Kanë filluar reshjet e bores në shumë fshatra të Dragashit, gjatë orëve të mëngjesit të ditës së sotme.
Gjatë ditës së hënë është parashikuar të mbajë mot i vranët me reshje shiut , të cilat në disa zona janë shëndrruar në reshje të borës.
Sipas Institutit Hidrometereologjik të Kosovës, parashikohet që në mbrëmje të intensifikohen reshjet e dëborës.
Këto janë pamje të dërguara në redaksi të Televizionit të Prizrenit nga fshati Zapluxhë e komunës së Dragashit.
Presidenti i Sllovenisë, Borut Pahor, dje u shpreh i shqetësuar për dialogun mes Kosovës dhe Serbisë, ndërsa tha se gjatë vizitës së tij në Prishtinë do të kërkojë të zbatohet gjithçka që është rënë dakord në Bruksel. Por pas takimit me të, presidentja e Kosovës, Vjosa Osmani, tha se Serbia nuk i ka implementuar shumicën e marrëveshjeve.
Presidentja Osmani tha se marrëveshja për Asociacionin e komunave me shumicë serbe nuk është implementuar për shkak të vendimit të Gjykatës Kushtetuese.
“Një marrëveshje që nuk është implementuar është sepse, parakusht është që duhet të respektohet vendimi i Gjykatës Kushtetuese. Gjykata Kushtetuese ka thënë se Asociacioni nuk është në përputhje me Kushtetutën”, tha Osmani, duke theksuar se nuk mund të ketë Asociacion me kompetenca ekzekutive.
“Serbia nuk i ka implementuar as 2/3 e marrëveshjeve”, tha Osmani paraprakisht, duke vënë në pah se Serbia ende refuzon t’i shkatërrojë të gjitha strukturat ilegale dhe të mos i financojë ato. “Janë duke e terrorizuar popullatën”, shtoi presidentja.
Ndërsa presidenti slloven, Pahor, tha se çështjet më të rëndësishme mund të zgjidhen përmes dialogut, por theksoi se kushti i parë është që të respektohen marrëveshjet e arritura. Edhe marrëveshja për Asociacionin, Pahor tha se duhet të respektohet nga Kosova.
“Çështjet më të rëndësishme mund të zgjidhen me dialog. Kushti i parë është që të respektohen marrëveshjet. Ne e kuptojmë vendimin e Gjykatës Kushtetuese, por për palën e tretë që nuk është nënshkruese e kësaj marrëveshjeje… Derisa të mos merreni vesh ndryshe, kjo marrëveshje duhet respektuar. Është e sigurt se gjithmonë duhet t’i kthehemi dialogut”, tha Pahor.
Presidenti i Sllovenisë, Borut Pahor, ka thënë që dialogu mes Kosovës dhe Serbisë duhet të vazhdojë, sado që sipas tij, nuk është një proces i lehtë.
“Nuk është rrugë e lehtë, por Sllovenia e mbështet Kosovën. Dialogu nuk është i thjeshtë – duhet të zgjidhen çështje shumë komplekse”.
“Duhet të tejkalohen mosmarrëveshjet në dialog dhe të ndikojmë në Bashkimin Evropian”, tha Pahor në një konferencë për media me presidenten e vendit, Vjosa Osmani, njofton Klankosova.tv.
Një tërmet me magnitudë 2.7 ballë të shkallës Rihter është regjistruar në Kosovë herët në mëngjes. Kështu thotë Instituti Sizmologjik i Serbisë.
Siç bëhet e ditur nga mediat serbe, tërmeti është regjistruar mëngjesin e sotëm rreth orës 4.08 në afërsi të Shtimes.
Ky ishte tërmeti i dytë në këtë rajon në më pak se një orë, pasi një tërmet është regjistruar mëngjesin e sotëm rreth orës 03:20, me magnitudë 2.1 ballë të shkallës Rihter.
Gjithashtu, të dielën rreth orës 18:58 në të njëjtën zonë është regjistruar një dridhje tjetër, që ka qenë me magnitudë 2.6 ballë sipas shkallës Rihter, sipas Institutit Sizmologjik të Serbisë.
Sizmologu kosovar, Shemsi Mustafa ka shkruar para rreth 15 orësh për disa dridhje toke të regjistruara.
“2021/11/29; 04:08:25; 42.369 N; 21.047 E; Mag -2.7; Epiqendra ishte 8 km në Perendim të Ferizait2021/11/29; 03:20:13; 42.385 N; 21.032 E; Mag-2.2;Epiqendra ishte 10 km; Veri-Perendim të Ferizait2021/11/28 18:58:51.8 42.44 N 21.03 E M=2.9Epiqendra ishte 1.2 km në Veri-Perendim të Shtimës”, ka shkruar ai në Facebook.
Presidentja e Kosovës, Vjosa Osmani i ka kërkuar Sllovenisë ndihmën e saj për liberalizimin e vizave.
Në takimin me presidentin Pahor, Osmani ka kërkuar përkrahjen sllovene në procesin e liberalizimit.
Presidenti Pahor i ka garantuar Osmanit që do të ketë përkrahjen e vazhdueshme të Sllovenisë në këtë proces.
“Liberalizimi i vizave është vonuar dhe kjo e dëmton kredibilitetin evropian. Presidenti Pahor na dha mbështetje të fuqishme. Lidhur me dialogun Kosovë-Serbi, ne kemi qenë gjithmonë palë konstruktive në këtë temë. Në këtë proces, njohja reciproke është ajo që duhet të jetë në qendër të këtij procesi. Shpresojmë që BE të jetë e qartë në raport me Serbinë që të ndërprejë retorikën kërcënuese ndaj Kosovës dhe shteteve tjera.
Rritja e ndikimit rus poashtu po dëmton Ballkanin. Ne kemi nevojë për përkrahjen e Sllovenisë dhe presidentit Pahor që është i aktivizuar në politikë që 32 vite. Ky e din mirë se çka ndodhë në rajonin tonë nëse nuk ndërhyhet me kohë” ka thënë Vjosa Osmani.
Policia e Kosovës gjatë periudhës janar-shtator pati mjaft punë me shkelësit e rregullave të komunikacionit.
E me këtë rast për të ngritur sigurinë në trafik organet e rendit kanë shtuar aktivitetet e tyre.
Në funksion të kësaj policia po ashtu ua ka konfiskuar edhe patentë-shoferët vozitësve që nuk i kanë përfilluar rregullat.
Në një përgjigje të këtij institucioni për Klankosova.tv janë 5 mijë e 556 leje të vozitjes të konfiskuar për nëntë muaj.
“5556 shoferëve, iu është ndaluar drejtimi i mjetit me veprim motorik”.
E po ashtu një numër i madh i shoferëve kanë ndëshkuar me pikë negative, gjithsejt 13 mijë e 532.
Policia e Kosovës raporton që një person ka njoftuar që në një pyll të një fshati në Gjakovë, kishte hasur disa mjete të pashpërthyera.
E pas daljes së njësive policore dhe ato të FSK-së në vendin e ngjarjes, kanë bërë tërheqjen e 70 copave të mjeteve të dyshuara (minë E-3).
“Ankuesi mashkull kosovar ka informuar se në pyll të fshatit kishte hasur në disa mjete të pashpërthyera. Njësia policore ka bërë sigurimin e vendin të ngjarjes, ndërsa njësitet e FSK-së për deminim, kanë bërë tërheqjen e 70 copë mjeteve të dyshuara (minë E-3) në mënyrë të sigurte”, thuhet në raport./Telegrafi/
Në ditën e Çlirimit, kryeministri i Shqipërisë, Edi Rama përcolli pamje nga Rruga e Arbrit, që hapet sot për qarkullim.
Rruga e Arbrit ka 7 tunele me gjatësi totale 8.5 km. Me një gjatësi rreth 74 km, ajo do të bëhet një korridor lidhës i rëndësishëm Lindje-Perëndim.
Ky investim i strategjik, jo vetëm do të afrojë qytetarët e Tiranës e gjithë Shqipërisë me Dibrën dhe Maqedoninë e Veriut, por do jetë një arterie e zhvillimit ekonomik dhe turizmit.
Kjo rrugë lidh rajonet lindore dhe verilindore të Shqipërisë duke përmirësuar transportin e banorëve që jetojnë në zonat në të cilën kalon rruga, si dhe siguron transportin e burimeve natyrore nëntokësore, siç është kromi, nga Bulqiza për në portin e Durrësit, i cili më pas eksportohet.
Gjithashtu, ky aks rrugor do të jetë rruga më e shkurtër që lidh Tiranën me Dibrën, si dhe me veriun e Maqedonisë, Dibrën e Madhe, Tetovën dhe Shkupin, pra do të jetë rrugë lidhëse ndërkombëtare.
Kosova dhe Rusia si dy vende nuk kanë marrëdhënie të mira mes vete.
Por, kjo nuk i ka penguar dy njerëz të dyja vendeve të lidhin kurorë.
Një histori e tillë dhe interesante ka ndodhur mes Elinës dhe Yllzonit.
Çifti në fjalë ka folur për emisionin e mëngjesit në Abcnews për vështirësitë që kanë kaluar për të qenë bashkë.
Kosovari dhe rusja u njohën në Gjermani në moshën 18-vjeçare.
Në fillim prindërit e kësaj të fundit ishin kundër kësaj lidhje.
“Isha vetëm 18 vjeç, isha ulur në klasë dhe më pas erdhi Yllzoni, hyri kishte një xhaketë të kolegjit dhe ishte vërtet dashuri me shikim të parë. I thashë miqve të mi, unë e dua atë djalë. Filluam të dalim, isha shumë skeptike në fillim”.
Nga ana tjetër, Yllzoni tregoi se prindërit e tij e kishin mirëpritur që në fillim dashurinë e tij me vajzën nga Rusia.
“Ne u takuam në vitin 2011. Në fillim i thashë nënës time. Babai ishte kundër kësaj lidhjeje sepse jemi nga kultura dhe besime të ndryshme.Ishte një jo e prerë midis shqiptarëve dhe rusëve. Por dolëm së bashku, i kërkova babait që ta takojë se është një djalë shumë i mirë. E takoi dhe në fillim tha se unë të ndaloj që të martohesh me të. Ndërkohë 10 vite më vonë, e shikon si djalin e vet.”-tha Elina.
Kosova mund të rrezikohet nga përhapja e variantit të ri të koronavirusit, Omicron që ka prekur tashmë shumë vende të botës.
Kështu mendojnë infektologët që kanë bërë thirrje për vigjilencë sa i përket respektimit të masave mbrojtëse, sidomos pasi ende nuk dihet saktë shkalla e agresivitetit të këtij varianti të ri.
Infektologët po ashtu kanë thënë se institucionet duhet të vendosin masa të reja kundër COVID-19 duke pasur gjithmonë parasysh lëvizjet e virusit dhe situatën aktuale epidemiologjike.
Deri më tani, në Kosovë nuk është konfirmuar asnjë rast me variantin Omicron.
Më 26 nëntor, Organizata Botërore e Shëndetësisë tha se Omicron, që fillimisht u identifikua në Afrikën e Jugut, ishte “variant shqetësues”.
Zyrtarët në Afrikën e Jugut kanë thënë se 90 për qind e rasteve të reja janë me variantin Omicron, që ka numër të madh të mutacioneve.
“Pacientët kryesisht ankohen për dhimbje trupi dhe lodhje dhe këto simptoma ne i kemi hasur te pacientët e rinj, jo te personat më në moshë”, ka deklaruar për BBC, Angelique Coetzee nga Shoqata e Mjekëve të Afrikës së Jugut.
Infektologu Sali Ahmeti tha për Radion Evropa e Lirë se periudha e festave të fundvitit rrit rrezikun për shfaqjen e rasteve me këtë variant të virusit edhe në Kosovë.
“Ky variant paraqet një kërcënim edhe për neve, sidomos tash afër festave të Vitit të Ri kur te ne munden të vijnë bashkëqytetarët tanë nga vende të ndryshme të botës”, tha ai.
Ahmeti u shpreh se edhe pse nuk dihet saktë shkalla e rrezikut nga varianti i ri i virusit, qytetarët dhe institucionet duhet të kontribuojnë në shmangien e përhapjes së tij.
“Ne duhet të jemi syhapur dhe vigjilentë. Duhet t’i përcjellim kërcënimet potenciale që mund t’i paraqesë ky virus”, tha ai.
Edhe infektologu, njëherësh drejtori i Shërbimit Klinik Spitalor dhe Universitar të Kosovës (SHSKUK), Valbon Krasniqi, tha për Radion Evropa e Lirë se Kosova është e rrezikuar nga shpërndarja e variantit Omicron.
“Atë që e kemi parë në variantet e tjera, është jo e besueshme që ndonjë vend mundet të kursehet. Varet edhe sa do të ketë qarkullim të njerëzve”, tha ai.
Deri më tani, varianti Omicron është shpërndarë në shumë vende të botës, përfshirë edhe në Mbretërinë e Bashkuar, Gjermani, Itali, Belgjikë, Danimarkë, Botsvanë, Izrael, Australi, Hong Kong dhe Çeki e të tjera.
Ministria e Shëndetësisë (MSH) në Kosovë më 27 nëntor bëri të ditur se gjatë një takimi të Komitetit për koordinim dhe vlerësim të situatës me pandeminë COVID-19, është diskutuar për variantin Omicron.
MSH-ja ka paralajmëruar se nga java që nis më 29 nëntor do të bëhet rishqyrtimi i masave në fuqi dhe do të marren masa të tjera “sipas nevojës dhe zhvillimeve lidhur me COVID-19”.
Kosova së fundmi ka shënuar rënie të rasteve me koronavirus. Gjatë shtatë ditëve të fundit, në vend janë regjistruar 78 raste.
Sipas masave që janë aktualisht në fuqi në Kosovë, mbajtja e maskës në ambiente të hapura dhe të mbyllura publike është obligative. Po ashtu, qytetarët duhet të tregojnë dëshminë e vaksinimit kundër koronavirusit apo të testit negativ për hyrje në qendra tregtare, restorante, bare dhe vende të tjera publike.
Gjithashtu, sipas masave në fuqi, secili person që hyn në Kosovë duhet të posedojë dëshmi për vaksinim të plotë, shërim nga COVID-19 apo një test negativ.
Megjithatë, shumë shpesh, sidomos në kohën e uljes së numrit të rasteve në Kosovë, vërehet një mungesë e respektimit të masave në fuqi.
Sipas Organizatës Botërore Shëndetësisë, testet aktuale PCR diagnostikuese për koronavirusin SARS-CoV-2 e detektojnë edhe variantin Omicron.
Përkujtojmë se testet për detektimin e variantit Delta të koronavirusit nuk kishte pasur mundësi të kryhen në Kosovë dhe kështu mostrat nga Kosova ishin dërguar në Berlin të Gjermanisë.
Çfarë është varianti Omicron dhe çka dihet deri më tani?
Varianti i koronavirusit, Omicron u vërejt për herë të parë në Afrikën e Jugut më 23 nëntor të vitit 2021.
Më 28 nëntor, Organizata Botërore e Shëndetësisë tha se e kishte klasifikuar këtë variant si “shqetësues” për shkak të disa mutacioneve dhe mënyrës se si ato mund të kenë ndikim në sjelljen e virusit, si për shembull, se sa shpejt mund të shpërndahet apo shkallën e sëmundjes që shkakton.
Sa i përket transmetueshmërisë, OBSH-ja tha se ende është e paqartë nëse Omicron është më i transmetueshëm sesa variantet paraprake, përfshirë variantin Delta.
“Është rritur numri i personave që po infektohen në zonat e Afrikës së Jugut, që janë prekur nga ky variant, por studimet epidemiologjike janë duke u kryer, në mënyrë që më pas të mund të kuptojmë nëse rritja e rasteve është për shkak të Omicronit apo faktorëve të tjerë”, tha OBSH-ja.
OBSH-ja tha se është ende e paqartë nëse varianti Omicron shkakton sëmundje më të rëndë, krahasuar me variantet paraprake.
“Të dhënat paraprake sugjerojnë se ka rritje të hospitalizimeve në Afrikën e Jugut, por kjo mund të jetë edhe për shkak të rritjes së numrit të të infektuarve sesa rezultat i infeksionit me Omicron”, thuhet në njoftim.
Ndërkaq, sa i përket simptomave, OBSH-ja tha se aktualisht nuk ka informacione që sugjerojnë se simptomat e lidhura me variantin e ri, Omicron janë të ndryshme nga ato që shkaktojnë variantet e tjera.
Vaksinat ekzistuese vazhdojnë të jenë efektive kundër sëmundjes së rëndë dhe vdekjes, tha OBSH-ja, duke theksuar se ende nuk ka të dhëna se cili është ndikimi që Omicron mund të ketë mbi vaksinat ekzistuese kundër koronavirusit.
“OBSH-ja po punon me partnerët teknikë për të kuptuar ndikimin potencial që ky variant ka në kundërmasat ekzistuese, përfshirë vaksinat. Vaksinat vazhdojnë të jenë mjete kritike për të zvogëluar sëmundjen e rëndë dhe vdekjen, përfshirë edhe infektimeve kundër variantit dominues, Delta”, tha OBSH-ja.
Megjithatë, OBSH-ja tha se sipas të dhënave të para, Omicroni rrit rrezikun e riifektimeve, pasi njerëzit që më herët e kanë pasur COVID-19 “mund të riinfektohen më lehtë me COVID-19”.
A janë të gjitha mutacionet e virusit të rrezikshme?
Para përhapjes së variantit Omicron nëpër botë, koronavirusi i ri që u shfaq për herë të parë në fund të vitit 2019, ka pësuar disa mutacione.
Në Kosovë në muajt e fundit ka pasur përhapje të variantit Delta dhe Delta Plus që janë vlerësuar variante me përhapje më të shpejtë dhe me pasoja më të mëdha në shëndet.
Infektologu Ahmeti tha se mutacionet e virusit do të vazhdojnë përderisa virusi vazhdon të jetë prezent.
Megjithatë, sipas tij, shqetësuese mbetet nëse mutacionet do të jenë rezistente ndaj imunitetit natyral të njerëzve apo imunitetit të krijuar nga vaksinat kundër koronavirusit.
“Është në hulumtim e sipër sjellja e tij ndaj imunitetit natyral dhe pas-vaksinal. Veçse kanë filluar hulumtimet e qëndrueshmërisë së këtij virusi në raportin e imunitetit pas-vaksinal”, tha infektologu Ahmeti.
Në Kosovë deri më tani janë vaksinuar me të dy dozat 761.003 qytetarë, përkatësisht mbi 40 për qind e popullsisë. Momentalisht mundësi vaksinimi kanë të gjithë personat mbi 12 vjeç.
Duke komentuar mutacionet e shpeshta dhe variantet e koronavirusit, infektologët kanë thënë se jo të gjithë variantet e reja të një virusi, që mund të shfaqen, janë më të rrezikshme se variantet paraprake.
“Mund të ketë variante më agresive apo më pak agresive”, tha për REL-in, Shemsedin Dreshaj, infektolog.
Dreshaj ka thënë se, megjithatë, variantin Omicron e sheh si të rrezikshëm dhe me potencial të shpërndarjes në Kosovë.
Disa shtete në botë veçse kanë filluar të marrin masa për të parandaluar përhapjen e këtij varianti të koronavirusit.
Më 27 nëntor, kryeministri britanik, Boris Johnson njoftoi se të gjithë personat që do të hyjnë në shtet duhet t’i nënshtrohen testit PCR për koronavirus dhe derisa të dalin negativë, duhet të vetizolohen. Po ashtu, të gjithë personat që janë raste kontakti të të infektuarve me Omicron, duhet të izolohen për dhjetë ditë.
Edhe shtetet e Bashkimit Evropian dhe Shtetet e Bashkuara kanë vendosur kufizime në udhëtimet nga shtetet në jug të Afrikës, me qëllim që të frenojnë përhapjen e variantit Omicron./REL
