Instituti Hidrometeorologjik i Kosovës bën të ditur se sot reshjet parashihen të përfshijnë gjithë territorin, intensiteti i tyre do të jetë mesatar dhe mesatarisht i lartë, duke krijuar mundësi që në disa zona të shkaktojnë vështirësi.

IHK njofton se të dielën reshjet parashihen të jenë në formë dëbore për shkak të masave të ajrit të cilat vijnë nga veriu i kontinentit dhe bashkë me këto ndryshime priten edhe ulje në fushat termike, kryesisht në vlerat e minimaleve.

Temperaturat minimale do të lëvizin ndërmjet 0 deri 1 gradë Celsius, ndërsa maksimalet e ditës parashihen të lëvizin ndërmjet 3-7 gradë Celsius.

Do të fryjë erë kryesisht nga juglindja me shpejtësi 1-9m/s.

Java e ardhshme parashihet me më pak reshje, por sa i përket temperaturave, ato do të shënojnë ulje në të dy vlerat ekstreme.

Bankat në Kosovë i kanë ulur normat e interesit në kredi, por i kanë rritur tarifat, thonë Albulena Kastrati, studiuese e politikave bankare dhe Florin Aliu, studiues i tregjeve financiare në “Java Sonte me Rronin” në KTV.

Sipas tyre, kjo ka bërë që profiti i bankave megjithatë të jetë i lartë.

Kastrati ka thënë se 11 bankat komerciale që operojnë në Kosovë, kanë raportuar profit në vlerë prej 100 milionë euro brenda 10 muajve të këtij viti, që sipas saj, është profiti më i lartë i realizuar ndonjëherë deri më tani.

“Sivjet vetëm deri në tetor 2021, Bankat kanë raportuar 100 milionë mijë euro profit, që është profiti më i lartë që kanë realizuar ndonjëherë në Kosovë, si sektor. Së pari bankat te ne e dominojnë sektorin financiar, dhe financimi kryesor i ekonomive familjare dhe bizneseve vjen prej bankave, e dyta është se kanë fuqi tregu edhe nga ana e aseteve, kanë mundësi ta përcaktojnë edhe çmimin e kredisë edhe sasinë e kredisë që e ofrojnë. Edhe kanë pozicion shumë stabil të likuiditetit, pasi njerëzit nuk kanë ku t’i depozitojnë mjetet e tyre financiare. Një arsye tjetër shumë e rëndësishme është se kreditë që nuk kthehen janë shumë të ulëta në Kosovë”, ka thënë Kastrati.

Sipas saj, e hyra kryesore e bankave në Kosovë janë tarifat dhe se qytetarët e Kosovës janë kredimarrësit më të mirë në rajon, pasi niveli i kredive të këqija është i ulët.

“Njerëzit në Kosovë janë kredimarrësit më të mirë në rajon. E hyra kryesore e bankave është arkëtimi i interesit në kredi. Bankat realizojnë të hyra edhe nga tarifat dhe provizionet, që janë ato ngarkesa për qytetarët për secilën pagesë, tërheqje etj. Bankat i kanë ulur normat e interesit por i kanë rritur ngarkesat në provizione. 25% të të gjitha të hyrave bankat i realizojnë përmes tarifave”, është shprehur Kastrati.

Ndërkaq, Florin Aliu ka folur edhe për kursimet e Trustit Pensional, duke thënë se kjo shtyllë duhet të liberalizohet.

Ai ka thënë se në Kosovë është shumë e nevojshme që të krijohet bursa e Prishtinës.

“Në Kosovë, duhet të krijohet tregu i kapitalit, bursa e Prishtinës. Nëse i shohim vendet e Ballkanit, janë integruar në një bursë të përbashkët. Janë brenda një burse të përbashkët, Maqedonia, Serbia, Kroacia, Bosnja, Bullgaria, Rumania. BE-ja operon me një bursë të përbashkët thirret Euronext. Janë mbi 2 miliardë mjete në menaxhim, ne i kontribuojmë zhvillimit të vendeve të tjera, e nuk vijnë këtu. Duhet të fillojë iniciativa përndryshe ne vazhdimisht mund të na qëndrojnë atje. Me pas bursën e ristrukturon shumë mirë ekonominë tënde. Qytetarët e Kosovës bëhen pronarë të këtyre kompanive. E vetmja mënyrë për të tërhequr investimet e tyre është që ata të jenë bashkëpronar të këtyre kompanive”, ka thënë Aliu.

Ndërkaq, duke folur për dhënien e 10% të trustit për qytetarët e Kosovës vitin e kaluar, në kohë të pandemisë, Kastrati e Aliu kanë thënë se ky ishte një vendim i gabuar.

Sipas tyre, kjo është një simptomë që shteti ka dështuar t’i menaxhojë krizat dhe e udhëzon qytetarin që t’i shfrytëzojë fondet që duhet të përdoren pas 20 apo 30 vitesh.

Po të prekeshin në xhep, kosovarët nuk do të përdornin kaq shumë qese plastike.

Ky është edhe njëri nga propozimet e ambientalistëve, që këto qese të jenë me pagesë, në mënyrë që të mbrohet mjedisi, ashtu si në Maqedoninë e Veriut ku një e tillë në market kushton rreth 25 centë.

Aktualisht qytetarët vazhdojnë t’i marrin me shumicë edhe pse i dinë të metat e tyre, njofton Klan Kosova.

Ish-ministri i Mjedisit, Fatmir Matoshi, thotë se për shkak të rënies së qeverisë më 2019, nuk arriti ta çojë deri në fund Udhëzimin Administrativ që kishte dy opsione.

“Të ndalohet importi dhe dhënia pa pagesë e qeseve të plastikës, ose të vendoset taksë për qeset e plastikës”, shpjegon ai.

Punën e lënë në gjysmë duhet ta vazhdojë qeveria aktuale, thonë në organizatën “Gjethi”. Këta propozojnë edhe alternativa tjera.

“Të përdoren qeset e tekstilit në vend të plastikës. Ose të ketë një vend për riciklim të tyre, pas përdorimit”, thotë Valon Raka.

Ministria e Mjedisit nuk i ktheu përgjigje televizionit nëse po punojnë në evitimin e përdorimit të qeseve të plastikës.

Por, kjo është një nga problemet kryesore globale, pasi vetëm një qeseje i duhen rreth një mijë vjet për t’u asgjësuar në natyrë.

Shoqata e Gastronomeve të Kosovës (SHGK) dhe Oda e Hotelerisë dhe Turizmit të Kosovës (OHTK), kanë vendosur që me 15 dhjetor të protestojnë për shkak të mos mbështetjes financiare, mohimit të të drejtës për të punuar dhe mosgatishmërisë për takime dhe gjetje të zgjidhjes nga Qeveria e Kosovë.

Përfaqësues të të dy shoqatave në një konferencë për media, thanë se protesta do të nis në orën 13:00 para Qeverisë, pasi ajo i ka burgos dhe nuk po u jap bukë.

Sekretari i Shoqatës së Gastronomëve të Kosovës, Arian Vranica tha se pas shumë tentativave për t’i shfrytëzuar rrugët demokratike lidhur me kërkesat e tyre dhe mungesa e një strategjie të Qeverisë së Kosovës për t’i ndihmuar gastronomisë.

“Mos pasja e një vizioni dhe një strategjie nga ana e Qeverisë së Kosovës në raport me gastronominë, neve na ka imponuar që t’i shfrytëzojmë rrugët demokratike, pra organizimin e protestës të cilën e kemi paralajmëruar me datë 15 dhjetor më pra 13:00 para qeverisë”, tha ai.

Vranica tha se Qeveria i ka burgos dhe nuk po u jap bukë.

Kryetari i Oda e Hotelerisë dhe Turizmit të Kosovës, Hysen Sugujeva tha se po përgatitën për këtë protestë.

“Kjo protestë nuk është me dëshirën tonë por është imponuar për arsye se i kemi shterë të gjitha mundësitë që të vazhdojmë kontaktojmë dhe të vazhdojmë bisedimet me Qeverinë dhe ministritë përkatëse, por i kemi has në vesh të shurdhër dhe na u është imponuar kjo protestë, kështu që ftojë të gjithë bizneset që i përkasin fushës së hotelerisë dhe turizmit që të na bashkohen, estrada të na bashkohen, përfaqësues të sallave të dasmave , përfaqësues të këtij sektori”, ka thënë ai.

Sipas tij, këta sektorë kanë qenë më të atakuarit gjatë kohës së pandemisë

“Ne edhe ndihmat, do të thotë edhe ato që është dashur prej 420 milionë, as që ka filluar, prandaj nuk është çështja vetëm e zgjatjes së orarit, orës policore ose hapja e ahengjeve por edhe shumë faktor tjerë kanë ndikuar që të marrim këtë hap”, tha ai.

Në këtë konferencë u tha se ata nuk janë subvencionuar, iu është mohuar e drejta e punës dhe injorohen për takime.

Shërbimi Spitalor Klinik dhe Universitar i Kosovës njoftoi se për 9 muaj ka kursyer mbi 1.5 milion euro në furnizim me oksigjen. Sipas SHSKUK-së, këto kursime u mundësuan falë investimeve të bëra në QKUK dhe spitalet përgjithshme për instalim të rezervuarëve të oksigjenit.

Kështu bëhet e ditur se u mundësua furnizimi me oksigjen të lëngshëm dhe u hoqën nga përdorimi cilindrat (bombolat e oksigjenit) të cilat kanë shkaktuar, siç u tha, shpenzime shumë më të mëdha, transmeton Klankosova.tv.

“Furnizimi ka qenë më i vështirë, sidomos në spitalet e përgjithshme që nuk kanë pasur rezervuare të furnizimit të lëngshëm me oksigjen. Në një raport/analizë të shpenzimeve të oksigjenit të lëngët për periudhën 9 mujore të vitit 2021 (janar-shtator 2021) rezulton se vetëm në spitalet e përgjithshme janë shpenzuar rreth 900 mijë L oksigjen (e shprehur në vlerë financiare rreth 400 mijë Euro). Nëse nuk do të ishin instaluar cryo-tanket, ShSKUK do të shpenzonte rreth 2 milion euro për oksigjen të gazët me bombola, pra vetëm për 9 muaj në spitalet e përgjithshme (pa llogaritur fare këtu QKUK) pra, janë kursyer mbi 1.5 milion Euro në furnizimet me oksigjen.” thuhet në një postim në Facebook të SHSKUK-së.

Tutje shpjegohet se këto kursime u mundësuan edhe falë zgjerimit me oksigjen qendror në dhomat e pacientëve si në QKUK, ashtu edhe në spitalet e përgjithshme.

“ShSKUK ka instaluar rezervuarët për furnizim me oksigjen të lëngët në të gjitha spitalet e përgjithshme, ndërkohë ka rritur kapacitetet edhe në QKUK. Nga kapaciteti 20 ton që kishte në QKUK, tashmë ka 35 ton, kurse në spitalet e përgjithshëm që nuk kishte fare, tashmë ka kapacitet për furnizim me 55 ton me oksigjen të lëngshëm.”

Departamenti amerikan i Shtetit, në përgjigje të deklaratave të ministrit serb, Alleksandar Vullin, tha se “mizoritë që kanë ndodhur në Reçak në janar të vitit 1999, përfshirë masakrën e civilëve, janë të dokumentuara mirë”.

“Mohimi i këtyre fakteve themelore dhe madhërimi i krimeve të luftës sjellin dhimbje për të mbijetuarit, çnderojnë viktimat dhe mbajnë gjallë ndarjet që vazhdojnë të pengojnë pajtimin e qëndrueshëm, paqen dhe prosperitetin për Ballkanin Perëndimor”, thuhet në deklaratën e Departamentit amerikan të Shtetit dhënë për Radion Evropa e Lirë.

Ministri i Brendshëm i Serbisë, Alleksandar Vullin, deklaroi më 10 dhjetor se Masakra e Reçakut, ishte një “gënjeshtër të madhe dhe një falsifikim i tmerrshëm”.

“Agresioni i NATO-s filloi pas një gënjeshtre të tmerrshme për Reçakun. Në atë kohë, ne nuk ishim as të aftë e as të zgjuar për t’i treguar të gjithë botës se çfarë gënjeshtre e tmerrshme ishte”, citohet të ketë thënë Vullin.

Më 15 janar të vitit 1999, forcat policore dhe ushtarake serbe në Kosovë vranë 45 civilë shqiptarë në fshatin Reçak në Komunën e Shtimes.

Krimet e kryera në këtë fshat i kishte dokumentuar kreu i atëhershëm i misionit vëzhgues të Organizatës për Siguri dhe Bashkëpunim në Evropë, William Walker.

Ngjarja e Reçakut u pasua nga bombardimet e NATO-s mbi caqet serbe në Kosovë si dhe në Serbi.

Vullin ka mohuar disa herë në të kaluarën Masakrën e Reçakut, duke e quajtur këtë masakër si një “krim të fabrikuar”.