Zëvendësministri i Drejtësisë, Blerim Sallahu sot ka marr pjesë në hapjen e punimeve të grupit punues për hartimin e Udhëzimit Administrativ për tarifat e përmbaruesve privat.

Ai ka bërë të ditur se Ministria e Drejtësisë ka vendosur që të ketë rishikim të tarifave të përmbaruesve privat të Kosovës, respektivisht ulje të tyre.

Sallahu gjatë fjalës së tij tha se ky grup është themeluar me qëllim të ndryshim plotësimit të Udhëzimit për tarifat e përmbaruesve privat duke marrë parasysh vështirësitë dhe mangësitë tashmë të identifikuara në praktikën e zbatimit të tarifave të përmbarimit dhe në veçanti faktit se Udhëzimi aktual lë hapësirë për interpretime rreth çështjes së gjenerimit të tarifave.

Në mënyrë që të bëhen ndryshimet e duhura, tha Sallahu, Ministria e Drejtësisë me mbështetjen e Programit të USAID-it për Drejtësi Komerciale ka kryer analizën e studimit të kostove të shërbimeve përmbarimore nga përmbaruesit privat, si dhe analizën krahasuese të shërbimeve të përmbaruesve privat të Kosovës me ato të vendeve të rajonit, Ministria e Drejtësisë ka vendosur që të ketë rishikim të tarifave, respektivisht ulje të tyre.

Ndër të tjera, Sallahu bëri të ditur se krahas procesit të rishikimit të tarifave, Ministria e Drejtësisë ka finalizuar edhe ndryshim plotësimin e Ligjit për Procedurën Përmbarimore, i cili adreson çështjen e ndarjes së barabartë të lëndëve të pranuara nga institucionet publike me qëllim të garantimit të funksionimit të zyrave përmbarimore, si dhe eliminimin e krijimit të monopoleve.

Zëvendësministri Sallahu theksoi se Ministria e Drejtësisë mbetet e përkushtuar në përmirësimit të transparencës, llogaridhënies dhe profesionalizmit të sistemit të përmbarimit privat të Kosovës dhe në ngritjen e besimit të qytetarëve në sistemin e drejtësisë. /Telegrafi/

Ministria e Bujqësisë, Pylltarisë dhe Zhvillimit Rural ka njoftuar se furnizimin e rezervave shtetërore me kulturën e grurit, mund ta bëjnë edhe grumbulluesit e kësaj kulture bujqësore, të cilët operojnë në vendin tonë.

Përmes një postimi në faqen zyrtare, Ministria ka bërë me dije është hapur shpallja publike për këtë qëllim dhe ka ftuar të gjithë grumbulluesit e grurit, të cilët shprehin interes dhe posedojnë rezerva të grurit që të aplikojnë në këtë thirrje të MINT-it.
“Furnizimin e rezervave shtetërore me kulturën e grurit, mund ta bëjnë edhe grumbulluesit e kësaj kulture bujqësore, të cilët operojnë në vendin tonë.

Për këtë qëllim, Ministria e Industrisë, Ndërmarrësisë dhe Tregtisë, ka hapur shpalljen publike dhe kjo thirrje është e hapur deri më datë 11 nëntor 2021. Andaj, ftohen të gjithë grumbulluesit e grurit, të cilët shprehin interes dhe posedojnë rezerva të grurit që të aplikojnë në këtë thirrje të MINT-it”, thuhet në njoftim.

Pas shtatë vjetësh është rihapur terminali doganor i Trepçës në Mitrovicë.

Kryeministri i Kosovës, Albin Kurti ka thënë se në vitin 2014 padrejtësisht Trepçës i është privuar kjo hapësirë.

“Nga viti 2003 deri në vitin 2014, terminali doganor ka qenë në hapësirën e Trepçës. Padrejtësisht edhe çuditërisht kjo hapësirë i është privuar Trepçës për terminal doganor dhe i është dhënë një privati jashtë zonës së Trepçës, e ç’rast çmimi është shtrenjtuar në 40 euro për maune. Në këtë mënyrë kanë humbur bizneset, ka humbur Trepça dhe ka fituar një privat”, tha Kurti, përcjell Telegrafi.

Sipas tij, asokohe 24 punëtorë kishin mbetur papunë kur e patën nxjerr jashtë kësaj hapësire këtë terminal.

“Shtatë vjet më vonë, ne po e bëjmë këtë hapje në hapësirën e Trepçës, po e rikthejmë atë që gjithmonë i ka takuar Trepçës, e në këtë mënyrë po e korrigjojmë një dëm të bërë para shtatë vjetësh. Asokohe 24 punëtorë kishin mbetur papunë kur e patën nxjerr jashtë kësaj hapësire terminalin”, ka shtuar ai.

Ndërsa, drejtori i Doganës së Kosovës, Agron Llugaliu hapja e këtij terminali është mjaftë i rëndësishëm për bizneset.

“Sot rihapet terminali doganor i Trepçës. Kjo është shumë me rëndësi për ekonominë, për arsye ndihmon bizneset dhe qytetarët që ofron çmime më të lira, po ashtu është atraksion për investimet e huaja”, tha Llugaliu.

Ky terminal kishte operuar nga viti 2003 deri në vitin 2014.

Në ngjarjen për hapjen e terminalit ka marrë pjesë kryeministri Kurti bashkë me ministren e Ekonomisë, Artane Rizvanolli dhe ministrin e Financave, Hekuran Murati.

Po ashtu, të pranishëm kanë qenë edhe zyrtarë të tjerë doganor.

Ditë më parë, drejtori Llugaliu kishte nënshkruar kontratën për hapjen e këtij terminali.

“Nënshkrova një marrëveshje me kryeshefin e Trepçës për rifunksionalizimin e Terminalit Doganor në Mitrovicë, siç është operuar edhe më herët në pronën e Trepçës. Kjo është një arritje e rëndësishme për shkak se pagesat që bëhen në terminalet private prej 40 eurosh, ta rikthejmë në një pagesë simbolike, gjithashtu kjo adreson edhe një problem me vite që është përsëritur si sfidë e të bërit biznes në raportin e Progresit të Komisionit Evropian”, kishte deklaruar ai. /Telegrafi/