Qeveria e Kosovës është duke punuar intensivisht në një Projektligj të ri të Pagave në sektorin publik.

Kjo çështje u diskutua në takimin që pati kryeministri i Republikës së Kosovës, Albin Kurti me kryetarin e Bashkimit të Sindikatave të Pavarura të Kosovës (BSPK), Atdhe Hykolli.

Kurti tha se ai mbetet i përkushtuar në fuqizimin e të drejtave të punëtorëve dhe respektimit të plotë të Ligjit të Punës nëpërmjet rritjes së kapaciteteve inspektuese.

Ai po ashtu tha se qeveria është partneri kryesor social për mbrojtjen, realizimin dhe avancimin e të drejtave dhe mirëqenies së punëtoreve.

Në takim u bisedua edhe për Ligjin e Pagave dhe pagën minimale.

“Ne tani po punojmë intensivisht në hartimin e ligjit të ri që do të ofrojë një zgjidhje të drejtë dhe të qëndrueshme të sistemit të pagave në sektorin publik. Duke e trajtuar me thellësinë dhe kujdesin e nevojshëm, e duke mos u nxituar, ne po tregojmë përgjegjësinë tonë në trajtimin e këtij ligji kaq të rëndësishëm që ka munguar për tash e 22 vjet”, u shpreh kryeministri Kurti.

Sa i përket Ligjit të Pagave, kryeministri Kurti tha se qëllimi primar i tij do të jetë që të krijojë transparencë dhe barazi në sektorin publik, për dallim nga ai paraprak, që është shfuqizuar nga Gjykata Kushtetuese, që përveç se ishte ligj i dobët ishte edhe i dëmshëm duke qenë se ishte diskriminues dhe krijonte pabarazi.
Në lidhje me pagën minimale, ai tha se gjatë mandatit të tij, sikurse është zotuar para qytetarëve dhe miratuar në programin qeverisës, ajo do të ngritet në 250 euro.

“Kjo, e sidomos kërkesat për rritje pagash, duhen ta konsiderojnë që përveç rritjes ekonomike nevojitet edhe rritje e produktivitetit përbrenda rritjes ekonomike që përjeton vendi i ynë”, thuhet në komunikatën e kryeministrisë.

Përgjatë takimit u bisedua edhe për çështje tjera që për synim kanë ngritjen e mirëqenies së qytetarëve të Republikës së Kosovës dhe për formë kanë bashkëpunimin e sinqertë dhe korrekt ndërmjet Qeverisë dhe BSPK-së. /Telegrafi/

Kreu i Aleancës për Ardhmërinë e Kosovës, Ramush Haradinaj, përmes një konference për media ka bërë publike dy kërkesa për kryeministrin Albin Kurti.

Haradinaj i ka kërkuar Kurtit që çdo ditë pune ta fillojë me një vizitë bashkë me Ministren e Ekonomisë, Artane Rizvanollin, në Korporatën Energjetike të Kosovës, shkaku i situatës energjetike në vend.

Ndërsa, kërkesa tjetër e tij është që kostoja e importit të rrymës të paguhet nga buxheti i këtij viti.

“I bëj apel Kurtit që të ndërmerr dy veprime menjëherë. Njëri është që ta fillojë çdo ditë pune në KEK, bashkë me Ministren, pra çdo ditë ta heq nga agjenda një takim protokollar, dhe çdo ditë ta filloj ditën në KEK, gjatë gjithë dimrit dhe i dyti që ta paguajë koston e importit për këtë vit, nga buxheti i këtij viti e të mos e bartë në buxhetin e vitit tjetër, sepse duke u bartë kostoja krijon pengesa të mëdha ne buxhetim të projekteve të tjera”, ka deklaruar Haradinaj në këtë konferencë. /GazetaSinjali/

Prokuroria Themelore në Gjakovë, ka kërkuar nga Njësiti për Hetimin e Krimeve Ekonomike dhe Korrupsionit të Policisë së Gjakovës, që të ndërmarrë veprime hetimore, pas kallëzimit penal që ka ushtruar Aleanca për Ardhmërinë e Kosovës (AAK), ndaj ish-kryetares së Gjakovës, Mimoza Kusari-Lila.

Në kallëzimin penale të cilin e ka siguruar “Betimi për Drejtësi”, AAK-ja po pretendon se Kusari-Lila e ka keqpërdorur detyrën zyrtare në kohën sa ka qenë në krye të Komunës së Gjakovës.

Kërkesën për ndërmarrjen e veprimeve hetimore ndaj Kusari-Lilës, për “Betimi për Drejtësi”, e ka bërë të ditur zëdhënësja e Prokurorisë Themelore në Gjakovë, Yllka Shehu.

“Pas pranimit të kallëzimit penal të parashtruar nga partia politike, Aleanca për Ardhmërinë e Kosovës, dega në Gjakovë, me datë 04 nëntor 2021, Prokuroria Themelore në Gjakovë, Departamenti i Krimeve të Rënda, më 30 nëntor 2021, ka bërë kërkesë për ndërmarrjen e veprimeve të caktuara hetimore, Stacionit Policor në Gjakovë, Njësitit të Hetimeve të Krimeve Ekonomike.”, thuhet në përgjigjen e Prokurorisë.

Tutje sipas prokurorisë, nga ana e Policisë ende nuk kanë pranuar raportin me informatat e kërkuara nga prokurori i çështjes.

Ndryshe, sipas kallëzimit penal, me vendimin e 25 marsit 2014, Kuvendi i Komunës së Gjakovës kishte marrë vendim për shpalljen e interesit publik për pronat private në dobi të Komunës së Gjakovës, për realizimin e projektit të rrethrrotullimit, në kryqëzimin e rrugëve “Tirana” dhe “Skënderbeu”, në parcelat e evidentuara në emër të familjes Bakija, raporton “Betimi për Drejtësi“.

Tutje thuhet se, Kusari-Lila duke qenë në cilësinë e kryetares së Komunës së Gjakovës, ka arritur marrëveshje me familjen Bakija edhe pse jo në formë të shkruar, por se në bazë të dokumentacionit vërtetohet një gjë e tillë, ashtu që kompromisi është arritur për zhvendosjen e rrethrrotullimit, me ç’rast është krijuar hapësira e konsiderueshme në favor për familjen Bakija, respektivisht është shtuar sipërfaqja prej 930 metra katrorë.

Konfirmimin e këtij propozimi në fjalë, sipas kallëzimit penal ish-kryetarja e ka vërtetuar edhe përmes kërkesës zyrtare të 17 qershorit 2015, drejtuar Ministrisë së Infrastrukturës, përkatësisht ish-ministrit Lutfi Zharku.

Këto veprime, sipas AAK-së, janë bërë me dashje në kundërshtim me Planin Rregullues Urban Revidimi Orize 1/8, sipas të cilit në një pjesë të këtij lokacioni parashihet gjelbërimi.

Tutje sipas tyre, këto veprime ajo i ka ndërmarrë krye në vete dhe në këtë mënyrë duke mënjanuar apo anashkaluar miratimin e këtij ndryshimi përmes procedurave të kërkuara.

Sipas kallëzimi penal, Kusari-Lila, duke qenë në cilësinë e personit zyrtar ka shfrytëzuar detyrën apo autoritetin zyrtar dhe i ka tejkaluar kompetencat e saj, duke mos respektuar projektin e aprovuar të rrugës dhe rrethrrotullimit , dhe jo ta zhvendos atë.

Gjithashtu, sipas kallzimit penal ajo ka vepruar në kundërshtim me planin rregullues në fuqi, sipas të cili pjesa e vogël e mbetur nga prona e familjes Bakija kishte qenë e paraparë për gjelbërim dhe si të tillë ta shpronsojë, dhe jo ta rrisë këtë sipërfaqe duke krijuar hapësirë të mjaftueshme ndërtimin e objektit kolektiv për dobi të familjes Bakija, pa miratimin e Asamblesë Komunale në Gjakovë dhe në këtë mënyrë duke i shkaktuar dëm Komunës së Gjakovës.

AAK-ja i ka propozuar prokurorisë që të merret aktvendim për fillim të hetimeve për këtë rast./reporteri.net/

Ministri i Mbrojtjes, Armend Mehaj ka nënshkruar marrëveshje bashkëpunimi me homologun e tij kroat, Mario Banozic, për të cilën ministrat kanë thënë se do të thellojë bashkëpunimin e dy vendeve të fusha te ndryshme që lidhen me sigurinë dhe mbrojtjen.

Banozic ka thënë se Kroacia e mbështetë procesin e transformimit të FSK-së në ushtri dhe anëtarësimin e Kosovës në institucione euroatlantike.

“Ne e përkrahim anëtarësimin e Kosovës në institucione të ndryshme euroatlantike, ne po ashtu e mbështesim procesin e transformimit të FSK-së në forca të armatosura dhe kjo është pjesë e memorandumit të bashkëpunimit. Do të vazhdojmë të ofrojmë bashkëpunim në fushën e trajnimeve dhe shkollimit”, ka thënë ai.

Ministri i Mbrojtjes, Armend Mehaj ka thënë se marrëdhëniet mes Kosovës dhe Kroacisë i tejkalojnë ato diplomatike.

“Marrëdhëniet mes dy vendeve tona nuk janë thjesht marrëdhënie diplomatike por janë shumë më tej. Si popuj na bashkojnë sfida të ngjashme të kaluarës, çka e forcon edhe më shumë miqësinë mes vendeve tona. Jemi së bashku në rrugën e së ardhmes të vendeve tona. Miqësinë e kurorëzojmë sot me nënshkrimin e marrëveshjes për mbrojtje dhe siguri, me këtë hapet rruga për bashkëpunim dhe mundësi më të ngushta sa i përket shkollimit dhe trajnimit të personelit ushtarak”, ka thënë Mehaj.