Ministri i Punëve të Brendshme, Xhelal Sveçla, ka marrë pjesë në takimin virtual të ministrave të Punëve të Brendshme të Ballkanit Perëndimor në kuadër të Procesit të Berlinit.

Me këtë rast në kuadër të këtij takimi ministri Sveçla shpalosi veprimet konkrete të Republikës së Kosovës në kuadër të luftës kundër korrupsionit, përfshirë bashkëpunimin rajonal në këtë drejtim.

Ministri Sveçla theksoi në veçanti prioritetin e udhërrëfyesit rajonal kundër korrupsionit që fokusohet tek prokurimet publike.

“Lufta kundër korrupsionit mbetet sfida më e madhe jo vetëm për vendin tonë, por edhe për rajonin. Rrjedhimisht, që nga dita e parë e marrjes së mandatit jemi duke punuar me të gjitha kapacitetet tona për të parandaluar dhe luftuar këtë fenomen në gjitha nivelet shtetërore dhe shoqërore” theksoi ministri Sveçla.

Në këtë takim ministri Sveçla ka folur edhe për sfidat e migrimit në kohë pandemie. Ai tha se pandemia ka ndikuar shumë në uljen e migrimit të parregullt, si rezultat i masave të ndërmarra nga shtetet e ndryshme.

“Trendet rreth emigrimit të parregullt dhe numri i aplikuesve nga Republika e Kosovës, tregojnë një rënie të konsiderueshme në vazhdimësi (2015-2020)”, theksoi ndër të tjera ministri Sveçla.

Presidentja e vendit Vjosa Osmani, ka pritur sot në kabinetin e saj, këngëtaren e njohur shqiptare, Elvana Gjata.

Këtë e ka bërë të ditur vet këngëtarja Gjata, përmes një statusi në facebook, ndërsa ka ndarë dhe fotografi nga momenti i takimit me presidenten Osmani.

Siç shihet në pamje, Elvana Gjata edhe i ka dorëzuar presidentes Vjosa Osmani, albumin e saj ‘’Çelu’’, të realizuar së fundit.

”E lumtur për pritjen dhe bisedën e ëmbël për muzikën e artin, të ardhmen dhe shpresën për ditë më të bukura për të gjithë shqiptarët”, shkruan Elvana Gjata mes tjerash transmeton Klan Kosova.

Ministri i Mbrojtjes, Armend Mehaj ka sqaruar deklaratën e tij të pasurisë.

Ai tha se nuk posedon 3 banesa, 3 shtëpi dhe pagat nga Norvegjia, shkruan Indeksonline.

Mehaj pohoi se ka vetëm një shtëpi ndërsa banesën e ka shitur, kurse të tjerat janë të prindërve, por që e ka për obligim t’i raportojë.

Ministri Mehaj po ashtu theksoi se edhe 5 muaj merr pagë nga Ushtria e Norvegjisë dhe kështu e vetmja pagë për të mbetet kjo e ministrit në Qeverinë e Kosovës.

Njoftimi i plotë:

Sqarim për opinionin publik

Nga deklarata ime e pasurisë, e cila është publike dhe mund ta sheh çdokush, disa portale kanë nxjerrë tituj që nuk korrespodojnë me deklarimin tim për pasurinë. Në këto media shkruan se unë kam “3 banesa, 3 shtëpi dhe pagat nga Norvegjia”. KJO NUK ËSHTË E VËRTETË!

E vërteta është se unë kam vetëm një shtëpi teksa banesën e kam shitur, ndërkohë të tjerat janë të prindërve, të cilat jam i obliguar t’i raportojë dhe janë të theksuara se kujt i përkasin.

Në anën tjetër unë NUK i marrë disa paga. Pas lëshimit të Ushtrisë, unë marrë pagë vetëm edhe 5 muaj dhe kështu e vetmja pagë për mua mbetet kjo e ministrit në Qeverinë e Kosovës.

Ministrja e Punëve të Jashtme dhe Diasporës e Republikës së Kosovës, Donika Gërvalla, po qëndron sot për vizitë zyrtare në Luksemburg, ku pati takime edhe me zyrtarë shtetëror.

Një të tillë Gërvalla e pati me ministrin për Bashkëpunim për Zhvillim dhe Çështje Humanitare, Franz Fayot, ku shprehu mirënjohjen e shtetit të Kosovës për mbështetjen e vazhdueshme dhe miqësinë e mirë mes të dy vendeve.

Posaçërisht ka veçuar bashkëpunimin mes Luksemburgut dhe Kosovës në sektorin e shëndetësisë, në arsim si dhe në procesin e integrimit në BE.

“Një ndër prioritetet e qeverisë është përmirësimi i dukshëm i kushteve për investime të huaja me synimin për ta bërë Kosovën më atraktive për këto investime. Kosova mund të përfitojë shumë nga shkëmbimi me një partner në BE si Luksemburgu, i cili është ekonomikisht i fuqishëm dhe me përvojë të madhe ndërkombëtare”, ka thënë Gërvalla.

Së bashku me ministrin Fayot kanë diskutuar për mundësi të bashkëpunimit mes të dyja vendeve në fusha që lidhen me sistemin financiar, digjitalizimin dhe çështje të tjera.

Dy ministrat u dakorduan që së shpejti të organizohet takimi i radhës së Komisionit të Partneritetit për të vlerësuar nevojat, format e bashkëpunimit dhe diversifikimin e mundshëm të partneritetit mes të dy vendeve.

Sot në Komisionin për Bujqësi ka raportuar ministri i Bujqësisë, Pylltarisë dhe Zhvillimi Rajonal, Faton Peci, ku edhe ka folur për gjendjen në dikasterin të drejton.

Ai ka thënë se gjendja e ministrisë është shumë e rëndë për shkak të mungesës së legjislacionit, nivelit të borxheve dhe keqpërdorimit, shkruan Indeksonline.

Ministri Peci gjatë këtij komisioni tha se në kuadër të kësaj ministrie kanë hartuar programin dhe ligjet në kuadër të sektorit të bujqësisë.

Peci ka folur edhe për subvencionet që do t’u ndahen fermerëve.

Ministri ka thënë se 1.3 milionë euro do të ndahen për dëmet në bujqësi në mbledhjen e radhës, ndërsa 8.9 milionë euro janë ndarë për subvencionet e dyta (përmbushje e borxheve nga ligji për rimëkëmbje ekonomike).

Po ashtu ministri Faton Peci ka thënë se rreth 4 milionë euro janë ndarë për pagesa nga buxheti i subvencioneve të rregullta.

Deputetja e Partisë Demokratike të Kosovës, Ganimete Musliu ka mohuar se do të jetë kandidate për kryetare të këtij subjekti, zgjedhjet e brendshme të së cilit, mbahen të shtunën e 3 korrikut.

Se ajo mund të jetë potencialisht kandidate për kryetare të PDK-së, pati kureshtje pasi Musliu u pa shpesh në raste të ketë publikuar fotografi të ndryshme ku përmendej kandidatura për marrjen e timonit për drejtimin e PDK-së.

”Nuk kam pasur tendencë që ta bëjë kureshtarë dikënd. Kam pasur shumë thirrje telefonike edhe nga mediat”.

”Unë siç e keni pa jam prezantuar në një kryesi pune. Është grupi punues që është caktuar për organizimin e Konventës. Me automatizëm kjo lë të kuptohet se kandidatët e mundshëm nuk kanë të drejtë të jenë pjesë e këtij grupi punues”.

”Për ju dhe qytetarët, e në veçanti për anëtarët e PDK-së, ju bëjë me dije se unë nuk do të jem kandidate për kryetare e Partisë Demokratike të Kosovës, të paktën jo kësaj radhe”.

Janë konfirmuar dy raste me variantin Delta të koronavirusit në Kosovë, variant që së pari është zbuluar në Indi.

Lajmin e ka bërë të ditur Ministria e Shëndetësisë.

“Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 (dy) mostra me variantin Delta (B.1.617.2) të SARS-CoV-2. Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e IKSHPK-së tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve”, thuhet në njoftimin e MSH-së.

Varianti Delta po vlerësohet më ngjitës dhe nëpër botë kanë filluar të përhapen raste me variantin e ri.

“Varianti Delta u detektua për herë të parë në Indi në dhjetor të vitit 2020, i cili sot është njëri prej varianteve më brengosës në rruzullin tokësor. Hulumtimet e gjertanishme sugjerojnë se mund të jetë varianti që përhapet më së shpejti edhe më ngjitës sesa Alpha (U.K/B.1.1.7). Masat parandaluese janë të njëjta. Individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës”, thuhet nga MSH.

MSH ka bërë thirrje të evitohen grumbullimet, të testohen qytetarët që kanë simptome, e të mbahen maskat si dhe të shmangen turmat në hapësira të mbyllura.

Vendimi i Kuvendit të Komunës së Prizrenit për pagesën e shujtave për të gjithë punonjësit e administratës komunale është kthyer prapa nga niveli qendror. Ministria e Financave, Punës dhe Transfereve (MFPT) pas shqyrtimit të këtij akti ka vlerësuar se ai është i jashtëligjshëm.

Kryesuesi i KK-së, Sulltan Badalli, dhe kryetari i Komunës, Mytaher Haskuka, përmes një shkrese të Ministrisë së Administrimit të Pushtetit Lokal (MAPL) janë njoftuar për vlerësimin e bërë nga MFPT-ja. Badalli ka konfirmuar pranimin e kësaj shkrese. Në këtë komunikim MAPL-ja, duke theksuar pranimin e vendimit për lejimin e pagesës për shujta për të gjithë të punësuarit e administratës në Komunën e Prizrenit ka bërë të ditur se këtë akt e ka dërguar në MFPT, si institucion përgjegjës për vlerësimin e ligjshmërisë. Ndërkaq MFPT-ja ka kërkuar rishqyrtimin e aktit të KK-së së Prizrenit, meqë ai bie ndesh me dispozitat e caktuara ligjore.

“Ministria e Financave, Punës dhe Transfereve pas shqyrtimit përmbajtjesor të aktit të mësipërm të Komunës së Prizrenit vlerëson se akti i Komunës është në kundërshtim me dispozitat e legjislacionit në fuqi”, thuhet në shkresën e MFPT-së. Kjo ministri ka sqaruar se organet komunale me këtë vendim synojnë lejimin e pagesës së shujtave për të punësuarit në Komunën e Prizrenit, ku në nenin 5 specifikohet se pagesa synohet të bëhet nga kategoria e mallrave dhe shërbimeve, si dhe nga kategoria e subvencioneve dhe transfereve.

“Në këtë drejtim, neni 13, paragrafi 6 i Ligjit mbi ndarjet buxhetore për buxhetin e Republikës së Kosovës për vitin 2021, specifikon qartë se: ‘shpenzimi i parave publike nga kategoria mallra dhe shërbime nuk është i lejuar për pagesën e punonjësve, qoftë në formë të shtesave apo si kontribute në mall, përfshirë këtu shujtat apo dhuratat duke përjashtuar rimbursimin apo shpenzimet e lejuara për udhëtimet jashtë vendit, sipas legjislacionit përkatës’. Konform interpretimit të kësaj dispozite, Komunës së Prizrenit i pamundësohet realizimi i masës së përcaktuar në aktin komunal përmes kategorisë buxhetore mallra dhe shërbime”, ka njoftuar Ministria.

Tutje, duke shqyrtuar mundësinë e Komunës për realizimin e vendimit përmes subvencioneve dhe transfereve, MFPT-ja ka konsultuar Ligjin për menaxhimin e financave publike dhe përgjegjësitë, duke përkujtuar se në kontekst të shpenzimit të parasë publike, neni 17, paragrafi 1 dhe 2 i këtij ligji përcaktojnë se shpenzimi i parave publike mund të bëhet vetëm për qëllime të miratuara publike, si dhe nga fondet e ndara dhe të alokuara.

“Ministria, në konsultim me dispozitat ligjore të përcaktuara në Ligjin e buxhetit, si dhe me strukturat përgjegjëse të Ministrisë për buxhetin e Komunës së Prizrenit, ka evidentuar se organizata buxhetore në fjalë nuk i ka të planifikuara e as të miratuara publikisht shpenzimet e potencuara me aktin administrativ komunal. Kjo, rrjedhimisht bie ndesh me frymën e LMFPP-së, si dhe me limitet e përcaktuara për organizatën buxhetore me Ligjin e buxhetit. Në këtë kuptim Ministria i rikujton Komunës së Prizrenit që në procedim të mëtejshëm me aktin komunal të veprohet në përputhje me mundësitë buxhetore të Komunës, si dhe në pajtim me përgjegjësinë e organizatave buxhetore në shpenzimin e parasë publike, ashtu të përcaktuar me dispozitat ligjore në LMFPP”, thuhet në shkresë.

Bazuar në këto konstatime, MFPT-ja i ka propozuar MAPL-së që të kërkojë nga Komuna e Prizrenit ndërmarrjen e veprimeve konkrete për rishqyrtimin e këtij akti brenda afatit 30-ditor, me qëllim që ta harmonizojë atë me ligjet në fuqi.

Vendimi për lejimin e pagesës së shujtave për të gjithë të punësuarit e administratës komunale është miratuar nga Kuvendi i Prizrenit në seancën e mbajtur më 21 maj 2021. Për aprovimin e këtij vendimi patën votuar njëzëri 28 anëtarët e pranishëm në sallë. Paraprakisht drejtori i Administratës, Osman Hajdari, pati sqaruar se kërkesa për shujtat është parashtruar nga Sindikata e Shërbimit Civil të Komunës së Prizrenit. “Kjo kërkesë është legjitime”, pati thënë ai, duke shpjeguar se plani është që shujtat të paguhen përmes subvencioneve, me vlerën e përafërt prej 200 mijë eurove. “Na duhet një vendim i KK-së, ndërsa implementimin mund ta bëjmë deri në fund të vitit”, pati deklaruar Hajdari para anëtarëve të KK-së. Në anën tjetër kuvendarët nga radhët e partive opozitare patën shprehur mbështetjen për realizimin e kësaj nisme, bashkë me thirrjen që shujtat në mënyrë të rregullt t’u paguhen edhe punonjësve të arsimit.

Të shtunën, me 3 korrik do të mbahet konventa për zgjedhjen e kryetarit të ri të Partisë Demokratike të Kosovës.

Burimet e IndeksOnline kanë thënë se konventa do të nis në orën 09 e 30 minuta dhe do të mbahet në Hotel Emerald në Prishtinë.

Deri më tani ka vetëm një kandidat për kryetar të PDK-së. Memli Krasniqi ka shfaqur ambiciet për të qenë në krye të PDK-së.

Rikujtojmë se PDK ishte prej fillimit të nëntorit të vitit të kaluar me ushtrues detyre të kryetarit pas dhënies së dorëheqjes nga Kadri Veseli.

Së shpejti në Prishtinë do të ndërtohet rezidenca e re për ambasadorin e Shteteve të Bashkuara të Amerikës.

Kështu ka njoftuar kryetari Shpend Ahmeti duke treguar se sot është nënshkruar marrëveshje mes Komunës së Prishtinës dhe Ambasadës Amerikane në Prishtinë, për dhënie në shfrytëzim të pronës së paluajtshme komunale me një sipërfaqe prej 8,340 metra katrorë.
Postimi i plotë:

Komuna e Prishtinës nënshkruan marrëveshje me Ambasadën Amerikane

Komuna e Prishtinës sot ka nënshkruar marrëveshje me Ambasadën Amerikane në Prishtinë, për dhënie në shfrytëzim të pronës së paluajtshme komunale me një sipërfaqe prej 8,340 metra katrorë, për ndërtimin e rezidencës së re për ambasadorin e Shteteve të Bashkuara të Amerikës (SHBA), në Prishtinë.

Në ceremoninë e nënshkrimit të marrëveshjes ishte Ambasadori i SHBA-së në Kosovë, z.Philip Kosnett.

Kjo pronë e paluajtshme i ofrohet në shfrytëzim Ambasadës Amerikane për 99 vjet pas nënshkrimit të marrëveshjes.