Ministria e Shëndetësisë e Qeverisë së Kosovës ende nuk ka dhënë dritën e gjelbër për vaksinimin e personave të moshës 12 deri 15 vjeç kundër koronavirusit. Siç thonë, kjo mundësi është duke u shqyrtuar, por një vendim i tillë do të merret në “momentin e duhur”.

Nga muaji gusht, Qeveria e Kosovës ka lejuar imunizimin kundër koronavirusit edhe për personat mbi 16 vjeç, ndërsa për grupmoshën 12-15 vjeç, vaksinimi bëhet me prioritet dhe sipas indikacioneve shëndetësore.

Administrata Amerikane për Ushqim dhe Ilaçe në muajin maj të këtij viti, ka autorizuar përdorimin e vaksinës kundër koronavirusit të prodhuar nga Pfizer/BioNTech për fëmijët e moshave 12-15 vjeç.

SHBA-ja veçse është duke i vaksinuar fëmijët e moshave nga 12 vjeç e lart.

Kurse, më 27 tetor, një panel i qeverisë amerikane ka votuar për të rekomanduar vaksinën edhe për fëmijët e moshës nga pesë deri në 11 vjeç.

Kemajl Ratkoceri, nga komuna e Lipjanit, ekonomist me profesion, është baba i tre fëmijëve. Vajza e tij e vogël, tashmë është 14 vjeçe dhe ai shprehet i gatshëm të pranojë që ajo të vaksinohet nëse një gjë e tillë kërkohet nga autoritetet shëndetësore.

“Nëse Organizata Botërore e Shëndetësisë ka studime, fakte dhe rekomandon që vaksina nuk ka efekte tjera anësore, atëherë duhet t’i vaksinojmë edhe fëmijët. Po bazohemi edhe në të kaluarën edhe ne si fëmijë kemi pasur vaksina të ndryshme. Unë do të pranoj të vaksinohet vajza ime, ne duhet të bazohemi diku, unë nuk jam ekspert i fushës dhe bazohem në ekspertët e shëndetësisë, sepse nëse gjithsecili vepron me hamendje, atëherë nuk di se ku do të shkojmë”, thotë Ratkoceri.

Mjekët: Për t’u vaksinuar nuk duhet të ketë hezitim

Profesoresha e Mikrobiologjisë, Gjyle Mulliqi-Osmani, drejtoreshë e laboratorit privat “Mikrobiologjia” në Prishtinë, thotë se vaksinimi i fëmijëve në Kosovë duhet të bëhet edhe për ata nën moshën 12 vjeç. Hulumtimet e deritashme, thotë ajo, tregojnë se nuk ka ndonjë rrezik të veçantë nëse moshat e reja vaksinohen.

“Gjithashtu, specifikat e Kosovës, numri i madh i nxënësve në një klasë, në kopshte, banimi me numër më të madh të anëtarëve në një shtëpi e shton edhe më tepër nevojën e vaksinimit të fëmijëve të moshës mbi 12 vjeç”, shprehet ajo për Radion Evropa e Lirë.

Argument tjetër për vaksinimin e fëmijëve, thotë Mulliqi-Osmani, është sepse fëmijët janë bartës të infeksionit, kurse në shumicën e rasteve sëmundja tek ata mund të kalojë me simptoma më të lehta.

Edhe pediatri Ramush Bejiqi, në një bisedë për Radion Evropa e Lirë, thekson se Kosova duhet t’i zbatojë rekomandimet e organizatave ndërkombëtare të shëndetësisë. Kështu që qytetarët e Kosovës, sipas tij, nuk duhet të hezitojnë për imunizimin e fëmijëve të tyre.

“A kemi zgjidhje ne për këtë situatë? Unë mendoj se nuk kemi. Ne jemi pjesë e luftës globale kundër COVID-19 dhe problemeve që shkakton. Duke u bazuar në rekomandime shkencore dhe përvojë anë e mbanë botës, them se nëse fëmijët nuk kanë ndonjë sëmundje tjetër, e cila rrezikon sistemin imunitar të tyre dhe nuk kanë probleme tjera, nuk besoj se janë grup më shumë i rrezikuar se grupet tjera”, shprehet ai.

Vaksinimi i fëmijëve në vendet e rajonit dhe të botës

Disa nga vendet e rajonit dhe në botë, tashmë kanë filluar vaksinimin e adoleshentëve. Maqedonia e Veriut dhe Serbia, kanë nisur vaksinimin e fëmijëve nga mosha 12 vjeç e tutje.

Edhe shumë shtete në botë dhe Evropë kanë filluar përdorimin e vaksinës te fëmijët 12 vjeç e lartë. Shtetet e Bashkuara të Amerikës, Britania e Madhe, Gjermania, Italia Irlanda, Polonia, Franca, Zvicra dhe Suedia Veriut janë disa nga shtetet ku bëhet vaksinimi te fëmijët.

Në Kosovë nga muaji mars i vitit 2021, kur ka filluar procesi i imunizimit, deri më tani, janë dhënë mbi 1.5 milionë doza të vaksinës. Prej tyre, mbi 720 mijë qytetarë janë vaksinuar me të dyja dozat kundër koronavirusit. Imunizimi bëhet për të gjithë personat mbi moshën 16 vjeç.

Por, javët e fundit në Kosovë është ulur numri i personave të infektuar me koronavirus dhe në të njëjtën periudhë ka rënë edhe interesimi i qytetarëve për vaksinim kundër COVID-19. Nga 20 mijë vaksina sa janë dhënë brenda një dite muajin e kaluar, në ditët e fundit ky numër ka rënë në rreth 7,000.

Ministria e Shëndetësisë, të premten më 29 tetor, ka bërë thirrje qytetarëve që të vaksinohen pa hezitim. Në një postim në rrjetin social Facebook, thuhet se situata epidemiologjike, relativisht e qetë nuk përbën arsye që qytetarët që kanë marrë dozë e parë të vaksinës ta vonojnë marrjen e dozës së dytë, sepse kjo e pamundëson arritjen e mbrojtjes efikase dhe imunitetit të plotë. Më tutje thuhet se vaksinimi vazhdon të jetë mënyra më e lehtë, më e sigurt dhe më efikase për t’u mbrojtur nga COVID-19.

Çmimi i biletave të autobusëve ndërurbanë për disa qytete të Kosovës është rritur për 50 cent.

Një rritje e tillë po konsiderohet normale për kryetarin e Shoqatës së Transportuesve Rrugor.

“Autobusët rrugorë të udhëtarëve në destinacione të ndryshme lëndë primare për furnizim e kanë derivatin e naftës. Meqenëse kemi një rritje drastike të çmimit të naftës në krahasim me vitin e kaluar… si rezultat i të gjitha këtyre dukurive ka ndodhur kjo rritje, që për mua personalisht është krejtësisht e arsyeshme”, ka thënë Ruzhdi Kurtishaj, kryetar i Shoqatës së Transportuesve Rrugorë.

E para që ka filluar me rritjen e çmimeve është linja për Ferizaj. Në këtë linjë është vetëm një kompani e cila nuk e ka rritur çmimin.

Përveç linjës për Ferizaj, rritja shumë shpejt do të bëhet edhe për qytetet e tjera të vendit.

Por rritja e çmimit të biletave ka shqetësuar qytetarët.

“Nuk është mirë rritja e çmimit, njerëzit nuk kanë paga nuk kanë pare edhe kanë nevojë të enden e të shkojnë në puna, është shumë keq”, ka thënë Avdi Berisha.

“Sot veç u vërejt rritja e çmimeve. Kjo është katastrofë, në këto kushte kështu me u rritë çmimet, kjo është çmenduri. Kjo s’do të jetë e përballueshme hiç”, ka deklaruar Lulzim Sadikaj.

Rritje të çmimeve muajin e fundit në Kosovë ka pasur pothuajse në çdo sektor, por Ekzekutivi nuk ka ndërhyrë, por ka paralajmëruar një pako lehtësuese.

Komisioni Qendror i Zgjedhjeve njofton të gjithë qytetarët që janë regjistruar si votues jashtë Kosovës për raundin e parë, se ka filluar periudha e votimit përmes postës për raundin e dytë të zgjedhjeve dhe përfundon më 12 nëntor.

Raundi i dytë i zgjedhjeve mbahet në komunat: Gjakovë, Gllogoc, Gjilan, Dragash, Istog, Kaçanik, Klinë, Fushë Kosovë, Kamenicë, Obiliq, Rahovec, Podujevë, Prishtinë, Prizren, Shtime, Viti, Vushtrri, Malishevë, Junik, Mamush dhe Kllokot.

Fletëvotimin për Kryetar Komune dhe informacionet e detajuara mund t’i gjeni në këtë link: https://www.kqz-ks.org/sherbimet-per-votuesit/votimi-me-poste/ .

Në fletëvotim janë dy kandidatë, Ju duhet të votoni vetëm njërin kandidat/e.

Si duhet ta dërgoni pakon me fletëvotim në adresë të KQZ-së?

– Fletëvotimin e plotësuara vendosni në një zarf të pashënuar dhe mbylleni atë.

– Zarfin me fletëvotim dhe një kopje të dokumentit identifikues, vendoseni në një zarf tjetër në të cilin duhet ta shkruani adresën:

Komisioni Qendror i Zgjedhjeve

Votimi Përmes Postës

Posta nr. 6, Kutia Postare 351

10 000 Prishtinë, Republika e Kosovës.

Kjo zarfë mundet të bashkohet me zarfat tjera të anëtarëve të familjes së ngushtë dhe të vendosen në një zarfë postar të përbashkët, sipas udhëzimeve më lartë.

Fletëvotimet për votim përmes postës, duhet të arrijnë në KQZ deri më 12 nëntor 2021.

Richard Grenell, ish-i dërguari special i Shteteve të Bashkuara të Amerikës për dialogun Kosovë-Serbi, ka kritikuar administratën e re amerikane se ka lënë prapa “arritjet e ish-presidentit Donald Trump” për Ballkanin.

Sipas tij, më askush nga SHBA-ja s’po u kushton vëmendje shteteve të Ballkanit.

Në një intervistë për “Kash’s Corner”, Grenelli ka lavdëruar Marrëveshjen e Washingtonit, të arritur më 4 shtator të 2020-s në Shtëpinë e Bardhë. Sipas tij, pika më e suksesshme ka qenë ajo e moratoriumit për njohje nga Kosova dhe çnjohje nga ana e Serbisë.

“Qenë arritur katër marrëveshje ekonomike dhe tani është shumë e vështirë për mua ta shoh se si ekipi i Bidenit ka dështuar totalisht në Ballkan. Mendoj që s’po i kushtojnë fare vëmendje”, ka thënë fillimisht ai.

Teksa e ka quajtur historike Marrëveshjen e Washingtonit, Grenelli ka thënë se asnjëra palë nuk e donte moratoriumin, por kjo u arrit “falë” Trumpit.

“Zgjati për atë vit. Dhe më pas në fund të vitit, sivjet, të dyja palët tani po kërkojnë njohje në njërën anë dhe çnjohje në tjetrën, sepse skadoi afati. Ekipi i Bidenit ka mundur lehtë të shihte këtë marrëveshje e të thoshte se çka duhet të rinegociohet apo të mbahet apo se çfarë mund të bëjmë për të përmirësuar. Por askush s’e ka shikuar. Mund të them se duke folur me të dyja palët, askush nga ekipi i Bidenit s’u është afruar për të vazhduar kampanjat. Më e rëndësishmja ka qenë të vazhdohet”, ka thënë ai, duke shtuar se edhe në “Ballkan e dinë që më s’e kanë vëmendjen e SHBA-së”.

Grenelli ka thënë se edhe pse tash s’ka funksione politike “po bën çmos për ta implementuar marrëveshjen”.

Megjithatë, Shtetet e Bashkuara të Amerikës kanë kërkuar të vazhdohet me moratoriume duke i kërkuar Kosovës të mos aplikojë për anëtarësime në organizata ndërkombëtare e Serbisë fushatën e çnjohjeve. Pavarësisht kërkesave, Kosova dhe Serbia kanë zgjedhur të heshtin karshi rekomandimeve.

Më 4 shtator 2020, ish-kryeministri Avdullah Hoti dhe presidenti i Serbisë, Aleksandar Vuçiq, në praninë e ish-presidentit të SHBA-së, Donald Trump, patën nënshkruar zotimet që njihet si Marrëveshja e Washingtonit. Ajo marrëveshje qe kritikuar nga udhëheqja aktuale e ekzekutivit.

Jo vetëm në verë, por edhe gjatë vjeshtës shqiptarët e Kosovës kanë zgjedhur Shqipërinë për fundjavë.

Ditën e sotme është konstatuar një fluks i lartë makinash në pikën e kalimit kufitar Morinë.

Si duket qytetarët kanë dashur që të shfrytëzojnë motin e mirë me diell këtë fundjavë në vendin tonë.

Policia kufitare prej mëngjesit punon me procedurë të përshpejtuar dhe shtatë sportele.