Pra, deri në këtë kohë subjektet politike përveç që duhet te paraqesin aplikimin e tyre për pjesëmarrje në këto zgjedhje duhet të dorëzojnë edhe listën me emrat e kandidatëve qoftë për kryetar të komunave apo për Kuvende Komunale”, tha ai.

Pas aplikimit të partive politike, Elezi thotë se si KQZ do të bashkëpunojnë me institucionet PZAP, Këshillin Gjyqësor të Kosovës, Ministrinë e Punëve të Brendshme, Ministrinë e Punëve të Jashtme dhe Diasporës, Ministrinë e Mbrojtjes, Agjencinë e Kosovës për Inteligjencë dhe me Doganën e Kosovës, për të bërë verifikimin e kandidatëve nëse të njëjtit janë në përputhje me nenin 29 të Ligjit për Zgjedhje.

Sa i përket regjistrimit për votuesit jashtë Kosovës, Elezi thotë se periudha e regjistrimit do të filloi me 10 korrik dhe do të përfundojë me 18 gusht.

“KQZ ka vendosur 40 ditë kohë në dispozicion të qytetarëve me të drejtë vote të cilët jetojnë jashtë Kosovës për t’u regjistruar si votues jashtë Kosovës, gjatë kësaj periudhe pra nga data 10 korrik deri më datë 18 gusht për t’u regjistruar si votues jashtë Kosovës mund të aplikojnë shtetasit e Kosovës që jetojnë jashtë Republikës së Kosovës, si dhe për t’u regjistruar mund të aplikojnë edhe ata apo ato që nuk kanë shtetësinë e Republikës së Kosovës, por që kanë të drejtë në shtetësi sipas ligjit për shtetësi. Të gjithë pastaj aplikuesit të cilët i plotësojnë kriteret ligjore që arrijnë të regjistrohen si votues jashtë Kosovës do të mund të votojnë përmes postës gjatë periudhës së votimit, për të cilin KQZ ka vendosur 31 ditë në dispozicion të kësaj periudhe, pra nga data 15 shtator deri me datë 15 tetor”, tha ai.

Zgjedhjet lokale do të mbahen me 17 tetor të këtij viti./KP/Telegrafi/

Policia e Kosovës ka arrestuar dy të dyshuar për marrje me prostitucion në Ferizaj.

Sipas të dhënave të publikuara nga PK-ja, rasti ka ndodhur të hënën në mbrëmje.

Në lidhje me rastin, është konsultuar edhe prokurori i shtetit, ndërsa palët janë liruar në procedurë të rregullt.

“Ferizaj 28.06.2021 ─ 20:20. Janë arrestuar një i dyshuar mashkull shtetas i Shqipërisë një e dyshuar femër kosovare pasi që janë zënë në flagrancë duke kryer veprën e lartcekur. Në lidhje me rastin është konsultuar prokurori i shtetit i cili ka rekomanduar që pas intervistimit palët të lirohen dhe rasti të procedohet në procedurë të rregullt”, thuhet në raport. /Telegrafi/

Nëpër qytete të ndryshme të Kosovës, janë raportuar gjashtë raste të dhunës në familje.

Sipas raportit të Policisë së Kosovës, rastet kanë ndodhur në Suharekë, Prizren, Prishtinë e Pejë.

Detaje nga raporti i PK-së:

Suharekë 28.06.2021 ─ 15:15. Viktima femër kosovare ka raportuar se në shtëpi ishte sulmuar fizikisht nga bashkëshorti i saj i dyshuari mashkull kosovar. Si pasojë e sulmit viktima ka pranuar tretman mjekësor. Pas intervistimit të dy palët me dëshirë janë kthyer të jetojnë në shtëpi, ndërsa me urdhër të prokurorit rasti trajtohet në procedurë të rregullt.

Prizren 28.06.2021 ─ 23:30. Viktima femër shqiptare shtetase e Shqipërisë ka raportuar se pas një mosmarrëveshje ishte sulmuar fizikisht nga i dyshuari mashkull kosovar me të cilin bashkëjeton. Pasi që edhe viktima edhe i dyshuari ishin nën ndikimin e alkoolit është konsultuar prokurori i shtetit i cili ka rekomanduar që palët të mbahen në stacion policor deri në këndellje e më pas të intervistohen. Rasti vazhdon të hetohet.

Prishtinë 28.06.2021 ─ 11:45. Është arrestuar i dyshuari mashkull kosovar pasi që dyshohet se i njëjti kishte ushtruar dhunë ndaj viktimës femër–bashkëshortes së tij. Lidhur me rastin janë intervistuar palët dhe me urdhër të prokurorit kujdestar, rasti procedohet në procedurë të rregullt.

Suharekë 28.06.2021 ─ 15:15. Viktima femër kosovare ka raportuar se në shtëpi ishte sulmuar fizikisht nga bashkëshorti i saj i dyshuari mashkull kosovar. Si pasojë e sulmit viktima ka pranuar tretman mjekësor. Pas intervistimit të dy palët me dëshirë janë kthyer të jetojnë në shtëpi, ndërsa me urdhër të prokurorit rasti trajtohet në procedurë të rregullt.

Pejë 28.06.2021 ─ 21:45. Është arrestuar i dyshuari mashkull kosovar pasi që dyshohet se i njëjti kishte ushtruar dhunë ndaj viktimave (bashkëshortes dhe djalit të tij). Lidhur me rastin janë intervistuar palët dhe me urdhër të prokurorit kujdestar i dyshuari është dërguar në mbajtje. Rasti vazhdon të hetohet.

Pejë 27.06.2021 ─ 21:30. Viktima femër kosovare ka raportuar se pas një fjalosje që kishte pas me te dyshuarin mashkull kosovar me të cilin bashkëjeton për disa vite dhe kanë një fëmijë, ishte sulmuar fizikisht nga ai. Sipas viktimës i dyshuari për një kohë të gjatë është duke ushtruar dhunë ndaj saj. I dyshuari është arrestuar dhe me vendim të prokurorit është dërguar në mbajtje për 48 orë. /Telegrafi/

Një person është arrestuar dhe ndaluar për 48 orë nga policia pasi i njëjti kishte ngacmuar një të mitur në Malishevë.

Sipas raportit të Policisë së Kosovës, e mitura e kishte raportuar të dyshuarin pasi i njëjti sipas saj e kishte ngadalësuar automjetin e tij dhe i kishte kërkuar të shkonte me të, ose do ta merrte ai.

“Malishevë 18.06.2021 ─ 15:40. Viktima femër e mitur kosovare ka raportuar se deri sa kishte qenë duke u kthyer në shtëpi nga shkolla një person i panjohur e kishte ngadalësuar automjetin e tij duke i thënë se a po hyn në automjet apo po të marr”, thuhet në raport.

Tutje, në raport thuhet se “Pas hetimeve te zhvilluara është identifikuar dhe arrestuar i dyshuari mashkull kosovar dhe me vendim të prokurorit të njëjtit i është caktuar masa e ndalimit policor për 48 orë”. /Telegrafi/

Viteve të fundit, organizatat që punojnë në promovimin dhe ruajtjen e vlerave demokratike po ndjekin nga afër zhvillimet në shoqëritë demokratike dhe ndryshimet që po sjellin ato.

“Njëri nga shqetësimet kryesore në raportet e tyre është edhe ai për rënien e interesimit të qytetarëve për përfshirje në procese politike si dhe zbehjen e besimit të qytetarëve në insti­tucione. Shkaktar i një gjendje të tillë po konsiderohet edhe rritja e ndikimit të grupeve të interesit mbi institucionet “tradici­onale” shtetërore (parlamentin, qeverinë dhe institucionet lokale).

Sipas Këshillit të Evropës, vetëm në Bruksel sot veprojnë mbi 15,000 grupe të interesit, prej të cilave 2,600 grupe i kanë hapur edhe zyrat e përhershme në kryeqytetin evropian me qëllimit të lobimit gjatë vendim­marrjes në institucionet e Bashkimit Evropian”, thuhet në njoftimin e KDI-së.

Sipas Arben Kelmendi, menaxheri i programit në KDI, edhe në Kosovë, studimet flasin për ndikimin që grupet e ndryshme të interesit po e ushtrojnë në vendimmarrjen brenda institucioneve shtetërore.

Në studimin e KDI-së janë analizuar disa raste të dyshimta të përpilimit të ligjeve dhe legjislacionit sekondar për interesa të individëve apo grupeve të caktuara e jo të interesit publik. Rasti i Udhëzimit Administrativ për homologimin e automjeteve konsiderohet rast eklatant i “legalizimit” të monopolit për një kompani që ofron këtë shërbim. Ligji i ri për Noterinë është një tjetër shembull i fenomenit të legjislacionit të porositur në Kosovën e pasluftës. Ushtrimi i ndikimit të aktorëve jashtë institucionalë po vërehet si në legjislativ ashtu edhe në ekzekutiv dhe në të dy nivelet e pushtetit, atë qendror dhe lokal.

“Përpjekjet e këtyre aktorëve “jashtë-institucionalë” për të ushtruar ndikim në vendimmarrjen politike nuk duhet të nënvlerësohen. Shkalla e përhapjes dhe vizibiliteti i tyre është rritur ndjeshëm viteve të fundit, sidomos me përhapjen e teknologjisë së informacionit dhe formave të reja të komunikimit. Me qëllim të forcimit të besimit të publikut te institucionet qeverisëse, Instituti Demokrati i Kosovës thërret institucionet vendore për ngritje të trasnparencës së vendimmarrjes në të gjitha fazat e saj, duke përfshirë edhe fazën e konsultimeve publike. Qytetarët kanë të drejtë të informohen rreth aktorëve që kanë qasje apo ushtrojnë ndikim mbi vendimmarrjen qeveritare. Përndryshe, nëse format e ushtrimit të ndikimit kryhen në mungesë të transparencës dhe llogaridhënies së plotë, ato nxisin dyshime te publiku dhe dëmtojnë demokracinë”, thuhet më tej në njoftim.

Kelmendi tutje vazhdoi se qëllimi kryesor i këtij punimi ishte të iniciojë debatin në shoqërinë kosovare rreth rolit të aktorëve të ndryshëm jashtë-­institucionalë në vendimmarrje dhe të bëj një vlerësim preliminar të nevojës për rregullim ligjor të tij. Cilido qoftë modaliteti i zgjedhur, një ligj për lobim do të duhej të definojë qartë lobi­min, llojet e aktiviteteve lobiste, qëllimet e pranueshme të një ak­tiviteti lobues si dhe individët apo grupet që mund të kualifikohen si lobues.

Tutje, ligji duhet të parasheh krijimin e një Regjistri për Lobues, në të cilin lobistët individualë dhe organizatat lobuese obligohen të regjistrohen në mënyrë që të fitojnë të drejtën për të zhvilluar aktivitete lobiste. Lobistët e regjistruar duhet të raportojnë për aktivitetet e tyre në baza periodike rreth identitetit të lobuesit, çështjes për të cilën zhvillohen aktivitetet e lobimit, përfituesin e fundit të aktiviteteve të lobimit, institucionin dhe zyrtarin publik të synuar, llojin dhe numrin e aktiviteteve të lobimit, shpenzimet e lobimit, burimet financiare etj.

Ligji gjithashtu duhet të parandalojë futjen e menjëhershme të ish-zyrtarëve publikë në sektorin privat si lobistë me të përfunduar postin publik. Kjo arrihet përmes caktimit të periudhës së ftohjes (nga anglishtja cooling period) me qëllim të parandalimit të fenomenit të “dyerve rrotullues” (nga anglishtja revolving door). Periudha e ftohjes në vende të ndryshme ndryshon nga dy deri në pesë vjet.

Instituti Demokratik i Kosovës do të vazhdojë të punojë në konsolidimin e shoqërisë demokratike në Kosovë me qytetari aktive, vendimmarje transparente dhe llogaridhënëse si dhe sundim të ligjit./Telegrafi/

Një person ka raportuar në polici se disa fëmijë të lagjes kishin sjell në hekurishte tek ai materiale hekuri, mirëpo kishte vërejtur se në mesin e gjësendeve ishte edhe një mjet i dyshuar shpërthyes.

Rasti ka ndodhur të dielën rreth orës 22 e 30 minuta në Fushticë e Epërme të Drenasit.

Në vendin e ngjarjes kanë dal njësitë policore si dhe njësiti i KFOR-it dhe FSK-së për deminim të cilat mjetin e dyshuar e kanë marrë me vete.

Nuk është raportuar për ndonjë incident gjatë tërheqjes së mjetit.

Një traditë e bukur do të fillojë në Kosovë në muajin korrik. “Eja n’Sharr Fest” është ngjarje që do t’i bëjë bashkë adhuruesit e natyrës, sportit dhe kulturës në Parkun Kombëtar Sharri. Qëllimi primar i festivalit është promovimi i zonës dhe potencialit turistik të këtij rajoni.

“Në një vit post-pandemik, kur pothuajse çdo pore e jetës është prekur nga vështirësitë dhe sfidat, deri në mbijetesë, sigurisht që sektori i turizmit është një nga fushat që ka pësuar më së shumti si në vendet ku ai është industri, e lëre më në Kosova kur ai veç sa ka filluar të zhvillohet. Shumë biznese, shoqata, grupe dhe familje të cilat në një mënyrë ose tjetër kanë qenë të lidhur në zingjirin e ofrimit të ndonjë produkti apo shërbimi në sektorin e turizmit e ka ndjerë këtë goditje në palcë”, thuhet në njoftimin për media.

Duke e ndjerë këtë goditje edhe ne, kemi shfrytëzuar këtë momentum për të mbledhur të gjithë energjinë dhe motivin dhe së bashku me shumë partnerë të krijojmë një ngjarje e cila na bashkon të gjithëve e që ka potencialin të krijojë mundësi për të gjithë, e që do të quhet “Eja n’Sharr Fest”.

““Eja n’Sharr Fest 2021” është iniciativë e “SuperXplores” të cilët së bashku me shumë partnerë dhe bashkëpunëtorë janë duke organizuar një festival me aktivitete të llojllojshme të cilat ndërlidhen me natyrën dhe aventurën, kjo ngjarje që në Kosovë është duke u mbajtur për herë të parë do të jetë tre-ditor dhe synon të bëhet tradiconal. Qëllimi i “Eja n’Sharr fest” është promovimi dhe prezantimi i potencialit turistik të Parkut Kombëtar “Sharri”, që ky rajon në një të ardhme të afërt të shndërrohet në destionacion të turizmit rajonal për të gjithë apasionantit e turizmit të aventurës dhe natyrës”, thuhet më tej në njoftim.

“Eja n’Sharr Fest”, traditën e saj do ta fillojë në korrik të këtij viti me datat 16-17 dhe 18 tek lokacioni i qujatur “Guri i Zi” në zemër të Malit të Sharrit që rrethohet me disa nga majat më të larta të Sharrit si: Vërtopi, Skarpa dhe Karanikolla.

Djathi i Sharrit, bukuritë përrallore e shtigjet me pamje surreale që lidhin Kosovën me Maqedoninë e Veriut e Shqipërinë, e tradita e kuzhinës shqiptare janë gjërat që “Eja n’Sharr Fest”, synon t’i nxjerr në pah.

Ndonëse tri ditë për t’i përjetuar bukuritë e natyrës së Sharrit nuk mjaftojnë, por për kaq ditë sa do të zgjasë festivali, “Eja n’Sharr Fest” ka përzgjedhur aktivitete malore dhe sportive për të gjithë pjesëmarrësit.

“Eja n’Sharr Fest”, është ngjarje e hapur për të gjithë, prezenca apo pjesëmarrja do të jetë pa pagesë. Vetëm pjesëmarrja në ndonjërin prej aktiviteteve ka një çmim të caktuar, dhe dallon për secilin aktivitet.

“Via Ferrata, Çiklizëm, Kajak Ekspeditë, Kajak eksperiencë, Paraglide në Prizren, sesione të Yogas, Kamping, sesione të Fittnesit në natyrë, do të jenë disa prej aktiviteteve që secili nga pjesëmarrësit do të mund të zgjedhin, dhe do të realizohen nga klube dhe operatorë turizmi të ndryshëm nga e gjithë Kosova. Në fund të ditëve të këtyre aktiviteteve “Eja n’Sharr Fest” në kuadër të festivalit, do të zhvillohen edhe diskutime në formatin e forumeve me folës të cilët kanë eksperiencë dhe janë aktiv në fushat të cilat temat e këtyre forumeve do të trajtojnë, si: Diaspora dhe Zhvillimi Ekonomik në Fushën e Turizmit, Promovimi dhe Brendimi i qyteteve dhe rajoneve turistike, dhe Turizmi vs. Ambienti”, thuhet në njoftim.

Krejtësisht jo-formale të gjitha këto tema do të diskutohen në ambient të hapur dhe në qetësinë e Sharrit.

“Eja n’Sharr Fest” me të gjitha këto aktivitete synon që të krijojë një traditë të re, kur të gjithë natyrëdashësit dhe aventurierët mblidhen në një vend për t’u njohur mes vete, për të përjetuar përvoja të reja, dhe më e rëndësishmja për të ndihmuar një zone të caktuar që të zhvillohet duke shfrytëzuar resurset dhe mundësitë që ofron natyra e egër e asaj zone. /Telegrafi/