Një vëzhgues i Nismës dhe një komisioner i Aleancës për Ardhmërinë e Kosovës janë arrestuar në një qendër në Malishevë për shkak të një incidenti.

Rasti ka ndodhur në Qendrën e votimit në ora 14:00, në gjimnazin “Hamdi Berisha”, ka konfirmuar kryesuesi i KQZ-së për KOHËN, Rexhep Zogaj, derisa të ditur ka bërë edhe komandanti i Policisë për rajonin e Gjakovës, Lumni Graishta. Sipas tij, rasti dyshohet se ka ndodhur për shitblerje të votës

Të arrestuarit janë ndaluar për 48 orë.

Në ditën kur po mbahen zgjedhjet lokale dhe të drejtën kushtetuese për votim mund ta ushtrojnë edhe të burgosurit – dy të tillë kishin ikur nga Qendra Korrektuese në Lipjan.

A. K, është i dënuar me një vit për vepra penale dhunë në familje, ndërsa SH.XH është i dënuar me dy vjet për veprën penale ”asgjësim apo dëmtim i pasurisë dhe vjedhje”.

Teksa Policia e Kosovës ishte informuar për rastin pak orë më pas ka arritur që t’i arrestojë të njëjtit.

“Shërbimi Korrektues i Kosovës njofton opinionin publik, se pas letër – rreshtimit të lëshuar nga SHKK për të arratisurit A.K dhe SH.XH, policia e Kosovës ka arrestuar të njëjtit. Të njëjtit pas arrestimit nga policia e Kosovës janë dorëzuar tek autoritetet e SHKK-së për të vazhduar me procedurat e mëtutjeshme” thuhet në njoftimin e SHKK-së.

Shërbimi Korrektues i Kosovës (SHKK), njofton se sot rreth orës 14:40, nga Qendra Korrektuese Lipjan janë arratisur dy të burgosur, me inicialet A.K dhe SH.XH.

Sipas njoftimit të SHKK-së, dy të burgosurit janë tē dënuar me masë edukuese korrektuese.

A. K, është i dënuar me një vit për vepra penale dhunë në familje, ndërsa SH.XH është i dënuar me dy vite për veprën penale, asgjësim apo dëmtim i pasurisë dhe vjedhje.

SHKK-ja njofton se janë duke e bërë hetimin se si ka ardhur deri te arratisja, ndërsa për rastin është njoftuar edhe Policia e Kosovës.

Në komunën e Prizrenit shihet se nuk ka shumë përqindje të qytetarëve të cilët kanë ushtruar të drejtën e votës.

Gjithsej nga 171.644 persona të cilët kanë të drejtë vote në Prizren, vetëm 35.763 persona kanë votuar deri në ora 15:00.

Deri në orën 15:00 në Kosovë pjesëmarja në votime ka qenë 26.94 për qind, bëhet e ditur nga ueb faqja e KQZ-së.

Sipas këtyre të dhënave, deri në këtë kohë kanë votuar 481,870 qytetarë me të drejtë vote.

Njëra nga gratë më të moshuara në Kosovë, siç njihet në Istog Nëna Timë, i është drejtuar qendrës së votimit për të shfrytëzuar të drejtën e saj për votim.

Gruaja njëshekullore, saktësisht 103-vjeçare, ka dalë për të votuar, e lajmin e ka bërë të ditur një i afërm i saj, në profilin e tij në Facebook.

Timë Shtari (Nëna Timë), u bë personazh i njohur për publikun pasi ajo kishte rrëfyer se familja e kishte fejuar kur ishte 1-vjeçe.

Koordinatorja nacionale e zgjedhjeve nga Prokuroria e Shtetit, Laura Pula, ka thënë se deri tani procesi zgjedhor është duke shkuar shumë mirë.

Pula tha se deri tani kanë arrestuar pesë persona, katër prej tyre në Kllokot dhe një në Suharekë.

“Ka kaluar vetëm gjysmë dite, atëherë mund të them se procesi zgjedhor është duke shkuar shumë mirë. Nuk kemi raste të cilat kanë mundur ta cenojnë në përgjithësi procesin zgjedhor, kemi vetëm dy raste të evidentuara, ku kemi arrestuar pesë persona, katër prej tyre janë në komunën e Kllokotit, dhe një person në Suharekë për veprat penale që lidhen me të drejtën e votimit”.

Ajo theksoi se janë 11 vepra penale kundër se drejtës për votim, ku ndëshkueshmëria e tyre fillon nga gjashtë muaj deri në 10 vjet burgim, shkruan Telegrafi.