Agjencia e Bashkimit Evropian për shëndetin publik, ka paralajmëruar se sezoni i gripit që po vjen në Evropë mund të jetë i ashpër për të moshuarit dhe personat me imunitet të dobët.

Sipas kësaj agjencie, gripi mund t’ua rëndojë barrën sistemeve shëndetësore, tashmë të ngarkuara nga pandemia e koronavirusit.

Nënlloji kryesor i raportuar i virusit të gripit në Bashkimin Evropian dhe në Zonën Ekonomike Evropiane i prek në mënyrë të pabarabartë të moshuarit dhe lidhet me efikasitet më të ulët të vaksinës, tha Qendra Evropiane për Parandalimin dhe Kontrollimin e Sëmundjeve.

“Vërejtja e hershme e nënllojit A (H3N2) është tregues se sezoni i gripit që po vjen mund të jetë i ashpër, ndonëse nuk mund të dimë me siguri se si do të duket sezoni i gripit”, tha Pasi Penttinen, drejtor i programit për gripin në Qendrën Evropiane për Parandalimin dhe Kontrollimin e Sëmundjeve, shkruan Reuters.

Ai u bëri thirrje punëtorëve shëndetësorë që të vaksinohen edhe kundër COVID-19, edhe kundër gripit, para dimrit dhe shtoi se distanca fizike e masat higjienike janë të rëndësishme për të gjithë e posaçërisht për ata që punojnë në shtëpitë e kujdesit dhe në mjedise ku ofrohet kujdes shëndetësor.

Rreth 20 për qind e popullsisë preket nga gripi çdo vit. Sipas agjencisë evropiane, të moshuarit, gratë shtatzëna dhe personat me sëmundje kronike janë më të rrezikuar.

140.000 vaksina kundër gripit sezonal kanë arritur në Kosovë.
“Vaksinat kundër Gripit sezonal kanë arritur në Kosovë. Janë 140. 000 vaksina të siguruara”, kanë thënë nga MSH-ja.

Vaksinat sipas planit të MSH-së, do të shpërndahen nesër nëpër Komunat e Kosovës, ndërsa prioritet për tu vaksinuar do t’iu jepet të sëmurëve kronik, personave të moshës mbi 65 vjeç, shtatzënave dhe lehonave si dhe fëmijëve me indikacione shëndetësore.

“Sipas Planit te vaksinimit, ato pritet te shpërndahen nesër nëpër komuna. ndërsa kategoritë qe vaksinohen kundër Gripit sezonal janë: të sëmuret kronike, personat e moshës mbi 65 vjeç, shtatzënat dhe lehonat si dhe fëmijët me indikacione shëndetësore”, thuhet në përgjigjen e MSH-së për Front Online.

Nga kjo ministri thonë se qytetarët të cilët janë me prioritet do të informohen për tu vaksinuar në mënyrë që të mos krijohet tollovi në qendrat e mjekësisë familjare.

“Qytetaret e kategorive prioritare do të informohen për orarin e fillimit të vaksinimit dhe kategoritë që do të përfshihen se pari në vaksinim, me qellim të mos krijimit të tollovive të panevojshme me që vaksina do te ketë mjaft”, thuhet më tej në përgjigje.

Lakra turshi ka aftësinë të mbushë organizmin me energji, të forcojë imunitetin dhe të mbrojë zemrën. Përtej shijes fantastike, vlerat e jashtëzakonshme të lakrës turshi ashtu si edhe të bardhës për shëndetin, janë arsyeja kryesore përse ato nuk duhet të mungojnë asnjëherë në kuzhinën e çdo familjeje.

Lakra e bardhë turshi është plot me vlera shëndetësore. Ajo përmban fibër, një sasi domethënëse të vitaminave C dhe K, si dhe pasuron sistemin imunitar me hekur. Lakra turshi ka gjithashtu aftësinë të mbushë organizmin me energji. Megjithatë, ajo duhet konsumuar në sasi të kufizuara sepse përmban shumë kripë.

Studimet, konfirmojnë se fermentimi i lakrës çon në prodhimin e një sasie të madhe probiotikësh të cilët furnizojnë bakteret e mira në stomak dhe parandalojnë rritjen e baktereve të këqija. Lakra e bardhë turshi mundet gjithashtu të forcojë sistemin imunitar, të sintetizojë vitaminat B dhe të luftojë diarrenë që shkaktohet nga marrja e antibiotikëve.

Megjithatë, nxehtësia shkatërron bakteret e mira, ndaj ju duhet të konsumoni lakër turshi të freskët, transmeton AgroWeb.

Vlerat shëndetësore
Sasia e përshtatshme ditore e fibrës bazohet tërësisht nga nevoja për mbrojtjen kundër sëmundjeve kardiovaskulare. Fibra e tretshme tek lakra ndërlidhet me yndyrat dhe kolesterolin dhe i përcjell ato jashtë organizmit. Kjo nënkupton se gjaku përthith më pak kolesterol. Një filxhan me lakër turshi përmban 35 përqind të dozës së rekomanduar ditore të vitaminës C dhe 23 për qind të vitaminës K.

Vitamina C luan rolin e antioksiduesve, ndërsa vitamina K ka ndikim në mpiksjen e gjakut, por të dyja janë thelbësore për kocka të forta. Lakra turshi ofron 12 për qind të dozës së rekomanduar ditore të hekurit. Burimet bimore të këtij minerali nuk garantojnë një përthithje efikase të tij, por vitamina C përmirëson përthithjen e hekurit në organizëm. Lakra turshi ka vitaminë C por edhe acid laktik që thellon përthithjen e hekurit.

Lakër turshi në kushtet e shtëpisë
Përbërësit
1 lakër e bardhë mesatare
1 litër ujë i zier dhe i ftohur
2 lugë gjelle me kripë
2 lugë gjelle me sheqer
2 lugë gjelle uthull
Gjysmë gote me vaj ulliri
2 gjethe dafine të thata
6 kokrra piperi të zi
3 thelpinj hudhër

Udhëzimet
Udhëzohet të hiqni gjethet me njolla ose të prishura në pjesën e jashtme të lakrës. Prijeni atë në gjashtë copa dhe hiqni pjesët e forta në brendësi të saj. Merrni një enë të madhe dhe vendosini copat e lakrës në të. Në një enë tjetër përgatisni lëngun e turshisë duke hedhur ujin e zier më herët, kripën, sheqerin, uthullën, vajin, gjethet e dafinës dhe kokrrat e piperit të zi.

Përziejini mirë. Grijini thelpinjtë e hudhrës dhe shpërndajini në mënyrë të njëtrajtshme mes gjetheve të lakrës. Hidhni sipër tyre lëngun e turshisë. Në sipërfaqe vendosni një pjatë të madhe që të mbani lakrën të zhytur në lëng. Mbi pjatë duhet të vendosni diçka të fortë e të rëndë që të sigurohet një presion i qëndrueshëm mbi copat e lakrës turshi për të paktën tre ditë. Enën e turshisë duhet ta ruani në temperaturë ambienti. Pasi lakra të jetë bërë mund t’a fusni në frigorifer dhe ta konsumoni sipas dëshirës. E njëjta recetë përdoret edhe për lakrën turshi.