Eksperti i sigurisë Nuredin Ibishi, po thotë se paralajmërimet për sulme të mundshme në Kosovë, të bëra nga Departamenti Amerikan i Shtetit, paraqesin rreziqe.

Ibishi në një prononcim për Ekonomia Online, tha se kjo është kërcënim jo vetëm për Kosovën, por edhe për rajonin.

Madje, ai tha se akte të tilla terroriste mund të shpien në konflikte ndër etnike në katër komunat në veri që mund të jenë pjesë e luftës hibride të rusëve.

“Këto janë paralajmërime të hershme qe në një formë paraqesin rreziqe jo vetëm për Kosovën, por edhe gjithë Ballkanin nga kthimi i personave që janë dërguar në organizata terroriste edhe në Kosovë. Jo vetëm Departamenti Amerikan i Shtetit, por edhe Agjencioni i Inteligjencës në një formë po paralajmërojnë mundësinë që në vendet ku ka përqendrim, më të madh të popullatës sidomos tash në kohën e festave para vitit të ri që mund të ketë akte terroriste edhe në vendet e grumbullimit poashtu edhe konflikte ndër etnike në katër komunat në veri që mund të jenë pjesë e luftës hibride të rusëve”.

Sipas Ibishit, Policia e Kosovës ka ndërmarrë të gjitha masat e nevojshme për parandalimin e ndonjë sulmi terrorist në Kosovë, raporton EO.

“Sektori i sigurisë në Kosovë është funksionalizuar në Kosovë dhe vepron edhe në mënyrë parandaluese edhe në mënyrë të reagimit. Por duhet pasur parasysh se informacioni i duhur në këtë rast nga Agjencia profitabile e shtetit nga aleatë tonë strategjik duhet të merret seriozisht”.

“Policia e Kosovës ka marrë masa të menjëhershme me qëllim që edhe në disa vende që janë paralajmëruar caqe të mundshme të veprimit që të parandalohet nëse do të ketë ndonjë akt terrorist”.

Përderisa ambasada amerikanë në Prishtinë gjatë së hënës këto paralajmërime nuk i ka konsideruar si risi.

Zëdhënësi i Ambasadës Eric Brassil, tha se kjo nuk është diçka e re, as në Kosovë e as në Ballkan në përgjithësi, duke shtuar se janë në komunikim me Policinë e Kosovës për çdo gjë.

“Ambasada e ShBA-së monitoron kërcënimet lokale për të garantuar sigurinë e punonjësve tanë dhe qytetarëve amerikanë që jetojnë në Kosovë. Për këtë arsye jemi në komunikim të vazhdueshëm me Policinë e Kosovës. Ne nuk ishim një nga misionet/ambasadat që paralajmëruan punonjësit tanë dhe/ose qytetarët amerikanë për këtë kërcënim të veçantë dhe nuk kemi plane ta bëjmë këtë momentalisht”.

“Gjuha në lidhje me aktivitetin e mundshëm terrorist në Ballkan ka qenë në faqen e internetit për shumë muaj. Kjo nuk është e re. në fakt, të hënën e kaluar, më 22 nëntor, këshillimi i udhëtimit zbriti nga ‘Mos udhëto’ në ‘Rikonsideroni udhëtimin’. Kjo kryesisht nxitet nga të dhënat nga CDC në lidhje me rrezikun e Covid-19 për amerikanët që mund të udhëtojnë në Kosovë”.

Ambasada e Gjermanisë në Kosovë, ka njoftuar se ka ndryshuar procedurën e dhënies së termineve. Kjo për shkak të kërkesave të shumta për caktim të terminëve për me qëllim të nisjes së punësimit sipas rregullores për Ballkanin perëndimor.

Ambasada ka njoftuar se janë duke u tejkaluar terminet që janë në dispozicion dhe për të pasur mundësi të barabartë gjatë aplikimit, nga fillimi i dhjetorit, terminet do të jepen përmes procedurës së tërheqjes së shortit.

Personat e interesuar do të kenë mundësinë që nga data 1 dhjetor në orën 14.00 deri më 17 dhjetor në orën 12.00, nëpërmjet sistemit online të termineve të ambasadës të shprehin interesimin e tyre për procedurën e shortit.

“Nga të gjitha regjistrimet, nga gjeneratori i rastësishëm i drejtuar në mënyrë kompjuterike në një procedurë të shortit do të përzgjidhen ata, të cilët e marrin një termin për aplikim në periudhën janar deri në fillim të shkurtit 2022. Procedura e shortit do të realizohet secilën herë në Ministrinë e Jashtme Federale në Berlin nën mbikëqyrjen e më shumë personave”, thuhet në njoftimin e ambasadës.

Tutje ambasada ka bërë apel që shënimet dhe të dhënat e aplikuesve të jenë të sakta. Gjithashtu në njoftimin e ambasadës përmenden edhe disa informacione shtesë të cilat duhet të kenë parasysh aplikantët.

Sipas tyre, regjistrimet e shumëfishta janë të pamundura, ndryshimet e të dhënave të shënuara gjatë regjistrimit nuk kanë të mundshme, kalimi i terminit te një person tjetër nuk është e lejueshme, regjistrimi i mëhershëm nuk është përparësi kundrejt një regjistrimi të vonshëm, angazhimi i agjencioneve nuk sjell asnjë përparësi.

Ambasada ka njoftuar edhe se nuk japin terminë të veçanta dhe kanë kërkuar që aplikuesit të përmbahen nga pyetjet e tilla.

Aktorja, Adriana Matoshi, përmes një postimi prekës në rrjetin social “Facebook”, ka njoftuar se i është rikthyer tumori në tru, për të cilin ishte operuar para nëntë vitesh.

Matoshi përmes postimit ka treguar se para nëntë vitesh kur ishte diagnostikuar me tumor në hipofizë, ka qenë shtatzënë.

Asaj i kanë dal në mbështetje shumë kolegë aktorë, deputet, miq e mijëra njerëz të cilët përmes komenteve të ndryshme në rrjete sociale i kanë uruar shërim të shpejt.

“Mos bo stila, kemi pune vitin e ardheshem!”, aktori Fatmir Spahiu i njohur si Bufi, i ka komentuar asaj në postimin e bërë në “Facebook”.

Ndryshe, gazetari Milaim Zeka ka postuar një fotografi të deputetes, duke shkruar se të gjithë lutemi për të.

“Adriana Matoshi – te gjithe lutemi per Ty. Ke kalu sfida me te renda ne jete, se sa kjo. Te gjitha do i kalosh, duke mos harru per asnje sekond se te duam shume, dhe lutemi per Ty!”, shkroi ai në postim.

“E dashur Adriana Matoshi jemi me fat qe te kemi. Je personi qe gjitheher na rikujton rendesin e jetes. Te dergoj shume perqafime, jam e bindur qe edhe kete betej do ta kalon dhe do shihemi per te luftu edhe beteja te tjera bashk”, komentoi deputetja e Lëvizjes Vetëvendosje, Saranda Bogujevci.
“Gutu kryj punë Adriana se 100.000 punë i kemi”, ka shkruar aktori, Edi Kastrati.

“Adriana, ti je e forte zemer dhe perplot pozitivitet dhe jam e bindur qe do ta kalosh edhe kete sfide e do te kthehesh me shendet te plote prane familjes, miqve e kolegeve. Bashkë, do t’i vazhdojme planet qe i kemi”, i ka shënuar ministrja e Drejtësisë Albulena Haxhiu.

“Ti qëndron e fortë përpara çdo stuhije. Shtyllën për forcë e ke udhëtim të jetës. Nuk të mposht asgjë!”, ka komentuar deputetja e LDK-së, Vlora Dumoshi.

“Ti je e fortë! Pa dyshim qe do ja dalesh! Zoti qofte me Ty”, ka komentuar deputetja e PDK-së, Ganimete Musliu.