Drejtori i Antidrogës në Policinë e Kosovës, Bahri Shala është liruar nga kjo pozitë, të cilën e ka mbajtur për shumë vite, shkruan Gazeta Sinjali.
Kështu kanë bërë të ditur burime të Sinjalit brenda Policisë së Kosovës dhe kanë njoftuar se Shala është transferuar në Drejtorinë e Teknikës Kriminalistike.
Kurse sipas burimeve të Sinjalit në pozitën e drejtorit të Antridrogës tash e tutje do të jetë Reshat Murseli.
Instituti Hidrometeorologjik i Kosovës njofton se të mërkurën parashihet të mbajë mot kryesisht i vranët.
Temperaturat minimale do të lëvizin ndërmjet 3-4 gradë Celsius, ndërsa maksimalet e ditës parashihen të lëvizin ndërmjet 16-17 gradë Celsius.
Ndërkaq të enjten parashihet mot pjesërisht i vranët dhe me intervale të gjata me diell. Temperaturat minimale parashihen ndërmjet 6-7 gradë Celsius, ndërsa maksimalet e ditës ndërmjet 18-21 gradë Celsius.
Kandidati i LVV-së për kryetar të Prizrenit, Mytaher Haskuka ka takuar sot banorët e Zhurit dhe Hoçës së Qytetit.
Haskuka i ka falënderuar banorët e këtyre fshatrave për mbështetjen që i kanë dhënë në raundin e parë më 17 tetor.
“Falënderuam banorët e këtyre fshatrave për mbështetjen e madhe që na kanë dhënë në raundin e parë më 17 tetor dhe theksuam se është nevojë jetike për Prizrenin të përkrahet programi ynë politik për katër vitet e ardhshme”, ka shkruar ai në një postim në Facebook.
Ai është zotuar se do të vazhdojnë të jenë sa më afër banorëve të këtyre fshatrave.
“Përmendëm projektet që i kemi përfunduar në këto dy fshatra gjatë katërvjeçarit të parë dhe diskutuam për projektet e reja, të cilat do t’i realizojmë gjatë mandatit të dytë. Po ashtu u zotuam se do të vazhdojmë edhe më shumë të jemi afër banorëve të këtyre fshatrave”, tha Haskuka.
Sipas tij, si qeverisje përherë kanë qenë afër qytetarëve të Prizrenit dhe gjithmonë i kanë dëgjuar hallet e tyre.
“Si qeverisje përherë kemi qenë afër qytetarëve dhe gjithmonë i kemi dëgjuar hallet e tyre. Ndërsa qytetarët edhe këtë herë na kanë neve adresë të vetme për zgjidhjen e kërkesave dhe nevojave të tyre! Andaj, në këtë drejtim ne dhe qytetarët e Prizrenit, jemi në Bashkë Qeverisje”, ka përfunduar Haskuka.
Në qershor të këtij viti u raportua për përjashtimin e Haris Kelmendit, ish-pjesëtarit të Njësisë për Reagim të Shpejt nga Policia e Kosovës. Por Haris Kelmendi nuk është zyrtari i vetëm që u përjashtua nga ky institucion këtë vit.
Nga Policia e Kosovës në një përgjigje për Sinjalin, kanë bërë të ditur se gjatë këtij viti, 32 zyrtarëve policorë u është ndërprerë marrëdhënia e punës.
Sipas Policisë, arsyeja për përjashtimin e tyre është bërë për shkak të shkeljeve të rënda disiplinore.
Në anën tjetër nga Inspektorati Policor i Kosovës kanë njoftuar për Sinjalin për kallëzimet penale që janë ngritur deri në shtator ndaj punonjësve policorë.
“Ju njoftojmë se IPK për periudhën 01.01.2021 – 30.09.2021, ndaj punonjësve policorë në prokuroritë përkatëse ka dorëzuar dyzetë e nëntë (49) kallëzime penale”, thuhet në përgjigjen e IPK-së për Sinjalin.
Gjatë kësaj periudhe, 30 zyrtarë policorë janë arrestuar, ndërsa 74 janë suspenduar.
Nga IPK kanë thënë se nën hetime janë 157 punonjës policorë, nën dyshimin se kanë kryer vepra. Sipas IPK-së, veprat më të shpeshta janë: keqtrajtimi gjatë ushtrimit të detyrës zyrtare ose autorizimeve publike, keqpërdorimi i pozitës apo autoritetit zyrtar publike, lëndim i lehtë trupor, dhuna në familje dhe kanosja.
Të gjithë partnerët që përbëjnë koalicionin qeverisës në Maqedoninë e Veriut pas takimit me kryeministrin në dorëheqje, Zoran Zaev, janë shprehur se përbërja qeveritare është e qëndrueshme, duke ripërsëritur qëndrimin se janë kundër dorëheqjes së kreut të qeverisë.
Ndërkohë, ende nuk dihet se kur Zaevi do ta dorëzojë në Kuvend dorëheqjen nga posti i kryeministrit, të cilën dorëheqje ai e paralajmëroi menjëherë pas humbjes së zgjedhjeve lokale të dielën.
Nga Qeveria e Maqedonisë së Veriut nuk u janë përgjigjur pyetjeve të Radios Evropa e Lirë nëse ka një kornizë kohore se kur pritet që kryeministri në dorëheqje i Maqedonisë së Veriut ta deponojë dorëheqjen e tij në institucionin ligjvënës.
Nga takimi ndërmjet partnerëve të koalicionit u dha një porosi e qartë se votat e 62 deputetëve qëndrojnë pas kësaj përbërjeje të qeverisë.
Nga ana tjetër, nga VMRO DPMNE-ja të martën kanë thënë se dorëheqja e paralajmëruar e kryeministri Zaev është blof.
“Zoran Zaev sërish bëri blof dhe dorëheqja e tij mbeti vetëm në Facebook dhe nuk e deponoi të njëjtën me shkrim në Kuvend. Nga këtu duket se dorëheqja e Zaevit njëjtë si dorëheqja e Filipçes (Venko Filipçes, ministër i Shëndetësisë), u dha për të mos u pranuar dhe më pas t’i ikë përgjegjësisë”, ka deklaruar Dragan Kovaçevski, zyrtar i lartë në VMRO-DPMNE.
Por, Vlladimir Bozhinovski, drejtues i Institutit për Kërkime Politike thotë për Radion Evropa e Lirë se edhe kundrejt kërkesës së partnerëve të koalicionit qeverisës nuk ka hapësirë që Zaevi ta tërheqë dorëheqjen e tij, të cilën e ka bërë publike.
“Nëse Zaevi pendohet për dorëheqjen, më së shumti do të humbte ai dhe partia që e drejton. Pra, nëse Zaevi e tërheq dorëheqjen, do të kemi problem serioz me legjitimitetin politik të kësaj përbërjeje qeveritare, e cila është në këmbë të qelqta për shkak të shumicës së ngushtë parlamentare”, vlerëson Bozhinovski.
Ndërkohë, nga opozita shqiptare Aleanca për Shqiptarët dhe Alternativa bëjnë të ditur se po punohet në mënyrë intensive për formimin e një përbërjeje të re qeveritare.
Përderisa opozita maqedonase, VMRO-DPMNE, para zgjedhjeve dhe në mes rundeve zgjedhore e ka mbrojtur qëndrimin se është çështje kohe kur do ta bëjnë të ditur shumicën e re parlamentare të kryesuar nga kjo parti, tani janë shprehur më të përmbajtur duke thënë se po punohet në këtë drejtim, por duke lënë hapësirë që kjo gjë të mos arrihet dhe vendi shkojë në zgjedhje të parakohshme parlamentare.
Sfidat që dekurajojnë opozitën të përshpejtojë formimin e qeverisë teknike
Njohësit e zhvillimeve politike thonë se kriza energjetike dekurajon opozitën në këtë moment për të bërë presion që të formohet një qeveri teknike, e cila në bazë të Marrëveshjes së Përzhinos në një afat prej 100 ditëve do të duhet të përgatisë vendin për zgjedhje të parakohshme parlamentare.
Albert Musliu nga Instituti për Zhvillimin e Demokracisë në një bisedë për Radion Evropa e Lirë thotë se është e kuptueshme që VMRO DPMNE-ja ishte shumë zëshme se ka siguruar votat për krijimin e një shumicë të re para zgjedhjeve dhe gjatë fushatës mes dy rundeve zgjedhore për të fituar besimin e asaj pjese të elektoratit që gjithmonë orientohen nga fituesit.
Musliu konsideron se tani kemi një realitet tjetër kur vendi po përballet me probleme reale dhe në këtë situatë opozita e di se marrja e përgjegjësisë do ta tkurrte besimin e elektoratit pasi zgjedhja e problemit me Bullgarinë që është në tavolinë, si dhe kriza energjetike dhe inflacioni do të jenë procese jo të lehta.
“Tash vjen përballja me realitetin, me sfidat e shumta, me të cilat duhet të përballet vendi gjatë periudhës në vazhdim, siç është përmbyllja e çështjes me Bullgarinë, kriza energjetike, kriza e pandemisë nga një valë e re eventuale e COVID-19, inflacioni, rritja e çmimeve, të gjitha këto janë sfida që një shumice të re mund t’ia ulë përkrahjen tek elektorati, ashtu që e shoh të kuptueshme zbutjen e qëndrimit të opozitës maqedonase për formimin e një shumice të re”, vlerëson Musliu.
Edhe Vlladimir Boxhinovski konsideron se opozitës më shumë i konvenojnë zgjedhje të parakohshme në një afat sa më të shkurtër kohor, por shton se në këtë periudhë nuk është momenti i duhur që Maqedonia e Veriut të funksionojë me qeveri teknike me kompetenca të kufizuara në një periudhë kur vendi përballet me shumë sfida.
Ish-komandanti i Forcës së Sigurisë së Kosovës, Kadri Kastrati, vlerëson se buxheti prej 100 milionë euro për FSK-në nuk është i mjaftueshëm.
“Është një nismë e mirë pasi deri tani ushtria ka pas një buxhet modest prej rreth 60 milionë euro dhe këto kanë mjaftuar vetëm për paguar pagat dhe mëditjet, shërbimet mbështetëse dhe asesi për blerjen e pajisjeve apo armatimeve më të sofistikuara që janë të planifikuara sipas ligjeve që janë miratuar në Kuvendin e Kosovës në vitin 2018”.
“Mirëpo, është një nismë e mirë që në vitin 2022 të rritet numrin e ushtarëve sa është i parashikuar prej 5000 aktivë dhe 3000 rezervë. Ne e dimë që tani kjo Forcë ka diku rreth 3500 pjesëtarë dhe është shumë larg arritjes së këtij numri që është i planifikuar”, deklaroi Kastrati.
“Pres që në të ardhmen Qeveria e Kosovës – cilado që të jetë do duhej ta ketë prioritet numër një mbrojtjen dhe sigurinë pasi pa këto të dyja nuk do të ketë siguri as për vendin dhe as qytetarët”, deklaroi Kastrati.
Barcelona pritet ta emërojë Xavi Hernandezin si trajner të ri të enjten. Klubi spanjoll thuhet se ka arritur marrëveshje me spanjollin, që do të udhëtojë drejt “Camp Nou” për të nënshkruar kontratën me klubin.
Ndeshja e parë për Xavin si trajner i Barcelonës pritet të jetë ndaj Espanyolit më 18 nëntor në La Liga.
Xavi do ta zëvendësojë Ronald Koemanin, pasi klubi vendosi ta shkarkonte për shkak të rezultateve të dobëta.
41-vjeçari karrierën si trajner e filloi në Arabinë Saudite te skuadra Al-Sadd.
Ai gjatë karrierës si futbollist ka luajtur te skuadra katalonjase.
Ish-ministri i Mbrojtjes, Rrustem Berisha ka thënë se Kosova duhet që të analizojë mirë situatën përpara se të marr një vendim lidhur me shërbimin ushtarak të detyrueshëm.
Në një intervistë telefonike në emisionin “Frontal”, në T7, ai tha se ka shtete që edhe kanë hequr dorë nga shërbimi ushtarak i detyrueshëm.
“Nuk e kam parë, por mendoj se kjo don një analizë dhe një vendim më të hollësishëm sepse ushtria është bazë për buxhetin e Kosovës, por në anën tjetër ka shumë përparësi në edukimin e të rinjve për ushtrinë, për përdorimin e armëve për mbrojtjen dhe ka shumë shtete që e kanë shërbimin ushtarak të detyrueshëm dhe që janë pjesë e NATO-s. ka edhe prej atyre që e kanë ndërpre dhe më pas e kanë rikthyer prapë shërbimin ushtarak”, tha Berisha.
Sipas Berishës, lidhur me këtë çështje duhet që të konsultohen ekspertët dhe të shihet se në cilën fazë të avancimit është FSK-ja.
“Kjo varet nga sfidat dhe kërkimeve për siguri në përgjithësi. Kjo është çështje që e donë një analizë se s ai bënë ballë buxheti i Kosovës. Unë për fillim e theksova që kjo e don një analizë sepse duhet të merret parasysh se në çfarë faze është zhvillimi dhe avancimi i ushtrisë së Kosovës dhe a duhet ta ketë prioritet shërbimin ushtarak apo diçka tjetër. Ka shumë njerëz që mund të kontribuojnë në këtë drejtim që me e pas një analizë të mirëfillte dhe pastaj me dal me propozime konkrete”, deklaroi Berisha në T7.
Qeveria suedeze ka vazhduar ndalimin e udhëtimit për në Suedi, nga vendet jashtë BE-së deri më 31 janar të vitit të ardhshëm, në të cilin vendim përfshihen edhe shtetasit kosovarë.
Ky ndalim i hyrjes bazohet në një rekomandim të Këshillit të Ministrave të BE-së i vlefshëm për një kohë të pacaktuar për shkak të pandemisë me koronavirus, kështu që zgjatja është në përputhje me rekomandimin.
Sipas Ambasadës Suedeze në Kosovë, këto ndryshime do të hyjnë në fuqi më 5 nëntor 2021.
Ndërkaq, ndalimi i hyrjes në Suedi për udhëtarët nga vendet brenda BE-së është zgjatur deri më 30 nëntor 2021.
Për të udhëtuar në Suedi nga këto vende, duhet të jeni ende në gjendje të tregoni një certifikatë digjitale të BE-së për COVID-19 ose certifikatë ekuivalente që deklaron se ose jeni vaksinuar kundër COVID-19, keni dalë negativ brenda 72 orëve para mbërritjes ose jeni shëruar nga COVID-19 brenda 6 muajve.
Sikur edhe më herët, personat që udhëtojnë nga Danimarka, Finlanda, Islanda dhe Norvegjia nuk i nënshtrohen asnjë kufizimi të hyrjes dhe për këtë arsye nuk kanë nevojë të paraqesin një certifikatë kur hyjnë në Suedi.
Mbi 2 milionë euro u “zhdukën” nga Thesari i Shtetit tetorin e vitit të kaluar ndërsa i dyshuari kryesor për këtë çështje ishte Labinot Gruda, në atë kohë me pozitë në Ministrinë e Financave si menaxher i tavolinës ndihmëse për Sistemin Informativ për Menaxhimin e Financave të Kosovës.
Në aktakuzën e ngritur nga Prokuroria Speciale ndaj Labinot Grudës e Kadri Shalës, përshkruhet në detaje se si është kryer transferi i 2 milionë e 77 mijë e 995 eurove e 90 centë, për të cilën Prokuroria Speciale e ka ngarkuar Labinot Grudën për keqpërdorim të detyrës zyrtare, hyrje në sistem kompjuterik, vjedhje të identitetit dhe pajisje e qasjes, ndërsa Kadri Shala nga e njëjta prokurori po akuzohet për veprën penale të ndihmës të lidhur me veprën penale të keqpërdorimit të detyrës zyrtare.
Sipas aktakuzës, të siguruar nga Kallxo.com, paratë e transferuara nga Gruda te Kadri Shala e i cili ky i fundit pastaj i kishte shpërndarë në disa kompani të tjera sipas aktakuzës janë para të disa projekteve kapitale më saktësisht projektit për “Rehabilitimin e rrugëve Zhur-Dragash në vlerë të 330 mijë e 92 eurove, Prizren-Prevallë në vlerë të 750 mijë eurove, Prizren-Prevallë në vlerë të 375 mijë eurove dhe projektin Prishtinë-Mitrovicë në vlerë të 622 mijë e 903 eurove”.
Aktakuza tutje përshkruan se sa usera apo përdorues ka krijuar Labinot Gruda për të tërhequr paratë e projekteve dhe për t’i transferuar ato më pas në kompaninë “LDA GROUP SHPK” në të cilën person i autorizuar ligjor ka qenë Kadri Shala.
Më 9 tetor të vitit të kaluar, Labinot Gruda sipas aktakuzës, në orën 11:28 minuta përmes userit/përdoruesit të tij “LGruda” ka përditësuar klasën funksionale të tij në SIMFK duke i mundësuar vetes regjistrimin e furnitorëve apo operatorëve ekonomik, ku më pas ka regjistruar në SIMFK kompaninë “LDA GROUP SHPK”.
Labinot Gruda tutje sipas aktakuzës në të njëjtën ditë kishte krijuar disa usera/ përdorues të rinj për të mundësuar më pas qasjen në urdhër blere dhe qasje në pranim të mallit. Në orën 12:33 të datës 9 tetor 2020, Labinot Gruda kishte krijuar edhe një përdorues tjetër me qasje për shpenzim dhe në orën 12:42 ka ndërruar fjalëkalimin për përdoruesin ekzistues të një personi i cili kishte qasje në sistem si zyrtar certifikues në Ministrinë e Infrastrukturës.
Pas këtyre hapjeve të llogarive të reja, sipas aktakuzës, Gruda kishte shfrytëzuar njërën nga këto llogari për të bërë urdhër-blerje në vlerë të mbi 2 milionë eurove për kompaninë “LDA GROUP SHPK”, person autorizues ligjor i të cilës ishte Kadri Shala.
Sipas pretendimeve të Prokurorisë, veprimet e Grudës nuk kishin ndaluar, ai përmes llogarisë së tij pas realizimit të urdhër blerjes me qëllim të pranimit të mallit kishte shfrytëzuar edhe një llogari tjetër të cilën e kishte krijuar vetë dhe kishte bërë pranimin e mallit për të gjitha urdhër blerjet për kompaninë “LDA GROUP SHPK”.
Për çdo veprim, Gruda kishte përdorur llogari të krijuara nga vet ai, thuhet në aktakuzë. Edhe për shpenzim të mallit, Gruda kishte përdorur një llogari tjetër dhe kishte krijuar kuponët e shpenzimit si dhe certifikimin e kuponëve për kompaninë “LDA GROUP SHPK”.
Në pretendimet e Prokurorisë, për certifikimin e kuponëve Gruda i kishte ndryshuar fjalëkalimin personit i cili ka qenë zyrtar i certifikuar në Ministrinë e Infrastrukturës për të kryer këtë punë.
Pas certifikimit të kuponëve të shpenzimit, Labinot Gruda ka ekzekutuar edhe pagesat në vlerë të 2 milionë e 77 mijë e 995 eurove e 90 cent në drejtim të kompanisë “LDA GROUP SHPK” në të cilën person i autorizuar ligjor ishte Kadri Shala.
Me këto veprime, Prokuroria Speciale e akuzon Grudën për keqpërdorim të detyrës zyrtare.
Për krijimin e llogarive apo përdoruesve të rinj pa aprovim paraprak të udhëheqësit të departamentit për të tërhequr mbi 2 milionë euro nga Thesari i Shtetit, Prokuroria Speciale, Grudën e akuzon për ndërhyrje në sistem kompjuterik.
Prokuroria pretendon se këto llogari të reja Gruda i ka krijuar nga ora 12:5 minuta deri në 12:33 minuta.
Tutje, Prokuroria Speciale e akuzon Grudën edhe për vjedhje të identitetit, pasi që i njëjti në datën e njëjtë me qëllim të kryerjes së veprës penale, ka shfrytëzuar pajisjen e qasjes dhe informacionit dhe i ka keqpërdorur llogarinë një zyrtari tjetër i cili ka qenë zyrtar certifikues në Ministrinë e Financave, të cilit rreth orës 12:42 të datës 9 tetor 2020, i kishte ndërhyrë në llogari dhe i kishte certifikuar kuponët në vlerë të 2 milionë e 77 mijë e 995 eurove e 90 cent për kompaninë “LDA GROUP SHPK”.
Labinot Gruda ndodhet në paraburgim nga 20 tetori i vitit të kaluar në Qendrën e Paraburgimit në Pejë ndërsa, Kadri Shala gjendet në paraburgim nga 26 nëntori i vitit të kaluar në Burgun e Dyzit, i cili gjendet në Podujevë.
Në seancën fillestare të mbajtur më 28 tetor, të akuzuarit janë deklaruar të pafajshëm në pikat e aktakuzës me të cilat ngarkohen.
