Kanë mbetur edhe 9 ditë nga mbajtja e zgjedhjeve lokale në Kosovë.

E për të votuar për këto zgjedhje kanë aplikuar vetëm 15 mijë e 532 qytetarë dukshëm më pak se në zgjedhjet nacionale të cilat u mbajtën vitin e kaluar.

Zëdhënësi për media i KQZ-së, Valmir Elezi, në një prononcim për FrontOnline, tha se mërgimtarët të cilët kanë aplikuar për të votuar kanë afat vetëm deri me 15 tetor për t’i dërguar fletëvotimet në KQZ.

“Mund të ju konfirmoj se deri më tani Komisioni Qendror i Zgjedhjeve, përmes shërbimit votues, ka tërhequr 2,337 pako të supozuara me fletëvotime, pra të cilat kanë ardhur nga jashtë Kosovës. Gjatë periudhës së aplikimit për t’u regjistruar si votues jashtë Kosovës, kemi 15 532 qytetarë të cilët kanë arritur të regjistrohen suksesshëm si votues jashtë Kosovës dhe të cilët mund të votojnë përmes postës. Fletëvotimet duhet të pranohen nga ana e KQZ-së më së largu deri më 15 tetor”, u shpreh Elezi.

Ndërsa për numrin e vogël të mërgimtarëve të cilët kanë aplikuar për të votuar në zgjedhjet e 17 tetorit, për FrontOnline, ka folur ish-kryetari i KQZ-së, Mazlllum Baraliu.

Ai tha se janë disa faktorë të cilët kanë ndikuar që diaspora të mos ketë interesim për të votuar.

“Mendoj që mos respekti që po i bëhet diasporës në një mënyrë duke mos bërë më shumë për ta dhe premtimet të cilat nuk po i realizojnë, duke filluar nga targat, trajtimi i tyre në kufi e deri të përfaqësimi i tyre në Kuvend, është kërkesa që të këtë një përfaqësim jo vetëm në nivelin lokal por edhe në kuvend e Qeveri. Një tjetër arsye mund të jetë edhe zhgënjimi nga Qeveria e Kosovës për të cilët kanë bërë shumë në zgjedhjet e 14 shkurtit”, tha ai.

Baraliu për FrontOnline, tha se edhe procedurat burokratike për të votuar kanë ndikuar që diaspora të mos ketë interesim për të votuar dhe për këtë, ai ndryshimin e ligjit për zgjedhje po e sheh si mundësi të mirë për të i ‘u mundësuar atyre që të votojnë.

“Kjo qeverisje si ato tjerat nuk ka treguar mjaftueshëm përkushtim në këtë aspekt pa marr parasysh ndryshimin e ligjit që iu dështoj në mbledhjen e parë. Qeveria ka pasur mundësi që t’iu mundësoj votimin në ambasada por siç e dimë në 12 ambasada nuk ka ambasadorë aktiv ku kjo është dashur të bëhet që nga një gushti i këtij viti. Dashtë e padashur po vazhdon avazi i vjetër pa dashur të gjykojë për punën e kësaj qeverisje që ka shumë për të bërë dhe për të dëshiruar edhe në këtë aspekt nuk kanë arritur që t’i përmbushin pritshmëri e diasporës “, tha ai.

Lidhur me aplikimin e mërgatës për të votuar për zgjedhjet lokale në Kosovë, për FrontOnline, kanë folur edhe nga organizata “Germin”.

Ata thonë se janë disa arsye se pse diaspora nuk ka aplikuar për të votuar në zgjedhjet lokale.

“Numri ne zgjedhjet lokale ka qenë gjithmonë më i vogël, kjo për arsye si: Mungesa e thirrjeve nga partitë politike për të votuar në këto zgjedhje lokale, pra duke mos i bërë si te rëndësishme sa që janë ato nacionale. Andaj kjo mungese e thirrjeve dhe mos zhvillimit te kampanjave zgjedhore në degët e partive ne diasporë ndikon në mos interesimin e tyre”, thuhet në përgjigjen e tyre.

Nga kjo organizatë thonë së kanë bërë thirrje që diasporës t’iu mundësohet që të votojnë në ambasada dhe konsullata të Kosovës.

Ministria e Shëndetësisë ka vlerësuar se masat antiCOVID duhet të vazhdojnë edhe për dy javë për shkak të fillimit të viti të ri shkollor dhe fushatës zgjedhore.

Asociacioni i Komunave të Kosovës përmes një njoftimi për media ka bërë të ditur se në takimin me ushtruesen e detyrës së ministres së Shëndetësisë, Dafina Gexha-Bunjaku, ajo kërkoi edhe nga Inspektoratet dhe Policia që të sforcojnë aktivitetet në zbatimin e masave kundër kësaj pandemie të cilat janë në fuqi.
Sa i përket vaksinimit, Ministrja informoi kryetarët e komunave se deri tani për moshat mbi 16 vjet janë vaksinuar 67.5% e popullatës me dozën e parë dhe 47.6% me dozën e dytë.

Po ashtu, ka një rënie dhe stabilizim të situatës me infeksionet dhe përhapjen me virusin e pandemisë Covid-19.

Njoftimi i plotë i AKK-së:

Ministria e Shëndetësisë takim me kryetarët e komunave

Kryetarët e Komunave kanë mbajtur një takim virtual me Ministren e Ministrisë së Shëndetësisë znj. Dafina Gexha-Bunjaku për të diskutuar situatën lidhur me pandeminë Covid–19 me theks të veçantë për zbatimin e masave dhe vlerësimin e situatës së deritashme.

Ministrja Bunjaku në këtë takim informoi Kryetarët e Komunave me situatën e tashme me pandeminë dhe sidomos aktivitetet ndër-institucionale kundër kësaj pandemie.

Ajo fillimisht falënderoi Kryetarët e Komunave dhe Drejtorët Komunalë për Shëndetësi për aktivitetet dhe angazhimet e deritashme në betejën kundër pandemisë Covid-19.

Ministrja Bunjaku tha se ka pasur takime me Grupin e Ekspertëve Shëndetësor dhe përfaqësuesit e Institutit Kombëtar të Shëndetit Publik (IKSHP) për të vlerësuar situatën dhe masat e deritashme si dhe kanë pranuar raportin javor.

Sa i përket vaksinimit, Ministrja informoj Kryetarët e Komunave se deri tani për moshat mbi 16 vjet janë vaksinuar 67.5% e popullatës me dozën e parë dhe 47.6% me dozën e dytë.

Në anën tjetër ka një rënie dhe stabilizim të situatës me infeksionet dhe përhapjen me virusin e pandemisë Covid-19.

Andaj vlerësim i përgjithshëm është që këto masa të vazhdojnë edhe për dy javët e ardhshme sidomos tani që ka nis shkolla dhe kemi fushatën për zgjedhjet lokale me 17 tetor.

Ministrja Bunjaku kërkoi edhe nga Inspektoratet dhe Policia që të sforcojnë aktivitetet në zbatimin e masave kundër kësaj pandemie të cilat janë në fuqi.

Në këtë takim, Kryetarët e Komunave dhe përfaqësuesit tjerë komunalë të pranishëm në këtë takim online me Ministrin e Shëndetësisë paraqiten edhe sfidat dhe nevojat aktuale që janë në komunat e Kosovës me theks në çështjet e vaksinimit dhe furnizimit me barna shëndetësore.

Në anën tjetër Asociacioni i Komunave të Kosovës kërkoi që më datën 18 tetor (një ditë pas zgjedhjeve të 17 tetorit – ditën e zgjedhjeve lokale) të mos mbahet mësimi por të dezinfektohen shkollat meqë aty pritet të mbahen votimet dhe atë me buxhet të siguruar nga niveli qendror për komunat meqë mjetet komunale në shërbime dhe mallra janë në limite të vogla.

Po ashtu u kërkua që në ambiente të jashtme të lejohet tubimi deri në 50 persona të vaksinuar si dhe të hiqen maskat kur një person vetëm është duke ecur.

Po ashtu, nga kryetarët e Komunave u kërkua që të shikohet mundësia e heqjes së orës policore dhe të vazhdoj furnizimi i Komunave me barna esenciale. /Telegrafi/

Qytetarët që shkojnë nga Kosova në Mbretërinë e Bashkuar kanë për t’u përballur me rregulla të reja në aeroporte e kufij.

Për të hyrë në Mbretërinë e Bashkuar, qytetarët që shkojnë nga Kosova duhet ta kenë dëshminë se janë të vaksinuar me dy doza.

Kosova është pjesë e listës së 37 vendeve që duhet ta kenë dëshminë për vaksinim. Po ashtu edhe qytetarët që shkojnë nga Shqipëria në Angli duhet ta kenë dëshminë për vaksinim.

Qeveria Britanike ka të miratuara këto vaksina: Oxford/AstraZeneca, Pfizer/BioNTech, Moderna dhe Janssen.

Ju duhet të jeni në gjendje të siguroni dëshmi të miratuar të statusit tuaj të vaksinimit. Këto përfshijnë një certifikatë dixhitale të Covid-it të BE-së, një kartë vaksinimi të Qendrave për Kontrollin dhe Parandalimin e Sëmundjeve për banorët amerikanë ose një certifikatë vaksine nga një autoritet i shëndetit publik në nivel kombëtar ose shtetëror.

Nëse s’jeni i vaksinuar, atëherë duhet të hyni në karantinë.