Presidenti i Sllovenisë, Borut Pahor të hënën ka qëndruar për një vizitë në Kosovë, ndërsa pas takimit me krerët e shtetit, deklaroi se Sllovenia është e interesuar të shoh progres dhe përkundër vështirësive bisedimet duhet të vazhdojnë.

Presidenti i Sllovenisë ka thënë në Prishtinë se iniciativa e Ballkanit të Hapur nuk është alternativë e përfshirjes së vendeve të Ballkanit Perëndimor në Bashkimin Evropian.

Kurti-Pahor: Reflektimi i Serbisë mbi dëmet, shkatërrimet e krimet janë parakusht për bisedime serioze

Përkushtimi i dyanshëm për thellim të bashkëpunimit mes Kosovës dhe Sllovenisë dhe forcim të partneritetit ndërmjet dy vendeve, janë dy çështjet për të cilat kanë diskutuar sot kryeministri i Kosovës, Albin Kurti dhe Presidenti slloven, Borut Pahor.

Në një komunikatë për media të Zyrës së Kryeministrit bëhet e ditur po ashtu se kreu i ekzekutivit, Albin Kurti ka thënë se Sllovenia është partner i çmuar dhe se pret me padurim avancimin e marrëdhënieve dypalëshe në mbrojtje dhe siguri.

“Sllovenia është partneri ynë i çmuar pasi ndajmë të njëjtin interes për paqen dhe stabilitetin në rajon dhe më gjerë, ka thënë kryeministri Kurti, duke u shprehur mirënjohës për kontributin e Sllovenisë në misionin e NATO-s në Kosovë, KFOR, thuhet në komunikatë.

Kryeministri Kurti theksoi përkushtimin e Kosovës për anëtarësim në NATO dhe Bashkim Evropian, si dhe punën e qeverisë në këtë drejtim.

Ai kërkoi përkrahje nga Sllovenia për anëtarësimin në organizata dhe iniciativa ndërkombëtare.

Kryeministri theksoi se përkundër faktit që kanë filluar me vonesë vaksinimin nuk kanë marrë vaksina nga Kina apo Rusia, por vetëm ato të certifikuara nga FDA dhe EMA.

Duke thënë se këtë vit Kosova tregoi se është e gatshme të marrë përgjegjësi të reja me kalimin nga një konsumues i sigurisë në një ofrues sigurie, kreu i ekzekutivit veçoi se Kosova me krenari mbështeti operacionin e drejtuar nga NATO për evakuimin e refugjatëve afganë, gjë që sipas tij, dëshmon se Kosova është një partner i besueshëm.

Ne ishim të gatshëm të ndihmonim sepse kjo është ajo që vendet që ndajnë të njëjtat vlera të demokracisë dhe paqes bëjnë për njëri-tjetrin, tha kryeministri.

Kryeministri foli për përkushtimin e qeverisë në luftën kundër krimit e korrupsionit dhe për politikat qeverisëse.

Në komunikatë thuhet po ashtu se Presidenti Pahor ka përgëzuar kryeministrin për qasjen e re në qeverisje, derisa është interesuar të dijë më shumë rreth ecurisë së bisedimeve me Serbinë.

“Sllovenia është e interesuar të shoh progres. Përkundër vështirësive bisedimet duhet të vazhdojnë”, ka thënë Pahor.

Kryeministri e vlerësoi rolin e Sllovenisë në këtë proces si shumë të rëndësishëm dhe kërkoi mbështetjen e saj për të elaboruar rëndësinë e reflektimit të Serbisë për dëmet e shkaktuara, shkatërrimet dhe luftën, si dhe krimet e kryera në Kosovë, njofton Telegrafi.

Kryeministri e vlerësoi rolin e Sllovenisë në këtë proces si shumë të rëndësishëm dhe kërkoi mbështetjen e saj për të elaboruar rëndësinë e reflektimit të Serbisë për dëmet e shkaktuara, shkatërrimet dhe luftën, krimet e kryera në Kosovë.

Ky është një parakusht për bisedime serioze dhe normalizim të marrëdhënieve, tha kryeministri, duke e ritheksuar si parësore vendosjen në qendër të bisedimeve të njohjes së ndërsjellë të Kosovës me Serbinë.

Osmani e Pahor flasin për Ballkanin e Hapur, presidentja e quan hapësirë për ekspansion të hegjemonisë serbe

Presidenti i Sllovenisë, Borut Pahor ka thënë sot në Prishtinë se iniciativa e Ballkanit të Hapur nuk është alternativë e përfshirjes së vendeve të Ballkanit Perëndimor në Bashkimin Evropian.

Pahor tha se në fillim e ka mirëpritur këtë iniciativë edhe si mënyrë për rregullimin e marrëdhënieve Kosovë-Serbi, por tash, sipas tij, ka shumë kundërshtime.

“Kam parë se ka shumë kundërshtime, kur ka ardhur fillimisht kjo iniciativë më është dukur shumë me elegante për rregullimin e marrëdhënieve Kosovë-Serbi”, tha ai në konferencën e përbashkët për medie me presidenten Osmani.

Osmani e Pahor flasin për Ballkanin e Hapur, presidentja e quan hapësirë për ekspansion të hegjemonisë serbe
Në anën tjetër presidentja Vjosa Osmani u shpreh se kjo iniciativë përmes të cilës Serbia synon të ketë rolin kryesor, nuk ka qëllime të mira për rajonin.

“Ballkani i Hapur është hapësirë për ekspansion të hegjemonisë serbe. Serbia e cila po tenton ta luaj rolin kryesor në këtë iniciativë nuk ka qëllime të mira për rajonin tonë. Do të ishte krejt ndryshe sikur Serbia do të ishte shtet që ka paqen e stabilitetin synim dhe ta kishte njohur Kosovën, por përderisa synon që Kosova të hyjë në iniciativa të tilla si provincë e saj gjë që nuk është sepse relaiteti është ndryshe, natyrisht që një iniciativë e tillë nuk i bënë interesave të vendit tonë e as rajonit”, tha Osmani.

Ajo ka shtuar se shqetësimet tjera kanë të bëjnë me ekonominë, sigurinë e politikën.

Osmani ka shtuar se Serbia është pjesë e shumë iniciativave tjera rajonale, ku Kosova është pjesë e barabartë. Porse edhe aty Serbia nuk respekton marrëveshjet.

“Ta zëmë në Procesin e Berlinit, ku Kosova është e barabartë, e mbështesim këtë proces. Udhëhiqet nga kancelarja gjermane dhe presidenti francez, ka mbështetje të plotë të BE-së, përkundër këtij niveli kaq të lartë të udhëheqjes, Serbia vazhdon të mos implementojë marrëveshjet e nënshkruara aty. Sidomos atë të nënshkruar në Londër për personat e zhdukur me dhunë. Nëse nuk implementon marrëveshjet e një procesi kredibil siç është ai i Berlinit, paramendoni sa implementon marrëveshjet në një proces ku vet ka rol udhëheqës”, ka thënë Osmani.

Presidenti slloven: BE-ja t’i heq vizat Kosovës, tejkaloni mosmarrëveshjet me Serbinë

Presidenti i Sllovenisë, Borut Pahor, ka deklaruar se Sllovenia është mbështetës e dialogut mes Serbisë dhe Kosovës, dhe kësaj të fundit, Bashkimi Evropian duhet t’ia liberalizojë vizat.

Pahor ka kërkuar të tejkalohet gjitha mosmarrëveshjet në dialogun Kosovë-Serbi dhe të vazhdohet tutje për arritjen e marrëveshjes finale.

Ai në një konferencë të përbashkët me presidenten Vjosa Osmani, tha se Sllovenia do të mbështesë dialogun dhe perspektivën e Kosovës në procesin euro-integrues.

Megjithatë, ai tha se dy palët duhet të respektojnë edhe marrëveshjet e arritura. “Kushti i parë është t’i besohet dialogut dhe respektohen marrëveshjet”, tha ai.

Pahor deklaroi se dialogu duhet të bëhet një hap më tej tek çështja e personave të zhdukur.

“Në të dy këto çështje Sllovenia është mbështetëse edhe më tutje. Sllovenia e mbështet edhe perspektivën euroatlantike të Kosovës…Duhet të tejkalohen mosmarrëveshjet në dialog dhe të ndikojmë në Bashkimin Evropian”, deklaroi tutje ai. /Telegrafi/

Kryesia e Kuvendit të Kosovës do të mblidhet sot në orën 11:00.

Në rend dite është pika e papërfunduar nga seanca plenare e 22 dhe 28 korrikut 2021 për votimin e rekomandimeve të Komisionit për Mbikëqyrjen e Financave Publike lidhur me Raportin e Auditimit të pasqyrave vjetore financiare të ndërmarrjes Hortikultura për vitin 2020.

Pika e dytë e rendit të ditë ka të bëjë me pikat e papërfunduara nga seancat plenare më 16, 19, 21, 28 korrik dhe 6 gusht 2021, për votimin e Projektligjit për ratifikimin e amendamentimit të marrëveshjes ndërkombëtare me Bankën Evropiane për Investime, për financimin e Projektit për rehabilitimin e linjës hekurudhore 10, votimi i Projektligjit për ratifikimin e Marrëveshjes së bashkëpunimit ndërmjet MASHTI-t dhe Agjencisë Austriake për Zhvillim për zbatimin e Projektit “Hulumtimi dhe shkencat e aplikuara në arsimin e lartë + (HERAS+), votimi i kërkesës së Komisionit për Bujqësi për ndryshimin e emërtimit të këtij komisioni.

Kryesia e Kuvendit për shqyrtim do të ketë edhe pikën e papërfunduar nga seanca plenare e datës 19 tetor 2021, për votimin e raportit vjetor të Këshillit të Kosovës për Trashëgimi Kulturore për 2020, pikat e papërfunduara nga seancat plenare, 18, 19, 22 dhe 23 nëntor 2021, për votimin e raportit vjetor të Komisionit të Pavarur të Mediave për 2020, votimi i raportit vjetor të Zyrës së Rregullatorit për Energji për 2020, votimi i raportit vjetor të Agjencisë Kosovare për Krahasim dhe Verifikim të Pronës për 2020, votimi i raportit vjetor Financiar të Buxhetit të Kosovës për 2020, votimi i raportit vjetor të Autoritetit të Aviacionit Civil të Kosovës për 2020, shqyrtimi i propozim-vendimit të Qeverisë për miratimin e rekomandimit të Komisionit Ndërministror për Investime Strategjike për dhënien e statusit Investitor Strategjik për subjektin investues “KOSMONTE FOODS”, votimi për emërimin e kryetarit dhe katër anëtarëve të Bordit të Organin Shqyrtues të Prokurimit, votimi për përzgjedhjen e një kandidati për anëtar jo-ekzekutiv të Bordit të Bankës Qendrore, si dhe zgjedhja e anëtarëve të Bordit të Komisionit të Pavarur për Miniera dhe Minerale.

Kryesia e Kuvendit pritet të caktojë edhe datën për seancën e re plenare, ku në rend dite janë këto pika:

1. Deklarimet jashtë rendit të ditës,

2. Pyetjet parlamentare,

3. Shqyrtimi i Projektligjit për ratifikimin e Marrëveshjes në mes të Kosovës përfaqësuar nga Ministria e Financave, Punës dhe Transfereve dhe Qeverisë së Zvicrës përfaqësuar nga Departamenti Federal i Punëve të Jashtme përmes Agjencisë Zviceranë për Zhvillim dhe Bashkëpunim mbi programin Menaxhimi i Integruar i Burimeve Ujore në Kosovë,

4. Propozimi i dy kandidatëve për gjyqtarë në Gjykatën Kushtetuese,

5. Shqyrtimi i parë i Projektligjit për ndryshimin dhe plotësimin e Ligjit për festat zyrtare në Republikën e Kosovës,

6. Shqyrtimi i parë i Projektligjit për Pijet e forta alkoolike,

7. Shqyrtimi i parë i Projektligjit për ndryshimin dhe plotësimin e Ligjit

për mbeturina,

8. Shqyrtimi i parë i Projektligjit për Bujqësi dhe Zhvillim Rural,

9. Shqyrtimi i kërkesës së Fondit të Kursimeve Pensionale për miratimin e taksave vjetore për vitin 2022,

10. Shqyrtimi i Raportit vjetor të Komisionit Qendror të Zgjedhjeve për vitin 2020.

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon se në total numri i rasteve aktive është 322.

Numri i përgjithshëm i të shëruarve është 157.778, ndërkaq nga fillimi i pandemisë kanë vdekur 2,983 persona.

Prej fillimit të vaksinimit në të gjitha qytetet e Kosovës janë dhënë më shumë se 1.614.212 doza të vaksinës.

Deri më sot më shumë se 761.003 qytetarë janë vaksinuar me dozën e dytë.

Një ecje solidarizimi do të bëhet sot për aktoren dhe deputeten Adriana Matoshi e cila sot gjatë ditës njoftoi se i është rikthyer tumori në tru.

Sipas njoftimit ecja do të mbahet nga sheshi “Zahir Pajaziti” deri te Teatri Kombëtar i Prishtinës.

“Në nder të aktores së mirënjohur dhe shumë të dashur për gjithë publikun shqipfolës, Adriana Matoshi e cila përsëri u diagnostikua me tumor në tru, organizohet ecja nga Sheshi Zahir Pajaziti deri te Teatri Kombëtar në Prishtinë”, thuhet në njoftim. “Duam që me anë të kësaj ecje, të solidarizohemi me sfidën e Adrianës, për të cilën lutemi të gjithë që ta fitojë si çdo peripeci që e ka kaluar në jetë”, thuhet në njoftim.

Matoshi dje përmes një postimi në Facebook ka njoftuar se pas 10 vjetësh i është rikthyer tomori në tru. Ajo ka marrë mbështetja nga figura të ndryshme në vend.

Ndërkaq përmes postimit të saj ku ka treguar për sëmundjen ka bërë thirrje te të gjithë që ta duan vetën dhe t’i kushtojnë rëndësi vetvetes.

Njoftimi i saj, ku foli për kthimin e sëmundjes, u shpërnda në Facebook mbi 1000 herë për tetë orë, ndërkohë mori edhe rreth 10 mijë komente mbështetëse.