Policia e Kosovës në bashkëpunim me Qendrën Kombëtare të Transfuzionit të Gjakut, është duke zhvilluar aksionin për dhurimin vullnetar të gjakut.

Në kampin e Njësive të Specializuara në Vrellë, 31 pjesëtarë të Njësive të Specializuara të Policisë së Kosovës si: “NJSO”,” NJSI”,” EODD” dhe Njësia “K9 “, kanë dhuruar gjak vullnetarisht.

“Dhurimi vullnetar i gjakut është vepër humane, prandaj zyrtarët e Policisë gjithnjë shprehin gatishmëri të jenë në shërbim të qytetarëve të vendit. Ky aksion për dhurimin vullnetar të gjakut do të vazhdojë edhe ditëve në vijim në drejtoritë rajonale dhe njësi të tjera të PK-së”, thuhet në njoftimin e policisë.

Kryeministri i Kosovës, Albin Kurti, përmes një videomesazhi ka bërë thirrje edhe një herë drejtuar qytetarëve që të vaksionohen kundër virusit SARS‐CoV‐2.

Ai gjithashtu njoftoi se sot është tejkaluar administrimi i 1.6 milionë vaksinave, ku 64% e qytetarëve në Kosovë janë vaksinuar me një dozë, ndërsa më shumë se gjysma, 56%, janë vaksinuar me dy doza.

“Ata që kanë ende dyshime, ju bëj apel që për hir të shëndetit personal, të familjes dhe shoqërisë, t’i kapërcejnë paragjykimet për vaksinat”, ka thënë ai.

Tutje, Kurti u bëri thirrje të veçantë prindërve dhe mësimdhënësve që t’i inkurajojnë të rinjtë që të vaksinohen.

Ai ka shtuar që qytetarët ta shfrytëzojnë mundësinë e vaksinimit pa pasur nevojë për termin dhe në cilëndo komunë që ata duan.

Kurti e quajti gjendjen në Kosovë me pandeminë, më të mirën në rajon dhe Evropë.

Gjatë qëndrimit në Bruksel, për raundin e dialogut Kosovë-Serbi, Zëvendëskryeministri i Kosovës për Integrim Evropian, Zhvillim dhe Dialog, Besnik Bislimi, u takua me Komisionerin për Zgjerim të Bashkimit Evropian, Oliver Varhelyi.

Në njoftimin e bërë për media thuhet se “u diskutua për projekte potenciale në kuadër të mekanizmit të Instrumentit të Para-Anëtarësimit (IPA) dhe për mundësitë e rritjes së bashkëpunimit përmes ndihmës financiare dhe ekspertizës që Bashkimi Evropian mund të ofrojë për Kosovën në rrugëtimin e saj drejt BE-së”.

“Duke biseduar për reformat e nisura nga Qeveria e Republikës së Kosovës, Komisioneri për Zgjerim i Bashkimit Evropian, Varhelyi, tha se do ta ndihmojë Kosovën në luftimin e krimit. Gjatë takimit u theksua rëndësia e zbatimit të shpejtë të Planit Ekonomik dhe Investues të BE-së për Ballkanin Perëndimor”, thuhet në komunikatë.

Më tej, në komunikatë thuhet se u bisedua edhe për progresin që Kosova ka bërë në procesin e vaksinimit, ku tani qëndron më së miri ndër vendet e rajonit, ndërsa Komisioneri Varhelyi shprehu gatishmërinë e BE-së për të ndihmuar rreth certifikatës së vaksinimit.

Mos-përfshirja e Ligjit të Pagave në projektbuxhetin e miratuar në parim nga Komisioni për Buxhet, Punë dhe Transfere përgjatë ditës së mërkurë, ka ngjallur pakënaqësi tek sindikalistët.

Nga Sindikata e Bashkuar e Arsimit, Shkencës dhe Kulturës (SBASHK), kanë paralajmëruar përshkallëzim të situatës në rast se nuk arrihet ndonjë marrëveshje me Qeverinë për çështjen e Ligjit të Pagave.

Ymer Ymeri, koordinator i SBASHK-ut, ka thënë se paraprakisht është mbajtur takim me Qeverinë dhe se janë njoftuar që Ligji për Pagat nuk do të jetë pjesë e projektligjit për buxhetin e vitit 2021. I njëjti ka paralajmëruar protesta masovike përgjatë muajit dhjetor.

“Përpara mbajtjes së takimit të komisionit, SBASHK-u është ftuar që të mbajë takim me Qeverinë, andaj jemi njoftuar paraprakisht se Ligji për Pagat nuk do të përfshihet në projektbuxhetin e vitit 2022. SBASHK-u do të vazhdojë protestën më 4 dhjetor, kemi njoftuar edhe sindikatat e tjera si dhe Këshillin e Prindërve që t’iu bashkohen protestat. Nëse nuk reflektojnë, SBASHK-u pas dy javësh do t’ia mësyejë t’i mbledhë rreth 1,000 veta dhe të dalë në protestë”, ka deklaruar Ymeri për lajmi.net.

Ai ka paralajmëruar edhe futje në grevë, në rast se Qeveria nuk i merr parasysh kërkesat e sindikalistëve.

“Nëse sërish nuk reflektojnë, do të vazhdojmë me greva ku, rrjedhimisht do të bllokojë edhe fillimin e periodës së tretë”, ka shtuar ndër të tjera koordinatori i SBASHK-ut.

Karshi kësaj çështje, të indinjuar janë shprehur edhe sindikata e punonjësve shëndetësor, indinjatë kjo të cilën do ta përcjellin përmes protestës. Kryetari i Federatës së Sindikatave të Shëndetësisë, Blerim Syla, ka paralajmëruar bllokadë institucionesh shëndetësore në rast se nuk arrihet marrëveshja

“Nesër kemi mbledhjen e Këshillit Drejtues dhe ata ndërmarrin hapat e vet, besoj që nesër do të marrim vesh pas mbledhjes. Ju e dini qëllimin tonë, nëse nuk ka bashkëpunim, nëse nuk procedohet Ligji i Pagave, atëherë më vjen keq por pritet të ketë greva”, është deklaruar ai për lajmi.net.

Në fillim të këtij muaji punonjësit shëndetësorë dhe ata arsimor kanë protestuar para Qeverisë të Kosovës duke kërkuar barazi sociale përmes Ligjit të Pagave, duke thënë se kjo gjë i është premtuar më herët, por se janë mashtruar nga Qeveria.

Përgjatë ditës së mërkurë, në mbledhjen e Komisionit për Buxhet, Punë dhe Transfere, është miratuar në parim projektligji për buxhetin 2022, i cili do të jetë 2,7 miliardë euro.

Anëtarët e komisionit nga opozita kanë kritikuar mospërfshirjen e Ligjit për Pagat në këtë buxhet.

Deputeti Avdullah Hoti nga LDK-ja ngriti çështjen e shkurtimit të buxhetit për Ministrinë e Shëndetësisë, dhe ka pyetur ministrin Murati se a është buxhetuar Ligji për Pagat

Deputeti Pal Lekaj nga AAK kritikoi ministrin Murati për mos përfshirjen e Ligjit të Pagave dhe shkurtimin e buxhetit disa dikastere siç tha ai me rëndësi.

Në Dhomat e Specializuara në Hagë ka përfunduar për sot seanca gjyqësore ndaj ish-pjesëtarit të Ushtrisë Çlirimtare të Kosovës, Salih Mustafa.

Është dëgjuar dëshmitarja e Zyrës së Prokurorit të Specializuar (ZPS), dëshmia e së cilës në pjesën më të madhe të seancës ka vijuar e mbyllur për publikun. Kryetarja e trupit gjykues ka thënë se seanca do të vazhdojë nesër me të njëjtën dëshmitare të mbrojtur.

Dëshmitarja, e cila mban kodin W04676, në seancë publike ka thënë se ka qenë pjesë në një zhvarrim në fshatin Zllash.

Në seancën e sotme ajo ka thënë se kanë shkuar në një mal në thellësi të fshatit, së bashku me babanë e viktimës, për ta zhvarrosur atë.

Identiteti i saj nuk është i ditur për publikun sikurse roli i saj në ngjarjen e zhvarrimit në të cilën pretendon se ka qenë prezent.

Pyetjet e mbrojtjes së Mustafës kanë vijuar tërësisht të mbyllura, sikurse ato shtesë nga prokuroria.

Në gjykimin ndaj Mustafës deri tani janë dëgjuar gjashtë dëshmitarë, të gjithë të mbrojtur, identiteti i të cilëve nuk është bërë i ditur për publikun.

Gjykimi ka filluar më 15 shtator 2021 dhe është i pari në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.

Aktakuza ndaj Mustafës është konfirmuar më 12 qershor 2020, ndërsa ai u arrestua më 24 shtator të vitit të kaluar, me pretendime për krime lufte.

Ai po qëndron në qendrën e paraburgimit në Hagë, ndërsa në deklarimin e tij para trupit gjykues është deklaruar i pafajshëm./KP

Pothuajse çdo ditë Policia e Kosovës raporton për persona të zhdukur, nëpër tërë territorin e vendit.

Disa prej tyre fatmirësisht gjenden të gjallë e në gjendje të mirë shëndetësore, por ka edhe nga ta që gjenden pa shenja jete.

Në Policinë e Kosovës gjatë katër viteve të fundit janë raportuar 904 persona të zhdukur.

Bazuar në të dhënat që ka siguruar Indeksonline, nga fillimi i këtij viti deri më 21 shtator, 207 persona janë raportuar si të zhdukur.

Ky është një numër i lartë, krahasuar me vitin paraprak, ku në 2020-ën u raportuan 197 raste.

Numër të lartë të personave të zhdukur pati edhe gjatë vitit 2019. Sipas të dhënave të PK-së, 254 raste janë për persona të zhdukur.

Edhe viti 2018 u shoqërua me këtë ritëm të zhdukjeve. Në atë vit në Policinë e Kosovës janë raportuar 246 raste./Indeksonline/

Çmimet e gazit janë rritur për tetë përqind më 17 nëntor, pasi Gjermania ka shtyrë miratimin e gazsjellësit kontrovers të Rusisë, Rjedha Veriore 2.

Më 16 nëntor, Gjermania ka bërë të ditur se ka pezulluar procesin e miratimit, sepse konsorciumi me bazë në Zvicër, i cili qëndron mbrapa projektit të gazsjellësit, duhet të krijojë një degë në Gjermani, në mënyrë që të fitojë licencën.

Ky vendim ka shuar shpresat se gazsjellësi do të mund të jetë funksional në muajt në vijim dhe që do të mund të lehtësojë krizën me energji në Evropë, të shkaktuar nga disa faktorë, përfshirë prodhimin më të vogël sesa është pritur.

Rritja e kërkesës, pas rihapjes së ekonomive, është po ashtu shkak për këtë rritje çmimesh.

Rusia është akuzuar për bllokim të furnizimeve shtesë të gazit natyror në Evropë – përmes gazjellësit ekzistues që kalon Ukrainën – në mënyrë që t’i bëjë presion Bashkimit Evropian për të miratuar më shpejt projektin, Rrjedha Veriore 2.

Shtetet e Bashkuara, Ukraina dhe disa vende anëtare të Bashkimit Evropian kundërshtojnë projektin Rrjedha Veriore 2, duke thënë se rrezikon sigurinë energjetike në Evropë.

Ky gazsjellës do ta privojë edhe Ukrainën nga tarifat e transitit.

Një burim i paidentifikuar gjerman, ka thënë për agjencinë e lajmeve Reuters se projekti i gazsjellësit nuk do të miratohet deri në muajin mars, kur kërkesa për gaz natyror të nisë të ulet me ardhjen e pranverës.

Rritja e çmimeve të gazit është duke shkaktuar inflacion në Evropë ashtu sikurse panik për ndërprerje të energjisë elektrike.