Policia e Kosovës përkatësisht njësia e Krimeve Ekonomikë në bashkëpunim me Prokurorinë Themelore në Ferizaj, janë duke zhvilluar një aksion në gjerë kundër korrupsionit me ndërtimet në Brezovicë.

Këtë për Klankosova.tv e ka konfirmuar edhe kryeprokurori i Prokurorisë Themelore të Ferizajt, Shukri Jashari.

Jashari bëri të ditur se aksioni është në fazën e parë të zhvillimit dhe deri tani janë bastisur tetë lokacione, njofton Klankosova.tv.

“Aksioni është në fazën e parë të zhvillimit dhe ka të bëjë për keqpërdorim të detyrës zyrtare, pra ryshfet. Deri tani nuk ka të arrestuar pasi jemi në fazën e parë. Por, bastisjet janë duke vazhduar, deri tani janë bastisur tetë lokacione”, deklaroi Jashari.

Kujtojmë se aksioni që është duke u zhvilluar dyshohet se ka të bëjë me veprat penale të korrupsionit me ndërtimet pa leje në Brezovicë.

Deputetja e Parlamentit Evropian, Viola von Cramon, ka shpërndarë një tabelë me numrin e votuesve të regjistruar në disa vendbanime me shumicë shqiptare në Serbi, duke pyetur se si mund t’u hiqen qytetarëve të drejtat e tyre themelore.

“Pasivizimi i shtetësisë serbe vazhdon, siç e shfaq qartazi kjo tabelë. Kjo ndodh në rajonin e banuar kryesisht me shqiptarë në jug të Serbisë. Si dhe pse mund t’u hiqen qytetarëve të rëndomtë të drejtat e tyre themelore”, shkroi Von Cramon në llogarinë e saj në Twitter.

Ajo këto fjali i përcolli me një postim të një përdoruese tjetër të rrjetit social, të quajtur Flora Ferati-Sachsenmaier, e cila ka publikuar një tabelë ku paraqitet zvogëlimi i numrit të votuesve të regjistruar në Serbi në krahasimin mes viteve 2012 e 2019 në vendbanimet: Gjylekreshtë, Kapit, Tupallë, Sijarinë, Sfircë, Rama Banjë, Stara Banjë dhe Gërbac.

Mediat gjermane i kushtojnë vëmendje planeve të Danimarkës për të zhvendosur refugjatët që mbahen në burgim para dëbimit në Kosovë.
Kritikët shohin në këto plane një minim të rregulloreve të azilit në BE.
Janë disa media gjermane që i kanë kushtuar vëmendje planeve të Danimarkës për të dërguar në Kosovë refugjatët që mbahen në burgim para dëbimit. Planet e qeverisë daneze kanë ndezuar debat të madh edhe në Danimarkë.

Gazeta “Süddeutsche Zeitung” në një artikull të saj thekson se Danimarka planifikon të dërgojë në Kosovë një pjesë të refugjatëve të burgosurve para dëbimit për të ulur presionin në burgjet daneze.
Sipas ministrit danez të Drejtësisë, Nick Haekkerop ky vend do të marrë në përdorim 300 qeli burgu për të burgosur para dëbimit.
Nga Kosova ka pasur një konfirmim, sipas radios daneze, DR. Sipas gazetës gjermane planet janë të tilla: Danimarka do të marrë me qira për 10 vjet qelitë, kurse Kosova do të marrë si shpërblim 210 milionë euro nga Danimarka.

“Rregulla daneze”
Nga Danimarka theksohet, se në burgun në Kosovë do të vlejnë “rregulla daneze”.

Ministri i Drejtësisë, Haekkerup ka siguruar se “duhet ta përfytyroni, si në një burg danez, por në vend tjetër”, citon Süddeutsche Zeitung.
Por planet e Danimarkës që ka negociuar në fshehtësi për një 1 vit me Kosovën, sipas “Süddeutsche Zeitung” kritikohen ashpër nga aktivistët për të drejtat e njeriut. Shkak janë kushtet e këqija në burgjet e Kosovës, ku “Komiteti kundër Torturës i Këshillit të Europës, CPT në vitin 2020 dokumentoi akuza për korrupsion dhe keqtrajtim. Ata pyesin, se si shteti në Danimarkë do t’u garantojë të afërmve sipas ligjit danez një vizitë në javë.

Organizon shërbimi i burgjeve pastaj fluturime në Kosovë që fëmijët të shohin prindërit e tyre?’ ka pyetur kreu i Borns Vilkär, Shoqatës për Mbrojtjen e Fëmijëve Rasmus Kjedhal’”, shkruan Süddeutsche Zeitung. Kurse sipas radios gjermane, “Deutschland Funk” planifikohet që Danimarka të marrë përsipër një burg me 326 vende në Gjilan.”

Përkeqësim për burgjet kosovare?

Edhe gazeta gjermanishtfolëse zvicerane, “Neue Zürcher Zeitung” i kushton vëmendje akomodimit të refugjatëve të burgosur nga Danimarka në Kosovë. Planet e qeverisë daneze janë bërë të ditura në kuadër të një pakete reformash për lehtësimin e burgjeve daneze.

Sipas NZZ, ndryshe nga marrëveshja me Uashingtonin për pranimin e refugjatëve afganë në Prishtinë e Shqipëri, që ishte gjest humanitar, marrëveshja me Danimarkën është biznes.

“Kosova mund t’i përdorë mirë të ardhurat që lidhen me këtë, sidomos në kohët e pandemisë”, shkruan NZZ.

Por ka zëra të vëzhguesve politikë në Kosovë, që thonë, se Prishtina me gjasë ka marrë edhe mbështetjen e Kopenhagës për liberalizimin e vizave, sipas NZZ.

Shqetësim mbetet edhe se çfarë efekti do të ketë një marrëveshje e tillë në burgjet e vetë Kosovës. “Driat Cerabregu nga Qendra e Kosovës për Rehabilitimin e Viktimave të Torturës përmend, se në Gjilan aktualisht ndodhen 200 të burgosur. Zhvendosja e tyre në burgje të tjera do të çojë pashmangshëm në një mbingarkesë dhe përkeqësim të kushteve të burgimit”, shkruan NZZ.

Por me sa duket marrëveshja është gati. Sipas mediave konfirmimin e ka bërë edhe ministrja e Drejtësisë e Kosovës, Albulena Haxhiu.

Madje NZZ shkruan se një marrëveshje e tillë pritet të nënshkruhet të hënën në prani të ministrit Haekkerup në Prishtinë. /DW

Ministria e Shëndetësisë, sipas të dhënave nga Instituti Kombëtar i Shëndetësisë Publike të Kosovës, informon se në total numri i rasteve aktive me coronavirus është 311.

Numri i përgjithshëm i të shëruarve është 157.965, ndërkaq nga fillimi i pandemisë nga coronavirusi kanë vdekur 2,988 persona.

Në 24 orët e fundit janë dhënë 310 doza të vaksinës kundër COVID-19.

Prej fillimit të vaksinimit në të gjitha qytetet e Kosovës janë dhënë 1.654.843 doza të vaksinës.

Deri më sot 776.881 qytetarë janë vaksinuar me dozën e dytë

Automjetet dhe pajisjet ushtarake, duke përfshirë transportuesit e personelit të blinduar (BTR), do të hyjnë në Kosovë nga kufiri i Maqedonisë Veriore dhe nga Fushë Kosova gjatë rrugës për në kampin Novo Selo midis 21-26 dhjetor 2021.

Në një njoftim për media të KFOR-it, thuhet se lëvizja logjistike e këtyre automjeteve dhe pajisjeve është pjesë e paravendosjes së aseteve të Forcave Rezervë Operative të Forcës së Kosovës.

Gjatë vitit të ardhshëm eshaloni i parë i njësive rezervë do të sigurohet nga Hungaria duke siguruar një gatishmëri shumë të lartë për KFOR-in që do të ruajë një mjedis të sigurt dhe lirinë e lëvizjes në Kosovë.

Shoferë ushtarakë me përvojë nga Batalioni i Rezervës Operacionale hungareze do të drejtojnë automjetet dhe të gjitha lëvizjet do të bëhen me çdo masë paraprake për të pakësuar ndikimin në trafikun publik, thuhet në njoftim.

KFOR-i kërkon nga popullata që t’u afrohet autokolonave me kujdesin e duhur dhe respektimin e rregullave të komunikacionit.

Madhësia dhe shpejtësia e autokolonës, si dhe gjatësia dhe mënyra e udhëtimit, janë të ndryshme nga ato që përdoren në transportin e përditshëm rrugor. Në pjesën e përparme dhe të pasme të kolonës do të ketë mjete që drejtohen nga Policia Ushtarake. Të gjitha lëvizjet miratohen, koordinohen dhe mbështeten nga të gjitha autoritetet lokale dhe kombëtare të aplikueshme, përfundon njoftimi. /Telegrafi/

Qytetarët e Kosovës që udhëtojnë nëpër shtete të ndryshme evropiane thonë se po hasin shpesh në probleme me njohjen e certifikatës së vaksinimit të lëshuar nga institucionet e Kosovës.

Eljon Kollçaku thotë se gjatë udhëtimit të tij në Zvicër nuk iu njoh certifikata e vaksinimit e lëshuar nga institucionet e Kosovës.

“Më ka rastisur në Zvicër që në momentin që kam dashur të futem në restorane apo lokale, më ka nxjerrë problem dhe nuk më kanë lejuar të futem brenda pasi që nuk pranohet QR kodi që kanë vaksinat e Kosovës”, deklaroi për RTV Dukagjinin, Eljon Kollçaku.

Përvojë të ngjashme të hidhur ka pasur edhe një qytetarë tjetër që kishte udhëtuar jashtë vendit.

Ajo nuk ka dashur të identifikohet para kamerës, thotë se në Gjermani i është lejuar të futet në vende publike vetëm me mirëkuptim, përcjell Telegrafi.

Në Ministrinë e Shëndetësisë thonë se shtetet në mënyrë individuale pranojnë apo jo certifikatat e vaksinimit të lëshuara nga Kosova.

“Jemi në fazën kur QR kodi i vaksinave duhet të bëhet i lexueshëm edhe kur jemi offline pa pasur nevojën e internetit. Aktualisht kodi është i lexueshëm vetëm kur ka internet. Çështja ka të bëjë vetëm në aspektin teknik”.

Kodi QR ofron informacione për llojin e vaksinës, vendi ku është kryer vaksina dhe sa doza janë kryer./Telegrafi/

Ministria e Punëve të Brendshme ka njoftuar për gjendjen nëpër pikat kufitare të vendit.

Sipas infografikës së publikuar, pritjet nëpër pikat kufitare janë 3 deri në pesë minuta.

Përveç Merdares, nëpër pikat e tjera kufitare s’ka kolona. Sipas njoftimit, në këtë pikë kolona është 20 metra në hyrje, por që pritjet për të hyrë edhe këtu zgjasin 3-5 minuta.

Edhe rrugët që shpiejnë në pikat e kalimit kufitar thuhet se janë të kalueshme.