Kryeministri i Kosovës, Albin Kurti, ka thënë se përmes Projektligjit për financimin e partive politike synojnë të përcaktojnë qartë të hyrat e subjekteve politike dhe ofrimin e transparencës më të madhe.

Në diskutimin publik lidhur me këtë projektligj, kreu qeveritar tha se rezultatet e zgjedhjeve dhe qeverisja nuk duhet të jetë produkt i korporatave, pasi sipas tij të njëjtat investojnë në parti, për t’iu kthyer investimi përmes tenderëve.

“Kur një korporatë jep milionët për një politikan, dëshiron që nesër ai të jetë në pushtet dhe të fitojë shumëfishin e këtij investimi përmes tenderëve. Rezultatet e zgjedhjeve dhe qeverisja nuk duhet të jetë produkt i korporatave”, tha ai.

Ndryshimet në këtë projektligj i konsideroi të nevojshme edhe ambasadori i BE-së në Kosovë, Tomas Szunyog.

“Ndryshimet bë këtë draft ligj janë të rëndësishme dhe kanë për qëllim identifikimin e metave që janë shfaqur deri tani. Reforma e forcon kredibilitetin e zgjedhjeve. Financimi i partive politike është i rëndësisë së veçantë për funksionimin e demokracisë. Financat e partive politike duhet të jenë më të qarta dhe transparente”, tha ai.

Në tre vjetorin e themelimit të Ushtrisë së Kosovës, ministri i Mbrojtjes, Armend Mehaj ka thënë se ka arsye të fuqishme që të jetë krenarë me të gjitha të arriturat e deritanishme të FSK-së.

Mehaj nërmjet një postimi një postimi në Facebook ka thënë se do të vazhdojnë rrugëtimin përpara drejt realizimit të vizionit për ushtrinë plotësisht operacionale, profesionale, multietnike dhe moderne.

“Sot, në trevjetorin e miratimit të pakos ligjore themelore që legjitimoi mandatin ushtarak të FSK-së krahas themelimit të Ministrisë së Mbrojtjes, kemi arsye të fuqishme të ndjehemi krenar me të gjitha të arriturat e deritashme duke qenë të vetëdijshëm se kemi ende shumë për të bërë. Gëzuar bashkë me SHBA-në, aleatin tonë të pazëvendësueshëm që njohu dhe mbështeti deri në fund vullnetin tonë për ushtrinë që kemi. Gëzuar bashkë edhe me gjithë aleatët tjerë! Vazhdojmë rrugëtimin përpara drejtë realizimit të vizionit tonë: Ushtrinë tonë plotësisht operacionale, profesionale, multietnike, moderne dhe plotësisht të ndërveprueshme me forcat e vendeve aleate”, ka shkruar Mehaj.

Një shtetase e Shqipërisë dhe një shtetas i Kosovës janë arrestuar në fshatin Raushiq të Pejës pas dyshimit se janë marrë me prostitucion.

Policia e Kosovës ka njoftuar se të dyshuarit gjatë intervistimit kanë pranuar në tërësi veprën, njofton Klan Kosova.

Në konsultim me gjyqtarin rasti kalon në procedurë të rregullt. Të dyshuarit janë liruar.

Zyra e Rregullatorit për Energji (ZRRE) ka njoftuar se ka vendosur të hapë procesin e shqyrtimit të jashtëzakonshëm të tarifave të energjisë elektrike, për të reflektuar çmimet e ngritura të importit si pasojë e krizës globale të çmimeve të energjisë.

ZRRE-ja e ka marrë këtë vendim në bazë të kërkesës së Operatorit të Sistemit të Shpërndarjes (KEDS) dhe Furnizuesit për Shërbim Universal për Energji Elektrike (KESCO).

“Gjatë këtij procesi (ZRRE) do të shqyrtojë aplikacionet e të licencuarve, duke vlerësuar nevojën për vazhdim të furnizimit me energji elektrike, rritjen e efiçiencës së konsumit dhe përballueshmërinë e çmimeve nga ana e konsumatorëve”, thuhet në një njoftim të ZRRE-së.

Po ashtu shtohet se muajve të fundit, përveç rritjes së çmimeve në tregjet me shumicë të energjisë elektrike, vërehet edhe një rritje enorme e konsumit të energjisë elektrike në Kosovë.

Siç theksohet në njoftimin e ZRRE-së, kjo rezulton në rritjen e nevojës për blerje të energjisë me shumicë për mbulimin e konsumit dhe nevojat e rrjetit.

“Duke qenë se prodhimi vendor nuk mund të plotësojë të gjithë kërkesën për energji elektrike, paraqitet nevoja për import, që do të tejkalojë sasitë e lejuara nga ZRRE gjatë shqyrtimit të rregullt tarifor. Importi shtesë paraqet edhe kosto shtesë për operatorët, të cilat nuk janë parashikuar në të hyrat e lejuara maksimale për vitin relevant tarifor 2021”, thuhet në njoftimin e ZRRE-së.

ZRRE bën të ditur se në kuadër të këtij procesi do të bëjë analiza dhe kalkulime të bazuara në të dhënat e disponueshme dhe do të analizojë të gjitha rrethanat e krijuara në sektorin e energjisë në lidhje me kostot e sistemit si dhe në lidhje me menaxhimin e sigurisë së furnizimit.

Konsumatorët e Kosovës paguajnë 6.75 centë për kilovat në orë.

Javë më parë zyrtarë të KEDS-it, patën deklaruar se çmimi në Kosovë i energjisë elektrike nuk pritet të ndryshojë së paku deri më 1 prill, 2022, kur Zyra e Rregullatorit të Energjisë (ZRRE) të bëjë rishikimin e rregullt të tarifave.

Debat në Kuvend për situatën energjetike në Kosovë

Ndërkohë, partitë opozitare në Kosovë, në seancën e Kuvendit të mbajtur të hënën, kanë ngritur shqetësim për mungesën e energjisë elektrike, me të cilën kanë nisur të përballen qytetarët dhe ekonomia në përgjithësi.

Kosova, tha kryetari i Aleancës për Ardhmërinë e Kosovës, Ramush Haradinaj, ka hyrë në një krizë energjetike dhe për këtë ai ka kërkuar nga qeveria një strategji, si do t’i qaset këtij problemi.

“Si do ta kalojmë këtë dimër, sa i vështirë do të jetë për qytetarët për vendin për ekonominë dhe çfarë strategjie do të ndjekim në të ardhmen?”, pyeti Haradinaj.

Ndërprerjet e energjisë ditëve të fundit në Kosovë janë evidente.

Reduktimet e herëpashershme paralajmërohen edhe përmes njoftimeve zyrtare nga Distribucioni për Furnizim me Energji Elektrike (KEDS).

Pamundësia për të përmbushur kërkesat për energji elektrike i ka theksuar edhe ministrja e Ekonomisë, Artane Rizvanolli.

Ajo ka bërë të ditur se të hënën në mëngjes, termocentralet ‘Kosova A’ dhe ‘Kosova B’ në Obiliq kanë arritur të prodhojnë 759 megavatë, derisa kërkesa për energji ka qenë 1,113 megavatë.

“Treqindepesëdhjetekatër megavatë jemi duke i prodhuar më pak sesa që është kërkesa”, tha Rizvanolli.

Korporata Energjetike e Kosovës, sipas ministres Rizvanolli, është duke bërë përpjekje maksimale që të fusë në operim edhe bllokun e tretë të termocentralit ‘Kosova A’, që sipas saj, do të ndihmonte me 120 megavatë të tjera.

“Për të përmbushur kërkesat me energji elektrike në sezonin e dimrit, Ministria e Ambientit dhe Planifikimit Hapësinor është duke u marrë me prioritet të licencimit të kapaciteteve të impiantit të erës të ndërtuar në fshatin Selac, që do të shtojë edhe 60 megavatë”, tha Rizvanolli.

Haradinaj: Projektet e refuzuara rrezikojnë të ardhmen energjetike

Ndërkohë, deputeti i Kuvendit të Kosovës, Ramush Haradinaj tha se kriza energjetike në të cilën do të futet Kosova, është si pasojë edhe e refuzimit të projekteve energjetike nga Qeveria e kryeministrit, Albin Kurti, siç ishte projekti për ndërtimin e termocentralit ‘Kosova e Re’ dhe projekti për ndërtimin e infrastrukturës së gazit në Kosovë.

Duke iu përgjigjur Haradinajt, ministrja Rizvanolli tha se termocentrali “Kosova e Re” ishte një projekt i dështuar dhe i papërshtatshëm për sistemin energjetik të Kosovës.

Ndërkaq, sa i përket projektit për ndërtimin e infrastrukturës së gazit në Kosovë, Rizvanolli nuk e përjashtoi si mundësi.

“Kjo do të bëhet vetëm nëse shihet që është opsioni më i lirë dhe më i mirë për qytetarët e Kosovës”, tha ajo.

Ministria e Ekonomisë, ndërkohë është duke e hartuar Strategjinë e Energjisë 2022-2031.

Kjo strategji, sipas ministrisë, do të analizojë të gjithë skenarët potencialë dhe të përballueshëm financiarisht për të rritur stabilitetin e furnizimit me energji, si dhe të ofrojë mundësinë e integrimit sa më të madh të burimeve të ripërtërishme të energjisë.

Kurti: Kriza energjetike po troket në dyert tona

Evropa tash e sa javë është përfshirë nga kriza energjetike, për shkak të rritjes së çmimit të gazit dhe faktorëve të tjerë.

Kriza energjetike në Evropë ka ndikuar edhe në vendet e Ballkanit Perëndimor si në Shqipëri dhe Maqedoni të Veriut. Të dy nga këto shtete kanë shpallur krizë energjetike.

Kryeministri i Kosovës, Albin Kurti, tha se kriza energjetike, ashtu si në shtetet tjera, po troket edhe në Kosovë. Këtë çështje, Kurti tha se e kanë adresuar edhe në mbledhjen e fundit të Qeverisë.

Ai tha se po punojnë bashkë me Korporatën Energjetike të Kosovës, KEDS-in dhe Zyrën e Rregullatorit për Energji (ZRRE), që të gjejnë zgjidhjen më të mirë, në mënyrë që të ketë edhe furnizim të qëndrueshme, por edhe ta zbusin krizën energjetike.

“Konsumi është shumë më i madh edhe për shkak të stinës së dimrit edhe për shkak se mënyra jonë edhe e punës edhe e banimit edhe jetesës është e organizuar përmes ngrohjes nga termocentralet, por që edhe energjia elektrike është e lirë dhe konsumi është i kollajshëm”, tha Kurti.

Kryeminsitri Kurti tha se çmimet e energjisë në bursë janë shumëfishuar dhe as Kosova nuk mund të ngelet ne një situatë të favorshme me çmime, siç është aktualisht.

Konsumatorët e Kosovës paguajnë 6.75 centë për kilovat në orë. Krahasuar me vendet e rajonit, si Maqedonia e Veriut, Serbia e Shqipëria, rryma në Kosovë është më e lirë për 3 deri në 4 centë.

Për shkak të mungesës së energjisë elektrike, Zyra e Rregullatorit për Energji në Kosovë (ZRRE) dhe KEDS-i kanë kërkuar nga qytetarët që ta kursejnë rrymën, në mënyrë që të mos vijë deri te mungesat./Rel

Deklaratat e kryeministrit Albin Kurti, se krerët e sindikatave nuk kanë qenë të njëjtë, nuk po pëlqehen nga kryetari i SBAShK-ut, Rrahman Jasharaj.

Jasharaj ka thënë se shefi i ekzekutivit, duket se nuk e njeh historinë e sindikalizmit në Kosovë e as në botë.

Gjatë seancës së Kuvendit të Kosovës, shefi i Qeverisë, ka thënë se ka pasur sindikalistë që gjatë procesit të privatizimit janë rrahur brutalisht por që kanë mbrojtur ndërmarrjet, punëtorët, derisa tha se ka sindikalistë që në vitin 2017 në mes të fushatës zgjedhore kanë bërë memorandum bashkëpunimi me PAN-in.

Por këto akuza i ka mohuar Jasharaj, për të cilat tha se marrëveshja me PAN-in ka qenë për Ligjin për vitet e 90-ta.

“Marrëveshjen është e vërtetë që e kemi lidhur, por Kurti duhet ta thotë edhe pjesën tjetër të së vërtetës. Në atë kohë çdo subjekti politik i kemi dërguar kërkesë që të ulemi dhe të bëjmë marrëveshje me përmbajtjen e tekstit të njëjtë. Marrëveshja me PAN-in ka bërë që ta kemi ligjin për vitet e 90-ta, sepse atë marrëveshje e kishte nënshkruar edh kryeministri Haradinaj edhe kryeparlamentari Kadri Veseli në emër të partisë së tij”, ka thënë Jasharaj.

Jasharaj ka thënë se nuk janë në funksion të asnjë subjekti politik, dhe se në SBASHK mbrohen interesat e të punësuarve në sektorin e arsimit.

“Kurti është dashur t’ju tregoj medieve se i ka ardhë një letër nga Brukseli, nga Unioni i Sindikatave të Evropës dhe nga Unioni i Sindikatave të Shërbimeve Publike ku është anëtare sindikata që përfaqëson zoti Blerim Syla ndërsa ne jemi anëtare te Unioni i Sindikatave të Arsimit që ka 11 miljon anëtarë dhe ata i kanë treguar se ka bërë gabim të madh që në përzierjen e parë para medieve për sindikatat”, tha Jasharaj për EO.

Teksa ka folur për kërkesat e tyre për rritje të pagave, numri një i Sindikatës së Arsimit, thotë se nuk është problem për ta ndërrimi i qeverive çdo muaj. Tutje ai ka përmendur kushtet e rënda që përballen arsimtarët në Kosovë, për të cilat thotë se ata ende punojnë me shkumës dhe shpuzë.

“Nuk kam faj unë që qeveritë te na po ndërrohen çdo pesë-gjashtë muaj, e kemi ngritur çështjen edhe të kushteve madje shpesh në emisione televizive, në bisedat për media e kam përmendur se kolegët e mi në shkollat e Kosovës ende punojnë me shkumës dhe shpuzë”, u shpreh ai.

Jasharaj tutje tha se Kurti duhet ta dijë që kur ishin në opozitë kishin qëndrim tjetër ndaj kërkesave të SBAShK-ut.

“E vërteta është se asnjë kërkesë e SBASHK-ut nuk ka ndodhë të jetë jolegjitime sepse është kërkesë e anëtarësisë dhe asnjëherë SBASHK-u nuk e ka bërë asnjë hap pa u këshilluar me anëtarësinë dhe pa i respektuar ligjin mbi organizimin sindikal dhe ligjin mbi organizimin e grevave. Kurti duhet të ruhet se duke u përzier në sindikata po shkel ligjin mbi organizimin sindikal i cili në nenin 25 e ndalon rreptësisht përzierjen e institucioneve të shtetit”, thotë ai.

Rrahmani për Kurtin tha që ti lë sindikatat rehat. Anëtarësia vendos se kush po i udhëheq e si po i udhëheq. Tutje, ai ka paralajmëruar grevë si në kohën e ish-kryeministrit Haradinaj, grevë kjo që zgjati 3 javë.

“Sveçlës për hir të sistemit arsimor, për hir së ja kemi nis një muaj më vonë i’a kemi dhënë afatin që e ka kërku deri në fund të marsit. Nëse nuk ndodh asgjë deri në fund të marsit Kurti le ta dijë se na jemi ata sikur dikur dhe të mos harroj se Haradinaj dhe qeverisë tij i kemi bërë grevë 3 javore. Ne jemi të njëjtit dhe mos të habitet dhe të dal të zbuloj gjëra të reja që nuk ekzistojnë sepse një gjë të tillë mund ta ketë edhe në fund të marsit edhe tani kur ai po udhëheq këtë qeveri”.

Taulant Balla i Partisë Socialiste në Shqipëri sot gjatë ditës do të jetë në Kosovë.

Kryetari i Grupit Parlamentar të PS-së në Kuvendin e Shqipërisë do të pritet në takim nga kryetari i Kuvendit të Kosovës Glauk Konjufca.

Nuk është bërë e ditur nëse Balla gjatë vizitës në Kosovë do të takojë edhe krerë të tjerë institucionalë ose partiakë./