Organizata Lëvizja për Demokraci mbajti një aktivitet simbolik para Ambasadës së Shqipërisë në Kosovë, përmes së cilit ka kundërshtuar nismën e Edi Ramës për të ashtuquajturin mini-shëngenin ballkanik, tashmë zyrtarisht me emrin “Ballkani i Hapur”.

Anëtarë të kësaj organizate mbanin në duar banerin që kishte fotografi nga lufta e fundit në Kosovë, e që shiheshin krimet serbe mbi popullsinë civile.

Kryetari i kësaj organizate, Mexhid Ramusa, tha para mediave se kundërshtojnë çdo nismë të tillë, pasi Serbia nuk ka kërkuar ende falje për krimet e kryera në Kosovë.

Ai tha se janë përkujdesur që kryeministrit shqiptar, Edi Rama, t’i përkujtojnë lidhjet e presidentit serb Aleksandar Vuçiq me kasapin e Ballkanit, Slobodan Millosheviq.

Për të është e pakuptimtë sesi kryeministri Rama synon të përfshijë edhe Kosovën në një mini-shengen ku merr pjesë edhe Serbia.

“Në bazë të këtij aktiviteti kemi shprehur pakënaqësitë tona ndaj kryeministrit të Shqipërisë, Edi Rama, për lidhjet e tij me Vuçiqin, kriminelin serb që ka bërë krime në Kosovë dhe ne ja kemi prezantuar të gjitha faktet, lidhjet e tij me Millosheviqin, dhe duke kundërshtuar nismën e tij për mini-shengenin ballkanik”, tha ai.

Ramosaj theksoi se e ardhmja e Kosovës është drejt Bashkimit Evropian dhe jo “Ballkani i Hapur”.

“E ardhmja jonë është me qenë kah Bashkimi Evropian dhe ShBA. Për neve është e pakuptimtë që të hyjmë në një mini-shengen ku është edhe Serbia, e cila na ka vrarë, na ka masakruar dhe ka kryer gjenocid mbi popullatën civile… Ne e kundërshtojmë edhe dialogun pa kërkuar falje Serbia ndaj Kosovës”, shtoi ai.

Deputeti nga Partia Demokratike e Kosovës, Bekim Haxhiu ka kërkuar informacione se çka ka ndodhur me 1 mijë testet për COVID-19 që Kosova i kishte pranuar si donacion nga Serbia gjatë qeverisjes Kurti 1. Lidhur me këtë ministri i Shëndetësisë, Arben Vitia tha se ato teste nuk janë përdorur dhe për shkak të afatit të skaduar do të asgjësohen si çdo material tjetër laboratorik.

Deputeti i PDK-së në seancën e sotme plenare, pyeti Vitin se sa është barra shtesë për asgjësimin e këtyre 1 mijë testeve për COVID-19 të dhuruara nga Serbia.

“Deputetët por edhe ministrat që nuk i mbajnë maskat është mirë me i larguar nga seanca, në veçanti kur varianti, por e di që nuk po iu pëlqen disa por ne jemi të gjithë deputet kemi kontakte me qytetar variant Delta është prezent dhe duhet të mbrohemi të gjithë…Më datën 17 prill 2020 në kohën kur ishit ministër i Shëndetësisë në qeverinë Kurti 1 keni pranuar donacion për COVID 1 mijë teste nga Serbia sipas raportimeve të udhëheqësisë të IKSHP-së në Komisionit për Shëndetësi këto 1 mijë teste donacion nga Serbia nuk janë përdorur për testim të qytetarëve të Kosovës pasi këto teste nuk janë përdorur për qytetarët e Kosovës ndërsa Serbia u prezantua në mediat më prestigjioze si shumë humane . Pasi që këto teste nuk janë përdorur ende këto 1 mijë teste nga Serbia a janë larguar dhe a janë jashtë përdorimit si do veproni me këtë donacion që e keni pranuar nga Serbia a do ia ktheni Serbisë“, tha Haxhiu.

Vitia tha se këto teste do të asgjësohen si çdo material tjetër laboratorik në momentin e parë që mundshëm.

“Bazuar në të dhënat e IKSHP-së ato ruhen si edhe shumica e materialeve laboratorike të tjera dhe se ashtu siç ju nuk janë përdorur asnjëherë për shkak të skadencës këto kite do të trajtohen si të gjitha materialet e mikrobiologjisë me afat të skaduar sipas procedurave të Departamentit të Mikrobiologjisë në IKSHPK meqë nuk kërkohen procedura të veçanta të asgjësimit për to dhe numri i këtyre testeve nuk është i madh kjo nënkupton se do asgjësohen në momentin e parë bashkë me mbetjet e tjera të laboratorit”, theksoi ai.

Ministri Vitia tha se halli më i madh i tyre janë tonelata e shumta të barnave me afat të skaduar, për të cilat siguroi që do ua bëjnë qaren.

“Hallin më të madh qeveria aktuale e Kosovës dhe MSh e ka me tonelata e tonelata barna të cilat kërkojnë procedura procedura specifike për asgjësim dhe që fatkeqësisht janë blerë pa asnjë procedurë nga qeveritë e kaluara dhe tani janë grumbulluar në stoqet tona në depot e MSh-së të cilat jeni të sigurt se dhe aty do ia gjemë qaren”, tha ai.

Tutje deputeti i PDK-së, Bekim Haxhiu ka hedhur dyshimet për manipulim me shifrat e administrimit të vaksinave.

“Ka një mospërputhje totale në raportimet MSh-së a mundeni me na tregua se çka po ndodh me këto raportime, si mund të ndodh me u prezantuar vaksinimet ditore 12 mijë, ndërsa dozën e parë shtohen për 128 mijë brenda 24 orëve, ku është problem a nuk po arrini me mbajtur evidencën apo po tentoni rrejshëm me prezantuar shifrat çka ka ndodhur sepse ka mos përputhje shumë të madhe në raportimet në faqen zyrtare të MSh?”, tha ai.

E për këtë ministri i Shëndetësisë, Arben Vitia tha se raporti është i thjesht dhe i qartë.

“Raporti për të dhënat e dozave të administruara të vaksinës kundër COVID-19 është shumë i thjesht dhe shumë i qartë nuk kërkon analizën që keni bërë, dhe keni mundur çdo herë me e pa”, tha Vitia.

Edhe deputetja tjetër e PDK-së, Ganimete Musliu në seancën e sotme të Kuvendit të Kosovës, ka thënë se është kërcënuar përmes një letre nga bashkëshorti i presidentes, Vjosa Osmani, Prindon Sadriu.

“Para disa ditësh në postën time në Kuvend më kishte ardhur një zarf, ku shkruhej se ishte dërguar nga presidentja Vjosa Osmani. Pasi e hapa për çudi brenda nuk ishte shkresa nga presidentja, por një letër e pa nënshkruar e Prindon Sadriut. Letra që ma kishte dërguar me emër të presidentes përmbante një kërcënim për padi civile. Arsyeja e përmendur ishte se unë në një prej televizioneve pasna deklaruar se ai ishte ambasador me korrespodencë dhe se nuk rrinte në Shkup dhe udhëton çdo ditë dhe se atë ambasador e bëri bashkëshortja e tij”, ka thënë Musliu.

Ajo ka shtuar se në letrën që Sadriu i kishte dërguar i kishte  caktuar edhe afatet se kur do t’i kërkoj falje.

“Nëse kjo nuk ndodh atëherë do të pasojë padia ndaj meje”, tha Musliu.

Ndryshe edhe deputetja tjetër e PDK-së, Floretë Zejnullahu tha se është kërcënuar nga bashkëshorti i presidentes Vjosa Osmani, Prindon Sadriu.

Deputetja e PDK-së, Floretë Zjenullahu në seancën e sotme të Kuvendit të Kosovës, ka thënë se është kërcënuar nga bashkëshorti i presidentes Vjosa Osmani, Prindon Sadriu.

“Të nderuar para jush dua të paraqes kërcënimin që kam marr nga bashkëshorti i zonjës Osmani, Prindon Sadriu. I rrethuar me pushtetin e bashkëshortes dhe partnerit të saj qeverisës, Albin Kurti ai ka marrë guximin të kërcënoj deputetët e Kuvendit, pas publikimit të fakteve ndaj tij dhe jetës luksoze që ai dhe bashkëshortja e tij bëjnë”, ka thënë Zjenullahu.

Ajo ka shtuar se këto fakte duket se i kanë prishur rehatin familjes presidenciale.

“Ai ndoshta ka menduar se përmes kësaj letre kërcënuese unë mund të frikësohem dhe të heshti, por nga këtu i bëjë me dije se ka gabuar adresën e personit dhe adresën politike që kemi menduar se mund ta frikësoni e shantazhoni”, ka thënë Zejnullahu.

Deputetja ka shtuar se ajo dhe partia e saj PDK, do të vazhdojmë të denoncojë çdo zhvatje të buxhetit të Kosovës

“I bëjë me dije bashkëshortit të zonjës Osmani se do ta padis në organet e drejtësisë për kërcënimin që më ka bërë menjëherë pas kësaj seance”, tha Zejnullahu.