“Ka krizë energjetike por ka edhe zgjidhje”, “Qeveri reflekto, dëgjo kërkesat tona”, “Nuk duam të jemi në rrugë, por në fabrikë”, janë thirrjet që po bëjnë punëtorët e Ferronikelit.

Nën organizimin e Sindikatës së Pavarur Punëtorëve, punëtorët me helmeta në kokë e pankarta në duar, kanë protestuar para Qeverisë së Kosovës.

Ata kanë shprehur pakënaqësitë e tyre për 1 mijë punëtorët, të cilët që nga 8 tetori janë pa punë.

Për shkak të krizës energjetike në Evropë dhe ngritjes së çmimeve të energjisë elektrike në tregjet botërore, Ferronikel ka ndërprerë punën përkohësisht, përcjell KP.

Përfaqësuesi i kësaj proteste, Rifat Latifi ka thënë se ndërprerja e punës së tyre ka gjeneruar edhe shumë probleme.

“Qeverisë iu kemi drejtuar katër herë me shkresa për mbështetje, për hulumtimin e mundësive për tejkalimin e kësaj situate. Por kemi mbetur pa përgjigje”, ka thënë ai.

Më tej, punëtorët kanë kërkuar nga përfaqësuesit e qeverisë që të takohen me ta para objektit të qeverisë.

“Është fakt se Ferronikeli është privatizuar, por ne punëtorët nuk jemi të privatizuar. Ne jemi qytetarë të Kosovës dhe meritojmë trajtim nga qeveria”, ka thënë një nga punëtorët.

Në rast se nuk gjejnë mbështetje nga institucionet, ata kanë paralajmëruar protesta jo paqësore. /Telegrafi/

Në shtator të këtij viti skadoi moratoriumi i nënshkruar në Washington, ku Serbia u zotua se do ta ndalë fushatën në kërkim të ҫ’njohjeve të pavarësisë së Kosovës, ndërsa kjo e fundit do të ndalte përpjekjet për anëtarësim në organizata ndërkombëtare.

Me të skaduar kjo marrëveshje, Serbia ka nisur me paralajmërimet e saja diplomatike për fushatën e ç’njohjeve të shtetësisë së Kosovës.

Ministri i Jashtëm i Serbisë, Nikolla Selakoviq ka deklaruar për mediat serbe se janë dhjetë vende të gatshme të rishqyrtojnë vendimet rreth njohjes së Kosovës.

Lidhur me këto paralajmërime nga pala serbe, Ministria e Punëve të Jashtme dhe Diasporës në një përgjigje për Telegrafin ka thënë se Serbia nuk ka ndalur asnjëherë sulmet ndaj Kosovës dhe nuk i është përmbajtur as marrëveshjeve.

“Për fat të keq, Serbia asnjëherë nuk i ka ndalur sulmet ndaj Kosovës dhe në vazhdimësi ka punuar në drejtim të dobësimit të pozitës së Kosovës në arenën ndërkombëtare. Nuk i është përmbajtur as marrëveshjeve dhe publikisht zyrtarë të këtij shteti kanë bërë thirrje për ç’njohje të Kosovës”, thuhet në përgjigjen e MPJD-së për Telegrafin.

Më tej nga ministria e Jashtme kanë deklaruar se Qeveria është duke punuar shumë në forcimin e subjektiviteti ndërkombëtar.

“Qeveria e Republikës së Kosovës është shumë e përkushtuar dhe çdo ditë po punon me shumë seriozitet për forcim të subjektivitetit ndërkombëtar të Republikës në bashkëpunim me miqtë dhe partnerët ndërkombëtar”, kanë deklaruar nga MPJD-ja.

Ndryshe, dje në një prononcim për Telegrafin njohësi i marrëdhënieve ndërkombëtare, në Grupin për Studime Juridike Politike (GLPS), Arbër Fetahu ka thënë se ky moratorium një vjeçar është dashur të shfrytëzohet nga Qeveria e Kosovës përkatësisht Ministria e Jashtme për të përpiluar strategji, plane, për ta dinamizuar shërbimin e jashtëm të Kosovë nëpër botë, dhe që tutje të jenë gati për lobim zyrtar për anëtarësim në organizata ndërkombëtare dhe aplikim për pranim në to si dhe për të kërkuar njohje nga vende të tjera, të thellojë bashkëpunimin me vendet njohëse dhe ato që kanë qëndrim të luhatshëm ndaj Kosovës.

Dokumenti gjashtëmbëdhjetë pikësh në dy versione, një për palën kosovare dhe një për atë serbe, u nënshkrua më 04.09.2020, një vit më parë në Shtëpinë e Bardhë, në prani të ish-presidentit amerikan Donald Trump, nga ish-kryeministri i Kosovës Avdullah Hoti dhe presidenti aktual i Serbisë, Aleksandër Vuçiq. /Telegrafi/

Kryeministri i vendit, Albin Kurti ka thënë sot se në ekonomia e Kosovës nuk ka përjetuar asnjëherë rritje sikurse në këtë vit.

Pavarësisht, se vendi po ballafaqohet me rritje të çmimeve të shumë produkteve, Kurti tha se në Kosovë është rritur eksporti, aktiviteti ekonomik dhe të hyrat buxhetore.

Këtë deklaratë Kurti e bëri në një konferencë për media me Ministrin e Financave, Hekuran Murati, e që në foks ka prodhimtarinë vendore.

“Ekonomia e vendit tonë asnjëherë nuk ka përjetuar një rritje sikurse në këtë vit, rreth 10% dhe këtë duhet ta ndjekim me një rritje të prodhimtarisë dhe eksportit. Aktiviteti ekonomik është shtuar për afër 30%, eksportet janë rritur mbi 60% e poashtu janë rritur të hyrat buxhetore për 34%. Rritja dhe zhvillimi i prodhimtarisë është motori kryesore për zhvillimin ekonomik të një vendi”, ka thënë Kurti.

Ndërsa sa i përket rritjes së çmimeve të shumë produkteve në vend, Kurti tha se është pasojë ekonomike e pandemisë.

“Pasojat ekonomike të pandemisë që po përcillen edhe me luhatje të çmimeve vë në pah dy faktorë. Si pasojë e shkëputjes së zinxhirëve të furnizimit shumë vende të Evropës po shohin vendit që i kanë më afër si eksportues potencial si dhe theksohet nevoja për shtim të prodhimit vendor. Pandemia na dëshmoi që prodhimi vendor ka rol kyç në ekonomi”, ka thënë më tutje ai.