Në Spitalin e ri të Pediatrisë Kirurgjike “Sheikha Fatima”, në Qendrën Klinike Universitare të Kosovës (QKUK), i cili u përuruar para rreth 3 muajve nga krerët më të lartë të shtetit, ende nuk ka ofruar as edhe një shërbim mjekësor. E funksionalizimi i tij ende nuk dihet se kur do të ndodhë, pasi nga Ministria e Shëndetësisë bëjnë të ditur se për këtë projekt është bërë vetëm pranimi ceremonial por jo edhe aprovimi teknik.

Zyra për medie e MSh-së në një përgjigje për Kp thonë se kanë themeluar mekanizmat për zbatimin e këtij projekti, për të cilën fillimisht duhet të propozohet pranimi teknik, të aprovohet e më pastaj të nisin me përgatitjet për funksionalizim.

Po ashtu në këtë përgjigje thuhet se duhet një plani i veprimit që parasheh funksionalizimin e çdo shërbimi në këtë spital.

“Ministria e Shëndetësisë në vitin 2020 ka themeluar mekanizmat për zbatimin e projektit të Spitali Pediatrik donacion nga Emiratet e Bashkuara Arabet, komitetin drejtues dhe njësinë për zbatimin e projektit. Njësia për zbatimin e projektit duhet të rekomandoj pranimin teknik dhe pastaj komiteti drejtues ta aprovoj. Kohë më parë është bërë pranimi ceremonial, ndërsa pas aprovimit teknik do të fillohet me përgatitjet për funksionalizim, përmes një plani të veprimit që parasheh funksionalizimin e çdo shërbimi të paraparë në këtë spital, në përputhje me infrastrukturën e tij dhe resurset njerëzore që duhet angazhuar aty”, thuhej në përgjigjen e MSH-së.

Pediatri i Klinikës së Pediatrisë, Ramush Bejiqi u shpreh se donacioni i Emirateve të Bashkuara Arabe nuk ka qenë i mjaftueshëm që ky spital të ofrojë shërbimet spitalore. Për çka ai tregoi se tashmë Emiratet Arabe kanë ndarë edhe një shumë tjetër për këtë spital.

Ai shpreson që shumë shpejt pacientët do mund të marrin shërbime moderne mjekësore në këtë spital.

“Mjetet financiare të cilat kanë qenë donacion kanë qenë aq mirë të shfrytëzuara asgjë nuk ka mbetur mangu, por nuk kanë qenë të mjaftueshme për sistemin informativ dhe komunikim në spital dhe për pajisjet kirurgjikale dhe është bërë kërkesë e re shikoni ato janë procedura të prokurimit të cilat kanë kaluar në sistemin e Emirateve Arabe të gjitha mjetet janë lejuar kemi marr mjete shtesë nga Emiratet Arabe për pajisjen e Klinikës me sistemin informativ dhe komunikim dhe për pajisjet për Kirurgjinë e Fëmijëve. Dhe unë shpresoj që shumë shpejt Klinika e re do të hapet dhe do jetë në shfrytëzim”, theksoi ai.

Kurse, nga Federata e Sindikatave të Shëndetësisë së Kosovës thotë se për të funksionuar ky spital pediatrik me pajisje mjaftë moderne nuk ka kuadro mjekësor.

Kryetari i FSSHK-së, Blerim Syla u shpreh se është për të ardhur keq, pasi investimet janë enorme dhe pajisjet janë mjaftë moderne, por ka pak profesionistë që mund të punojnë me ato pajisje.

“Kosova ka mungesë të kuadrove që mund ta ushtrojnë atë detyrë në QKUK, janë 51 anesteziologë dhe aty është Kirurgji Pediatrike, plus duhet të ketë specializime specifike me të cilat duhet me u marrë, andaj nuk është menduar mirë siç nuk po mendohet se fushatat politike po dalin po ndërtojnë spitale por spitalet duhet me mirëmbajt dhe duhet me funksionuar me dikë. Nuk mundemi ne me funksionalizuar diçka për të cilin ne nuk kemi kuadro. Andaj, është për të ardhur keq, investimet janë enorme, janë shumë moderne, mirëpo kemi pak profesionistë që mund ta ushtrojnë këtë detyrë“, u shpreh Syla.

E nga Shoqata e të Drejtave të Pacientëve në Kosovë kërkojnë që çdo pengesë për funksionalizimin e spitalit pediatrik kirurgjik “Sheikha Fatima”, duhet të eliminohet.

Kryetari i kësaj shoqate, Besim Kodra tha se tani është dashur të ndaj edhe buxhet shtesë për këtë spital me qëllim që sa më shpejt fëmijët e sëmurë të marrin shërbime cilësore spitalore.

“Faktikisht ai është një gabim në hapa për shkak se ai spital është përuruar ende pa i plotësuar si me thënë të gjitha kriteret për funksionalizim edhe ne konsiderojmë se tani është dashur të ketë buxhet shtesë i cili është i nevojshëm për plotësimin e kushteve që aty veçse të filloj puna…

Nuk është e mirë që ne të përurojmë spitale dhe të premë shirita dhe të mos mund të punojmë në to, ajo që është e nevojshme çdo mungesë e cila ekziston për funksionalizimin e atij spitali duhet të eliminohet në mënyrë që fëmijët sa më shpejt të kenë një trajtim të dinijetetshëm në atë institucion

Deri më tani ka pasur kushte të padinjiteteshme për trajtimin e fëmijëve tani kemi një spitali i cili është i një standardi shumë të lartë prandaj është shumë e nevojshme që sa më shpejt të funksionalizimet ky spital dhe fëmijët të fillojmë më në fund një trajtim të dinjitetshëm, gjithashtu duhet të eliminohen edhe mangësitë e stafit dhe çdo mangësi tjetër dhe fëmijët të marrin trajtim sa më cilësor dhe të sigurt”, u shpreh Kodra.

Ish-presidentja, Atifete Jahjaga dhe Maitha Al Shamsi, ministre e shtetit e Emirateve të Bashkuara Arabe, më 21 mars të vitit 2016, kishin vënë gur themelin e Spitalit Pediatrik-Kirurgjik, në hapësirat e QKUK-së. Realizimi i këtij projekti ishte paraparë të përfundojë në vitin 2018.

Sindikata e Bashkuar e Arsimit, Shkencës dhe Kulturës kanë bërë të ditur se protesta e paralajmëruar që të mbahej sot për mosmiratimin e Ligjit të Pagave, nuk është thirrur nga ta.

Kryetari i kësaj sindikate, Rrahman Jasharaj për Klankosova.tv ka thënë se paralajmërimi për këtë protestë mund të jetë bërë nga dikush për qëllime të caktuara.

“Kjo protestë nuk është thirrur nga Sindikata e Bashkuar e Arsimit, Shkencës dhe Kulturës, këtë mund ta ketë bërë dikush tjetër, për qëllime të caktuara. Ne për momentin nuk do të protestojmë, sepse tani për tani kemi vendosur që t’i pezullojmë veprimet sindikaliste”, u shpreh Jasharaj.

Ai tregoi se vendimin për pezullimin e përkohshëm të veprimeve sindikaliste pas premtimeve se ligji i punës është duke u punuar, njofton Klankosova.tv.

“Për momentin janë pezulluar veprimet sindikaliste. Ndodhi që u takuam me Ministrin e Punëve të Brendshme, Xhelal Sveçla dhe morëm informacione që Ligji i Pagave është duke u punuar dhe ai tha se u duhet edhe pak kohë”, tha Jasharaj.

SBASHK dy ditë më parë, bëri të ditur se e mbështet vendimin e Bashkimit të Sindikatave të Pavarura të Kosovës, për t’i dhënë kohë Qeverisë që të punojë për Ligjin e Pagave.

“Në takimin me kryetarët e nivelit sindikal komunal dhe të Universiteteve u vlerësua se është arritur të realizohet kërkesa e SBASHK-ut për nisje të dialogut me Qeverinë dhe kërkesa që të dihet lidhur me fatin e ligjit të pagave, dhe me vendim unanim u përkrahen vendimet e BSPK-së për angazhim dhe për t’i dhënë kohë Qeverisë që ta punojë ashtu si duhet e pa defekte versionin e parë të Ligjit të pagave dhe pas kësaj në kohën më të shkurtër të mundshme, e se largu në fillim të marsit të nisin takimet me sindikatat dhe pas kësaj deri në fund të muajit mars të përgatitet versioni final e të dërgohet në Qeveri për votim dhe të vazhdohet me proceduarat parlamentare”, u tha nga SBASHK-u.

Kryesindikalisti i arsimit tha se në takim me BSPK-në janë marrë vesh që t’i japin kohë Qeverisë, por shtoi se grevat e protestat nuk përjashtohen nëse BSPK-ja nuk angazhohet.

“Ne jemi marrë vesh për angazhimet në çështjet e përbashkëta, por nëse Bashkimit të Sindikatave të Pavarura të Kosovës nuk angazhohet në këtë drejtim, atëherë SBASHK-u nuk i përjashton opsionet e grevave dhe protestave”, tha Jasharaj për Klankosova.tv.

Ndryshe, SBASHK-u ka bërë të ditur se në kohën më të shkurtër të mundshme, në fillim të marsit të nisin takimet me sindikatat dhe deri në fund të muajit mars të përgatitet versioni final e të dërgohet në Qeveri për votim dhe të vazhdohet me proceduarat parlamentar

Prej janarit të këtij viti e deri më tani janë paraqitur rreth 50 raste të reja me kancer tek fëmijët.

Ata trajtimin e marrin në Repartin e Hemato-Onkologjisë në Klinikën e Pediatrisë.

Drejtoresha e kësaj Klinike, Violeta Grajçevci-Uka, ka thënë për Front Online se çdo vit numri i rasteve të reja me kancer tek fëmijët është 50 deri në 55.

“Gjatë një viti lajmërohen 50-55 raste të reja me sëmundje kanceroze te fëmijët, ndërsa deri tani që nga janari i këtij viti janë lajmëruar rreth 48 fëmijë”, tha Grajçevci.

Fatmirësisht nga kjo sëmundje këtë vit nuk ka vdekur asnjë fëmijë në Kosovë.

Rastet më të rënda janë dërguar për shërim jashtë vendit.

“Nuk kemi numër të madh të rasteve të vdekjes, ato raste janë trajtuar edhe jashtë Kosovës por nuk kanë pas rezultate dhe kanë vazhduar me trajtim paliativ deri në fund të vdekjes, ndërsa asnjë rast nuk e kemi pas të vdekur për këtë vit me sëmundjen malinje”, shtoi ajo për Front Online.

Grajçevci ka treguar se aktualisht në Klinikën e Pediatrisë janë duke u trajtuar 70 fëmijë të prekur me kancer.

Sipas saj, disa po trajtohen në Klinikë e disa të tjerë në shtëpi.

“Momentalisht janë duke u trajtuar 70 fëmijë me këtë sëmundje në stade të ndryshme të trajtim, disa prej tyre hospitalizohen dhe marrin kimioterapi disa të tjerë këtë terapi në formë të tabletave e marrim në shtëpi”, shtoi ajo për Front Online.

Grajçevci njoftoi se pacientët e kësaj klinike të gjithë terapinë e kanë të siguruar nga SHSKUK dhe donacionet.

“Komplet terapinë e kanë të siguruar pacientët, disa sigurohen nga SHSKUK, dhe disa të tjera në formë të donacioneve, po ashtu ka shumë fëmijë të cilët janë shëruar nga sëmundjet malinje dhe ata vinë në kontrolle të rregullta 1 javore, 2 javore dhe mujore”, shtoi Grajçevci.

Diagnostikimi i rasteve me kancer tek fëmijët bëhet shumë shpejt me ekzaminimin fizikal, analiza laboratorike, imazherike, biopsive dhe funksionit të palcës kockore./FrontOnline