Demokracia në Veprim (DnV) ka bërë të ditur se po vëzhgon mbarëvajtjen e procesit zgjedhor me 110 vëzhgues nëpër qendra të votimit në nivel vendi.

Sipas DnV-së, 80% e Qendrave të Votimit janë të qasshme për persona me aftësi të kufizuar fizike ndërsa nuk është hasur në materiale propaganduese në perimetër prej 100m nga QV.

Sipas vëzhgueseve, 96% të Qendrave të Votimit dhe vendvotimeve janë dezinfektuar para hapjes ndërsa udhëzimet si të votohet sigurt duke respektuar masat anti-COVID në fuqi janë vendosur në 95% të QV në nivel vendi.

Në anën tjetër, në mëngjes është raportuar se komisionerët janë të pajisur me pajisje personale mbrojtëse (maska dhe dezinfektues) në mbi 95% të vendvotimeve, ndërsa pajisja me dorëza është në nivelin afër 50%.

Siguria e procesit zgjedhor është duke u garantuar nga Policia e Kosovës, e cila është prezente në hyrje të pothuajse të gjitha Qendrave të Votimit.

Kryetari i Aleancës për Ardhmërinë e Kosovës, Ramush Haradinaj ka votuar para pak çastesh.

Haradinaj pasi ka hedhur votën e tij, bëri thirrje që qytetarët të shfrytëzojnë të drejtën e tyre për votim.

“Unë votova, qeverisja komunale është mjaftë e rëndësishme. Dilni votoni, mos e lëni voton në shtëpi”, ka thënë ai.

Haradinaj gjatë votimit ka qenë i shoqëruar nga bashkëshortja e tij, Anita.

Qendrat e votimit janë hapur në ora 07:00, dhe qytetarët kanë të drejtë të votojnë deri në ora 19:00.

Tashmë edhe zyrtarisht janë larguar nga pika kufitare në Jarinje, trupat e KFOR-it, pas qëndrimit të tyre dyjavor, si rezultat i zhvillimeve që ndodhën me masën e reciprocitetit me targat.

Në këtë zonë nuk janë parë madje as rrugës prezencë të trupave ndërkombëtare të NATO-s.

Kryetari i Komisionit Qendror të Zgjedhjeve, Kreshnik Radoniqi, ka ushtruar të drejtën e tij për votë në zgjedhjet lokale që po mbahen këtë të dielë.

Radoniqi ka votuar në shkollën fillore “Lidhja e Prizrenit” në Pejë, njofton Klankosova.tv.

Kreu i KQZ-së është edhe personi i parë që voton në këto zgjedhje lokale.

Lamir Thaçi, zëdhënësi i Agjencisë së Ushqimit dhe Veterinarisë ka konfirmuar se po vazhdon shqiptimi i gjobave për personat dhe bizneset të cilat nuk po i respektojnë masat antiCovid, shkruan IndeksOnline.

Ai në një prononcim për IndeksOnline ka konfirmuar se gjatë javës se kaluar në gjithë territorin e Kosovës janë shqiptuar mbi 100 gjoba vetëm për operator ekonomikë.

Thaçi tha se mbikëqyrje më të rreptë për respektimin e këtyre masave është bërë në sektorin e gastronomisë.

“Agjencia e Ushqimit dhe Veterinarisë përmes Inspektoratit Sanitar ka vazhduar kontrolli për mbikëqyrje të zbatimit të masave COVID sipas vendimeve të Qeverisë së Kosovës Nr. 01/35 të datës 12.09.2021 dhe Nr. 01/37 të datës 24.09.2021 qe ka hyrë ne fuqi nga data 27.09.2021. Për ndalimin e grumbullimit të njerëzve mbi numrin e lejuar gjithmonë duke plotësuar kushtet e vendimit, ruajtjen e distancës, mbajtjen e maskës dhe higjienën e hapësirave të cilat kanë shërbyer për qytetar respektimin e orarit të punës, mos lejimin e tejkalimit të numrit të personave në hapësirat të mbyllura duke përfshire edhe mbikëqyrjen e posedimit të certifikatës se vaksinimit apo testin PCR siç kërkohet ne vendim për stafin e operatorëve ekonomik dhe klientët qe shërbehen ne hapësira të mbyllura . Mbikëqyrje me e rreptë i është bërë sektorit të gastronomisë, vlerësuar si pik kritike kontrolli, hapësira ku kontakti mes njerëzve është me i afërt.

Gjatë javës se kaluar në gjithë territorin e Kosovës janë shqiptuar mbi 100 gjoba vetëm për operator ekonomikë.

Arsyet e gjobitjes kanë qen të ndryshme. Secila pikë e vendimit qe është shkelur janë ndëshkuar”,tha ai.

Komisioni Qendror i Zgjedhjeve ka njoftuar të gjithë qytetarët me të drejtë vote për masat që duhet t’i zbatoni në ditën e zgjedhjeve.

Për të votuar duhet të mbani maskë mbrojtëse duke mbuluar hundën dhe gojën;

Mbani distancë fizike 2 metra derisa prisni në radhë për të hyrë në qendër të votimit dhe në vendvotim;

Gjatë hyrjes në vendvotim dezinfektoni duart;

Pas dezinfektimit të duarve, prezantoni dokumentin e identifikimit dhe hiqni maskën mbrojtëse me qëllim që të identifikoheni nga anëtari i vendvotimit;

Pas identifikimit, rivendoseni maskën;

Pas kësaj ju duhet të merrni fletëvotimet dhe të hyni në kabinën e votimit për të votuar dhe në fund vendoseni fletëvotimet në kutitë përkatës;

Në dalje të vendvotimit ju duhet t’i dezinfektoni sërish duart.

Komisioni Qendror i Zgjedhjeve kërkon mirëkuptimin e qytetarëve për zbatimin e këtyre masave të domosdoshme me qëllim të mbrojtjes së shëndetit.

Për informata shtesë kontaktoni këtë linjë ndihmëse pa pagesë: 0800 55 555.