Zyra për informim publik e DRP në Prizren, njofton se gjatë ditës së sotme, kapiten, Hasan Tershani,shef i Njësisë Rajonale të Komunikacionit Rrugor në Prizren së bashku me stafin  kanë mbajtur një takim pune me përfaqësuesit e kompanive që bëjnë pastrimin e rrugëve nacionale dhe rajonale si dhe  me menaxherët e Ministrisë së Infrastrukturës z. Ferid Tafallari, që është përgjegjës për rrugët rajonale Prizren 1 dhe nacionale.Poashtu i pranishëm ishte edhe  përfaqesuesi tjetër  i MI-së, Bahti Nebiu,  përgjegjës për rrugët rajonale Prizren 2 dhe nacionale si dhe përfaqësuesi i KK Prizren, z. Muhamet Bajrami, përgjegjës për mirëmbajtjen e qytetit të Prizrenit.

Në takim është kërkuar nga përfaqësuesit e kompanive përgjegjëse për pastrimin e rrugëve që të jenë të gatshëm pasi po afrohet koha kur po hymë në sezonin  dimëror, në mënyrë që të mos ketë pengesa në qarkullim të mjeteve në infrastrukturën rrugore të nivelit nacional dhe rajonal.

Përfaqësuesit e kompanive  përgjegjëse janë shprehur se janë në gatishmëri të plotë për të menaxhuar dhe intervenuar  me kohë në pastrimin e rrugëve.

Takimi u vlerësua i dobishëm dhe  konstruktiv dhe  u dakorduam që së bashku t’i paraprijmë preventivës në sigurinë rrugore.

Drejtoria Rajonale e Policisë në Prizren mbetet e përkushtuar në  mbrojtjen e rendit publik dhe ligjit duke ngritur bashkëpunimin me prioritet.

Policia e Kosovës duke zbatuar ligjet e aplikueshme synon në krijimin e një ambienti të qetë për të gjithë qytetarët e saj, njofton zyra për informim publik e DRP në Prizren.

Policia e Kosovës ka kërkuar bashkëpunimin e qytetarëve për të ndihmuar në lokalizimin e Lundrim Beqirit, të dyshuar për vrasjen e 30 tetorit në Mitrovicë.

Beqiri dyshohet se më 30 tetor e ka therur me thikë personin A.M., që si pasojë e plagëve ka vdekur në Qendrën Klinike Universitare të Kosovës.

Pos Beqirit i dyshuar ishte edhe një tjetër person, që më 2 nëntor ishte dorëzuar në Polici.

Duke kërkuar ndihmën e qytetarëve, Policia ka publikuar edhe fotografi e detaje për Beqirin.

Policia ka thënë se qytetarët mund të lajmërojnë në stacionin më të afërt policor, përmes telefonit apo aplikacionit “Lajmëro Policinë” nëse kanë informata se ku mund të gjendet i dyshuari.

Numrat e telefonit dhe adresat elektronike kontaktuese për të kontaktuar Policinë e Kosovës:

192

+381 (0)28 532 366-Drejtoria Rajonale Mitrovicë Jugu

044/245 503

E-mail adresa: [email protected]

Kryeministri i Kosovës, Albin Kurti, ka komentuar masat e mara përfshirë ato drejt luftimit të COVID-19, marrë mbrëmë nga Qeveria e Kosovës, shkruan Reporteri.net.

Kurti, ka përmendur masat e reja kundër COVID-19, promovimin dhe respektimin e diversitetit e barazisë, katër projektligje të miratuara dhe dy vendime të mëhershme të shfuqizuara.

“Mbledhjen e mbrëmshme të Qeverisë, të 46-tën, e zhvilluam në mënyrë elektronike. Si vendim të parë, miratuam masat e reja për kontrollin, parandalimin dhe luftimin e pandemisë COVID-19. Ato i përgjigjen situatës së tanishme pandemike në vend por edhe nevojës për të qenë të kujdesshëm ndaj virusit i cili me disa variante të tij vazhdon të jetë prezent në mesin tone”, ka shkruar Kurti në Facebook.

Tutje, Kurti ka përmendur edhe vendimet tjera që sipas tij, prej fillimit të qeverisjes së tij janë 408 vendime të marra.

“Shpallëm vitin 2022 – Vit i personave me aftësi të kufizuara në Republikën e Kosovës. Së bashku do të punojmë për një shoqëri me gjithëpërfshirje e mundësi për të gjithë. Ndër 14 vendimet e kësaj mbledhje nga 408 sa kemi marrë gjithsej që nga fillimi i qeverisjes sonë, katër ishin për miratimin e projektligjeve nga fushëveprimi i Ministrisë së Mbrojtjes, tek ai i Ministrisë së Financave, Punës dhe Transfereve e deri te i Ministrisë së Arsimit, Shkencës, Teknologjisë dhe Inovacionit”, shtoi tutje Kurti.

“Shtuam ligjshmëri duke shfuqizuar edhe dy vendime të qeverive të mëparshme. Njëri i qershorit të vitit 2018 për emërimin e zëvendësdrejtorit për shërbime administrative-financiare në Agjencinë e Shërbimit të Navigacionit Ajror. Tjetri i qershorit të vitit 2019 për rekomandimin e ministrit të atëhershëm të Mbrojtjes në lidhje me ristrukturimin e disa pozitave në këtë ministri”, ka thenë Kurti derisa ka përmendur se do të punohet për vendimet të reja.
“Vazhdojmë punën si dhe përgatitjet për vendime tjera të mira…”, përfundoi ai.

Nga sot, datë 1 dhjetor 2021, ata që janë të interesuar për vizë pune në Ambasadën e Gjermanisë do ta kenë për më shumë se dy javë të hapur sistemin për terminë, shkruan Reporteri.net.

Megjithatë, përzgjedhja e atyre që aplikojnë do të bëhet nëpërmjet shortit.

Procedura për pajisje me vizë pune gjermane është ndryshuar nga kjo e hënë. Qytetarët e Kosovës që duan të marrin vizë gjermane, nga 1 dhjetori e deri më 17 dhjetor do ta kenë sistemin e hapur për aplikim dhe se përzgjedhja e tyre do të bëhet me short.

Pavarësisht se sa aplikojnë, brenda një muaji me vizë pune mund të pajisen rreth 450 persona. Në njoftimin e Ambasadës lëshuar të hënën thuhet se procedura e shortit do të mbikëqyret në Ministrinë e Jashtme Federale në Berlin.

Personat e interesuar do të kenë mundësinë që nga sot në orën 14:00 deri më 17 dhjetor në orën 12:00, nëpërmjet sistemit online të termineve të ambasadës të shprehin interesimin e tyre për procedurën e shortit.

Në Departamentin Special të Gjykatës Themelore në Prishtinë, e akuzuara Ikballe Berisha-Huduti, u lirua nga akuza për shtytje në terrorizëm.

Aktgjykimi ndaj Berisha-Hudutit u shpall të mërkurën nga gjykatësi Vesel Ismajli, raporton “Betimi për Drejtësi”.

Sipas aktgjykimit, e akuzuara Ikballe Berisha- Huduti, e akuzuar se ka kryer veprën penale “Shtytje në kryerje të veprave terroriste”, lirohet nga akuza, për shkak se nuk është provuar se e njëjta ka kryer veprën penale për të cilën akuzohet.

Gjykatësi Ismajli tha se ky vendim erdhi pas shqyrtimitdhe analizimit të të gjitha provave një nga një, unanimisht konform neneve 157, par.2 359, par.1 dhe 2. dhe neni 364. par.1. pika .1.3. të Kodit të Procedurës Penale të Republikës së Kosovës.

Shpenzimet e procedurës bien mbi barrën e mjeteve buxhetore të gjykatës.

Ndërsa, palët e pakënaqura kanë të drejtë të ushtrimit të ankesës kundër këtij aktgjykimi në afatin ligjor prej 15 ditësh nga momenti kur pranohet në formë të shkruar dhe me arsyetim të zgjeruar.

Sipas aktakuzës së përpiluar më 30 shtator 2020, Ikballe Berisha-Huduti akuzohet se më 4 janar 2020, përmes rrjetit social “Facebook” kishte postuar thirrje me përmbajtje kërcënuese, duke bërë nxitje për hakmarrje pas vrasjes nga ushtria amerikane e Qassem Solejmani-gjeneral dhe udhëheqës i gardës revolucionare të Iranit dhe gjeneral Ebu Mehdi Muhendisi.

Në aktakuzë thuhet se e akuzuara kishte postuar tekstin “Populli Irakian doli në rrugët e Irakut menjëherë pas krimit amerikan, për të dënuar ashpër padrejtësinë që iu bë dy figurave eminente në Irak e Iran dy gjeneralët të tyre Gjeneral Sylejmani dhe Gjeneral Ebu Mehdi Muhendisi. Zoti i dasht durimin ngase të mbysësh Zotin e shtëpisë i ke mbytë tërë anëtarët e shtëpisë, e pastaj hakmarrja është obligim, por nuk ka kufi”.

Për këtë postim, PSRK po pretendon se e njëjta kishte shkaktuar rrezikun që një ose më shumë vepra të tilla të kryhen.

Më këtë veprim, PSRK-ja po e akuzon atë për kryerjen e veprës penale “Shtytja për kryerjen e veprave terroriste”, nga neni 134 i Kodit Penal të Republikës së Kosovës.