Ministria e Shëndetësisë i njofton qytetarët se ditën e premte, nga ora 10:00-17:30, të gjithë të interesuarit për vaksinim kundër COVID-19, mund të vaksinohen nga ekipet mobile të vaksinimit në sheshin “Zahir Pajaziti” në Prishtinë.

Ministria u bën thirrje qytetarëve që të shfrytëzojnë edhe këtë mundësi shtesë për t’u vaksinuar kundër COVID-19, si rrugën më të sigurt për parandalimin e infektimit nga COVID-19.

Një praktikë e këtillë do të fillojë së shpejti edhe në komuna të tjera të Kosovës.

MSh falënderon Forcat e Sigurisë së Kosovës (FSK) për mbështetje për aksionin e nesërm të vaksinimit në sheshin “Zahir Pajaziti” në Prishtinë.

Paneli Zgjedhor për Ankesa dhe Parashtresa ka refuzuar shumicën e ankesave të Bekim Jasharit për parregullsi në votimin e 17 tetorit në Komunën e Skenderajt. Vendimet e PZAP-së tregojnë se atij i janë miratuar pjesërisht disa ankesa, por se në Skenderaj s’do të ketë rivotim.

Këtë komunë në rundin e parë të zgjedhjeve e fitoi Fadil Nura i PDK-së me mbi 50 për qind të votave.

Jashari ishte ankuar se në procesin zgjedhor ka pasur blerje të votave nga PDK-ja. Megjithatë PZAP-ja i ka konsideruar të pabazuara ankesat duke thënë në disa raste se s’janë ofruar dëshmi të qarta e bindëse.

Ndërkaq pjesërisht janë pranuar ankesat e Jasharit kundër PDK-së për keqpërdorime të disa fletëvotimeve duke ua ndaluar disa zyrtarëve pjesëmarrjen në zgjedhje, si kandidat apo pjesë administrative e ndonjë organi zgjedhor për pesë vjet, pasi janë gjetur fletëvotime të pavulosura.

Policia e Kosovës ua përkujton qytetarëve se ngasja në mjegull mund të jetë e rrezikshme.

Prandaj, PK rekomandon që të mbani në vëzhgim rrugën për ndryshime të papritura të dukshmërisë dhe se mjegulla më e dendur mund të jetë më afër lumenjve.

“Përdorni dritat e mjegullës. Nëse automjeti juaj i ka këto drita kjo ju ndihmon të ndriçohet rruga para jush dhe këto drita e bëjnë automjetin tuaj më të dukshëm për shoferët e tjerë. Disa automjete kanë edhe dritat e pasme të mjegullës të cilat ndihmojnë shoferët që lëvizin mbrapa t’ju shohin juve edhe nga një distancë më e madhe.Mjegulla mund të krijojë një iluzion optik dhe t’i bëjë shoferët të mendojnë se po shkojnë më ngadalë seç janë. Mbani vëmendjen, mos shpejtoni! Ndizni dritat gjatë ngasjes, por mos ndizni dritat me rreze të gjatë! Ngasja e automjetit me drita të gjata mund të reflektojë jashtë mjegullës dhe mund të kthehet në automjetin tuaj, e cila gjithashtu e bën të pamundur që shoferët e tjerë t’ju shohin.​Mbani ndezur dritat e shkurtra dhe të mjegullës! Mbani nën kontroll shpejtësinë e lëvizjes!Mbani krahun e djathtë të rrugës gjatë lëvizjes”, thuhet në apelin e policisë.

Paneli Zgjedhor për Ankesa dhe Parashtresa ka marrë vendim që të anulojë zgjedhjet në komunën e Hanit të Elezit, ku për rrjedhojë do të ketë rivotim.

PZAP-ja e ka pranuar si të bazuar ankesën e kryetarit të kësaj komune, Rufki Suma.

“Procesi i votimit do të përsëritet vetëm për kryetar komune, për shkak të minimit të integritetit të zgjedhjeve si rezultat i presionit dhe organizimit me qëllim të përfitimit të mbështetjeve të votuesve”, thuhet në vendimin e PZAP-së.

Në zgjedhjet e 17 tetorit, në Han të Elezit iu dha fund qeverisjes 14-vjeçare të kandidatit të pavarur, Rufki Suma, duke u mposhtur nga kandidati i Partisë Demokratike të Kosovës, Mehmet Ballazhi.

Kryetari i Kuvendit të Serbisë, Ivica Daçiq tha se përfaqësues të qeverisë dhe opozitës, si dhe kryepeshkopi në Athinë i kanë thënë se Greqia nuk do ta njohë pavarësinë e Kosovës.

Daçiq e shfrytëzoi vizitën e tij në Athinë për takime dypalëshe me homologun e tij grek, Konstantinos Tasoulas, kryepeshkopin Jerome II të Athinës dhe ish-kryeministrin e Greqisë dhe tani udhëheqësin e opozitës, Alexis Tsipras, i cili, siç thotë Daçiq, i ka thënë se Greqia nuk do ta njohë pavarësinë e Kosovës.

“Përfaqësuesit e qeverisë, pra kryetari i parlamentit, kreu i opozitës, kryepeshkopi, të gjithë e thonë të njëjtën gjë, dhe kjo është se Greqia nuk do ta njohë pavarësinë e shpallur në mënyrë të njëanshme të Kosovës. Varet nga ne që ta mbajmë këtë temë aktive, domethënë të bëjmë atë lloj pyetjeje sepse është me rëndësi të madhe për ne”, tha Daçiq

Duke folur për takimin me kryetarin e Parlamentit helen, Tasoulas, Daçiq tha se kanë ranë dakord që ai ta vizitojë Serbinë deri në fund të vitit.

Duke iu referuar takimit të tij me Tsipras, tani kreu i opozitës, Daçiq tha se ai është mik i tij i madh dhe mik i presidentit të Serbisë, Aleksandar Vuçiq, dhe shton se ata kishin bashkëpunim të mirë me të kur ai ishte kryeministër.

Çmimi i derivateve është rritur kohëve të fundit në Kosovë dhe ky fakt po pritet me shqetësim nga qytetarët.

Pavarësisht rritjes së madhe të çmimeve, Fadil Berjani thotë se Kosova po shërbehet me çmimet më të ulta në rajon.

Berjani për Indeksonline pohoi se dizel në Kosovë sillet nga 1.18 deri 1.26 cent, kurse benzina nga 1.22 deri në 1.31 cent.

Berjani tregoi që çmimin e përcakton BERZH dhe organizata prodhuese OPEC.

“Kur ka reduktim të prodhimit atëherë çmimet rriten. Qytetarët e Kosovës janë duke u shërbyer me çmimet më të lira në regjion, përveç Maqedonia Veriore e ka dizelin më të lirë shkaku që akcizën e ka më të lirë, 22 cent për litër, ndërsa benzinen e ka çmimin sikur te ne“, tha ai.

Çmimet në Shqipëri shkojnë, dizeli 1.50 cent ndërsa benzina 1.52 cent.

Fadil Berjani u shpreh se, ne jemi me çmime më lirë se Bosnja, Mali i Zi, Serbia dhe Shqipëria.

Edhe pronarët e druve, lëndës kryesore të ngrohjes te shumica e banorëve të kryeqytetit, në këtë sezonë paradimërore kanë përcjellur trendet e ngritjes së çmimeve të karburanteve dhe produkteve të tjera energjetike në tregjet botërore dhe të vendit.

Drutë në Prishtinë sivjet janë duke u shitur me çmime ndjeshëm më të larta se në vitin paraprak. Këto ditë, në veçanti janë shpërfaqur çmimet e tejngritura edhe në krahasim me muajt e verës.

Dje në tregjet e druve në Prishtinë një metër kub sipas pronarëve të druve është shitur me çmimin 50 euro e më lartë. Ndërkohë, sipas tregtarëve, por edhe blerësve kryeqytetas, vjet në këtë kohë 1 metër dru ka shkuar 35-40 euro.

Buletini Ekonomik ka kontaktuar edhe sot me disa druvarë, të cilët në një mënyrë apo tjetër e arsyetojnë ngritjen e madhe të çmimeve të druve për ngrohje. Sipas tyre, ekzistojnë disa faktorë të cilët kanë ndikuar në këtë rritje të çmimit të druve.

Ylber Selimi nga Kamenica tha se çmimet e druve janë rritur në krahasim me vitet e kaluara për shkak të rritjes së çmimeve të karburanteve, në tadhë të parë, por edhe për shkak se nga viti në vit po ndihet mungesë e druve për shkak të zvogëlimit e të pyjeve si pasojë e prerjes vit-përvit dhe pa asnjë kontroll.

“Ka pasur shtrenëtim të druve këtë vit pasiqë janë rritur edhe çmimet e shumë produkteve të ndryshme. Është rritur çmimi i naftës dhe të të gjitha karburanteve të tjera dhe kjo domosdo ka ndikuar te ngritja e çmimit të druve. Gjithashtu te çmimet e larta ka ndikuar edhe koha, ftohja e motit dhe siç u tha më lartë, mungesa pyjeve” ka thënë Selimi.

Ai, gjithashtu, tha se momentalisht ka më shumë kërkesa në këtë periudhë sesa në periudhën e njëjtë të viteve të kaluara, pasiqë ekziston droja se do të ketë shtrenjtim edhe më të madh të disa produkteve, e sidomos druhet se do të ngritet çmimi i rrymës, prandaj njerëzit dëshirojnë sigurimin e tyre.

Edhe Naser Beqiri nga Prishtina gjithashtu pohoi se ka pasur rritje të çmimit të druve.

Beqiri tha se kjo rritje ka ndodhur si pasojë e ngritjes së çmimeve të naftës dhe të produkteve të tjera.

“Metra e druve aktualisht kushton 45-50 euro. Qarri edhe bungu janë më të shtrejt, dhe metri i tyre sillat rreth 48-50 euro”, tha ndër të tjera Beqiri.

Inspektorati Policor i Kosovës ka pranuar një donacion nga Misioni i Bashkimit Europian për Sundim të Ligjit në Kosovë (EULEX).

Shefi i këtij misioni Lars-Gunnar Ëigemark dhuroi tri vetura dhe pajisje të ndryshme, duke përfshirë edhe pajisje të teknologjisë informative, njofton Klan Kosova.

Kryeshefi Ekzekutiv i IPK-së Kushtrim Hodaj në një fjalë rasti gjatë ceremonisë e falënderoi shefin e Misionit EULEX për mbështetjen dhe kontributin e vazhdueshëm të dhënë nga ky mision në ngritjen e kapaciteteve të agjencive të zbatimit të ligjit në përgjithësi duke përfshirë edhe Inspektoratin Policor të Kosovës.

“IPK vlerëson lart bashkëpunimin me institucione të Bashkimit Evropian e sidomos me Misionin e EULEX-it dhe ky bashkëpunim ka ndikuar që IPK të rris kapacitetet e saj profesionale”, ka thekuar Hodaj duke u zotuar që IPK mbetet e përkushtuar që të vazhdojë këtë bashkëpunim në mënyrë që sundimi i ligjit të mbetet prioritet për të gjitha agjencitë e zbatimit të ligjit e në veçanti për IPK-në.