Kryetari i Aleancës për Ardhmërinë e Kosovës, Ramush Haradinaj, ka marrë pjesë në nisjen e sezonit e korrjeve dhe shirjeve në fshatin Sverkë e Thatë në komunën e Pejës.

Haradinaj këtë e bëri të ditur përmes një postimi në Facebook, ku tha se këtë të martë ka vizituar edhe dy ferma, transmeton Klankosova.tv.

‘’Fillimisht qëndrova në shtëpinë e Janoshëve në Rasujë, shtëpi që ishte strehë e luftëtarëve të lirisë. Kjo familje ka në pronësi fermën e pulave, për të cilën më informoi hollësisht bashkëluftëtari im Selim Berisha.Ndërsa në Nabërgjan, vizitova fermën e gjedheve në pronësi të Arif Gashit, ku takova edhe antarë të Shoqatës të Fermerëve. Dëgjova nga dora e parë për problemet dhe kërkesat e tyre’’, ka shkruar Haradinaj.

Tutje ai shtoi se në këtë kohë kur ekonomia e vendit është goditur rëndë dhe të gjithë bujqit e fermerët në Kosovë, kanë nevojë për dorën e shtetit, ai do të jetë gjithmonë mbështetës dhe avokat i të drejtave të tyre.

Kancelari austriak, Sebastian Kurz ka njoftuar se vendi i tij do të dhurojë edhe një milion doza të vaksinave antiCOVID, të prodhuara nga AstraZeneca për Ballkanin Perëndimor ku përfshihen (Kosova, Shqipëria, Bosnja dhe Hercegovina, Serbia, Mali i Zi dhe Maqedonia Veriore).

Kjo gjë u vë në pah gjatë një vizite të tij në New-York, ku poashtu Kurz vizitoi edhe selinë e Kombeve të Bashkuara për të diskutuar për pasojat negative të pandemisë COVID-19.

“Një gjë është e qartë, ne duhet të bashkëpunojmë dhe të mbështesim njëri-tjetrin. Ne duhet të mësojmë nga njëri-tjetri dhe të ndajmë shembuj të praktikës më të mirë”, tha kancelari Kurz.

Ai me këtë rast premtoi se vendi i tij do të jetë partner i atyre që kanë nevojë për ndihmë dhe pret që pandemia të kalohet dhe të kthehet në jetën normale.

Kurz theksoi se masat epidemiologjike do të shtrëngohen në Austri vetëm nëse është e nevojshme teksa beson se do të jetë më e pranueshme që qytetarët të sillen me përgjegjësi.

Ndryshe, duhet përkujtuar që Asutria pati ndarë edhe më herët 600 mijë doza të vaksinave antiCOVID për shtetet ballkanike.

Nga sot, në Kosovë mund të caktojnë termine për vaksinim të gjithë qytetarët mbi moshën 18-vjeç.

Ministria e Shëndetësisë ka publikuar informacionet shtesë të platformës online përmes së cilës mund të caktohet termini.

Po ashtu, është aktivizuar linja telefonike pa pagesë 080030900, ku mund të kërkohet ndihmë, të aplikohet për vaksinim apo për arsyet si më poshtë:

1. Për regjistrim dhe aplikim për vaksinën kundër COVID-19

2. Për informata rreth vaksinës

3. Për informata rreth procesit të vaksinimit

5. Për konsultë me psikologun rreth vaksinimit

Partia Socialdemokrate nuk do të garojë në zgjedhjet lokale të vjeshtës që po vie.

Të paktën kështu ka mësuar GazetaBlic nga burime të sigurta brenda kësaj partie.

Mosgarimi i tyre ka të bëjë kryekëput me faktin se degët aktuale të partisë në fjalë ende janë në proces e sipër të strukturimit.

“Jo, PSD-ja nuk do të garojë në zgjedhjet lokale të kësaj vjeshte. Kjo për shkak se ende duhet punuar në organizim të degëve”, tha ndër të tjera ky burim për GazetaBlic.

Partia Socialdemokrate nuk garoi as në zgjedhjet kombëtare të 14 Shkurtit.

Kujtojmë se pas ndarjes nga VV-ja, PSD-ja qeverisi me dy komuna, Prishtinën e Dardanën, ani pse pas zgjedhjeve të vitit 2019, Shpend Ahmeti dha dorëheqje nga pozita e kryetarit dhe nga të gjitha strukturat e partisë.

Gjithsesi, brenda ditëve mund ta kemi edhe konfirmimin zyrtar nga socialdemokratët kosovarë.

Ish-gjyqtari i EULEX-it, Malcolm Simmons i është përgjigjur sërish ambasadorit gjerman në Kosovë, Jorn Rohde për një deklaratë të këtij të fundit, i cili raportimin e Simmons e konsideroi dezinformatë dhe shprehi habi se pse Kuvendi i Kosovës i ka dhënë hapësirë të njëjti.

Simmons me anë të një postimi të ri në Twitter i është drejtuar Rohdes, duke e pyetur se nëse deklaratat e tij janë false, atëherë pse EULEX-i duhet t’i frikësohet një hetimi nga Kuvendi i Kosovës.

“Nëse deklaratat e mija janë të rreme, pse duhet të ketë frikë EULEX nga një hetim i Kuvendit të Kosovës?”, i është drejtuar Simmons ambasadorit Rohde.

Ky i ka mbështetur reagimin e EULEX-it duke e quajtur si përgënjeshtrim bindës për pretendimet e pabazuara të Simmons

“Përgënjeshtrim shumë bindës dhe gjithëpërfshirës i EULEX-it për pretendimet e pabazuara. Unë thjesht habitem pse Kuvendi i Kosovës ende i ofron ish-gjykatësit Simmons një platformë për ta vazhduar këtë fushatë të dezinformimit”, ka shkruar Rohde.

Ndaj kësaj deklarate ndërkaq kishte reaguar më herët Simmons duke thënë se i posedon provat dhe dokumentet mbi pretendimet e tij.

Ish-presidenti i Kosovës Hashim Thaçi, i cili po gjykohet në Hagë si i akuzuar për krime të luftës ka kërkuar që t’i mundësohet mbrojtja nga arresti shtëpiak.

Kështu shkruan në një artikull të datës 10 korrik të gazetës sllovene “Necenzurirano”.

Në këtë artikull theksohet se gazeta posedon informacion se Thaçi si vend të tretë e ka përzgjedhur Slloveninë për t`u mbrojtur.

Klankosova.tv ka pyetur në Ministrinë e Drejtësisë së Kosovës për të parë nëse ka pranuar ndonjë kërkesë nga mbrojtja.

Në një përgjigje për Klankosova.tv, Ministria e Drejtësisë bëri të ditur se nuk ka pranuar asnjë kërkesë sa i përket mbrojtjes në një shtet të tretë të ish-presidentit Thaçi.

“Sa i përket pyetjeve tuaja lidhur me pretendimet e mediumit slloven “Necenzurirano”, ju njoftojmë se Ministria e Drejtësisë nuk ka pranuar asnjë kërkesë për sa i përket mbrojtjes në një shtet të tretë të ish Presidentit Thaçi”.

E lidhur me këtë rast Klankosova.tv ka pyetur edhe në Ministrinë e Jashtme të Sllovenisë për të parë nëse qëndrojnë këto raportime të gazetës sllovene “Necenzurirano”.

Në një përgjigje të MPJ-së sllovene thuhet se nuk e komentojnë këtë rast.

“Ministria e Jashtme e Sllovenisë nuk i komenton këto pyetje”.

Lidhur me rastin jemi në pritje të një përgjigjeje edhe nga Zyra e kryeministrit të Kosovës Albin Kurti si dhe nga Gjykata Speciale.

Por, akoma nuk ka ndonjë përgjigje nga këto dy institucione.