Përmes një komunikate për media, KEDS ka njoftuar se sot dhe nesër do të ketë ndërprerje të energjisë në disa vende shkaku i punimeve në rrjet.

Njoftimet nga KEDS për punimet në rrjet

Prizren

1.

Nga TS 35/10 kV Prizreni III  do të ndërprehet:

Dalja 10 kV Skënderbeu  (kodi: 30032006 ) nga ora 11:00 deri 16:00

Vendet:  rr. Jusuf Gërvalla, Tregu i Gjelbër dhe  Policia e trafikut.

Arsyeja: Realizimi i sistemit hyrje/dalje, sipas pëlqimit elektro-energjetik.

Presidenti i Maqedonisë së Veriut, Stevo Pendarovski, do të vizitojë sot Kosovën.

Ai do të zhvillojë një takim me presidenten Vjosa Osmani.

Presidenca e Kosovës ka njoftuar se presidentja Vjosa Osmani do ta presë në vizitë zyrtare presidentin e Maqedonisë së Veriut, Stevo Pendarovski.

Sipas agjendës, në orën 09:00, Osmani do ta presë presidentin Pendarovski me ceremonitë më të larta shtetërore në sheshin “Ibrahim Rugova” në Prishtinë.

Në fund të takimit do të mbajnë konferencë për media.

Shoqata e Gastronomëve të Kosovës sot do të protestojë nga ora 13:00, për të kundërshtuar masat ndaj COVID-19, të vendosura nga Qeveria e Kosovës.

Arian Vranica nga kjo shoqatë tha se protesta do të mbahet para ndërtesës së Qeverisë, ku bashkë me ta, do të protestojë edhe Oda e Hotelerisë së Kosovës.

“Gastronomët janë më gati se kurrë dhe për këtë protestë janë mobilizuar gastronomët nga të gjitha qytetet e Kosovës. Do të dëgjohet jashtëzakonisht shumë zëri ynë, i cili na është ndaluar të komunikojmë me institucionet publike, po ashtu do të shihet se sa po preket ekonomia dhe se nuk po dëmtohet vetëm gastronomia por e gjithë ekonomia”.

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon se në total numri i rasteve aktive me coronavirus është 314.

Në 24 orët e fundit janë dhënë 2.892 doza të vaksinës kundër COVID-19.

Prej fillimit të vaksinimit në të gjitha qytetet e Kosovës janë dhënë 1.647.674 doza të vaksinës.

Deri më sot 773.633 qytetarë janë vaksinuar me dozën e dytë.

Numri i përgjithshëm i të shëruarve është 157.914, ndërsa nga fillimi i pandemisë nga coronavirusi kanë vdekur 2,988 persona.

Instituti Hidrometeorologjik ka njoftuar për motin që pritet të mbajë sot dhe nesër në vend.

Sipas IHMK’së, do të mbajë mot kryesisht i vranët. Në viset malore pritet të bie edhe borë.

Temperaturat minimale do të lëvizin ndërmjet -2 deri 0 gradë Celsius ndërsa maksimalet e ditës parashihen të lëvizin ndërmjet 1-2 gradë Celsius

“Do të mbajë mot kryesisht i vranët. Në viset malore parashihen fjolla të dobëta bore. Temperaturat minimale do të lëvizin ndërmjet -2 deri 0 gradë Celsius ndërsa maksimalet e ditës parashihen të lëvizin ndërmjet 1-2 gradë Celsius. Do të fryjë erë e lehtë deri mesatare nga drejtimi i verilindjes”, thuhet në njoftimin e IHMK’së.

Maqedonia e Veriut planifikon t’i blejë tre milionë tonë thëngjill nga Kosova për të furnizuar termocentralet e veta të prodhimt të rrymës.

Këtë e ka konfirmuar ministri i Ekonomisë i këtij shteti, Kreshnik Bekteshi, me një status në facebook.

Ai ka thënë, të hënën, se kanë nisur negociatat më Kosovën për importimin e linjitit.

E në një intervistë për Alsat, Bekteshi pohoi se planet janë që këta tre milionë tonë thëngjill të blihen gjatë tre vjetëve të ardhshme.

Qeveria në Shkup shpalli gjendjen e krizës energjetike më 9 nëntor për shkak të prodhimit të pakët vendor dhe sezonit të thatë, gjë që ndikoi në mosmbushjen e lumenjve më ujë.

Qeveria e Kosovës ende nuk është deklaruar për mundësinë e shitjes së thengjillit në Maqedoni të Veriut.