Qeveria e Kosovës do të mblidhet sot për të diskutuar rreth masave anti-Covid që do të vlejnë ditën e zgjedhjeve, më 17 tetor.

Nga burime brenda Qeverisë së Kosovës, Express mëson se Qeveria pritet të marrë vendimin për heqjen e kufizimit të lëvizjes për personat që do të angazhohen zyrtarisht në organizimin dhe mbarëvajtjen e procesit zgjedhor.

Personat e angazhuar në ditën e zgjedhjeve, më 17 tetor, do të lejohen të lëvizin edhe pas orës 22:00, kur është e ndaluar për qytetarët tjerë.

Heqjen e kufizimit të lëvizjes e ka kërkuar sot edhe kryetari i Komisionit Qendror të Zgjedhjeve, Kreshnik Radoniqi.

Radoniqi ka thënë se kanë bërë kërkesë në Qeveri për heqjen e përkohshme të orës policorë, për 48 orë për shtunën dhe dielën.

Ndërkaq Asociacioni i Komunave të Kosovës ka kërkuar nga ushtruesja e detyrës së ministrit të Shëndetësisë, Dafina Gexha-Bunjaku, që kufizimi i lëvizjes të hiqet tërësisht.

Përfaqësuesi Special i Sekretarit të Përgjithshëm të Kombeve të Bashkuara për zhvillimet në Kosovë, Zahir Tanin, ka fajësuar Qeverinë e Kosovës për tensionet e shkaktuara në fund të shtatorit në veri të Kosovës.

Në mbledhjen e Këshillit të Sigurimit të OKB-së për zhvillimet në Kosovë, Tanin ka deklaruar se për përshkallëzim shtytës ka qenë mungesa e komunikimit politik.

“Në mëngjesin e 20 shtatorit, Prishtina ka nisur një operacion policor në Kosovën veriore me qëllim të zbatimit të masave të reja për targat. Duke marrë parasysh diskutimet e ndjeshme dhe kamotshme për lirinë e lëvizjes përmes dialogut të mbështetur nga BE-ja do të ishte e natyrshme të pritej një komunikim me ata që preken. Megjithatë, komunikimi ka qenë i pakët apo fare. KFOR-it s’i është dhënë njoftim paraprak”, ka thënë ai duke shtuar se njësitë speciale të Policisë së Kosovës ishin për disa ditë përballë protestuesve që bllokuan rrugët në Jarinjë e Bërnjak.

Gjenerata e 56-të e kadetëve policorë të Policisë së Kosovës ka diplomuar sot.

Në njoftimin e policisë thuhet se duke u bazuar në situatën aktuale të pandemisë COVID -19, diplomimi është bërë në grupe të vogla në hapësirat e akademisë, i organizuar nga Drejtoria për Trajnime Themelore – Divizioni i Trajnimeve i Policisë së Kosovës.

“Në këtë ngjarje ka marrë pjesë ministri i Punëve të Brendshme z. Xhelal Sveçla , drejtori i përgjithshëm i Policisë së Kosovës, z. Samedin Mehmeti dhe stafi menaxhues, të cilët vlerësuan lartë aktivitetet dhe diplomimin e 197 kadetëve, tani si policë të rinj që do t’i bashkohen Policisë së Kosovës. Kjo do të jetë ndihmesë e madhe për punën në terren dhe nga të njëjtit është kërkuar angazhim sidomos në këtë kohë të pandemisë. Duke marrë parasysh se PK-ja ka një imazh të mirë te qytetarët ju duhet të kontribuoni që akoma më shumë të ngritet niveli i besueshmërisë te qytetarët. Policëve të rinj ju dëshiruan shëndet dhe suksese në detyrën e re në shërbim të qytetarëve dhe vendit”.

“Me këtë rast të 197-të policët e rinj i pranuan certifikatat dhe dhanë betimin zyrtar se do të zbatojnë Kushtetutën dhe Ligjet e Republikës së Kosovës, se do ta mbrojnë sovranitetin dhe integritetin territorial të Republikës së Kosovës duke treguar profesionalizëm, përgjegjësi dhe ndershmëri në interes të të gjithë qytetarëve të Republikës së Kosovës. Gjithashtu janë ndarë mirënjohje për 11 kadetët policorë si kapiten të klasave dhe 20 kadetëve policorë për rezultatet me të larta të arritura gjatë kohëzgjatjes së trajnimit”, thuhet në njoftim.

Nga data 18 tetor 2021, policët e rinj do të fillojnë të shërbejnë në kuadër të Policisë së Kosovës duke vazhduar me pjesën e programit të trajnimit fushor për policët e rinj në Stacione policore në kohëzgjatje prej dy viteve nën mbikëqyrje të instruktorëve praktik/fushor të Policisë së Kosovës.

Ministri i Financave, Hekuran Murati, ka njoftuar se për shkak të përformancës së mirë financiare dhe hapësirë fiskale të krijuar, sot është marrë vendimi që prej këtij muaji të zgjerohet skema e shtesave për fëmijë edhe për fëmijët e lindur nga viti 2015 e tutje.

Aplikimi do të hapet nga dita e nesërme.

“Pra të gjitha nënat që kanë fëmijë të lindur nga data 1 janar 2015 e tutje, mund të aplikojnë për shtesa, të cilat do të fillojnë t’i marrin nga ky muaj. Aplikimi për fëmijët 2015+ do të hapet prej ditës së nesërme”, ka njoftuar Murati.

Për të përfituar nga ky muaj e tutje, aplikimi duhet të bëhet më së largu deri më 24 tetor. Aplikimet që bëhen pas datës 24 tetor, shqyrtohen në muajin pasues.

Sipas vendimit të kaluar, për fëmijët 0 deri në 24 muaj pagesa do të jetë 20 euro në muaj, e për ata nën 16 vjeç nga 10 euro.

Kanë mbetur edhe pak ditë para se udhëzimet e reja të Whatsapp të hyjnë në fuqi. Duke filluar nga 1 Nëntori 2021, në fakt, aplikacioni i mesazheve të menjëhershme në Facebook nuk do të funksionojë në disa versione më të vjetra të Android, iOS dhe KaiOS.

Në pak më shumë se 16 ditë, në këtë rast, Whatsapp do të kërkojë të paktën Android 4.1, iOS 10 dhe KaiOS 2.5.1 për të qenë në gjendje të funksionojë. Nëse pajisja juaj ka një version më të vjetër se sistemet operative në fjalë, ju nuk do të jeni në gjendje ta përdorni atë.

Këtë mund ta kontrolloni direkt nga ‘settings’ e smartphone-it tuaj.

Whatsapp zakonisht zvogëlon suportin për versionet më të vjetra të sistemeve operative pasi release më të fundit e lejojnë atë të zhvillojë më mirë funksione të reja.

Sipas zërave të fundit, Whatsapp gjithashtu është duke punuar në Community, ose një lloj grupi Telegram që mund të kërkohen direkt nga shiriti i kërkimit i aplikacionit dhe që synojnë të revolucionarizojnë përvojën e përdoruesit.Referencat u gjetën nga kolegët e XDA drejtpërdrejt në burimin e një beta, por asnjë informacion i saktë nuk ka dalë në lidhje me të dhe nuk është e sigurt që në fund Community do të shohin vërtet dritën.

Në të njëjtën kohë, zhvilluesit po punojnë në një funksion që do t’ju lejojë të ndaloni mesazhet zanore të Whatsapp.

Kandidati i Lëvizjes Vetëvendosje për Kuvend Komunal, Tajar Susuri, ka kërkuar mbështetjen e qytetarëve të Prizrenit si kandidat për kuvendar nga radhët e Lëvizjes Vetëvendosje.

Shkrimi i plotë:

Miq, shok, anëtarë dhe simpatizant të Lëvizjes Vetëvendosje, ju ftojmë që ditën e diele me datën 17 shkurt 2021 të merrni pjesë masovisht në zgjedhjet lokale dhe të votoni pa hezitim, me krenari, numrin 144, Kryetarin prof.dr.Mytaher Haskuka, në udhëheqjen e të cilit do të shënojmë të tjera zhvillime pozitive për gjithë komunën e Prizrenit.

Gjithashtu kërkojë mbeshtetjen tuaj edhe për mua, si kandidat për kuvendar nga radhët e Lëvizjes Vetëvendosje në Kuvendin e Komunes, pra votoni 144 dhe numrin 20.

Ju garantoj se do jem zëri Juaj në të gjitha zhvillimet në komune, mbi të gjitha zeri i fuqishem i biznesit dhe i prodhuesve.

Suksese

Voto 144 / Mytaher Haskuka për krytar të Prizrenit

Voto 144, numri 20 / Tajar Susuri për kuvendar