Në ditën e parë pas marrjes së detyrës të kryetarit të Partisë Demokratike të Kosovës, Memli Krasniqi së bashku me familjen e tij kanë bërë homazhe në Prekaz.

Krasniqi gjatë ditësh së djeshme u zgjodh në këtë pozitë me shumicë votash të delegatëve pjesëmarrës në Konventën zgjedhore të partisë.

Në votim morën pjesë 476 delegatë. Vetëm 7 vota ishin kundër.

Në deklarimin e tij të parë pas marrjes së pozitës së kryetarit, Krasniqi tha se do të çojë përpara rrugën e trasuar nga ish-kryetarët Hashim Thaçi e Kadri Veseli në krye të PDK-së.

Krasniqi tha se do të bashkëpunojë me secilin anëtarë dhe qytetarë që dëshiron të bashkohet PDK-së.

Një person ka vdekur nga COVID-19 gjatë 24 orëve të fundit në Kosovë.

Ndërkohë, nga 1.871 testime të kryera, 9 prej tyre kanë rezultuar pozitivë me koronavirus.

Të shëruar në 24 orët e fundit janë 14 persona.

Që nga fillimi i pandemisë, në Kosovë janë regjistruar 107.797 raste pozitive, 2.261 vdekje, 105.376 shërime dhe janë kryer 679.255 teste.

Rastet aktive në vendin tonë janë 160.

Partitë politike kanë filluar që t’i zyrtarizojnë kandidatët për kryetar të komunave kur kanë mbetur edhe tre muaj deri në mbajtjen e zgjedhjeve lokale më 17 tetor.

Një garë e nxehtë pritet të jetë në komunën e Skenderajt, kjo për faktin edhe të dilemave të ngritura, nëse ish kryetari i Skenderajt, Sami Lushtaku ka të drejtë ligjore të kandidoj për të parin e këtij qyteti.

Ish kryetari i Skenderajt për disa mandate, Sami Lushtaku ka thënë për “Indeksonline”, se e ka konsultuar ligjin dhe se nuk ka asnjë pengesë për të kandiduar, përcjell Klankosova.tv.

“Unë ligjin e kam konsultuar dhe mendoj se kam drejtë të kandidoj. Unë punoj ditën e natën dhe nuk ndalna asnjëherë. Unë e kam ndërmend me i hy kandidaturës tash të shohim”.

Zyrtari i lartë i Partisë Demokratike të Kosovës thotë se po punon shumë dhe se është krejt kohën në terren.

Komuna e Skenderajt qeveriset nga Bekim Jashari, i cili në zgjedhjet lokale të vitit 2017 kishte kandiduar si kandidat i pavarur, dhe ishte përkrahur nga shumica e partive në këtë komunë.

Deri më tash Jashari nuk ka dhënë përgjigje përfundimtare, nëse synon mandatin e tij të dytë në krye të Skenderajt.

Drenica vazhdon të mbetet bastion i Partisë Demokratike të Kosovës.

Kryetari i LDK-së, Lumir Abdixhiku ka uruar popullin dhe qverinë amerikane me rastin e 4 Korrikut – Ditës së Pavarësisë së SHBA-ve.Në urimin e Abdixhikut thuhet se:

“Në emër të Lidhjes Demokratike të Kosovës e uroj Qeverinë dhe popullin e SHBA-ve, për Ditën e Pavarësisë – 4 Korrikun.

Sot, ShBA-të festojnë ditën e pavarësisë, një ngjarje jashtëzakonisht e rëndësishme në përpjekjen e popullit amerikan drejt arritjes së synimeve dhe idealeve për liri dhe pavarësi. Që nga ai moment Shtetet e Bashkuara në politikën botërore mbajnë flamurin e lirisë dhe demokracisë”Abdixhiku ka theksuar se për Kosovën ShBA-të ishin dhe janë aleati jetik në ekzistencën tonë si komb dhe si shtet.

“Në momentet më kruciale kur populli ynë po ballafaqohej me jetë apo vdekje, Shtetet e Bashkuara vepruan në mbrojtjen e idealit për liri dhe çlirim, ideal dhe synim që e kanë të brumosur në vet gjenezën e tyre si shtet nga etërit themelues. Kosova në gjithë këtë rrugëtim deri më sot, ka arritur falë mbështetjes së pa rezervë të ShBA-së, fillimisht në luftën për liri e më pas edhe në shpalljen e pavarësisë dhe tani e tutje në forcimin e subjektivitetit ndërkombëtar”, ka deklaruar Abdixhiku.I pari i LDK-së ka theksuar se ShBA-të mbeten vendi mik më i mirë i Kosovës, si dhe raportet tona të ngushta nuk lejojmë asnjëherë të zbehen.“Përjetësisht mirënjohës! Zoti i Bekoftë Shtete e Bashkuara të Amerikës”, ka thënë Abdixhiku.

Dërgesat nga bashkatdhetarët sivjet kanë shënuar një trend rritës dhe pritet që deri në fund të vitit të arrijnë mbi 1 miliard euro.

Sipas Bankës Qendrore të Kosovës (BQK), në tre mujorin e parë të këtij viti remitencat kanë arrit shumën 250 milionë euro ose rreth 60 milionë euro më shumë se në periudhën e njëjtë të vitit të kaluar.

Përkundër krizës ekonomike të shkaktuar nga pandemia Covid-19, remitencat më 2020 shënuan rritje 120 milionë më shumë se në vitin 2019.

Ndërsa, sipas Instituti Riinvest, në 10 vitet e fundit, remitencat kanë arrit vlerën mbi 7 miliardë euro.

Visar Vokrri, drejtor programor në Institutin Riinvest thotë se sipas kalkulimeve që janë bërë vlera ose kontributi i diasporës përveç remitencave për gjatë një viti kalendarik është edhe më i madh me shpenzime dhe investime.

“Vlera e remitencave besoj që do të kalojë 1 miliardshin këtë vit, pasi kohëve të fundit po shohim edhe lirim të masave sa i përket lëvizjes së qytetarëve, prandaj besoj që këtë vit, në këta muajt e verës do të kemi një fluks të diasporës në Kosovë dhe kësisoj besoj që kontributi i tyre do të vazhdoj ashtu siç ka qenë ndoshta edhe më i madh për ekonominë e Kosovës…Unë nuk dua ta reduktoi kontributin e diasporës vetëm në remitenca. Mirëpo nëse flasim vetëm për remitenca të paktën për ato që janë raportuar nga institucionet e thirrura, në dhjetë vitet e fundit diku vetëm vlera e remitencave arrin në 7 miliardë euro të dërguara nga diaspora. Mirëpo kontributi i diasporës nuk mund të futet vetëm në remitenca”, thekson Vokrri.

Vokrri po ashtu thotë se pjesa dërmuese e remitencave shkojnë në konsum ditor, ani pse sipas tij në këto vitet e fundit ka pasur edhe disa investime të mëdha nga diaspora në sektorë të ndryshëm të ekonomisë.

Për këtë, sipas Vokrrit diaspora duhet të trajtohet me një ligj të veçantë.

“Nuk mund të presim që dërgesat të kanalizohen leht për investime, mirëpo duhet analizuar mirë një strategji, një qasje se si të krijojmë iniciativa që bashkatdhetarët tanë të fillojnë të investojnë në Kosovë. Ndoshta një pjesë e këtyre remitencave mund të kanalizohet në investime[…]Investitorë të shumtë kemi nga diaspora, kemi parë në këto vitet e fundit investime të mëdha nga diaspora në sektor të ndryshëm të ekonomisë. Unë besoj që duhet të trajtojmë diasporën në mënyrë të veçantë duke parë rolin që kanë pasur gjatë këtyre viteve në Kosovë. Unë besoj që duhet ti trajtojmë me një ligj të veçantë dhe investimet e tyre dhe ti konsiderojmë si investime strategjike dhe shohim se ku mund ta kanalizojmë kapitalin e tyre në Kosovë. Kjo qeveri në programin e saj kam parë që ka në plan që në këtë drejtim të punojë diçka, mirëpo ende nuk kemi ide konkrete për të cilat presim që të shpalosen në muajt në vijim”, thotë ai.

Edhe profesori universitar Muhamet Sadiku deklaron se lidhja e bashkatdhetarëve me Kosovën ka qenë gjithnjë e fuqishme dhe ka vazhduar një trend i dërgesave të mëdha të cilat janë gati sa gjysma e buxhetit të Kosovës, respektivisht rreth 13 përqind e Bruto Produktit Vendor.

“Edhe për kundër problemeve që ka sjellë pandemia, megjithatë lidhja e diasporës me Kosovën ka qenë gjithnjë e fuqishme dhe ka vazhduar një trend I dërgesave të mëdha të cilat janë rreth 40 përqind e buxhetit të Kosovës, respektivisht rreth 13 përqind e Bruto Produktit në vend. Remitencat janë treguar burim i sigurt dhe afatgjatë i zhvillimit ekonomik të Kosovës pavarësisht se 90 përqind e remitencave shkojnë në mbulimin e konsumit familjar në Kosovë. Kjo është një strukturë e ndërtuar nga niveli i lartë I papunësisë dhe niveli i lartë i varfërisë, prandaj familjet kosovare derisa ekziston kjo situatë sociale…Parat e diasporës në një përqindje të vogël orientohen në investime për hapjen e vendeve të punës”, theksoi Sadiku.

Ai shtoi se një pjesë e madhe e këtyre parave shkojnë në mbulimin e importit të madh, pasi Kosova i ka 2,4 miliardë euro në vit import.

Sipas studimeve të ndryshme, për orientimin e remitencave në investime, Kosova duhet të ndërtojë një mjedis biznesor të favorshëm për investitorë të huajë e nga diaspora.

Ndërsa, zëdhënësi i BQK-së Kushtrim Ahmeti thotë në një përgjigje me shkrim se përgjatë muajve, janar-mars remitencat kanë arrit 243 milionë euro.

“Vlera totale e remitencave për tremujorin e parë të këtij viti (janar-mars 2021), ishte 242.9 milionë euro, që është më e lartë për 55.6 milionë se periudha e njëjtë e vitit të kaluar, ku vlera e remitencave ishte 187.3 milionë euro”, thotë Ahmeti.

Ndryshe, Qeveria e Kosovës me anë të një vendimi sikur vitin e kaluar synon t’i nxitë bashkatdhetarët që të vizitojnë Kosovën. Në mbledhjen e fundit të ekzekutivit të udhëhequr nga kryeministri Kurti është marrë vendim që të mbulohen shpenzimet policës kufitare ne vlerë deri 6 milionë euro për bashkatdhetarët.

Numër i madh i tyre pritet që të vijnë edhe përmes transportit ajror, ndërsa në Aeroportin e Prishtinës veçse janë bërë përgatitjet e nevojshme për pritjen e tyre.

Muajt korrik dhe gusht pritet të jenë muajt me fluksin më të madh të ardhjes së mërgimtarëve në Kosovë.

Pasi që viti i kaluar kishte pamundësuar ardhjen e shumicës prej tyre, këtë herë pritet numër edhe më i madh i mërgimtarëve të cilët vijnë në shtetin e Kosovës.

Derisa mbrëmjeve të kaluara kolonat ishin tejet të gjata në hyrje të shteteve të rajonit për të arritur në Kosovë, në pikat kufitare të Kosovës tani për tani pritjet janë vetëm pesë minutëshe.

Në publikimet e fundit nga Ministria e Brendshme theksohet se edhe në pikat më të frekuentuara kufitare pritjet në hyrje janë vetëm 3 deri në 5 minuta.

Padyshim se kjo javë është vetëm fillimi i ardhjes së mërgimtarëve, ndërsa kolona pritet të ketë gjatë javëve në vazhdim.

Janë bërë tre vjet që nga ratifikimi i Marrëveshjes së demarkacionit me Malin e Zi në Kuvendin e Kosovës dhe ende ky proces nuk mund të konsiderohet i përfunduar.

Sipas kësaj marrëveshjeje të nënshkruar në vitin 2015 në Vjenë, pas ratifikimit, të dyja shtetet do ta rishikojnë vijën kufitare dhe do të bëhen korrigjime nëse ka pasur lëshime.

Kryeministri i Kosovës, Albin Kurti, që ishte kundërshtar i kësaj marrëveshjeje, ende nuk ka formuar komisionin shtetëror për shënjimin e kufirit.

Vitin e kaluar, më 26 gusht, sa ishte në opozitë, Kurti kishte kritikuar marrëveshjen, që sipas tij ia ka humbur Kosovës 8.200 hektarë.

“Raporti dhe puna e Komisionit Bulliqi është aktakuzë për regjimin e vjetër (porsa të çlirohet Prokuroria e Shtetit) dhe orientim për korrigjim (porsa të rikthehet qeveria e mirë)”, kishte shkruar Kurti në Facebook.

Mirëpo, si kryeministër në mandatin e dytë, Kurti nuk ka bërë asgjë sa i përket këtij procesi.

Në Qeverinë e Kosovës, nuk janë përgjigjur në pyetjet e Radios Evropa e Lirë dhe nuk kanë treguar se kur do të formohet komisioni i ri që do të merret me çështjen e rishikimit të vijës kufitare, ashtu edhe siç e parasheh marrëveshja.

Kërkesë për të formuar këtë komision, kryeministrit i ka drejtuar edhe kryetar i Aleancës për Ardhmërinë e Kosovës (AAK), Ramush Haradinaj.

Në ditën e parë të punës si kryeministër në vitin 2017, Ramush Haradinaj e kishte shkarkuar komisionin e udhëhequr nga Murat Meha dhe kishte emëruar një komision të ri i përbërë nga profesorët Florim Isufi dhe Shpëtim Bulliqi.

Tash si deputet i opozitës, Haradinaj kërkoi më 25 qershor nga kryeministri i Kosovës, Albin Kurti, që të formojë sa më shpejt Komisionin shtetëror për shënjimin e kufirit.

“Është veprimi i parë që duhet të bëni, në mënyrë që të mos leni vakum, që qeveria të mos ndodhet në befasi të çfarëdo natyre, ky komision duhet të jetë funksional. Në procedurë të punës, nuk kanë dalë komisioni i Kosovës dhe ai i Malit të Zi, që të qesin gurët. Ende nuk janë qitë gurët në mes Kosovës dhe Malit të Zi. Kufiri që është sot është kufiri që e kemi gjetur edhe para marrëveshjes”, tha kryetari i Aleancës për Ardhmërinë e Kosovës (AAK).

Sipas tij, nëse Mali i Zi nuk shpreh gatishmëri të ecet në këtë drejtim, kjo çështje duhet të shkojë në arbitrazh.

Marrëveshja me Malin e Zi ishte nënshkruar sipas gjetjeve të Komisionit shtetëror për shënjimin e vijës kufitare, që udhëhiqej nga Murat Meha.

“Nuk mund të them asgjë, sepse çfarë kam pasur të them e kam thënë. Çka kemi thënë është vërtetuar dhe me kaq e kemi përfunduar atë punë”, tha Meha shkurt për Radion Evropa e Lirë.

Profesori Florim Isufi, i cili ishte pjesë e Komisionit shtetëror të emëruar nga ish-kryeministri, Ramush Haradinaj dhe i shkarkuar nga ish-kryeministri Avdullah Hoti, thotë se vetëm me vullnetin e mirë të Malit të Zi, mund të ketë rishikim të kësaj vije të demarkimit.

“Askush më nuk mund të bisedojë me Malin e Zi nëse duhet të bazohet në raportin e gjetjeve, sepse aty janë gjetjet që duhet përmirësuar, e pala malazeze nëse nuk pranon, është vështirë që të përmirësohen. Vija kufitare nuk mund të përcaktohet ose nuk mund të shënjohet, nëse nuk janë dy palët dakord. Kjo mbetet si rrugë qorre në të ardhmen derisa të krijohen komisionet”, thotë Isufi.

Ai thotë për Radio Evropa e Lirë se kryeministri i Kosovës, Albin Kurti, duhet të takohet dhe të bisedojë me autoritetet e Malit të Zi.

Çdo vit, Rasim Mulaj bashkë me gruan e tij qëndrojnë nga tre muaj në stanin e tyre në bjeshkët afër kufirit me Malin e Zi.

Mulaj është nga fshati Llukë e Epërme në Komunën e Deçanit, që bashkë me banorët e tjerë të kësaj ane, e kundërshtuan Marrëveshjen e demarkacionit me Malin e Zi, të nënshkruar në vitin 2015.

Ai thotë se këtyre banorëve u është bërë e padrejtë.

“Pesëmbëdhjetë fshatra na kanë lënë pa bjeshkë”, thotë Mulaj në një bisedë me Radion Evropa e Lirë, duke shtuar se si pasojë e marrëveshjes të nënshkruar ndërmjet dy shteteve, vija kufitare tash është rreth pesë kilometra në thellësi të Kosovës.

Sipas tij, Mali i Zi asnjëherë nuk e ka kontrolluar këtë pjesë dhe se Kulla e Zhlebit, thotë Mulaj, asnjëherë nuk ka qenë pjesë e Malit të Zi.

“E kontrollojnë, kanë vendosur rrjeta në anën e epërme që të mos rrëshqasin gurët, i kanë bërë vizat e reja, e pastrojnë rrugën. Çdo gjë, do të thotë e kontrollojnë këta (malazezët), pylltari është i Rozhajës, e kontrollon malin”, thotë Mulaj.

Kur kanë kaluar tre vjet që nga ratifikimi i kësaj marrëveshjeje në Kuvendin e Kosovës, Kosova ka pasur katër qeveri.

Asnjëra nga qeveritë nuk e ka marrë asnjë hap sa i përket rishikimit të vijës kufitare, për të bërë korrigjimet e nevojshme nëse ka pasur ndonjë lëshim.

“Unë pres prej këtyre (Qeverisë së Kosovës), sepse këta kanë qenë me këmbëngulje që të mos votohet demarkacioni. Pres prej tyre dhe Ministrisë së Jashtme që të merren me këtë punë, të bisedojnë me Malin e Zi”, thotë Mulaj.

Nga viti 2015 e deri në vitin 2018, Lëvizja Vetëvendosje si parti opozitare, por edhe partitë tjera opozitare, e kundërshtuan ashpër Marrëveshjen e demarkacionit me Malin e Zi.

Kundër kësaj marrëveshjeje u organizuan protesta të shumta, si në sheshe po ashtu edhe në sallën e kuvendit.

Nën tymin e gazit lotsjellës, më 21 mars të vitit 2018, deputetët e Kuvendit të Kosovës votuan për ratifikimin e Marrëveshjes për demarkacionin me Malin e Zi, që konsiderohej si kriter për liberalizimin e vizave për qytetarët e Kosovës.

Marrëveshja për demarkacionin me Malin e Zi e nënshkruar në vitin 2015 në Vjenë të Austrisë, është plotësuar edhe me një aneks-marrëveshje ndërmjet dy ish-presidentëve, atij të Kosovës Hashim Thaçi dhe të Malit të Zi, Filip Vujanoviq.

Në marrëveshjen e nënshkruar ndërmjet dy presidentëve, thuhet se pas ratifikimit të demarkacionit në Kuvendin e Kosovës, të dy vendet do ta rishikojnë vijën kufitare dhe do të bëhen korrigjime nëse ka pasur lëshime.

Kryeministri i Kosovës Albin Kurti, ka uruar Shtetet e Bashkuara të Amerikës për Ditën e Pavarësisë.

Kurti tha se edhe Shteti i Kosovës i bashkohet festës së popullit amerikan.

“Në këtë ditë të pavarësisë së Shteteve të Bashkuara të Amerikës, shteti i Kosovës i bashkohet festës së popullit dhe institucioneve të ShBA-ve, partnerë dhe aleatë të pazëvendësueshëm në arritjet tona”.