gMinistri i Bujqësisë, Pylltarisë dhe Zhvillimit Rural, Faton Peci në mbledhjen e sotme të Qeverisë ka prezantuar propozim – vendimin për kompensimin e dëmeve në bujqësi me vlerë prej 1.3 milionë euro i cili është miratuar nga Qeveria e Republikës së Kosovës.

Po ashtu vetëm në dy javët e fundit, janë proceduar për pagesë 1.4 milion euro për 1,554 përfitues në kategorinë e subvencioneve, duke e rritur kështu shifrën e mbështetjes ndaj fermerëve në 2.7 milionë euro.

Gjithashtu, në mbledhjen e sotme të Qeverisë është miratuar edhe themelimi i Task-Forcës për Mbrojtjen dhe Shfrytëzimin e Ligjshëm të Pyjeve, si dhe themelimi i Task-Forcës për Mbrojtjen dhe Ruajtjen e Tokës Bujqësore.

Kryetari i Deçanit, Bashkim Ramosaj, ka thënë se ka tendenca të përmirësimit të situatës në Deçan, pas helmimit të një numri të madh të qytetarëve.

Ai në Info Magazine ka deklaruar se akoma janë të shqetësuar me këtë gjendje pasi nuk e dinë shkakun.

“Ka tendenca të përmirësimit duke e krahasuar ditën e sodit me atë të djeshmen. Por shqetësimi është duke vazhduar, pasi ende ka pacientë të cilët janë duke shkuar në Qendrën Kryesore Familjare në Deçan për të kërkuar ndihmë. Shqetësimi po vazhdon të jetë i rritur, sepse është dita e pestë dhe ende nuk po e dimë se nga është ardhur ky helmim tek qytetarët”.

Ramosaj ka theksuar se edhe në muajin qershor kanë pasë helmim të qytetarëve por në numër më të vogël.

“Kemi pasë situatë të ngjashme por ka qenë më e izoluar, ku kishim jo më pak se 13 apo 14 persona të fshatrave të caktuara që janë lajmëruar se kanë qenë të helmuar. Në dhjetë ditshin e parë të muajit qershor të këtij viti, ishin bërë analizat e ujit nga Instituti Kombëtar i Shëndetit Publik të Kosovës këtu në Pejë si dhe nga Kompania Rajonale e Ujësjellësit “Hidrodrini”, pas rezultateve ka dalë se uji ishte në rregull”.

“E njëjta përgjigje është dhënë edhe tani kur kjo situatë është shumë më enorme, ku janë diku më shumë se 1,700 persona që kanë kërkuar ndihmë në institucionet shëndetësore, diku vetëm 1,500 njerëz janë në QKMF-në në Deçan, mbi 254 persona iu janë drejtuar klinikave private, më shumë se 34 persona janë në QKMF-në në Gjakovë si dhe mbi 80 persona janë në QKMF-në në Pejë”.

I pari i Deçanit ka treguar se nuk do të ndalen deri në gjetjen e shkakut të helmimit, deri tani janë bërë analizat e ujit dhe kanë dalë negative.

“Një prej lajmeve të mira është që nuk ka dalë helmim në analizat e ujit, nuk duhet me u ndal deri në gjetjen e faktorëve, jam duke këmbëngulur që qytetarët e Deçanit dhe të Kosovës të dinë se cilët janë faktorët që e kanë shkaktuar këtë si dhe të kemi qetësi dhe të jetojmë në një ambient që është për të jetuar në të”.

“Janë duke vazhduar të bëhen të gjitha analizat e mundshme, derisa ta kemi një përfundim duhet të vazhdojmë, duhet të vazhdojmë deri sa ta kemi përgjigjen për atë që ka ndodhur. Edhe institucionet tjera jo vetëm IKSHPK-ja, edhe nivelet ushtarake në këtë Komunë janë duke bërë testimin e ajrit, derisa ta kemi një përgjigje. Kur të gjenden faktorët atëherë do të përfundojë gjithçka”, ka thënë Ramosaj.

Zyrtari i LDK’së, Bajram Gecaj thotë se të gjithë bashkë duhet të organizojnë një protestë para Qeverisë për të kërkuar shkarkimin e Albin Kurtit, kjo për shkak të sorollatjeve nëpër hotele luksoze.

“Partitë në pushtet, opozita, shoqëria civile, si dhe qytetarët e vendit, të organizojnë një protestë të përbashkët gjithë-popullore para ndërtesës së Qeverisë së Kosovës, në të cilën do të kërkohej shkarkimi i Albin Kurtit, i cili, edhe pse deklarohet politikan i majtë, megjithatë, ai po sorollatet nëpër resorë luksozë pa qarë kokë për qytetarët e helmuar”, shkruan ndër të tjera ai.

Postimi i plotë i tij:

KURTI IK!

Partitë në pushtet, opozita, shoqëria civile, si dhe qytetarët e vendit, të organizojnë një protestë të përbashkët gjithë-popullore para ndërtesës së Qeverisë së Kosovës, në të cilën do të kërkohej shkarkimi i Albin Kurtit, i cili, edhe pse deklarohet politikan i majtë, megjithatë, ai po sorollatet nëpër resorë luksozë pa qarë kokë për qytetarët e helmuar. Rrjedhimisht, deri në organizimin e zgjedhjeve, të kërkohet zëvendësimi i tij me Besnik Bislimin, i cili u “sakrifikua” në atë masë për vendin saqë shkoi në komision parlamentar drejtpërdrejtë nga klinika, pas trajtimit me infuzion, dhe pastaj edhe udhëhoqi mbledhjen e kabinetit qeveritar!

Raportuesja për Kosovën në Parlamentin Europian, Viola von Crammon ka komentuar deklarimet e ish-kryetarit të gjyqtarëve të EULEX-it, Malcolm Simons, i cili pretendon se ky mission ishte i korruptuar dhe politik.

Në një intervistë për Info Magazine, akuzat e tilla nga Simons, i cilëson të habitshme, dhe se duhet mësuar në detaje se cili tashmë është motivi i tij pas këtyre deklarimeve.

”Eshtë intersant që dikush qe ka punuar në këtë institucion dhe pastaj e ka lënë ate para 4 viteve të dalë me këto akuza katër vite pas. Kështu që në lidhje me deklarimin e tij ka shumë pyetje që mund të shtrohen tash”.

”Së pari pse nuk ka dalë me këto deklarime më parë?, cili është motivi i tij tash?, a ka të bëjë me hetimet që u bënë kundër tij nga misioni i EULEX-it?, dhe pse iu drejtua deputetëve të Kuvendit të Kosovës, ndoshta për këtë do të thoja shkaku i imunitetit të tij dhe mua më duket pak e dyshimtë dhe mbi të gjitha një sulm i madh drejtuar institucioneve të BE-së”.

Ndërkaq nëse deklarimi i Simons, mund të ketë lidhje me proceset gjyqësore ndaj ish-krerëve të UÇK-së që ndodhen në Gjykatën Speciale, ajo shprehet:

”Deri tash nga ajo qe kemi parë, deklarimet e tij, akuzat e tij u bënë për konsum publik”.

”Asnjë prej tyre nuk mund të konfirmohet nga misioni i EULEX-it dhe mendoj së është thjeshtë e papranueshme që një person i tillë qe ka një agjende politike të akuzojë misionin e EULEX-it, në këtë mënyrë të deleguar dhe të ndjeshme në këtë kohë kur ka zhvillime në Dhomat e Specializuara të Kosovës për të nënvlerësuar këtë proces atje, por po ashtu edhe për vet institucionin e BE-së”.

”Dhe ne nuk e kemi idenë se çka mund të sjellë kjo, porosia e ime për deputetët kosovarë do të ishte që të mendojnë dy herë dhe të caktojnë një takim nëse ka nevojë, që të gjejmë mënyra për ta zgjedhur këtë, dhe jo ta përdorin këtë për qëllime politike dhe për të hedhur poshtë gjithë hetimet e pavarura në institucionet e Drejtësisë”.

”Së paku koha do të japë më shumë mundësi për t’u deklaruar në lidhje me këto, që menjëherë pas arrestimit të z Thaçi, Veseli e Selimi nga Dhomat e Specializuara doli kërkesa e Simons për të raportuar në Kuvendin e Kosovës, kështu po kjo lë hapësirë për shumë spekulime”.

A gabuan deputetët e Kuvendit të Kosovës që ia miratuan kërkesën Simons-it, për të raportuar në parlament?

”Do të thosha që po”.

”Është për keqardhje që pati një dëgjim publik. E udhës do të ishte që të ketë një raportim të fshehtë që Kryetari i Kuvendit [Glauk Konjufca] me shumicën në parlament, ta rregullonin këtë dhe jo në këtë mënyrë siç ndodhi, sepse po e them prapë do të përdoret prej njerëzve që kanë interes për të shtyrë proceset gjyqësore apo edhe për të dëmtuar institucionet e BE-së”.

Përkundër lehtësimit të masave antiCOVID, ministri i Shëndetësisë, Arben Vitia ka deklaruar se është e pashmangshme një valë e re e pandemisë në fund të muajit gusht. Për këtë ai ka kërkuar edhe njëherë nga qytetarët që të vaksinohen në mënyrë që varianti delta të mos ketë pasoja të mëdha për shëndetin dhe ekonominë e vendit.

Në një konferencë për media të mbajtur menjëherë pas mbledhjes së qeverisë, Vitia tha se varianti “Delta” është shumë i rrezikshëm dhe evidentimi i 2 rasteve në Kosovë paraqet rrezik për përhapjen e shpejt të tij.

“Varianti delta është një variant jashtëzakonisht i rrezikshëm, varianti delta tani po dominon edhe disa pjesë të mëdha të Evropës perëndimore. Me paraqitjen e dy rasteve të ne, natyrisht se ne kemi frikën që ky variant shumë shpejt do të dominojë edhe tek ne. Pavarësisht masave që i marrim, përhapja e variantit delta është aq e frikshme sa të gjitha masat konvencionale që janë përdorur deri tani kanë treguar se përkundër që mund ta ngadalësojnë ritmin e përhapjes nuk mund ta ndalin atë. Kjo është arsyeja pse ka tash e sa javë që bëjmë apel të gjithë qytetarëve tonë që vetëm vaksinimi është alternativa. Një valë e re e pandemisë në muajt fund gusht, shtator dhe tetor në çfarëdo varianti është e pashmangshme, në çfarë do varianti, me çfarë do masa mund të ngadalësohet, por është e pashmangshme. Lajm i mirë që vije nga shtetet të cilat kanë kryer me sukses vaksinimin tregon se të gjithë ata që janë vaksinuar janë të mbrojtur nga varianti delta dhe ata pak persona të cilët janë infektuar përkundër vaksinimit me variantin delta rastet fatale janë pothuajse të papërfillshme, kurse rastet e rënda janë jashtëzakonisht të vogla”, tha Vitia.

Para gazetarëve, Vitia foli edhe për situatën e krijuar në Deçan, ku ende ka qytetarë që po kërkojnë ndihmë mjekësore si rezultatet i helmimit, të cilin nuk dihet ende se çka e ka shkaktuar.

Ai potencoi edhe njëherë se janë marrë disa mostra koprokulturë nga disa pacientë, të cilat kanë rezultuar negative dhe për këtë arsye janë përgatitur edhe një numër tjetër i mostrave për analiza më specifike, të cilat do të dërgohen jashtë shtetit.

Për çdo zhvillim tjetër, Vitia tha se do të informojnë qytetarët me kohë.

“Këto mostra të gjitha do të dërgohen për analiza specifike, të cilat për fat të keq një pjesë e tyre nuk bëhen tek ne. Besoj që gjatë kësaj jave do të dërgohen në njërën nga vendet e rajonit, mirëpo në momentin kur dërgohen dhe të marrim rezultatet, ashtu siç ju thash, informacioni do t’iu jepet të gjithë qytetarëve”, tha ai./KP

Në konferencën e sotme mbi ecurinë e çështjes për Hysni Gucatin dhe Nasim Haradinaj, gjyqtari i procedurës paraprake, Nicolas Guillou ka njoftuar se dosja e kësaj çështjeje do të kalojë para trupit gjykues të premten.

Mbrojtja e Nasim Haradinaj ka thënë se i duhet më shumë kohë për të qenë gati, por që klienti i tij është i gatshëm për procesin gjyqësor. Më tej, mbrojtja ka ngritur çështjen edhe të disa materialeve që ende nuk janë përkthyer në gjuhën shqipe.

Në të gjashtën konferencë nërastin e Hysni Gucatit dhe Nasim Haradinaj, gjykatësi i procedurës paraprake, Nicolas Guillou ka treguar për ecurinë e rastit dhe kalimin e dosjes së çështjes në trupin gjykues.

“Më 5 korrik ZPS dorëzoi aktakuzën, më 12 korrik avokatët e zotëri Gucatit dhe Haradinaj dorëzuan dosjet paraprake përkatëse. Për sot kam qëllim që të shqyrtojmë ecurinë e çështjes përpara se t’i kalohet dosja e çështjes, trupit gjykues. Afatin për të cilin e kam vendosur me urdhrin për kalendarin, data 16 korrik. Në veçanti dëshiroj të diskutojmë për nxjerrjen e materialeve, për ecurinë e hetimeve dhe për kalimin e dosjes gjyqësore dhe për gatishmërinë për procesin gjyqësor”, ka theksuar ai.

Avokati i Nasim Haradinajt, Toby Cadman, ka thënë se mbrojtjes i duhet ende kohë që të përgatitet për procesin gjyqësor, ndërkohë që shtoi se Haradinaj mezi pret të fillojë.

“Do të na duhet edhe pak më shumë kohë që të jemi gati për të kaluar në procesin gjyqësor. Sigurisht ne nuk kërkojmë që të vonojmë kohët më tej. Sigurisht nga ana e Haradinaj, që u bën 10 muaj që ndodhet në paraburgim. Ai mezi pret që gjërat të ecin përpara”, u shpreh ai.

Gjatë seancës është bërë e ditur, që vizitat e familjeve mund të fillojnë që nga nesër. Mbrojtja e Nasim Haradinaj, Toby Cadman ka thënë se i njëjti që dhjetë muaj nuk ka pasur mundësi të takohet me familjarët. Më tej, ai ka përmendur edhe një herë çështjen e materialeve të papërkthyera.

“Ne do të bëjmë një parashtrim me shkrim lidhur me ato dokumente të cilat konsiderohen si ta përkthyera ende deri më tani. Ne e kuptojmë që ka një prioritet lidhur me këto çështje, por nuk mund të kuptojmë ecet përpara me këtë qëndrim dhe nuk mund të vazhdojmë nëse nuk do t’i vendoset në dispozicion të akuzuarit në gjuhën që ai flet dhe kupton. Ne e kuptojmë nuk bëhet fjalë për një shtetas të huaj që del para një gjykate të huajë, është shtetas i një vendi i cili del para gjykatës së shtetit të tij”, tha ai.

Por, prokurori tha se këto arsyeje nuk janë të vlefshme.

“Këto arsyeje nuk janë të vlefshme. Nuk është e qartë për ZPS së çfarë kërkesash i referohet mbrojtja e Haradinajt, e cila mbetet e pa plotësuar, ne mendojmë që janë plotësuar të gjitha kërkesat. Do të plotësojmë kërkesat të cilat janë të pa plotësuara. Për këtë arsyeje ne mendojmë që nuk ka asnjë pengesë që kalimi i dosjes të bëhet shpejt me 16 korrik… Parashikojmë që gjykimi të filloj në fillim të nëntorit, por siç e thash në momentin që ka kërkohet të jemi gati, do të jemi gati ”, ka deklaruar ai.

Më tej, mbrojtja e Haradinajt ka bërë të ditur që janë duke bërë disa hetime në bashkëpunim edhe me Republikën e Kosovës, po ashtu edhe disa intervistomë në Serbi.
“Ka disa gjëra që duhet t’i hetojmë më tej dhe do të vazhdojmë të bëjmë këtë punë. Kemi një numër kërkesash që presin t’i bëjmë. I kemi bërë ministrive, agjencive të ndryshme në Republikën e Kosovës, me të cilat kërkojmë informacione, kemi kërkuar gjithashtu dhe do të vazhdojmë të ndjekim bashkëpunimin. Kërkojmë të intervistojmë një numër personash të Republikës së Serbisë për shkak të përfshirjes së tyre në këto çështje. Nëse nuk kemi bashkëpunimin e Republikës së Serbisë, siç presim, për shkak të faktit që ekziston gjendje lufte mes Serbisë dhe Kosovës duhet të kthehemi përsëri këtu për të kërkuar ndihmë”, u shpreh ai.

Për dy çështje të cilat i ka përmendur mbrojtja e Haradinaj është vijuar me seancë private. Për këtë Cadman ka kërkuar nga OSBE që të ketë monitorim të pavarur të procedurave.

“Do të bëhet një kërkesë që provat e prokurorisë do të mbahen pas dyerve të mbyllura. Ne jemi të shqetësuar me atë që u ngrit në seancë private, për drejtësinë e procesit. Ne do të kërkojmë që OSBE apo një organ tjetër, në këtë bazë-pozitë të kryej një monitorim të pavarur të procedurave, sepse ne jemi të shqetësuar për mënyrën se si po procedohet”, ka deklaruar Codman.

Drejtuesit e OVL së UÇK-së, Hysni Gucati dhe Nasim Haradinaj janë në paraburgim që nga viti i kaluar. Ata po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.

Gucati dhe Haradinaj më 25 shtator, u arrestuan si të dyshuar nga Zyra e Prokurorit të Specializuar, me mbështetjen e EULEX-it dhe policisë së Kosovës dhe u transferuan në objektin e paraburgimit të Dhomave të Specializuara të Kosovës në Hagë. Paraqitja e parë e Haradinaj si i dyshuar u mbajt më 29 shtator dhe paraqitja e parë e Gucati si i dyshuar u mbajt më 1 tetor.

Qeveria e Kosovës ka votuar sot për masat e reja kundër-Covid-19.

Ndër masat e reja është edhe lejimi i aktivitetit të klubeve të natës deri në orën 01:00.

Këto klube sipas vendimit të MSH-së, duhet të shfrytëzojnë vetëm 50% të kapacitetit në ambiente të mbyllura, teksa 70% të kapacitetit në ambientet e hapura.

Përveç klubeve të natës, qeveria sot ka vendosur edhe për zgjatjen e orarit të dasmave deri në orën 01:00, dhe që ato të bëhen me 300 të ftuar.

559 aplikacione i ka pranuar Komisioni Qendror i Zgjedhjeve nga qytetarët që jetojnë në diasporë për zgjedhjet e 17 tetorit.

KQZ deri më tani i ka aprovuar 523 aplikacione ndërsa 36 të tjera janë refuzuar.

Shtetasit e Kosovës që jetojnë dhe punojnë në diasporë që duan të votojnë në zgjedhjet lokale kanë të drejtë të regjistrohen deri më datën 18 gusht.

Kështu bëri të ditur për Klankosova.tv zëdhënësi i Komisioni Qendror i Zgjedhjeve Valmir Elezi.

“Periudha e aplikimit për t’u regjistruar si votues jashtë Kosovës, e cila ka filluar më 10 korrik, është duke vijuar. Kjo periudhë përfundon më 18 gusht”.

“Sipas të dhënave të fundit, deri më 13 korrik, kemi pranuar 559 aplikacione për regjistrim. Pas shqyrtimit të tyre nga shërbimi votues janë aprovuar 523 aplikacione, ndërsa 36 të tjera jo”.

Elezi theksoi se ata që arrijnë të rrezikohen suksesshëm do të mund të votojnë nga data 15 shtator.

Ai shtoi se fletvotimet duhet të arrijnë në adresë të KQZ-së deri më 15 tetor.

“Të gjithë personat që arrijnë të regjistrohen suksesshëm si votues jashtë Kosovës do të mundet të votojnë në një fazë të mëvonshme përmes postës, e cila fillon më 15 shtator, ndërsa fletëvotimet në adresë të KQZ-së duhet të arrijnë deri më 15 tetor”.

Qeveria e Kosovës ka ndarë 4.5 milionë euro për blerjen e dronëve për Ushtrinë e Kosovës.

Vendimi është marrë me kërkesë të ministrit të Mbrojtjes, Armend Mehaj dhe me propozimin e sotëm në qeveri të ministrit të Financave, Hekuran Murati.

Mjetet do të ndahen nga ministria e Financave, mjetet e destinuara për rimëkëmbje ekonomike dhe do t’i transferohen ministrisë së Mbrojtjes.

E gjithë shuma për blerjen e dronëve shkon deri afro 12 milionë dollarë, teksa e njëjta do të paguhet me këste.