Kryetari aktual i Skenderajt, Bekim Jashari ka reaguar me një shkrim të gjatë për procesin zgjedhor të ditës së diel.

Jashari i cili u mposht nga Fadil Nura i PDK-së vazhdon të pretendoj se është vjedhur në zgjedhjet e 17 tetorit.

Ky është shkrimi i tij:

Të dashur qytetarë, mbështetës të Idealit tonë të përbashkët,

Ju faleminderit mijëra herë nga zemra për bashkëpunimin e shkëlqyer që kemi pasur gjatë qeverisjes sime 4 vjeçare, duke realizuar së bashku qindra projekte milionëshe që kanë ngritur mirëqenien e qytetarëve të Skenderajt dhe të cilat do të mbahen mend gjatë nga të gjithë.

Jam jashtëzakonisht i lumtur që me vullnetin më të madh, pavarësisht shumë sfidave, me angazhim maksimal bashkë me qytetarët instaluam një qeverisje të mirë dhe transparente, një standart të ri të qeverisje për qytetarët tonë.

Sot duhet të ndihemi krenar secili nga Ne që punuam me tërë mundin në këto 4 vite për qytetarët, për fushatën shembull që zhvilluam, për programin zhvillimor që ofruam, për ruajtjen e dinjitetit të qytetarëve, për respektimin e ligjeve dhe institucioneve tona të ndërtuara me shumë mund e sakrificë.

Të turpëruar duhet të ndihen vetëm ata që nuk lanë gurë pa lëvizur e metodë antiligjore pa përdorur për të marrë peng votën e qytetarëve, ata që ju bënë presion votuesve, ata që iu shkuan në shtëpi një ditë para votimit, ata që i ndalën votuesit para qendrave të votimit duke i shantazhuar e mashtruar, ata që vodhën vullnetin e lirë të qytetarëve e ata që festuan si festuan për një “fitore” që as vet nuk e kishin pritur.

Të gjitha këto i dijnë shumë mirë qytetarët e vendit tonë, këto sot fliten gjithandej dhe tashmë çdo gjë dihet për manipulimin e këtyre zgjedhjeve.

Të dashur qytetarë, duke besuar fuqishëm në drejtësinë tonë kemi bërë mbi 10 ankesa në lidhje me manipulimin e procesit zgjedhor dhe presim që të zbardhet e vërteta edhe nëse duhet të hapet e të verifikohet çdo kuti e votimit.

As këto zgjedhje, as manipulimet e shumta dhe as asgjë tjetër nuk mund të ndalë angazhimin tonë të përbashkët për qytetarët dhe vendin tonë të shenjtë.

Fitues të vërtetë të këtyre zgjedhjeve jemi vetëm Ne qytetarë të dashur, numrat e vjedhur e manipuluar nuk mund t’i mbulojnë veprat dhe sjelljet e tyre antiligjore dhe anti morale.

Shihemi së shpejti bashkë për Idealin tonë!

Kryeministri i vendit Albin Kurti, ka thënë sot se para çdo takimi me presidentin serb Aleksandar Vuçiq, do të ketë takim të përfaqësuesve të të dyja qeverive apo të ekipeve negociatore.

Ai nuk beson që do të ketë takim shumë shpejtë me Vuçiqin, të paktën jo në muajin tetor në Bruksel.

Këto deklarata kryeministri kosovar i dha sot kur pranoi nga shefi i zyrës së BE-së, Tomas Szunyog Raportin e Progresit nga Komisioni Europian.

Sipas Kurtit në këtë raport thuhet se Kosova ka shënuar progres.

Ambasadori i BE-së në Kosovë, Tomas Szunyog, ia ka dorëzuar sot kryeministrit të Kosovës, raportin e Komisionit Evropian.

Ndër të tjera në Raportin e Progresit thuhet për një përparim të kufizuar të Kosovës në luftën kundër krimit të organizuar dhe korrupsionit.

E i pyetur nga gazetarët për reagimin e Përfaqësuesit të Lartë të BE-së për Politikë të Jashtme, Josep Borrell, pas aksionit të Policisë së Kosovës e Doganës kundër kontrabandës, përfshirë edhe në veri, Szunyog tha se BE-ja nuk vë në pyetje çështjen e luftës kundër krimit e korrupsionit.

“Nuk shoh kundërthënie në këto kërkesa dhe raporte, me deklaratën e lëshuar nga Përfaqësuesi i Lartë. Si BE nuk e vëmë në pyetje çështjen e luftës kundër krimit e korrupsionit. I bëjmë thirrje Qeverisë që të vazhdojë përpjekjet në këtë drejtim. I bëjmë thirrje Qeverisë që të vazhdojë me këtë qëndrim aktiv për problemin i cili është jo vetëm për Kosovën, por për mbarë rajonin”, ka thënë Szunyog në konferencë për media.

Borrell pas aksionit në veri, në Twitter kishte thënë se duhet evituar veprimet e njëanshme dhe të pakoordinuara që rrezikojnë stabilitetin.

Szunyog ka treguar se kryenegociatorët do të takohen në Bruksel për targat. Ai ka thënë se sa i përket aspekteve më të përgjithshme, BE-ja është vetëm ndërmjetësuese në dialog.

“Varet nga Prishtina dhe Beogradi se si bien dakord për shpejtësinë e dialogut dhe për agjendën. Kjo varet nga të dyja palët se sa janë të gatshme të dakordohen për agjendën dhe ritmin. Por nga pikëpamja jonë sa më shpejtë të bëhet aq më mirë”, tha Szunyog.

Kryeministri Albin Kurti ka thënë se ky është raporti i parë i progresit prej që kanë ardhur në Qeveri.

Ai ka thënë se duke qenë se është raport vjetor matë progresin para ardhjes dhe pas ardhjes së tyre.

Kurti ka thënë se për këta gjashtë muaj qeverisje kanë shënuar shumë progres.

“Në fundjavën që lamë pas mbajtëm zgjedhje dhe edhe këtë herë dëshmuam transparencë të plotë. Vetëm 37 ditë pas zgjedhjeve të 14 shkurtit zgjodhëm kryeministrin dhe kryeparlamentarin. Gjithashtu vetëm 13 ditë ende pa u bërë dy javë ne zgjodhëm edhe presidenten e Republikës, e cila është gruaja e dytë presidente. Në këta gjashtë muaj të Qeverisë, kemi legjitimitet demokratik dhe besueshmëri në institucione nga ana e qytetarëve, që do ta kishin zili jo vetëm vendet e rajonit por edhe ato të BE-së.

Ai ka thënë se në fushën e sundimit të ligjit kanë marrë mbi 320 vendime në mbledhje të Qeverisë, prej tyre 60 projektligje.

Kurti ka thënë se nga 1 prilli deri më 30 shtator janë realizuar 519 bastisje dhe 283 operacione policore.

Ka thënë se nga marsi kanë shkatërruar 29 grupe kriminale.

“Numri i të vaksinuarve ka mbërritur shifrën në 1.5 milionë dhe mbetemi vendi i parë në rajon që paraqet progres të pamohueshëm. Deri në fund të vitit do të kemi rritje mbresëlënëse të përqindjes së brutoproduktit vendor. Sipas vlerësimit të bankës Qendrore ekonomia jonë do të rritet për 9.9 për qind. Kemi hequr homologimin për vetura, kemi bërë demonopolizimin e terminaleve doganore, kemi bërë transferimin e 76 inspektorëve komunal.

Ai ka thënë se rruga drejt BE-së kërkon reforma, duke shtuar se janë të përkushtuar për të ecur në këtë rrugë.

Komisioni Europian në Raportin e Progresit, ka konstatuar se Kosova dhe Serbia nuk kanë bërë përparim në dialog, derisa Kosovës mes tjerash i përmendet përsëri çështja se duhet ta themelojë Asociacionin e komunave me shumicë serbe dhe të arrijë marrëveshjen finale me Serbinë.

Kjo e fundit, ujdia finale, madje përshkruhet në këtë raport si çështje urgjente.

Në këtë raport tutje përmendet përparimi fillestar në dialog që ishte bërë në vitin 2020, kur palët u dakorduan për ta zgjidhur çështjen e personave të zhdukur dhe të zhvendosur, për të bashkëpunuar ekonomikisht dhe për ta trajtuar çështjen e pretendimeve pronësore e financiare.

Derisa edhe në raportin e këtij viti, Komisioni Evropian inkurajon Qeverinë e Kosovës që të angazhohet në procesin e dialogut dhe t’i rinis negociatat për ta arritur marrëveshjen finale me Serbinë.

”Gjatë periudhës raportuese, nuk është arritur përparim i mëtejshëm në negociatat mbi marrëveshjen e normalizimit gjithëpërfshirëse dhe ligjërisht detyruese. Përparimi fillestar në marrëveshje ishte bërë në vitin 2020, kur palët ranë dakord t’i zgjidhin përkohësisht çështjet e personave të zhdukur, personave të zhvendosur, për bashkëpunimin ekonomik dhe fillimin e negociatave për pretendimet pronësore dhe financiare. Qeveria e re e Kosovës inkurajohet të angazhohet në mënyrë konstruktive dhe t’i rinis negociatat për marrëveshjen e normalizimit gjithëpërfshirës”, thuhet në raport.

Po ashtu, përmendet edhe marrëveshja e fundit e arritur mes Kosovës dhe Serbisë për çështjen e targave të automjeteve, duke nënvizuar se “BE-ja pret që palët të angazhohen në mënyrë konstruktive në këtë proces për ta siguruar lirinë e lëvizjes për qytetarët.”

Komisioni Evropian ia kujton Kosovës se duhet t’i zbatojë në plotni marrëveshjet e nënshkruara më parë me Serbinë, përfshirë atë për themelimin e Asociacionit të komunave me shumicë serbe. Këtë të fundit, KE-ja vlerëson se s’është bërë asnjë përparim.

”Kur bëhet fjalë për gjendjen e në zbatimin e marrëveshjeve të kaluara: Gjatë periudhës raportuese, dispozitat e marrëveshjes nuk janë respektuar nga Kosova në një rast; Gjatë periudhës raportuese, nuk ka pasur progres të mëtejshëm në zbatim të Marrëveshjeve të 25 gushtit 2015. Asnjë përparim nuk është bërë në lidhje me Asociacioni/Bashkësinë e komunave me shumicë serbe dhe Kosovës ende nuk është angazhuar në mënyrë konstruktive në krijimin e tij”, theksohet në Raportin e Progresit.

Komisioni Evropian përmend edhe marrëveshjet e dialogut teknik mes Kosovës dhe Serbisë gjatë periudhës 2011-2012, të cilat ende nuk kanë gjetur zbatim nga palët. Kosova dhe Serbia thirren t’i zbatojnë ato marrëveshje.

”Sa i përket marrëveshjeve të dialogut teknik (2011-2012), disa nuk janë ose vetëm pjesërisht duke u zbatuar. Të dyja palët duhet të qëndrojnë të angazhuara për ta vazhduar zbatimin e marrëveshjes për përfaqësimin dhe pjesëmarrjen e Kosovës në forumet rajonale. Zbatimi i njohjes së diplomave kadastrale dhe universitare është ende në pritje”, thuhet ndër tjerash në raport.

Në fund, Kosova kritikohet për çështjen e vizitave të zyrtarëve serbë si dhe për të ashtuquajturat “veprime të njëanshme’’.

”Kosova duhet të respektojë rregullisht aranzhimet për vizitat zyrtare. Në përgjithësi, Kosova ka mbetur e angazhuar në dialog. Megjithatë, Qeveria e Kosovës duhet të respektojë angazhimet e saj të mëparshme dhe të angazhohet për zbatimin e plotë të marrëveshjeve të kaluara… Duke ecur përpara, Kosova gjithashtu duhet të bëjë përpjekje të mëtejshme thelbësore për t’u përmbajtur nga çdo veprim i njëanshëm dhe kontributi në një mjedis të favorshëm për arritjen e një marrëveshjeje të normalizimit dhe ligjërisht të detyrueshme me Serbinë, përfshirë në të marrëdhëniet ndërkombetare”, thekson raporti.

Komisionerët europianë, siç thonë në këtë raport, presin që ”Kosova të angazhohet në mënyrë konstruktive në negociatat për marrëveshjen e normalizimit ligjërisht detyruese në periudhën e ardhshme në mënyrë që të bëhet progres i shpejtë dhe konkret”.

”Arritja e një marrëveshjeje gjithëpërfshirëse, ligjërisht detyruese është urgjente dhe vendimtare në mënyrë që Serbia dhe Kosova të përparojnë në rrugët e tyre përkatëse evropiane”.