Prizreni Weather ka njoftuar se deri të premten do të jetë më ngrohtë dhe me diell, derisa në fundjavë priten reshje shiu dhe rënie e temperaturave.
Mot më i ngrohtë pritet të mbajë në ditët e ardhshme, me kthjellime e diell, derisa ditën e premte vransirat do të shtohen orëve të pasdites.  Orëve të mëngjesit mbetet më ftohtë, përreth ultësirave me mundësi për formim të mjegullës apo mjegullinës.

Ditën e shtunë do të ketë reshje lokale shiu, nga pasditja edhe temperaturat pësojnë rënie, e nga e diela do të mbajë mot i ftohtë, ndërkaq vransirat fillojnë të shpërndahen.  Ditën e hënë pas mëngjesit të ftohtë ditën do të mbajë mot kryesisht me diell.
Ndotësit ajror do të mbeten në koncentrime më të rritura ditën e enjte, me indeks në vlera mesatare e të dobëta, mirëpo me ndryshimin e motit që pritet ditëve në vijim, me qarkullim më të mjaftueshëm ajror, indeksi do të shënojë përmirësim në vlera të pranueshme dhe të mira në fundjavë.

21.10 – Kryesisht me diell dhe më butë.  Në mëngjes përreth ultësirave mundësi për mjegull apo mjegullinë.
22.10 – Fillimisht me diell, në mëngjes në ultësira mundësi për mjegull apo mjegullinë.  Ditën ngrohtë e vransirat shtohen.
23.10 – Kryesisht vranët, e kohëpaskohe me reshje lokale shiu, e orëve të mbrëmjes më ftohtë.

24.10 – Më ftohtë e kryesisht me vransira, që deri në mbrëmje pritet të shpërndahen.
25.10 – Kryesisht me diell, e në mëngjes ftohtë.
Temperaturat minimale luhaten nga 4C-9C, e në pjesët e mbuluara me mjegull, minimalet zbresin edhe në 0C e 2C. Temperaturat maksimale shënojnë rritje deri në 19C e 20C ditën e premte, e deri të dielen zbresin në 10C.

Do të fryjë erë mesatare nga krahu jugor 4-12m/s, e nga e shtuna ndryshon drejtimin në verlindje.
Shtypja atmosferike mbetet pak më e lartë nga vlerat normale, por që në fundjavë sërish shënon një rritje edhe më të vazhdueshme

Policia e Kosovës ka arrestuar gjashtë persona të dyshuar për shpëlarje dhe falsifikim parash si dhe armëmbajtje pa leje.

Drejtoria për hetimin e krimeve ekonomike ka zhvilluar aksionin në Ferizaj, Fushë-Kosovë, Viti, Kaçanik si dhe në Prishtinë.

Prokuroria Speciale ka njoftuar se nga të dyshuarit janë sekuestruar 125 mijë euro si dhe pesë vetura të modeleve të ndryshme.

Të dyshuarit, A.Q., Sh.R., A.O., F.L., H.L dhe L.S., me urdhër të prokurorit janë dërguar në mbajtje si dhe brenda afateve kohore ligjore do të bëhet kërkesa për caktimin e paraburgimit.

Policia e Kosovës është duke zhvilluar një aksion kundër krimeve ekonomike dhe korrupsionit.

Klan Kosova merr vesh se gjashtë persona janë arrestuar teksa ishin duke pirë kafe në një pompë derivatesh në periferi të Prishtinës.

Rastin për Klankosova.tv e ka konfirmuar edhe zëdhënësi i Policisë së Kosovës, Bajram Krasniqi.

“Mund të konfirmojmë se Policia e Kosovës, konkretisht hetuesit policorë të Drejtorisë për Hetimin e Krimeve Ekonomike dhe Korrupsionit, janë duke e realizuar një operacion policor në rajonin e Prishtinës. Pas përfundimit të operacionit policor do të njoftoheni me informacione shtesë”, tha Krasniqi.

Aksioni ka përfunduar dhe veturat e të dyshuarve janë konfiskuar nga policia.

Ish-ministri i Jashtëm i Kosovës, Enver Hoxhaj, ka takuar kryeministrin e Shqipërisë, Edi Rama.

Këtë e ka bërë të ditur vet Hoxhaj përmes facebookut, ndërsa dhe po shprehet krenar siç thotë me arritjet e Shqipërisë.

”Gjithmonë është kënaqësi takimi me mikun tim të veçantë dhe Kryeministrin e Shqipërisë, Edi Rama! Krenar me arritjet e Shqipërisë!”.

Policia e Kosovës, konkretisht Krimet Ekonomike janë duke zhvilluar një operacion të madh.

Burime të Indeksonline bëjnë të ditur se operacioni ka rezultuar me sukses.

Jetesa e qytetarëve ka nisur të vështirësohet shkaku i ngritjes së vazhdueshme të çmimeve.

Shtrenjtimi është vërejtur te vajrat, buka, qumështi, djathërat, mishi, sheqeri e produkte të tjera.

Nga matjet e Agjencisë së Statistikave të Kosovës, në shtator të këtij viti krahasuar me atë të vitit të kaluar, çmimet janë rritur për 4.9 për qind.

“Nuk është normale, krejt çmimet i kanë rritë të produkteve krejt. Krejt, krejt, prej buke e krejt fije-fije”, tha qytetari Qerim Demaku.

Qytetarët thonë se kjo është e papranueshme, meqë nuk ka kurrfarë ndryshimi edhe në paga. Ata e fajësojnë Qeverinë për shtrenjtimin.

“As pagat nuk na i rrisin as kurrgjë hiq çmimet janë shumë të mëdha”, tha qytetari tjetër Avdi Sejdiu.

“Tona valla ushqimore janë rritë. Krejt këtu fajet e Qeverisë edhe këtu nuk ka kontroll, qysh po donë po bojnë”, tha qytetari Rizah Krasniqi.

Por, nuk janë vetëm produktet e konsumit ushqimor të cilave u janë shtrenjtuar çmimet. Ngritje vërehet edhe te nafta, biletat e autobusit e shërbime të tjera, derisa është paralajmëruar edhe ngritja e çmimit të energjisë elektrike.

Astrit Panxha nga Klubi i Prodhuesve të Kosovës ka paralajmëruar që prodhuesit vendorë do të vazhdojnë ngritjen e çmimeve, meqë globalisht të gjithë faktorët e prodhimit janë duke shënuar ngritje.

“Nuk do të ketë vetëm ngritje të çmimeve të produkteve të prodhuara në Kosovë por do të ketë ngritje të çmimeve edhe tek prodhimet e importuara. Ky cikël i ngritjeve vetëm ka filluar, inflacioni është 3.6 për qind që është më i larti deri më tash”, tha Panxha.

Ndonëse ngritja e çmimeve ka nisur që nga qershori, Autoriteti Kosovar i Konkurrencës nuk ka bërë kurrfarë analize se pse e si ka ardhur deri te shtrenjtimi dhe as nuk ka intervenuar në këtë proces.

E vetmja analizë që kanë bërë është për shtrenjtimin e çmimit të naftës, gjë për të cilën KOHËS ia kanë përcjellë një përgjigje me shkrim.

“Tregu për naftën në vendin tonë është i liberalizuar dhe se ndërmarrjet që operojnë në tregun relevant janë plotësisht të lira të vendosin çmimet e tyre sipas politikës së tyre të biznesit. Por, bazuar në Ligjin për Mbrojtjen e Konkurrencës, AKK mund të reagojë në rastet kur bëhet fjalë për çmime të tepërta (grabitqare), dhe atë vetëm kur ndërmarrja apo ndërmarrjet kanë një pozitë dominuese ose pozite dominuese kolektive në tregun përkatës”, thuhet nga AKK-ja.

Pavarësisht se Kosova ka treg të lirë, KOHA i ka kërkuar përgjigje Qeverisë nëse do të ndërhyjë me politikat e saj në kontrollimin e këtyre çmimeve, por askush nuk ka kthyer përgjigje.

Zëvendësministrja e Drejtësisë, Nita Shala, ka thënë se procesi i Vettingut i nisur nga ata duhet të marrë mbështetjen e të gjithëve, pasi sipas saj kjo është për të mirën e secilit qytetarët të vendit.

Ajo në Info Magazine të Klan Kosovës ka deklaruar kështu pasi u pyet se si do ta bindnin Listën Serbe për të votuar pro kalimit të draf-dokumentit për Vettingun në Kuvend, nëse do të kishin me këtë rast mbështetjen e të gjitha partive opozitare.

“Realisht mendoj se duke qenë që gjyqësori na prek gjithë secilin prej nesh, mendoj që do të jetë një thirrje e ndërgjegjes së përgjithshme që do ta kuptojë rëndësinë dhe domosdoshmërinë ndërmarrjes së një nisme të tillë. Nuk do të kishim nevojë për proces Vettingu nëse do të kishim një gjyqësor që do të ishte i drejt për secilin prej nesh, per secilin nga qytetarët. Qasja e Ministrisë së Drejtësisë është që bën sens për të mirën e përgjithshme që të angazhohemi të gjithë që këtë nismë ta qojmë deri në fund dhe të ketë sukses”.