Presidentja e Kosovës, Vjosa Osmani po e përfaqëson vendin në Samitin për Demokraci, të organizuar nga presidenti amerikan, Joe Biden.

Osmani pritet që të fillojë fjalimin e saj rreth orës 16:00 dhe deklarimi do të zgjasë vetëm tre minuta, transmeton Demokracia.com.

Fjalimin e Osmanit dhe të presidentëve të tjerë që po marrin pjesë në samit mund ta ndiqni duke klikuar në këtë LINK.

Nga presidenca, kanë bërë të ditur se Osmani në fjalën e saj në këtë Samit do t’i paraqes pikat kryesore të zotimeve të Kosovës në fushën e sundimit të ligjit, bashkëpunimit ndërkombëtar në luftimin e autokracive, fuqizimit të rolit të grave në shoqëri dhe krijimin e mekanizmave për të siguruar zbatimin e zotimeve.

Ndërkohë, hapjen e samitit e ka bërë presidenti Joe Biden pak më herët, me një fjalim përmes së cilit tha se demokracia po përballet me “sfida të qëndrueshme dhe alarmante”.

“Demokracia ka nevojë për kampion dhe që të ripërtrihet ka nevojë për përpjekje të vazhdueshme. Demokracia nuk ndodh aksidentalisht, duhet të kalohet në secilën gjeneratë”, ka thënë Biden.

Gjithsej 110 shtete po marrin pjesë në këtë samit.

Biden është zotuar se do ta organizojë këtë samit në nisje të mandatit të tij presidencial, me qëllim që të përforcojë angazhimin e SHBA-së që të vendosë demokracinë dhe të drejtat e njeriut në qendër të politikës së jashtme të Uashingtonit.

Në samit janë ftuar të gjitha vendet e Ballkanit, me përjashtim të Bosnje e Hercegovinës.

Akademiku Mehmet Kraja është rizgjedhur kryetar i Akademisë së Shkencave dhe Arteve të Kosovës.

Rizgjedhja e tij është bërë në një mbledhje të mbajtur sot. Ai e kishte marrë këtë detyrë fillimisht më 3 tetor, pasi deri atëherë në krye të ASHAK-ut ishte Nexhat Daci.

Gjykata Themelore në Prizren, të enjten e ka dënuar me 1 vjet e 4 muaj dënim me burgim me kusht ish-drejtorin e Financave në Komunën e Dragashit, Ahmet Bahtijarin dhe 1 vjet dënim me burgim me kusht zyrtarin e kësaj komune, Selajdin Vehbi.

Sipas aktgjykimit dënues të shpallur nga kryetarja e trupit gjykues, Raima Elezi për të akuzuarin Ahmet Bahtijari për veprën penale keqpërdorim të pozitës zyrtare apo autoritetit zyrtar i është shqiptuar dënim me 1 vit burgim me kusht, ndërsa për veprën penale konflikt interesi 6 muaj dënim me burgim me kusht ashtu që ndaj tij është shqiptuar dënim unik me burgim me kusht prej 1 vit e 4 muaj i cili dënim nuk do të ekzekutohet, nëse i njëjti nuk do të kryejë vepra të tjera penale në periudhën verifikuese prej 3 vitesh, raporton “ Betimi për Drejtësi”.

Ndërsa, për të akuzuarin Selajdin Vehbi për veprën penale keqpërdorim i pozitës apo autoritetit zyrtar i është shqiptuar dënimi me 1 vit dënim me burgim me kusht, i cili dënim nuk do të ekzekutohet, nëse i njëjti nuk do të kryejë vepra të tjera penale në periudhën verifikuese prej 2 vitesh.

Të akuzuarit janë shpallur fajtor pasi që të njëjtin kishin pranuar fajësinë për veprën penale konflikt interesi dhe keqpërdorim të pozitës zyrtare.

Po ashtu, sipas aktgjykimit, secili prej të akuzuarve obligohet të paguaj edhe shpenzimet procedurale dhe atë paushallin gjyqësor në shumë prej 200 euro ndërsa shumën prej 50 euro për fondin e kompensimit të viktimave, raporton “Betimi për Drejtësi”.

Kryetarja e trupit gjykues Raima Elezi i njëjti i njoftoi palët prezente se kundër këtij aktgjykimi kanë të drejtë ankese në afat prej 15 ditësh, nga dita e pranimit të aktgjykimit me shkrim.

Ndryshe, Prokuroria Themelore në Prizren, më 31 maj 2019, ka ngritur aktakuzë ndaj Avni Nebiut dhe Selajdin Vehbi, të cilët i ngarkon me veprën penale të “Keqpërdorimit të detyrës apo autoritetit zyrtar”, ndërsa Ahmet Bahtijari, përveç për “Keqpërdorim të detyrës zyrtare”, akuzohet edhe për “Konflikt të interest”.

Sipas aktakuzës, Ahmet Bahtijari akuzohej se gjatë periudhës 2004 e deri më 2017, në cilësinë e Drejtorit të Financave në Komunën e Dragashit, nuk i ka përmbushur detyrat apo autoritetin zyrtar, me qëllim të përfitimit të çfarëdo dobie për servisin “Menti”, pronar i të cilit është djali i tij, Armend Bahtijari.

Në aktakuzë thuhej se kjo ka ndodhur në atë mënyrë që i pandehuri Bahtijari, i ka mundësuar lidhjen e marrëveshjes me Kuvendin Komunal të Dragashit për dhënie në shfrytëzim të pronës komunale, parcelën në sipërfaqe prej 122 m2, dhe e nënshkruan urdhërpagesën e servisimit të automjeteve zyrtare në servisin “Menti”, në bazë të faturave edhe pse Kuvendi Komunal i Dragashit, ka pasur kontratë me operatorin ekonomik për servisim “LML”, për rregullimin e automjeteve.

Kështu që thuhet se i mundëson djali të tij dobi pasurore si pronar i servisit “Menti”, për vitin 2015, shumën prej 3 mijë e 69 euro, për vitin 2016, shumën prej 712 euro, dhe për vitin 2017, shumën prej 1 mijë e 532 euro, duke dëmtuar kështu operatorin ekonomik “LML”, i cili ka pasur kontratë për servisimin e automjeteve të Komunës së Dragashit.

Me këtë, akuzohej se ka kryer veprën penale “Keqpërdorim i detyrës zyrtare apo autoritetit zyrtar”, nga neni 422 par.1 lidhur me par.2 nënpar.2.4 të KPRK-së.

Gjithnjë sipas aktakuzës, Bahtjari akuzohej se në periudhën e njëjtë kohore, në cilësinë e drejtorit të Financave në Komunën e Dragashit, personalisht merr pjesë në çështje zyrtare në të cilën anëtari i familjes-djali i tij, Armend Bahtjari ka interes financiar, në atë mënyrë që e nënshkruan urdhërpagesën e servisimit të automjeteve zyrtare në servisin “Menti” dhe, kështu i mundëson djalit të tij, dobi pasurore si pronar i servisit “Menti”, për vitin 2015, shumën prej 3 mijë e 69 euro, për vitin 2016, shumën prej 712 euro dhe për vitin 2017, shumën prej 1 mijë e 532 euro.

Me këtë, akuzohej se ka kryer veprën penale “Konflikt i interesit”, nga neni 424 paragraf 1 të KPRK.

Ndërsa, sipas aktakuzës, Avni Nebiu dhe Selajdin Vehbi, akuzoheshin se gjatë periudhës nëntor 2014, e deri në kohë të pacaktuar, në cilësi të personave zyrtarë të Komunës së Dragashit, Avni Nebiu, zyrtar autorizues i pagesave, ndërsa Selajdin Vehbi, zyrtar certifikues, duke mos i përmbushur detyrat zyrtare apo autoritetin zyrtar, kanë tejkaluar kompetencat me qëllim të përfitimit të dobisë pasurore për servisin “Menti”, pronar i të cilit është djali i drejtorit të Financave në Komunën e Dragashit.

Në aktakuzë thuhej se të pandehurit Avni Nebiu dhe Selajdin Vehbi, nënshkruajnë urdhërpagesat e servisimit të automjeteve zyrtare, në servisin “Menti”, në bazë të faturave edhe pse Kuvendi Komunal i Dragashit, ka pasur kontratë me operatorin ekonomik “LML” për rregullimin e automjeteve.

Kështu që, sipas aktakuzës, i mundëson dobi pasurore pronarit të servisit “Menti”, për vitin 2015 shumën prej 3 mijë e 69 euro, për vitin 2016, shumën prej 712 euro dhe për vitin 2017, shumën prej 1 mijë e 532 euro, duke dëmtuar kështu operatorin ekonomik “LML”, e cila ka pasur kontratë për servisimin e automjeteve të Komunës së Dragashit.

Me këto veprime, ata akuzohen se kanë kryer veprën penale “Keqpërdorim i pozitës apo autoritetit zyrtar”, nga neni 422 par.1 lidhur me par.2 nënpar.2.4 të KPRK-së. /BetimipërDrejtësi