Kryeministri i vendit Albin Kurti, ka nisur mbledhjen e Qeverisë duke shprehur mirënjohje për shtetin e Kroacisë që u ka dal në ndihmë të lënduarve në aksidentit që ndodhi në këtë shtet.

Kurti u ka shprehur ngushëllime të gjithë familjarëve të të vdekurve dhe ka thënë se do të qëndrojnë pranë bashkatdhetarëve.

“U shpreh ngushëllime për viktimat. U shpreh mirënjohje Kroacisë për ndihmën e dhënë. Qeveria do tu qëndrojë me bashkatdhetarët”.

Rreth orës 13:30 kanë arritur në pikën kufitare të Morinës, trupat e pajetë të mërgimtarëve nga aksidenti në Kroaci.

Varrimi i trupave të pajetë do të bëhet pasditen e sotme.

Ndërkaq, mbrëmë në Aeroportin Ndërkombëtar të Prishtinës kanë arritur 21 nga të mbijetuarit e aksidentit që janë në gjendje të mirë shëndetësore.

Aksidenti tragjik i autobusit nga Kosova, që po udhëtonte nga destinacioni Frankfurt-Prishtinë ndodhi të dielën, ku si pasojë kanë vdekur 10 persona humbën jetën dhe mbi 40 të tjerë u lënduan.

Ka një rritje domethënëse të kënaqshmërisë së qytetarëve me punën e institucioneve kyçe ekzekutive, legjislative dhe gjyqësore të Kosovës, thuhet në raportin “Pulsi Publik, edicioni i XX-të“, prezantuar nga Programi i Kombeve të Bashkuara për Zhvillim (UNDP).

Krahasuar me anketën e mëparshme të realizuar në dhjetor të 2020-së, kënaqshmëria e regjistruar me performancën e kabinetit të ekzekutivit është 59.1 për qind, gjë që përbën një rritje prej 37.8 pikë përqindje në krahasim kur kjo vlerë ishte 21.3 për qind.

“Niveli i regjistruar i kënaqshmërisë me punën e Kryeministrit është 59.5 për qind nga 23 për qind në muajin dhjetor 2020, ndërsa kënaqshmëria me punën e Kryetarit të Kuvendit është rritur nga 46.7 për qind në muajin dhjetor 2020 në 59.2 për qind në muajin maj 2021. Niveli më i lartë i kënaqshmërisë prej 63.7 për qind është regjistruar me punën e Presidencës, krahasuar me 33.9 për qind të regjistruar në muajin dhjetor 2020”, thuhet në raport.

Sipas UNDP-së, Indeksi i Demokratizimit është rritur në 1.58 pikë krahasuar me dhjetorin e 2020-së, kur kjo vlerë ishte 1.32 pikë, duke treguar se qytetarët janë të kënaqur me trendet demokratike në vend.

Indeksi i Besueshmërisë Ekonomike (IBE) është rritur nga muaji dhjetor 2020 dhe ka arritur në 1.49 pikë, duke treguar një rritje të konsiderueshme të besimit të qytetarëve në perspektivën ekonomike të Kosovës.

Gjetjet tregojnë edhe rritje thelbësore të ndjenjës së sigurisë te të anketuarit, me 76.4 për qind që ndihen të sigurt kur janë në publik, krahasuar me 68.4 për qind të regjistruar në muajin dhjetor 2020.

“Tri problemet kyçe me të cilat Kosova aktualisht ballafaqohet janë papunësia me 34.3 për qind, varfëria me 19.3 për qind dhe korrupsioni me 9.3 për qind. Serbët e Kosovës e konsiderojnë papunësinë me 16.7 për qind, sigurinë publike dhe personale me 14.8 për qind dhe problemet e hapësirës urbane me 12.9 për qind si tri problemet më të mëdha, ndërsa për komunitetet e tjera të Kosovës problemi më i madh është papunësia me 51.2 për qind, ndjekur nga varfëria me 18.9 për qind dhe furnizimi me energji me 11.4 për qind”, përfundon raporti.

Respondentët u shprehën mesatarisht të kënaqur me reagimin e institucioneve të Kosovës ndaj pandemisë COVID-19, me 43.6 për qind të kënaqur me masat e ndëmarra nga kabineti ekzekutiv.

Deputetja shqiptare në parlamentin kroat, Ermina Lekaj- Prljaskaj në një intervistë për emisionin “Përballje” në Telegrafi.com me kryeredaktorin Muhamet Hajrullahu, ka folur rreth tragjedisë që ndodhi të dielën në Kroaci ku humbën jetën dhjetë persona dhe mbi 40 të tjerë u lënduan.

Lekaj-Prljaskaj tha se kjo ishte një tragjedi e rëndë derisa u shprehi ngushëllime familjarëve të viktimave dhe u dëshiroj shërim të shpejtë qytetarëve që po trajtohen ende në spitalin e Sllavonski Brod.

“Qeveria kroate dhe qeverisja lokale kanë dhënë një kontribut shumë të madh, dhe duhet t’i falënderoj emergjencën dhe spitalin e Sllavonski Brodit të cilët në një kohë të shkurtë kanë arrit në vendin e ngjarjes dhe brenda një ore kanë kryer operacionet e dy personave që kanë qenë në gjendje kritike dhe pastaj me ardhjen time dhe ambasadorit Kasapolli kanë bashkëpunuar me ne dhe na kanë informuar për çdo gjë, na kanë lejuar të kemi kontakt edhe me pacientët”, ka thënë Lekaj-Prljaskaj.

Deputetja shqiptare në parlamentin kroat, Ermina Lekaj- Prljaskaj në një intervistë për Telegrafi.com

Deputetja shqiptare ka shpalosur edhe disa detaje tjera rreth komunikimit të saj me kryeministrin kroat dhe kryeministrin Kurti.

“Gjatë shkuarjes time në vendin e ngjarjes e kam njoftuar kryeministrin Andrej Plenkoviq i cili më është zotuar se do të na ndal në ndihmë dhe do ta kemi mbështetjen e tij, pastaj e kam kontaktuar dhe kryeministrin Kurti i cili shprehi gatishmërinë që ti vizitojë pacientët, gjë e cila edhe ndodhi pastaj”, u shpreh deputetja.

Lekaj-Prljaskaj gjatë kësaj interviste tregoi se kryeministri kroat Plenkoviq i kishte kërkuar t’i mësonte se si të fliste shqip para se ti vizitonte pacientët e shtrirë në spitalin e Sllavonski Brodit.

“Mua më len përshtypje humanizmi  i tij, momenti kur ka ardhur në Sllavonski Brod në spital më ka thënë Ermina që së bashku do të shkojmë ti vizitojmë pacientët ti do të flasësh shqip unë kroatisht dhe më tregon në gjuhën shqipe se si thuhet “mirëdita” dhe “si jeni”.

Ai dy herë brenda dy orëve i ka vizituar pacientët dhe i ka dhënë mundësi vetes që ti mësoj dy fjalë në gjuhën shqipe”, u shpreh ajo.

Ndryshe mbrëmë në Aeroportin Ndërkombëtar të Prishtinës kanë arritur 21 nga të mbijetuarit e aksidentit që janë në gjendje më të mirë shëndetësore, kurse sot kanë arritur edhe trupat e pajetë të dhjetë viktimave.