Kryeministri i Kosovës, Albin Kurti, ka thënë se Liqeni i Ujmanit është pronë e Kosovës dhe nuk e ka përmendur fare Raportin e SHBA-së për ndarjen e tij sipas modelit të Lumit Colombia mes SHBA-së dhe Kanadasë.Kurti u shpreh se liqeni është ndërtuar në kohën e ish-Jugosllavisë dhe se Serbia ka pasur rastin të ankohet atëherë.“Është liqen artificial i Kosovës, them artificial dhe jo natyral. Pasi nuk është se kufiri ka rënë në liqenin natyror por është një liqen i ndërtuar. Ai është ndërtuar në kohën e ish-Jugosllavisë dhe është konsideruar çështje e mbyllur atëherë.

Nuk është ankuar Serbia andej, atëkohë. Pra, nuk mund të diskutojmë për një çështje e cila është e mbyllur. Kosova nuk ka qenë republikë por njësi autonome dhe element në Federatë. Është çështje e mbyllur nuk mund të vihet asnjëherë në pikëpytje pronësia”, tha ai.

Tutje theksoi se ekspertët janë duke i shqyrtuar të gjeturat dhe ne natyrisht që do të përdorim argumenetet të cilat do të jenë në favor të sovranitetit tonë.“Aty në marrëveshje ka qenë fjala “share” do të thotë dicka që e ndan së bashku. Unë nuk jam në favor të komisioneve të përbashkëta “Kosovë-Serbi. Unë tani po e shoh në samite ndërkombëtare për gjithçka kemi problem. Qeveri apo përfaqësues. Qytetar apo vendas. Jemi futur në debate terminologjike. Unë kam thënë që të mos evitohet Elefanti në Dhomë. Pasi nëse e eviton ai vetëm rritet. Megjithatë kjo nuk u pranua pasi duket se pala tjetër është mësuar ndryshe me ata para nesh”, ka thënë Kurt në RTK.

Kryeministri Albin Kurti ka thënë se kritikat se pushteti po punëson të afërm janë vetëm për ta njollosur, por jo se ka diçka të vërtetë në to.

Kurti në RTK ka shtuar se duhet të dallohet shërbyesi civil me të emëruarin politik dhe se ai nuk mund ta emërojë dikë që nuk përputhet me programin e bindjen e njëjtë.

Ai ka përmendur edhe disa veprime që ish-krerët e ekzekutivit patën marrë vitet e kaluara, e shtoi se ato praktika po mundohet t’i ndalë. Ndër to përmendi rritjen e rrogës, një vendim të ish-kryeministrit Ramush Haradinaj.

“Nëse ka ndonjë rast individual të ndonjë lidhje të ndokujt nuk është bërë sepse e ka pasur këtë lidhje familjare por sepse është profesionist i spikatur, e dyta, duhet ta dallojmë shërbyesin civil nga i emëruari politik. Unë ministra e ata këshilltarë të tyre, nuk mund t’i emërojnë njerëzit që nuk përputhen në bindje dhe nuk e pranojnë programin dhe nuk e kanë një lidhje me ta. Çfarëdo krahasimi me të kaluarën është i pavend. Herën e kaluar kur në fund në pranverë 2020 doli që afër 50 persona në borde u vendosën, prej tyre 4 dolën me libreza të VV-së, të flitej për ata 4, tash s’janë as ata katër. Meqë nuk mund të flasim se si unë ja rrita rrogën veten për të blerë kravata, meqë nuk mund të flasim si shkova unë për skijim, meqë nuk kemi skandale të këtilla atëherë përpiqen të gjejnë njolla edhe aty ku s’ka”, ka thënë Kurti.

Situatat kur “në ministri vinin me farefis”, ka thënë Kurti, nuk ekzistojnë në qeverinë e re.