Të gjithë specializantët e angazhuar në Shërbimin Spitalor Klinik Universitar të Kosovës (ShSKUK) me financim nga Ministria e Shëndetësisë̈ dhe ata me vetë financim sot kanë protestuar para Qeverisë së Kosovës.

Protesta e tyre nisi nga Qendra Klinike Universitare e Kosovës (QKUK), ndërkaq përmes këtij marshi protestues po kërkojnë që ata që janë me vetëfinancim të kthehen në të rregullt dhe të gjithëve tu paguhet kujdestaria sidomos gjatë vikendeve.

“’20 vite u harruam mos na harroni edhe ju’, ‘familja nuk mund të na financoj gjatë gjithë jetës’, ‘na trajtoni me dinjitet’, ‘kryeministër ndaloni traditën e neglizhencës së mjekëve të rinj’, ishin disa nga mbishkrimet që mbanin në duar protestuesit të cilët i vendosen para Qeverisë së Kosovës dhe objektit të Kuvendit të Kosovës.

Arianit Zajmi specializant tha se përmes këtyre protestave po kërkojnë trajtim dinjitoz nga shteti.

KEDS-i ka kërkuar nga Zyra e Rregullatorit të Energjisë rritje të çmimit të energjisë prej 7 për qind nga 1 dhjetori, dita e djeshme. Kështu ka bërë të ditur për Sinjalin, zëdhënësi i KEDS-it, Viktor Buzhala.

Përmes kërkesës për aplikim të jashtëzakonshëm të tarifave, KEDS-i po kërkon që rritja prej 7 për qind të jetë deri në fund të marsit.

“Kjo do të vlejë deri në shqyrtimin e rregullt tarifor, i cili bëhet në fillim të vitit të ardhshëm me tarifa që hyn në fuqi nga data 1 prill pasi vit energjetik që e themi ne fillon me 1 prill dhe përfundon me 31 mars të vitit vijues, aty ne do të aplikojmë për të hyrat tona të lejuara dhe për tarifat që i mbulojnë kostot pasi dihet që kemi të bëjmë me çmime astronomike të importit të cilat shkojnë në 300 euro megavat apo 5-6 fish më të larta se vitin e kaluar dhe këto çmime duhet të mbulohen”, ka thënë Buzhala.

Policia e Shqipërisë ka njoftuar se ka arrestuar një 21-vjeçar, i cili ishte kapur duke transportuar në mënyrë të paligjshme emigrantë në drejtim të Kosovës.

Policia e Shtetit ka bërë publike një video të realizuar në vendin e ngjarjes, ku shihet se si në bagazhin e veturës të të dyshuarit janë gjetur emigrantët.

Në njoftimin e Policisë së Shtetit thuhet se i dyshuari nga Tirana e ka kryer këtë vepër penale kundrejt fitimit.

“Materialet i kaluan Prokurorisë së Rrethit Gjyqësor Kukës, për veprën penale ‘Ndihma për kalim të paligjshëm të kufijve’”, është thënë tutje.

Kryetari i Shoqatës së Naftëtarëve të Kosovës, Fadil Berjani ka paralajmëruar rënie të çmimeve të derivateve të naftës për javën e ardhshme.

Berjani thotë se rënia ka nisur e çmimeve ka nisur nga mbrëmë, por rënie më të theksuar do të ketë nga java e ardhshme.

“Ulje të çmimeve më të theksuara pritet të ketë në javën e ardhshme. Kështu është për momentin situata, por kjo nuk është me siguri të plotë, sepse mund të lëvizë edhe në anën e kundërt, por informatat janë që do të lëvizet në këtë drejtim”, ka thënë Berjan për indeksonline.

Në muajin e fundit të këtij viti, përfaqësuesi i lartë i BE-së, Josep Borrell, tha se Kosova dhe Serbia duhet të kthehen në tavolinën e bisedimeve.

Ai dje ka përmendur edhe tensionet mes dy vendeve, duke shtuar se dialogu është rruga e stabilizimit të situatës, transmeton Gazeta Sinjali.

“Sa i përket Kosovës dhe Serbisë, kemi pasur shumë tensione gjatë verës. Situata është më e qetë së fundi. Por ka nevojë që dialogu të rikthehet sepse nuk ka rrugë tjetër për ta stabilizuar situatën”, tha Borrell duke folur para mediave, në prag të takimit.

Së fundmi pengesë në dialog u bë marrëveshja për themelimin e Asociacionit të komunave me shumicë serbe në Kosovës. Qëllim i dialogut thuhet të jetë arritja e një marrëveshjeje gjithëpërfshirëse dhe ligjërisht e obligueshme për të dyja palët.

Deklaratat e Lajçakut gjatë vizitës në Prishtinë

I dërguari i Bashkimit Evropian për dialogun, Miroslav Lajçak tha më 25 nëntor se ka hapësirë për progres në kuadër të dialogut mes Kosovës dhe Serbisë, derisa theksoi rëndësinë strategjike të këtij procesi për gjithë Bashkimin Evropian.

Ai tha se gjatë vizitës në Kosovë ka diskutuar për një takim të mundshëm ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiq, që BE-ja shpreson se do të mbahet para fundit të vitit.

Pas takimit me kryeministrin Kurti, Lajçak tha se nuk është i rëndësishëm vetëm caktimi i takimit, por edhe rezultati mund të ketë ai.

“Nuk është në pyetje takimi, sepse liderët janë takuar dy herë, por siç e dini nuk ka pasur rezultate pozitive. Kësaj here, ambiciet tona janë ndryshe dhe nuk ka të bëjë vetëm me organizimin e takimit, por edhe për t’u pajtuar se cili do të jetë rezultati”, tha Lajçak.

Ai shtoi se palët kanë shprehur vullnet të mirë për procesin e dialogut dhe “ne vetëm duhet të sigurohemi që takimi do të prodhojë rezultate”.

/GazetaSinjali/