Policia e Kosovës ditët e fundit ka shpeshtuar apelet, thirrjet për qytetarët për respektim të rregullave në komunikacion.

Pasi që numri i aksidenteve ka filluar të shënoj rritje, kështu bëhet e ditur edhe përmes raporteve ditore të policisë.

Në çdo raport ditor janë të regjistruar mbi 30 aksidente trafiku.

Vetëm gjatë ditës së premte në Kosovë kanë ndodhur 85 aksidente trafiku, asnjë prej tyre fatmirësisht nuk ka përfunduar me fatalitet, ndërsa 22 të tjera me persona të lënduar dhe 63 me dëme materiale.

Ndërsa brenda këtyre katër ditëve në vendin tonë kanë ndodhur 269 aksidente trafiku.

Gazeta SuharekaOnline ka grumbulluar statistikat e Policisë për aksidente trafiku prej datës 13 korrik deri më 16 korrik.

Ministri i Mbrojtjes, Armend Mehaj, ka qëndruar edhe sot për vizitë në Qendrën Kryesore të Mjekësisë Familjare në Deçan.

Mehaj përmes një postimi në Facebook, thotë se në Deçan qëndroi për të parë nga afër punën e stafit mjekësor të kësaj qendre dhe pacientët.

Ai shprehu mirënjohje për mantelbardhët që kanë punuar me përkushtim gjatë kësaj periudhe, ndërsa tregon se është njoftuar që gjendja po i kthehet normalitetit dhe qytetarët nuk kanë nevojë për shqetësim.

Postimi i plotë:“Bashkëvendas të mi të dashur deçanas,Qytetarë të dashur të vendit tim,Edhe pse çdo çast jam i informuar me situatën, sot, isha në vizitë në Qendrën Kryesore të Mjekësisë Familjare në Deçan, për të parë nga afër punën e stafit mjekësor të kësaj qendre dhe pacientët në trajtim. Drejtorit të Drejtorisë së Shëndetësisë, Musa Berisha dhe të gjithë stafit të QKMF-së në Deçan i shpreha vlerësimin tim më të lartë për shërbimin vetëmohues të tyre në përmbushjen me përkushtimin dhe dinjitetin më të lartë, detyrën e shenjtë të mantelbardhit.Gjatë tërë kohës pata në dorë librin “Lufta kundër vdekjes” të dhuruar nga vet autori, drejtori Musa Berisha, këtij burri me një jetë të tërë në shërbim të Lirisë së vendit tonë.E luftën, me këtë emergjencë, e fituan edhe ky ekip i mrekullueshëm, të cilët më njoftuan se gjendja është gati në normalitet dhe se qytetarët nuk kanë nevojë më të shqetësohen.Unë kam marrë të gjitha masat, që të gjitha nevojat dhe kërkesat e adresuara nga Shtabi Emergjent i Komunës, do të realizohen në kohën e duhur me të gjitha kapacitetet e FSK-së në dispozicion”.

Dosja e Hysni Gucatit dhe Nasim Haradinajt në Gjykatën Speciale edhe zyrtarisht i është transmetuar Trupit Gjykues nga gjyqtari francez i Procedurës Paraprake, Nicollas Guillou.

Katër gjyqtarët e trupit gjykues në rastin e Hysni Gucatit e Nasim Haradinajt kanë në dorë tashmë dosjen e ish-krerëve të Organizatës së Veteranëve të Luftës së UÇK-së. Kjo nënkupton edhe hapin final për nisjen e gjykimit ndaj tyre.

Brenda 30 ditësh, siç parashihet me rregullore, gjykatësi paraprak do të dorëzojë tek trupi gjykues materialet si më poshtë:

(a) Aktakuza siç është konfirmuar;

(b) Të gjitha regjistrat dhe materialin e paraqitur përmes sistemit elektronik të menaxhimit të gjykatës;

(c) Çdo material dëshmues i marrë që nuk i nënshtrohet paragrafit (1) (b);

(d) Çdo korrespondencë tjetër në lidhje me çështjen e paditur në Njësinë e Menaxhimit të Gjykatës;

(e) Një dokument të dorëzimit që përmbledh: (i) argumentet e palëve dhe, kur është e zbatueshme, avokatin e viktimave mbi faktet dhe ligjin në fuqi; (ii) pikat e marrëveshjes; (iii) një listë të urdhrave dhe vendimeve të marra nga Gjyqtari i Procedurës paraprake; (iv) materialin dëshmues të prodhuar nga secila Palë; (v) sugjerime për numrin dhe rëndësinë e dëshmitarëve që do të thirren; (vi) çështjet e kundërta dhe ligji që janë në diskutim; (vii) gjendja e avancimit të procesit të zbulimit; (viii) të gjitha takimet me Palët; dhe (ix) çdo çështje tjetër që ka mbetur e pazgjidhur;

(f) Çdo kërkesë dhe vendim në lidhje me zbulimin; dhe

(g) Çdo material tjetër që ka të bëjë me çështjen.

Lajmi.net raportoi dje se në Trupin Gjykues në këtë rast është caktuar një gjyqtar i cili ishte shumë i përmendur në raportet e ish-kryetarit të gjyqtarëve të EULEX-it, Malcolm Simmons, për ndikime në raste kundër krerëve të UÇK-së. Bëhet fjalë për Charles Smith.

Charles Smith është emër i njohur për opinionin kosovar. Amerikani për tri vite ka punuar në Kosovë, në kuadër të misionit të EULEX-it. Aty ai njëherë u zgjodh kryetar dhe nënkryetar i Kuvendit të Gjykatësve të EULEX-it, më 2011-2012 si dhe 2013.

Opinionisti Blerim Shala në kolumnen e tij të radhës për klankosova.tv i ka listuar katër të vërtetat që ai konsideron se ekzistojnë rreth dialogut Kosovë-Serbi.

Sipa Shalës, e vërteta e parë është që nuk ka shtet dhe qeveri të Perëndimit e cila nuk e di se si do të përmbyllej dialogu i Brukselit.

Ndërkaq, ai thotë që e vërteta e dytë është që asnjë prej këtyre shteteve perëndimore nuk mund ta parashohë afatin kohor brenda të cilit marrëveshja Kosovë-Serbi do të nënshkruhej.

E vërtetë e tretë, sipas Shalës, “kryeqendrat e Perëndimit, pra, Ëashingtoni, Brukseli, Berlini, Parisi, Londra dhe Roma, aq sa nuk dinë se kur do të mund të arrihet Marrëveshja në mes të autoriteteve më të larta të Prishtinës dhe Beogradit”.

E vërteta e katërt dhe finale Shala thotë se është që “kryeqendrat e Perëndimit, teksa e dinë fare qartë se cili duhet të jetë elementi kyç i Marrëveshjes Gjithpërfshirëse në mes të Kosovës, apo, njohja reciproke (zatën, dy Administratat e fundit amerikane, të Presidentëve Biden dhe Trump, e kanë artikuluar edhe publikisht këtë qëndrim), dhe derisa e dinë që sa më parë që është e mundur Kosova dhe Serbia duhet ta nënshkruajnë Marrëveshjen për normalizimin e marrëdhënieve në mes të këtyre dy shteteve, nuk e kanë aspak të qartë se si kryengociatorët e Prishtinës dhe Beogradit do të mund të arrijnë tek epilogu i bisedimeve”.

Prokuroria Themelore në Pejë ka njoftuar të shtunën se janë identifikuar dy serbët të cilët ishin parë në Komunën e Deçanit pak ditë para helmimit të mijëra qytetarëve të kësaj komune nga uji i pijes.

Në një njoftim për media, kjo Prokurori ka thënë se po punohet që të verifikohet nëse ata kishin lidhshmëri eventuale me situatën e krijuar ditëve të fundit në këtë komunë.

Identifikimin, bazuar në pamjet e ofruara nga kamerat e sigurisë, Prokuroria ka thënë se e ka bërë në koordinim me Agjencinë e Kosovës për Inteligjencë.

Ditë më parë për dy serbët për të cilët u raportua në vend, foli edhe presidenti serb, Aleksandar Vuçiq, që deklaroi se ka njohuri për lëvizjen e tyre.

“Prokuroria Themelore në Pejë, njofton opinionin publik se, lidhur me situatën e krijuar ditëve të fundit në komunën e Deçanit, pasi janë pranuar informata se para disa ditësh janë parë duke lëvizur në drejtim të Manastirit të Deçanit, dy persona të nacionalitetit serb, menjëherë janë ndërmarrë veprime me autorizimin e Kryeprokurorit të Prokurorisë Themelore të Pejës në koordinim me Agjencinë e Kosovës për Inteligjencë (AKI) dhe Drejtorinë Rajonale të Policisë së Kosovës në Pejë, ashtu që është bërë identifikimi i personave që shihen në ato fotografi dhe do të verifikohet nëse kanë lidhshmëri eventuale me situatën e krijuar ditëve të fundit në komunën e Deçanit”, thuhet në njoftim të Prokurorisë Themelore të Pejës.

Bekim Jashari do të jetë kandidat edhe për një mandate në krye të Skenderajt.

Këtë e ka bërë të ditur vet Jashari me anë të një postimi të gjatë në Facebook.

Në të njëjtin ai ka shpalosur disa nga të arriturat e tij në qeverisjen e komunës.

Postimi i plotë i tij:

Të dashur bashkëqytetarë të komunës sonë,

Të dashura familje të dëshmorëve, veteran e invalid të UÇK-së,

Të dashur të rinj të komunë sonë,

Nëna, motra dhe vëllezër,

4 vite me parë mora një vendim jo të lehtë për mua dhe familjen time, inkuadrimi im në jetën politike në rrethanat në të cilat po kalonte shteti ynë nuk ishte i lehtë, por duke qenë pjesë e jetës në komunën tonë, duke parë problemet dhe sfidat e mëdha me të cilat po ballafaqohej komuna jonë, duke qenë i vendosur për t’i shërbyer vendit tim dhe qytetarëve pa asnjë dallim, me kërkesë të qytetarëve pranova që të kandidoj për kryetar të komunës sonë, në zgjedhjet lokale të vitit 2017.

Përkrahja plebishitare e juaj për mua dhe qeverisjen time ishte obligimi im që të punoj më përkushtim maksimal për një jetë më të mirë për secilin qytetar të komunës sonë, për çka i jam falënderues përjetë secilit prej jush.

Qeverisjen time lokale në udhëheqje të qytetarëve të Skenderajt e fillova me betimin që bëra pranë varreve të familjarëve të mi, gjyshit, Shaban Jashari, Komandantit Legjendar të UÇK-së, Adem Jasharit, babushit Hamëzes dhe dëshmorëve të kombit në Kompleksin Memorial të Dëshmorëve në Marinë.

Pranë tyre dhashë betimin që çdo ditë, javë, muaj e vit do të angazhohem t’i shërbej secilit qytetar dhe ngritjes së mirëqenies së tyre, duke u angazhuar për një qeverisje të mirë dhe transparente.

Siç e dini, gjatë fushatës parazgjedhore të vetmin premtim që kam dhënë ka qenë qeverisja transparente dhe me duar të pastra, përtej kësaj falë bashkëpunimit që kemi ndërtuar dhe me përkrahjen edhe të nivelit qendror dhe donatorëve kemi arritur që krahas instalimit të një qeverisje që në qendër ka qytetarin, respektimin e shprehjes se lirë e mendimit ndryshe kemi arritur që të realizojmë shumë projekte infrastrukturore në shumë fusha dhe reforma në administratë që kanë ndikuar në avancimin e shërbimeve për qytetarët.

Angazhimin tim si kryetar i komunës e kam filluar me rivarrimin e dëshmorëve të kombit tonë, falë gjakut të së cilëve sot jetojmë të lirë e të pavarur. Proces ky i realizuar me sukses, duke krijuar kështu një vend dinjitoz ku pushojnë së bashku dëshmorët tonë.

Pandemia COVID-19 solli pasoja të mëdha dhe pamundësoi realizimin e projekteve të parapara, por pavarësisht kësaj ne nuk jemi ndalur, kemi realizuar e po realizojmë projekte në secilin sektor, për të ngritur stadartin e jetës së qytetarëve të Skenderajt.

Gjatë mandatit tim qeverisës, së bashku me donatorë dhe qeverinë qendrore kemi arritur të bëjmë më ujë të pijshëm 12 fshatra kurse në proces e sipër i kemi edhe 12 tjera.

Për të pasur furnizim të rregullt me ujë të pijshëm, këtë vit fillon projekti milionësh i ndërtimit të bazenave në Brus dhe ndërtimi i gypit kryesor me kapacitet të madh, Brus- Skenderaj. Për këtë projekt si komunë kemi kryer procesin e shpronësimit të pronave.

Krahas kësaj jemi në rrugë të drejtë për fillimin e realizimit të projektit tonë strategjik, ndërtimi e pendës së Kuqicës, që do të sigurojë ujë të pijshëm, ujitje për bujqësi dhe mundësi të zhvillimit të turizmit në vendin tonë.

Kemi bërë investime infrastrukturore në institucionet tona shëndetësore si dhe furnizim me pajisje e medikamente të nevojshme mjekësore.

Me qëllim të përkrahjes së grave lehona që nga fillimi i këtij viti kemi filluar ndarjen e subvencioneve me nga 100 euro për secilën lindje.

Prioritet të veçantë i kemi dhënë zhvillimit të bujqësisë, përkrahjes së bujqve, ku kemi bërë 10 fishimin e buxhetit për bujqësi nga 48 mijë sa ishte në vitin 2018 sipas buxhetit të miratuar në 2017, në rreth 500 mijë euro në vitin 2021, bashkë me donatorët.

Që nga ardhja në krye të komunës kemi përkrahur me grante të ndryshme mbi 1000 fermer të komunës sonë kurse deri në fund të vitit do të përkrahim edhe 500 tjerë.

Kemi asfaltuar mbi 100 km rrugë dhe kështu planifikojmë që deri në fund të këtij viti të përfshijmë edhe ato rrugë në fshatra e lagje që kanë mbetur pa u asfaltuar.

Krahas asfaltimit të rrugëve kemi ndërtuar e po ndërtojmë trotuare e po ashtu edhe ndriçim publik në qytet dhe në bashkësi lokale.

Kemi ndërtuar e po ndërtojmë rrjetin e kanalizimit në çdo bashkësi lokale të komunës sonë, ku deri në fund të vitit synojmë të përfundojmë rrjetin e kanalizimit në shumicën e fshatrave kurse vitet në vijim do të fokusohemi në ndërtimin e gropave të reja septike, rritjen e kapacitetit të impiantit në Llaushë dhe ndërtimin e impianteve të reja për trajtimin e ujërave të zeza.

Kemi ndërtuar shkolla, salla sportive e poligone sportive për të rinjtë tonë për zhvillimin e aktiviteteve të tyre sportive.

Studentët e komunës sonë po i përkrahim për çdo vit me bursa kurse organizatat jo qeveritare dhe klubet sportive me mjete financiare për realizimin e aktiviteteve të tyre.

Në fokus të veçantë, gjatë qeverisjes sime e kam vendosur edhe mjedisin, duke bërë kështu largimin e deponive ilegale në zona urbane e rurale, pastrimin e lumenjve e po ashtu duke i pajisur edhe ekonomitë familjare me shporta për hedhjen e mbeturinave ku deri në fund të këtij viti synojmë të përfshijmë mbi 90 % të territorit të komunës sonë.

Po ashtu kam realizuar premtimin tim lidhur me mësimdhënësit ku kemi ndarë shujta me vlerë 800 mijë euro, dhe me këtë jemi bërë komuna e parë dhe shembull për komunat tjera kurse nga viti që vjen do të fillojmë të mbulojmë edhe shujtat për nxënësit e ciklit të ulët.

Jemi komuna e parë që kemi bërë miratimin e Hartës Zonale dhe PZHK-së sipas legjislacionit të ri të planifikimit hapësinor. Me këtë kemi kompletuar legjislacionin në fushën e planifikimit hapësinor.

Krahas shumë projekteve infrastrukturore të shumta që kemi realizuar kemi arritur që të përfundojmë procedurat për themelimin e parkut të biznesit si gjenerator i punësimit të të rinjve tonë.

Të dashur qytetarë, gjatë këtij mandati kam vizituar të gjitha familjet e dëshmorëve të komunës sonë si dhe kam bërë homazhe tek varri i secilit dëshmor e martir të komunës sonë.

Nga këto vizita e homazhe kam marrë mesazhe të qarta që ne duhet të jemi të bashkuar për të jetësuar amanetin e dëshmorëve tonë sepse ata nuk kanë rënë që ne të jemi të lirë e të na kaplojë varfëria e përçarja por ata kanë rënë që ne te jemi të bashkuar për të krijuar një jetë më të mirë për secilin qytetarë të vendit tonë.

Të dashur qytetarë, nën betimin për të vazhduar qeverisjen time transparente dhe me duar të pastra, për të vazhduar me projekte të tilla edhe më madhore, për të arritur zhvillim ekonomik, mirëqenie, punësim të të rinjve, infrastrukturë moderne, furnizim të rregullt me ujë të pijshëm, trajtim të ujërave të zeza, mbrojtje të mjedisit e planifikim të duhur hapësinor, kam vendosur që:

Të kërkoj nga ju edhe një mandat qeverisës si kryetar i Skenderajt, me vendosmërinë më të madhe për t’iu shërbyer edhe për 4 vitet e ardhshme.

Ditët në vijim do të takohemi në ceremoninë zyrtare në të cilën do të shpalosim vizionin tonë për Skenderajn në katër vitet e ardhshme.

I juaji Bekim Hamëz Jashari.

Rreth 150 punëtorë të Telekomit të Kosovës marrin paga pa shkuar fare në punë, ndonëse shoqëria civile po kërkon hetim nga prokuroria e shtetit për këtë dukuri korruptive.

Mësohet se shumica prej këtyre punëtorëve për një kohë të gjatë madje gjenden edhe jashtë shtetit, dhe paguhen nga Telekomi.

Burime të KosovaPress thonë se të punësuarit në fjalë janë familjarë dhe të afërm të politikanëve, të ish-deputetëve, ish-ministrave dhe të tjerë të afërm me ndikim nga disa subjekte politike.

“Një numër i madh, prej rreth 150 njerëzish, vazhdojnë ta dëmtojnë buxhetin e Telekomit, duke marrë paga për çdo muaj nga kjo kompani publike, ani pse nuk punojnë në këtë ndërmarrje dhe nuk gjenden as edhe në Kosovë. Këta njerëz janë të afërt me ish-deputet, ish-ministra dhe të afërt të anëtarëve me ndikim në subjektet politike”, thotë një burim për KP-në.

Në anën tjetër zyrtarë të menaxhmentit të Telekomit theksuan për KosovaPress se ka pasur sinjalizime për keqpërdorime të mundshme të kësaj natyre, por me një afat optimal menaxhmenti i ri në Telekom do të merret me prioritet me këtë çështje dhe do të marrë masat e nevojshme në të gjitha rastet.

“Duke qenë se nuk ka pasur sinjalizime nga departamentet, të cilat janë përgjegjëse për evidentimin e prezencës në punë, por duke pranuar se ka pasur sinjalizime nga kanale të tjera për keqpërdorime të mundshme të kësaj natyre, në një afat optimal menaxhmenti (i ri) do të merret me prioritet me këtë çështje dhe do të marrë masat e nevojshme në të gjitha rastet, kur gjejmë fakte për shkelje të kësaj natyre, për të cilat po interesoheni ju”, thotë në një përgjigje me shkrim Fadil Lepaja nga Departamenti për Relacione me Publikun në Telekomin e Kosovës.

Për këto pretendime se deri ku kanë shkuar hetimet nga Drejtoria për Hetimin e Krimeve Ekonomike, Policia e Kosovës nuk është përgjigjur për KosovaPress.

Edhe kryetari i Sindikatës në Telekom, Lamih Balaj ka pranuar se është një numër i madh i personave që kanë kontratë, por që nuk kanë qenë asnjë ditë në zyrat e Telekomit.

“Kjo është shumë e vërtetë. Ka njerëz që ndoshta jetojnë edhe jashtë, dhe saktësisht nuk mundem me thënë në numër. Por, unë besoj që numri është më i madh se sa që e theksuat ju i atyre që ndoshta marrin pagë dhe nuk e dinë se ku është Telekomi i Kosovës. Kjo është urgjencë e cila bashkërisht besoj që me menaxhmentin aktual, me Ministrinë e Ekonomisë, por edhe në Zyrën e Kryeministrit për të kërkuar që të shkohet me një ristrukturim të mirëfilltë”, thotë ai.

Balaj po kërkon që të paditen të gjithë ata persona që kanë keqpërdorur Telekomin e Kosovës.

“Të gjenden të gjithë ata shkaktarët dhe ata njerëz të cilët kanë marrë paga në Telekomin e Kosovës pa qenë asnjëherë në punë. Ata njerëz nuk e kanë vendin në Telekomin e Kosovës, ndaj tyre ishte dashur me u bërë edhe një padi në gjykatë për keqpërdorim të pozitës zyrtare për kthimin e atyre mjeteve të cilat i kanë marrë kundërligjshëm prej Telekomit të Kosovës. Se kush i ka mbrojtur dhe kush i ka sjellë, janë burimet njerëzore që duhet me i gjetur dhe kush janë ata persona”, thotë ai.

Kjo dukuri po kritikohet edhe nga shoqëria civile.

Florent Spahiu nga Instituti Demokratik i Kosovës (KDI) punësimet e tilla në Telekom po i cilëson si korrupsion të pastër, andaj kërkon kthimin e mjeteve të përfituara kundërligjshëm dhe sjelljen e tyre para drejtësisë.

“Kjo është jashtë çdo norme. Për këta njerëz, unë konsideroj që menaxhmenti duhet të vendoset para përgjegjësisë për keqpërdorim të parasë publike meqë Telekomi sikur në çdo ndërmarrje është para publike. Megjithatë, edhe ata persona që kanë përfituar duhet të ndiqen për përfitim të kundërligjshëm… Ligji është më i fuqishëm se gjithë deputetë bashkë e gjithë ministrat e ish-ministrat. Pra, para ligjit duhet të jemi të gjithë të barabartë dhe konsideroj që për këtë rast Prokuroria e shtetit do të duhej me hapur hetim dhe me i sjellë para përgjegjësisë edhe ata persona që i kanë punësuar këta dhe ata persona që kanë përfituar në emër të këtyre njerëzve, për shkak se duket që është korrupsion i pastër”, thotë Spahiu.

Pavarësisht kritikave të vazhdueshme ndër vite nga partitë opozitare dhe shoqëria civilenumri i të punësuarve vazhdimisht është rritur në Telekom, e që është rreth 2 mijë e 400.