Kryeministri i Kosovës Albin Kurti, të martën në mbrëmje ka dhënë një intervistë për BBC-në.

Kurti në emisionin “Hard Talk” ka thënë se nuk do ta lejojë bosnjëzimin e Kosovës.

Ai tha se nuk do ta lejojë zbatimin e marrëveshjes për Asociacionin e Komunave me shumicë serbe.

E lidhur me këtë është deklaruar Ambasada e Shteteve të Bashkuara të Amerikës në Prishtinë.

Në një përgjigje për Klankosova.tv nga kjo ambasadë thuhet se qëndrimi i SHBA-së nuk ka ndryshuar.

Po ashtu bëhet thirrje që të zbatohen të gjitha marrëveshjet e arritura në dialogun Kosovë-Serbi, përfshirë edhe marrëveshjen për Asociacionin.

“Qëndrimi i SHBA-së nuk ka ndryshuar. Është thelbësore që Kosova dhe Serbia të respektojnë zotimet e tyre duke zbatuar të gjitha marrëveshjet e mëparshme. Këtu përfshihet Asociacioni i Komunave Serbe. Ne nuk po e përshkruajmë se si duhet të zbatohet kjo marrëveshje, apo ndonjë tjetër. Teknikat e zbatimit janë në dorën e palëve”.

E për deklaratën e shefit të ekzekutivit kosovar më herët ka folur edhe zëdhënësi i Bashkimit Evropian Peter Stano.

Stano në një adresim për media tha se marrëveshja për Asociacionin e Komunave me shumicë serbe duhet të zbatohet.

“BE-ja nuk i komenton deklaratat e të tjerëve. Është e qartë kur bëhet fjalë për zbatimin se çfarë është marrë vesh në dialog”.

“Duhet të bëjmë gjithçka që të zbatohet ajo çfarë është nënshkruar”.

Shefi i zyrës së Bashkimit Evropian në Kosovë, Tomas Szunyog, nuk ka dhënë asnjë arsyetim se përse Kosovës nuk po i liberalizohen vizat pavarësisht se Komisioni Evropian ka vendosur tash e tre vjet që Kosova i ka përmbushur të gjitha kriteret për liberalizim.

Pas kritikave të liderëve kosovarë për mosliberalizim, në mbledhjen e Komisionit Parlamentar për MSA-në, Kosovë – BE, Szunyog ka folur shkurt për këtë çështje.

“E dimë sa i rëndësishëm është liberalizimi i vizave për qytetarët e Kosovës. Von Der Leyen (shefja Komisionit Evropian) ka qenë e qartë. Komisioni i qëndron prapa vendimit të korrikut të vitit 2018 që Kosova i ka përmbushur të gjitha kriteret për liberalizim. Është mbështetur edhe nga Parlamenti Evropian në lexim të parë, por është në shqyrtim në Këshill. Llogaris në mbështetjen e anëtarëve të Parlamentit Evropian dhe të deputetëve që janë këtu sot që të vazhdojnë të punojnë me Parlamentin Evropian për ta arritur këtë qëllim. Kuvendi ka rol të rëndësishëm që duhet ta luajë në zbatimin e reformave dhe priorietizimin e reformave në sundim të ligjit”, ka thënë ai.

Tutje Szunyog ka thënë se BE-ja është e gatshme të punojë me Kosovën në rrugën e saj drejt BE-së.

Ai ka vënë në pah Raportin e Progresit që theksoi ngecje në miratim të disa ligjeve, ndërsa ka bërë thirrje që tash kjo të ndryshojë.

Për dialogun me Serbinë ai ka thënë se është e rëndësishme të punohet në mënyrë konstruktive e të ketë përmbajtje nga retorika. Ka bërë thirrje për zbatim të të gjitha marrëveshjeve të arritura në të kaluarën.

Po ashtu ka bërë thirrje për miratim të Ligjit për Paga

Kryetari i Lëvizjes Vetëvendosje, Albin Kurti dhe kandidati i kësaj lëvizjeje për Kryetar të Prishtinës, Arben Vitia kanë kaluar ca qaste relaksimi.

Kështu së paku shihet në një video të shpërndarë nga Vitia në profilin e tij në Facebook.

“Menaxhimi i Prishtinës kërkon bashkëpunim e përkushtim të përditshëm i cili deri më tash i ka mungu kryeqytetit” ka shkruar ai sipër videos.

Në cak të Kurtit dhe Vitisë shihet të jetë topi me numrin 14, si simbolikë e 14 nëntorit, ditën që do të mbahet raundi i balotazhit.

Kryeministri i Kosovës, Albin Kurti, e ka quajtur të padrejtë dhe dritëshkurtër vendimin për mosliberalizim të vizave për qytetarët e Kosovës.

Në takimin e Komisionit për MSA-në, Kurti ka përmendur zhvillimin ekonomik e reforma në drejtësi në kuadër të forcimit të shtetit. Ai ka thënë se të gjitha reformat janë në agjendë për reformë evropiane.

“Shpesh them se Bashkimi Evropian fillon në shtëpi dhe duhet të rritet këtu nga brenda, por na duhet ndihma nga jashtë, pra ndihma nga BE-ja. Ne jemi te përkushtuar për të intensifikuar përmbushjen e reformave dhe jemi në rrugë te mbarë. Ndryshimet demokratike në Kosovë kanë sjellë stabilitet dhe deri në fund të këtij viti pritet të rritet edhe zhvillimi ekonomik. Kemi pasur rritje të hyrave importeve etj. Kemi menaxhuar pandeminë dhe jemi vendi i parë në rajon me mesataren e numrit të vaksinave Kemi filluar reformat rrënjësore në drejtësi me veting dhe ligjin për pasuri të pajustifikueshme. Këto reforma do të forcojnë shtetin e së drejtës. Kemi themeluar struktura ndërinstitucionale për procesin e integrimit evropian. Këto edhe tema të tjera do të diskutohen hollësisht në ketë komision sot e nesër dhe këto janë prioritete edhe në agjenda për reforma evropiane”, ka thënë Kurti.

Më tej ai ka thënë se edhe BE-ja duhet të ketë përmbushje për çështjen e Kosovës.

“Edhe zëri i qytetarëve të Kosovës duhet të dëgjohet nga ju. Veprimi për mosliberalizim të vizave për qytetarët e Kosovës është i padrejtë dhe dritëshkurtër”, ka thënë ai.

Lëvdata për qeverisje ka shprehur edhe zëvendëskryeministri Besnik Bislimi.

Kryeparlamentari i Kosovës, Glauk Konjufca, ka thënë se Bashkimi Evropian nuk do të jetë i plotë pa përfshirjen e Kosovës dhe të vendeve të Ballkanit Perëndimor në të. Ai ka kritikuar BE-në se nuk e ka mbajtur fjalën për liberalizim vizash për kosovarët.

Në takimin e shtatë të Komisionit Parlamentar për Stabilizim-Asocim mes të Bashkimit Evropian dhe Kosovës, Konjufca ka thënë se në 6 vjetët që kur është nënshkruar Marrëveshja e Stabilizim-Asocimit ka ngecur për shkaqe të ngecjes së vullnetit politik.

Sipas tij, prej zgjedhjeve të fundit në shkurt, në Kosovë “ka vullnet politik dhe ka stabilitet politike për rrugën drejt integrimit evropian”.

“Jemi plotësisht të bindur se integrimi nuk është proces i njëanshëm, por është i bazuar në procesin reciprok. Ne e mendojmë BE-në si një sistem të vlerave të demokracisë drejtësisë e sigurisë që duhet të e ndërtojmë këtu në Kosovë dhe vetëm kështu transformohemi duke u bërë Bashkim Evropian. Por as BE-ja nuk është e plotë pa përfshirjen e Kosovës dhe vendeve të Ballkanit Perëndimor. Pika më kritike e BE-së ka të bëjë me zgjerimin. U bënë 8 vite kur shteti i fundit iu bashkua Be-së dhe nuk mbaj mend që procesi i zgjerimit është në krizë sikur sot. Bashkimi Evropian nuk i ka dalë zot Kosovës në një premtim e bëhet fjalë për liberalizimin e vizave. Regjimi i vizave ende mbetet në fuqi për qytetarët e Kosovës”, ka thënë ai.

Ministria e Shëndetësisë ka vendosur që nga nesër, vaksinimi kudo në qendrat në Kosovë të bëhet pa caktuar termin.

Po ashtu, qytetarët mund të vaksinohen në secilën qendër të vaksinimit kudo në Kosovë, pavarësisht se cilës komunë i takojnë me vendbanim.

“Ministria e Shëndetësisë vlerëson se tashmë një numër i konsideruar i qytetarëve të grup-moshave të ndryshme janë vaksinuar kundër COVID-19 dhe kjo e bën edhe më të lehtë menaxhimin e procesit të vaksinimit në çdo qendër, ku përmes ekipeve të vaksinimit në dispozicion, ka kapacitete për t’iu përgjigjur të gjitha kërkesave të qytetarëve për vaksinim”, thuhet në njoftim.

Së fundi, MSH-ja ka miratuar edhe rekomandimin për vaksinimin e fëmijëve të grupmoshës nga 12 deri në 15 vjeç.

“Në këtë kohë kur në shtete të ndryshme të Evropës, por edhe në rajon po regjistrohen shifra shumë të larta të infektimeve me COVID-19 me dominim të variantit Delta, vaksinimi i popullatës mbetet rruga më e sigurt për ta mbajtur situatën e qetë epidemiologjike në vendin tonë dhe për të arritur imunitetin kolektiv”, thuhet në njoftim.

Në 24 orët e fundit janë shënuar 14 raste pozitive me COVID-19.

14 raste me COVID-19 janë regjistruar në 24 orët e fundit në Kosovë, ndërkaq nuk është raportuar për asnjë vdekje.

Sipas të dhënave të Ministrisë së Shëndetësisë janë shëruar 16 qytetarë duke çuar numrin e përgjithshëm të të shëruarve në 157402.

Numri i rasteve aktive në vend është 443.

“Në 24 orët e fundit janë dhënë 2.748 doza të vaksinës kundër COVID-19. Prej fillimit të vaksinimit në të gjitha qytetet e Kosovës janë dhënë 1.575.375 doza të vaksinës. Deri më sot 735.357 qytetarë janë vaksinuar me dozën e dytë”, thuhet në njoftim.

Kryeministri i Republikës së Kosovës, Albin Kurti, ka pritur sot në Prishtinë, zyrtaren e lartë të Departamentit të Shtetit Amerikan, Molly Montogomery.

Zëvendës ndihmësja e sekretarit të Shtetit, Molly Montgomery në këtë takim ka theksuar marrëdhënien ndërmjet Shteteve të Bashkuara të Amerikës me Kosovën, e veçanërisht lidhjen e fortë personale që Presidenti Biden ka me Kosovën.

Në emër të Shteteve të Bashkuara të Amerikës ajo ka falënderuar kryeministrin Kurti dhe Qeverinë e Kosovës për bashkëpunimin dhe mbështetjen në çështjen e strehimit të qytetarëve afganë.

Kryeministri Kurti ka deklaruar se kjo ndihmë ishte obligim humanitar i Kosovës, duke shtuar se Kosova dëshiron t’i qëndrojë në krah ShBA-ve, si aleat trategjik.

Ai e falënderoi për mbështetjen e dhënë për Forcën e Sigurisë së Kosovës për pajisje dhe trajnime, si dhe shprehu vullnetin për bashkëpunim të mëtejmë. Po ashtu e njoftoi për buxhetin e Republikës së Kosovës për vitin 2022, ku përfshihet edhe ndarja e mbi 100 milionë eurove për ushtrinë.

Siç njofton zyra për media e kryeministrit, Kurti ka shprehur mirënjohen për vlerësimin e Presidentit Biden, që vazhdimi i bisedimeve mes Kosovës dhe Serbisë dhe arritja e një marrëveshjeje duhet përqendruar në njohjen reciproke.

Gjithashtu, u bisedua për situatën e mirë në menaxhimin e pandemisë COVID-19, mbarëvajtjen e procesit të vaksinimit dhe administrimin e rreth 1.6 milionë dozave.

Kryeministri Kurti ka falendëruar ShBA-në për ndihmën në procesin e sigurimit të vaksinave kundër Covid-19.

Duke ritheksuar aleancën e palëkundur me ShBA-në, kryeministri shprehu përkushtimin e Qeverisë për të zgjeruar bashkëpunimin edhe më tej në fushën e edukimit, agrikulturës dhe investimeve.