Datë për takimin me presidentin e Serbisë, Aleksandër Vuçiq, në kuadër të dialogut mes Kosovës dhe Serbisë, nuk ka kryeministri Albin Kurti.

Kreu i Qeverisë ka thënë se aranzhimi i këtij takimi varet nga ndërmjetësuesit e dialogut, Josep Borrell e Miroslav Lajçak.

Por, Kurti ka dhënë një datë të përafërt për vazhdimin e bisedimeve në nivel të përfaqësuesve të të dyja shteteve.

E një nga temat që do të diskutohet në takimet në Bruksel, sipas Kurtit, do të jetë edhe ajo e boksierëve kosovarë. Shkaku i ndalimit të hyrjes në Serbi, atyre iu pamundësua pjesëmarrja në Kampionatin Botëror të Boksit.

“Me bllokimin që ua bëri boksierëve tanë Serbia në kufi e shpërfaqi edhe njëherë fytyrën dhe thelbin e saj si shtet, për ata të cilët kanë pasur dilema. Natyrisht që të gjitha këto çështje adresohen edhe në Bruksel. Këto do të adresohen edhe para se të ketë takim në Bruksel, sepse ne jemi vazhdimisht në komunikim me ta, përmes letrave që ua dërgojmë dhe takimi do të mund të ndodhte diku në gjysmën e dytë të nëntorit, sa u përket përfaqësuesve të dy shteteve tona”, ka thënë Kurti.

Kurti u është përgjigjur kritikave të opozitës, se me vendimet e marra ditëve të fundit, është duke bërë fushatë.

“Ne këto vendime që i marrim, i marrim duke u bazuar në përgatitjet për vendimet, jo në agjendat politike qofshin ato elektorale ose të tjera. Gjithçka që bëjmë do të qëllojë pas ndonjë date e para ndonjë date tjetër. Por ky nuk është preokupimi ynë. Ne qeverisim për ditë, drejt e mirë dhe fare nuk ndikohemi prej zhvillimeve të jashtme, por prej përgatitjeve dhe vlerësimeve të brendshme”, ka deklaruar ai.

E derisa ka thënë se janë në përgatitje të Ligjit, kreu i ekzekutivit ka kritikuar qeverisjet e kaluara për rritjet e bëra të pagave, duke thënë se ato nuk janë bërë në mënyrën e duhur.

“Qeveritë e mëhershme i kanë rritur pagat me premtime elektorale që mandej i kanë përmbushur pjesërisht ose aspak. Pra, me premtime elektorale janë përpjekur t’i rrisin pagat, mirëpo ekonomia nuk funksionon asisoj mund të funksionojnë dëshirat për pushtet, mirëpo ekonomia nuk funksionon me rritje pagash, siç është bërë në të kaluarën. Me neve, në muajt dhe viteve në vijim rritja e pagave do ta ndjekë rritjen e produktivitetit brenda rritjes ekonomike”, ka thënë tutje Kurti.

Të gjitha këto, Kurti i bëri të ditura në një konferencë të përbashkët për media me ministrin e Bujqësisë, Faton Peci.

Që të dy renditën punët që, sipas tyre, kanë bërë në favor të fermerëve, derisa shtuan se kanë adresuar rreth 40 milionë euro obligime ndaj tyre në kategorinë e subvencioneve.

Presidentja e Kosovës, Vjosa Osmani, sot është pritur në takim nga presidenti i Potugalisë, Marcelo Rebelo de Sousa, të cilin e ka falënderuar për mbështetjen e dhënë Kosovës me dekada, duke kërkuar mbështetje edhe në rrugën e integrimit euroatlantik.

Osmani ka theksuar se Kosova po zbaton reforma gjithëpërfshirëse në ekonomi dhe sundim të ligjit, duke u dëshmuar kështu si partner kredibil, por edhe si një shtet që zhvillohet bazuar në vlerat e BE-së. Në këtë kontekst, ajo ka potencuar se Kosova synon anëtarësimin në BE dhe NATO si synime parësore e strategjike, ndërkaq falënderoi Portugalinë që është zë i fuqishëm pro liberalizimit të vizave për Kosovën.

Për procesin e dialogut me Serbinë, Osmani ka theksuar se Kosova është e përkushtuar ndaj bashkëpunimit rajonal dhe marrëdhënieve konstruktive me fqinjët, duke potencuar se normalizimi i plotë i marrëdhënieve me Serbinë duhet të përfshijë njohjen reciproke.

Presidentja Osmani në takim me homologun De Sousa ka shfaqur gatishmërinë e shtetit të Kosovës për thellimin e bashkëpunimit me Portugalinë jo vetëm në sferën e politikës e diplomacisë por edhe në fushën e tregtisë, turizmit, mbrojtjes, arsimit, kulturës, si dhe të trajnimeve profesionale.

Sot është miratuar buxheti i Kosovës për vitin 2022 në shumë prej 2 miliardë e 748 milionë euro.

Kryeministri i Kosovës, Albin Kurti, ka bërë të ditur se qeveria të cilën ai e udhëheq, për herë të parë ka ndarë një buxhet prej 10 milionë euro për furnizimin me pajisje moderne për policinë e zjarrfikësit.

Tutje, i pari i qeverisë bëri të ditur se me buxhetin e ri do të filloj ndërtimi i 50 çerdheve, ashtu që sipas tij, fëmijët të kenë kujdesin e duhur e gratë të integrohen në tregun e punës.

Më poshtë mund t’i gjeni të gjitha planet e investimeve të Qeverisë së Kosovës të prezantuar sot nga Kurti:

“Janë ndarë 45 milionë euro për të mbështetur nënat për pagesat për lehonat dhe për shtesat për fëmijë.

Kemi bërë studimet falas për të gjithë studentët dhe do të ndajmë edhe 2 mijë bursa shtesë për më të mirët.

Do të mbështesim shkencën dhe hulumtimin.

Kemi shtuar 35 milionë euro te pensionet dhe skemat sociale, ashtu që asnjë pension të mos jetë nën 100 euro dhe skemat sociale prej 30 përqind të bëhet e përhershme.

Kemi shtuar 24 milionë euro shtesë për sigurimin e barnave esenciale.

Do të nisim ndërtimin e rrugës Prizren – Tetovë, që do të bashkojë të dy qytetet.

Për herë të parë kemi buxhetuar mbështetje për Luginën e Preshevës në shumë prej 2 milionë euro.

Kemi ndarë 50 milionë euro për borxhet e shpronësimeve të trashëguara në mënyrë që të kryhen rrugët që tashmë janë në proces për sa e sa vite.

Kemi ndarë buxhetin dhe do të fillojmë projektin e banimit social e të përballueshëm, sapo të përfundoj studimi i fizibilitetit në pranverën që vjen.

Kemi ndarë 20 milionë euro për skemën e punësimit të garantuar për të rinjt dhe do të mbështesim bizneset Start Up dhe ato në teknologji të informacionit.

Kemi rritur buxhetin për kulturën e sportin dhe për trashëgimi kulturore.

Për herë të parë kemi ndarë 10 milionë euro për blerjen e ambasadave në shtete aleate.

Kemi rritur buxhetin për bujqësi në mbi 70 milionë euro, për herë të parë.

Prodhuesit vendorë do t’i mbështesim me 40 milionë euro për të zgjeruar kapacitetet, për të rritur cilesinë dhe për të gjetur tregje për eksport.

40 milionë euro të tjera i kemi ndarë për të financuar financimetet në Trepçë e Telekom ashtu që këto asete të kthehen në gjenerues të mirëqenies.

Do të furnizojmë policinë dhe zjarrfikësit me pajisje moderne, për këtë kemi ndarë 10 milionë euro.

Ushtrinë e kemi projektin tonë madhor, andaj për herë të parë kemi ndarë buxhet prej 100 milionë euro apo 1.3 përqind të bruto produktit vendor e synimi ynë është që këtë ta sjellim në 2 përqind të bruto produktit vendor.

Nga kursimet në paga që ka bërë menaxhmenti i ri AKP-së, na është mundësuar që ato mjete t’i riorientojmë në ushtri e si rezultat do t’i rekrutojmë 840 ushtarë të rinj”.

Më tej, Kurti tha se këto investime janë bërë të mundura në vetëm 7 muaj qeverisje.

Miratohet buxheti prej 2,748,000,000 për vitin 2022

“Tash mund të vërehet se sa ka vuajtur shteti ynë për një qeverisje që nuk vjedh e nuk abuzon me paranë publike”, është shprehur Kurti, njofton Klankosova.tv.

Janë gjetur mbetje mortore në bazën e KFOR-it në Arbëri, të premten.

Lajmin për KOHËN e ka konfirmuar zëdhënësi i KFOR-it, Antonio Minutella i cili ka thënë se mbetjet njerëzore janë gjetur gjatë punimeve të gërmimit për ndërtimin e një godine të re.

“Gjatë punimeve të gërmimit për ndërtimin e një godine të re, me sa duket u gjetën mbetje njerëzore. Për momentin nuk dihen detaje të tjera”, ka thënë Minutella.

Sipas tij, tashmë hetime janë duke vazhduar nga Policia Ushtarake e KFOR-it dhe Policia e Kosovës.

“Hetimet janë duke vazhduar dhe janë duke u zhvilluar nga Policia Ushtarake e KFOR-it dhe PK-ja. Të gjitha provat i janë dorëzuar PK-së e cila është duke e zhvilluar hetimin e rastit”, ka shtuar ai.

KOHA ka kontaktuar edhe Policinë e Kosovës për të mësuar për hetimet që është duke kryer dhe është në pritje të një përgjigjeje.

Kryeministri i Kosovës Albin Kurti i ka quajtur orgurzeza paralajmërimet për rritje të çmimeve, duke thënë se këto kanë efekte negative dhe tha se kanë për qëllim ngjalljen e panikut.

Ai tha se rritja ekonomike në Kosovë ka ndodhur për shkak se qytetarët kanë shpresë dhe po shpenzojnë.

“Sot lajmi kryesor që i frikësohen të gjithë armiqtë e Kosovës është rritja ekonomike. A e dini çka do të thotë që nëse përgjatë viteve të kësaj dekade ne vazhdojmë me rritje nga 10 përqind, ne do t’i afrohemi Kroacisë. Nëse vazhdojmë me këtë rritje që është e pashembullt në Ballkan, ne i afrohemi vendit që së fundmi iu bashkua BE-së. Prandaj, është tejet e rëndësishme dhe asnjëherë mjaftueshëm e theksuar rritja ekonmike e Kosvës tani”.

Kurti në një konferencë për media pas miratimit të buxhetit për vitin 2022 ka thënë se kanë në plan t’i ndajnë 10 milionë euro për mbushje të rezervave të shtetit.

“Ju e mbani mend se ne i kemi gjetur të zbrazura rezervat shtetërore. Por, ne do t’i mbushim me prodhime vendore për t’iu dalë në ndihmë dhe kemi në plan t’i shpenzojmë 10 milionë euro për rezerva shtetërore. Duke i mbushur rezervat me grurin tonë të Kosovës që t’i përdorim ato sa herë ka lëkunudje të çmimit në bursë. Ata e kanë ditur që do të ikin, prandaj i kanë zbrazur. Ne e dimë që do të jemi shumë gjatë, prandaj jemi të interesuar që të kemi rezerva që të mos goditemi shpejt dhe rëndë”.

Qeveria e Kosovës këtë të premte ka bërë të ditur se me buxhetin e ri, 24 milionë euro shtesë do të ndahen për sigurimin e barnave esenciale.

Kështu bëri të ditur kryeministri i vendit, Albin Kurti në mbledhjen e sotme të qeverisë ku u miratua buxheti për vitin 2022 në vlerë 2.74 miliardë euro.

Kryeministri i Kosovës, Albin Kurit, ka bërë të ditur se qeveria që ai udhëheq në buxhetin e ri në vlerë 2.74 miliardë euro për vitin 2022 ka planifikuar që të blejë edhe objekte për ambasada në vendet mike të Kosovës.

“Për herë të parë kemi ndarë 10 milionë euro për blerjen e ambasadave në shtete aleate”, është shprehur Kurti në mbledhjen e qeverisë.

Kurti tha se nuk mund të thuhet tani se në cilin vend do të blihen këto objekte sepse në mënyrë automatike, sipas tij, do të rritej çmimi i tyre.

Kryeministri i Kosovës, Albin Kurti, pas miratimit të buxhetit në mbledhjen e Qeverisë për vitin 2022, ka thënë se ky vit ka qenë një vit me shumë shpresë dhe optizimizëm që ka rezultuar me të arritura sa i përket sundimit të ligjit dhe rritjes ekonomike.

Ai në një konferencë për media tha se sundimi i ligjit e ka në epiqendër luftimin e korrupsionit dhe për rrjedhojë Policia e Kosovës ka kryer 437 operacione, 746 bastistje dhe ka shkatërruar 31 grupe kriminale, njofton Klan Kosova.

Kurti po ashtu tha se do të ketë edhe rritje të ekonomisë në vend.

“Në anën tjetër, duke u bazuar në të dhënat e BQK-së, ekonomia sivjet do të rritet 9.9 për qind. Praktikisht për herë të parë do të kemi rritje dyshifrore për rritjen e bruto produktit vendor. Krahasuar me vitin e kaluar janë mbledhur më shumë tatime në periudhën janar-shtator për 34 përqind”.

Kurti tha se nëse dikush ka dilemë që viti 2020 ka qenë viti i pandemisë atëherë s’duhet krahausuar me të, por edhe nëse krahasohet më vitin 2019 kur s’kishte pandemi, ai tha se prapë ka më shumë rritje.

“Kemi ndërmarrë një varg masash për të arritur mundësinë e qytetarëve tonë, në veçanti të grave, për ta zvogëluar pabarazinë përmes shtesave për lehona dhe fëmijë dhe duke e bërë studimin në universitet falas”.

Për miratimin e buxhetit prej 2.7 miliardë eurosh, Kurti tha se ishte buxheti i parë i miratuar nga qeverisja e tij, i cili do të orientohet për përmbushjen e prioriteteve qeverisëse.