Një video nga Prizreni i vitit 1971 po qarkulllon nëpër rrjete sociale. Përmes këtyre pamjeve, tregohet se si ka qenë qyteti para 50 vitesh, raporton Express.
Ajo që bie më shumë në sy në këtë video është veshja e banorëve. Të gjitha gratë kanë të vendosura shami, derisa burrat enden rrugëve me plisa.Në këtë video shihen edhe monumentet e famshme të këtij qyteti, siç janë: shadërvani, ura e gurit, si dhe xhamitë.
📍Prizren 1971 pic.twitter.com/cx1JxKb8Rc
— Nida (@nidakukovca1) November 15, 2021
Përmes një postimi në facebook, “Ec ma ndryshe” ka njoftuar se punimet në projektin e Komunës së Prizrenit për “Regjenerimin Urban të brigjeve të lumit Lumbardh” në Qendrën Historike të Prizrenit, kanë filluar pa pëlqimin e organeve të trashëgimisë kulturore. Për këtë arsye, sipas informatave që ka pranuar EC Ma Ndryshe, këto punime janë ndaluar nga Inspektorati për Trashëgiminë Kulturore të MKRS-së.
Sipas njoftimit të publikuar në rrjetet sociale në faqen e kryetarit të Komunës së Prizrenit, Mytaher Haskuka, punimet në këtë projekt janë vizituar më 6 nëntor, në prag të balotazhit, në të cilën ngjarje ka qenë i ftuar edhe ministri i MKRS-së Hajrulla Çeku.
Por këtë javë, zyrtarët e MKRS-së, kanë konfirmuar për EC-in, se për këtë projekt nuk është lëshuar pëlqimi nga organet e trashëgimisë kulturore që janë nën vartësi të kësaj ministrie.
Komuna e Prizrenit përmes DUPH-së me 1 qershor 2021 ka parashtruar kërkesën për dhënien e pëlqimit për projektin “Regjenerimi Urban për brigjet e lumit Lumbardh”. Ndërsa më 28 qershor 2021, QRTK-ja në Prizren ia ka përcjellë DUPH-së rekomandimin e Komisionit për shqyrtimin dhe vlerësimin e kërkesave dhe projekteve konservuese, restauruese të trashëgimisë kulturore – QHP, i cili Komision ka kthyer lëndën për korrigjim dhe plotësim.
Ndërsa më datë 3 gusht 2021, DUPH-ja merr aktvendim me të cilin i lejohet DUPH-së zhvillimi i punimeve për projektin “Regjenerimi Urban për brigjet e lumit Lumbardh”.
Me datë 12 gusht 2021, QRTK në Prizren ka parashtruar ankesë në MMPHI te Komisioni i shkallës së dytë kundër vendimi të DUPH-së të datës 3 gusht 2021, me pretendimin se në këtë lëndë ka shkelje esenciale të dispozitave të procedurës administrative dhe zbatim të gabuar të drejtës materiale.
Sipas një përgjigjeje zyrtare të MKRS-së, kjo ankesë e QRTK-së ende nuk është trajtuar. “Në përputhje me dispozitat ligjore në fuqi (respektivisht neni 18, i Ligjit për Qendrën Historike), Ministria e Mjedisit dhe Planifikimit Hapësinor, ka përcjellë ankesën në fjalë në Ministrinë e Kulturës, Rinisë dhe Sportit dhe në Këshillin e Kosovës për Trashëgimi Kulturore. Me qëllim të trajtimit të ankesës, nga MKRS është deleguar një zyrtar ligjor. Kjo informatë është dërguar në MMPHI, dhe kërkohet që në bashkëpunim me zyrtarët nga KKTK dhe MMHPI, të trajtohet më tutje ankesa e parashtruar. Pas trajtimit të kësaj ankese nga institucionet përkatëse, dhe në bazë të dispozitave ligjore në fuqi, do të kërkohet ndërmarrja e hapave në përputhje me vendimin e dalur nga ankesa e shqyrtuar. Ne do të angazhohemi që kjo çështje të trajtohet me prioritet, dhe të sigurohet zbatimi i ligjeve në fuqi”.
EC Ma Ndryshe përkujton se sipas legjislacionit në fuqi për cdo ndërhyrje në infrastrukturën e Qendrës Historike të Prizrenit nevojitet pëlqimi i QRTK-së, dhe se ky nuk është rasti i vetëm që organet komunale gjatë këtij mandati kanë iniciuar punime në këtë zonë të mbrojtur pa pëlqimin e këtij organi të trashëgimisë kulturore. Pos kësaj fillimi i punimeve në këtë projekt, në kohë fushate, pa pëlqimin e duhur të organit të trashëgimisë kulturore përbën edhe veprim jo-etik të zyrtarëve institucionalë.
Lidhur me këtë projekt, EC Ma Ndryshe ka reaguar edhe më parë, me thirrjen që projektet e tilla në qendrën historike të Prizrenit të realizohen sipas legjislacionit (linku: https://www.facebook.com/207817452665864/posts/4520244568089776/) dhe se projekti konkret ka qenë jo-transparent, pa konkurs publik dhe pa pjesëmarrje qytetare (linku: https://www.facebook.com/ecmandryshe/posts/4086356651478572/.
Prandaj, EC Ma Ndryshe përmes këtij reagimi i bën thirrje të gjitha institucioneve relevante që në raport me këtë projekt të ndërmarrin masa për respektimin e ligjshmërisë në Qendrën Historike të Prizrenit, dhe që në të ardhmen projektet e tilla të realizohen me transparencë të plotë, me konkurs publik dhe me pjesëmarrje të qytetarëve, thuhet në këtë njoftim.
Në 24 orët e fundit janë dhënë 2.025 doza të vaksinës kundër COVID-19.Prej fillimit të vaksinimit në të gjitha qytetet e Kosovës janë dhënë 1.599.372 doza të vaksinës.Deri më sot 752.365 qytetarë janë vaksinuar me dozën e dytë.Nga 1.544 testime, 17 qytetarë kanë rezultuar pozitiv me virusin COVID-19.Gjatë 24 orëve të fundit, nuk është shënuar asnjë rast i vdekjes.Sot janë shëruar 19 qytetarë, derisa numri i përgjithshëm i të shëruarve është 157.589.Në total numri i rasteve aktive është 405.
Të dhënat e detajuara mund të i gjeni në linkun:
Pas hulumtimit të KALLXO.com, Prokuroria e Prizrenit ka nisur hetimet lidhur me një kontratë të nënshkruar nga ana e Komunës së Prizrenit për blerjen e disa ulëseve të parkut dhe shtyllave të ndriçimit me çmim më të lartë.
Këtë e ka konfirmuar zëdhënësja e prokurorisë, Fitore Mehmeti- Sejrani.
“Veprimet hetimore lidhur me këtë rast, Prokuroria e Prizrenit zyrtarisht i ka filluar me 14 janar 2021, ndërsa hetimet kanë filluar qysh në qershor të vitit 2020”, shtoi ajo.
Duke mos dhënë detaje të tjera për rastin në fjalë, prokuroria ka shtuar se për rrjedhën e mëtutjeshme do të njoftojnë me kohë.
Siç mëson KALLXO.com, dy zyrtarët e lartë janë duke u hetuar lidhur me veprën penale keqpërdorimi i detyrës apo autoritetit zyrtar dhe tashmë hetimet janë në fazën përfundimtare.
Më 12 qershor 2020, hulumtimi i “Drejtësia në Kosovë” shpërfaqi detaje të zbatimit të kontratës dhe tejkalimin e blerjeve të produkteve me çmim më të lartë, ndërsa produktet që kishin çmimet më të lira janë blerë më pak, për të mos thënë fare.
Në emisionin e “Drejtësia në Kosovë” ishte transmetuar hulumtimi mbi dyshimet për keqpërdorim të buxhetit në Komunën e Prizrenit.
Një kontratë e Komunës së Prizrenit me çmim 289 mijë e 124 euro ka qenë pjesë e analizës së përmbajtjes dhe implementimit të saj në terren nga ana e ekipit të “Drejtësia në Kosovë”.
Komuna e Prizrenit që nga viti 2018 ka planifikuar që të rregulloj mini-parqe në qytet dhe të vendos ulëse çeliku, kosha për mbeturina e ndriçim publik.
Në një tender mbi 280 mijë euro me shumë detaje dhe shumë produkte, karakteristikë kanë qenë dallimet në çmimet e produkteve të cilat në dukje janë të njëjta.
Kjo kontratë sipas datave do të përfundoj në dhjetor të vitit të ardhshëm, ndërsa deri më tash janë implementuar katër faza, dhe faza e pestë ende nuk është zbatuar për shkak të pandemisë COVID-19.Hulumtimi i sotëm solli detaje të zbatimit të kontratës dhe tejkalim të blerjeve të produkteve me çmim më të lartë ndërsa produktet që kishin çmimet e lira janë blerë pak, për të mos thënë fare.
Ekipi i “Drejtësia në Kosovë” kishte kërkuar të gjitha faturat dhe porositë e Komunës së Prizrenit për produktet e blera dhe të vendosura në lokacionet e caktuara si mini-parqe.
Në kontratë thuhet se një ulëse parku kushton 995 euro, ndërsa Komuna planifikon t`i blejë 60 copë apo në total do të shpenzon 59 mijë e 700 euro për këtë produkt, që është edhe produkti më i shtrenjtë i kësaj kontrate.
Ulëse nga çeliku i galvanizuar, dhe i ngjyrosur me ngjyrë elektrostatike e pjekur në furrë, skeleti mbështillet me 15 profile, janë disa nga specifikat të këtij produkti.
Mirëpo një produkt të ngjashëm për nga pamja dhe për nga karakteristikat dhe specifikimet e produktit, është paguar shumë herë më lirë nga Komuna e Prizrenit.
Ulëse parku model i njëjtë me atë si më lartë në specifikimet e dosjes së tenderi kjo ulëse është përbërë nga skeleti me formë anatomike i mbështjella me 25 profile nga tubi i rrumbullakët prej çeliku me lyerje elektrostatike dhe e pjekur në furrë pa dorezë sipas komunës do të kushtonte 11 euro ndërsa ishin kontraktuar për të blerë 70 të tilla.
Në emisionin e sotëm zbuluam se Komuna e Prizrenit në bazë të faturave që i ka prezantuar ekipit të DNK-së ka tejkaluar blerjen e ulëse të cilat kanë kushtuar 995 euro.
Sipas kontratës Komuna e Prizrenit kishte paraparë të blinte 60 copë ulëse të 995 eurove, ndërsa sipas faturave ka blerë 18 më shumë ulëse të njëjta. Pra për 18 ulëse më shumë se sa ishin paraparë në kontratë Komuna e Prizrenit ka paguar 17 mijë e 910 euro më shumë.
Në anën tjetër ishin paraparë që të bliheshin 70 ulëse të 11 eurove, ndërsa komuna sipas faturave ka blerë vetëm 20 të tilla.
Porosi me çmim më të lartë e me numër më të madh blerjesh janë parë edhe te ulëset e drurit.
Edhe ulëset e drurit kanë çmime të ndryshme, ndërsa dallimet e produkteve janë shumë të vogla.
Ulëse nga druri sipas specifikimeve është produkt i përbërë nga druri bungut, dhe ka bazë të aluminit, me vida inoxi dhe me lyerje elektrostatike e pjekur në furrë.
Një ulëse me doreza sipas kontratës ka kushtuar 4 euro e 50 cent, ndërsa pa doreza 450 euro.
Hulumtimi zbardhi se edhe në këtë rast Komuna e Prizrenit kishte tejkaluar blerjen e ulëseve të drurit me çmim më të lartë. Në këtë rast ishin paraparë të blihen 50 ulëse druri me çmim 450 euro, e në fund i kanë blerë 65 të tilla me çmim të njëjtë.
Pra edhe në këtë rast Komuna e Prizrenit ka tejkaluar sasinë e blerjeve të cilat kanë qenë në kontratë, ndërsa për ulëse të çmimit 11 euro i kanë blerë vetëm 20 të tilla.
Në lidhje me çmimet e larta dhe dallimet në këto çmime për produktet të cilat 90 janë të njëjta Drejtësia në Kosovë kishte kërkuar sqarime edhe nga drejtori i Shërbimeve Publike, Levent Kasemi.
“Ju lusim që për të gjitha detajet në lidhje me produktet dhe çmimet e tyre të kontaktoni me Operatorin Ekonomik fitues për shkak se ne si Komunë nuk kemi informata dhe obligim për të marr informata mbi çështjet afariste të Operatorëve”, ishte përgjigja e tij për këtë çështje.
Kompania “NABS” në disa sqarime të kërkuara nga Drejtësia në Kosovë kishte thënë se çmimet janë përcaktuar nga tregu.
“Në bazë të relacioneve tona kontraktuese me furnitorët, në shumë raste produktet të cilat janë të prodhuara në sasi të mëdha na ofrohen me zbritje, qoftë për shkak të tepricës së prodhimit ose rabateve tjera që i pranojmë ne në kuadër të afarizmit tonë. Normalisht, edhe ne në kuadër të politikave të kompanisë tonë, në disa raste fitojmë më shumë në produkte, në disa raste veprojmë me çmime më të ulëta dhe marzhe minimale për të qenë konkurrues në treg. Në çdo rast, klientët tanë, qofshin autoritete kontraktuese ose klient të rregullt afarist, produktet i kanë në dispozicion për blerje sipas çmimeve të vendosura nga kompania jonë dhe politikave tona afariste”, thuhet në përgjigjet e Kompanisë “NABS”.
Gjithashtu të njëjtit të pyetur në lidhje me dorezat e ulëseve të cilat janë i vetmi dallim në pamje te ato me çmim 995 euro, kanë thënë se nuk e di çmimin real të tyre.
“Ne e kemi të pamundur të përgjigjem për dorëzat anësore të ulëseve për shkak se ulëset ne i importojmë si tërësi dhe jo me pjesë. Sipas specifikave të tenderit, ne kemi ofertuar për të dy llojet e ulëseve, të dyja i kemi në dispozicion me çmimet e ofertuar dhe të dyja i kemi ofruar sa here janë kërkuar nga autoriteti kontraktues”, thuhej tutje në përgjigje.
Kryetari i Komunës së Prizrenit, Mytaher Haskuka nuk di shumë rreth përmbajtjes apo çmimeve të cilat kanë qenë në kontratë të cilën e ka nënshkruar vetë.
“Nuk e di, si të them, në këtë aspekt se di sa operator ekonomik kanë aplikuar. Edhe në raste të tjera janë parashtruar pyetje se pse ky çmim. OE japin çmimet e tyre. Nuk mundem me paragjyku se çfarë matematike kanë pasur por kam kërkuar që të gjitha të blihen dhe normal me siguri janë marrë të gjitha dhe të gjitha produktet janë dorëzuar komunës edhe ato me çmim të lartë edhe ato më çmim të ulët”, kishte thënë kryetari Haskuka.
Hulumtimi i Drejtësia në Kosovë zbuloi edhe se dallime në çmime dhe blerje të produkteve me çmim të lartë kishte edhe për shtyllat e ndriçimit.
Një shtyllë e ndriçimit me dukje dekorative antike dhe llambë LED komunës i ka kushtuar 900 Euro, dhe për 50 copë Komuna do të shpenzon 54 mijë euro.
Ndërsa i njëjti produkt, pra shtyllë e ndriçimit me dukje dekorative antike, por me ‘solar sistem’ dhe llambë LED, sipas kontratës do të kushtonte vetëm 11 euro, apo për 62 copë do të paguheshin 660 euro.
Te shtyllat pa sistem solar të cilat kushtonin 900 euro, sipas hulumtimit të Drejtësia në Kosovë, Komuna e Prizrenit ka paguar 15 copë më shumë se sa kishte paraparë në kontratë, ndërsa këto të tjerat me sistem solar nuk janë blerë ende asnjë.
Dallim i çmimeve në produkte është te shtyllat e ndriçimit me dukje moderne, përderisa shtyllat me llambë LED do të kushtojnë 900 euro në total 54 mijë euro për 60 copë, të njëjtat shtylla me ‘solar sistem’ dhe llampë LED do të kushtojnë vetëm 11 euro, apo për 60 copë do të paguhen 660 euro.
Kryetari Haskuka kur ishte pyetur nëse i duket e arsyeshme një dallim qindra euro mes dy produkteve të njëjta sërish nuk pati përgjigje të saktë.
“Unë nuk mund të jap përgjigje për ofertën e tregut që bëhet nuk mund të dijë logjikën e operatorëve në Kosovë. Ne kemi probleme të mëdha me Ligjin për Prokurim, proceset e prokurimit zgjasin minimum 4-5 muaj për shkak të mungesës së afateve ligjore për ankesa. Nuk kam asnjë përgjigje në lidhje më këtë sepse nuk është përgjegjësi imja”, kishte thënë Haskuka.
Krejt në fund, sipas llogaritjeve të ekipit të Drejtësia në Kosovë, në një kontratë e cila kishte vlerën e 289 mijë eurove, ishin paraparë të bliheshin 340 ulëse gjithsej.
Nga kjo sasi janë blerë vetëm 183 ulëse, gjë që i ka kushtuar Komunës së Prizrenit 20 mijë euro më shtrenjtë.
Te shtyllat e ndriçimit, kanë qenë të parapara të blihen gjithsej 230 shtylla të katër llojeve të ndryshme por që janë blerë 143, edhe ato janë realizuar blerjet vetëm për produktet e shtrenjta.
Sindikata e Bashkuar e Arsimit, Shkencës dhe Kulturës (SBASHK) ka paralajmëruar përshkallëzim të masave sindikale pas datës 4 dhjetor nëse Qeveria e Kosovës dhe deputetët e Kuvendit të Kosovës vazhdojnë injorimin e kërkesës së tyre për përfshirjen e kostos së Ligjit të Pagave në Ligjin për Buxhet të vitit të ardhshëm.
Koordinatori i SBAShK-ut, Ymer Ymeri ka thënë për Telegrafin se kanë kërkuar takime me anëtarët e Komisionit për Buxhet e Financa si dhe me shefat e Grupeve Parlamentare të partive politike, por nga asnjëra palë nuk kanë marrë përgjigje.
“Ne i jemi drejtuar edhe Komisionit për Buxhet edhe Financa për takim para se të miratohet Projektligji për Buxhetin, e ata sot e kanë miratuar, neve nuk na kanë takuar, po ashtu ju kemi bërë shkresë edhe shefave të Grupeve Parlamentare që edhe me ta të bisedojmë, që të bëjmë plotësim-ndryshim të Projektligjit të Buxhetit 2022, që të përfshihet edhe kostoja e Ligjit të Pagave por nuk kemi takime”, tha Ymeri.
Ai tutje shtoi se paralajmërimi i një greve të përgjithshme që është bërë për në muajin janar të vitit të ardhshëm, mund të bëhet në dhjetor nëse institucionet vazhdojnë t’i injorojnë.
“Paralajmërimi për datën 4 dhjetor që e kemi bërë qëndron, dhe nëse injorohemi tërësisht atëherë paralajmërimi për grevën e përgjithshme mund të kaloj nga janari që është planifikuar për në dhjetor. Menjëherë pas 4 dhjetorit të fillojmë me përshkallëzim të grevës nëse injorohen kërkesat”, tha koordinatori i SBASHK-ut, Ymer Ymeri.
Të njëjtën kërkesë e kanë edhe nga Federata e Sindikatave të Shëndetësisë së Kosovës.
Federata e Sindikatave të Shëndetësisë së Kosovës të enjten do të marrë vendim rreth mbajtjes së grevës e mund të ketë edhe masa më radikale, nëse deri atëherë nuk marrin përgjigje nga Qeveria e Kosovës.
Kryetari i FSSHK-së, Blerim Syla në një deklaratë për Telegrafin ka thënë se do të dërgojnë edhe njëherë kërkesë Qeverisë për t’i përfshirë në proces të hartimit të Projektligjit për Paga.
Sindikatat e Shëndetësisë paralajmërojnë grevë e masa radikale, Qeveria nuk po u përgjigjet kërkesave të tyre
Syla tha se të enjten Këshilli Drejtues i FSSHK-së do të paralajmërojë grevën, nëse Qeveria vazhdon ta injorojë kërkesën e tyre.
“Para ditës së enjte ne do të dërgojmë edhe njëherë kërkesën Qeverisë së Kosovës, pasi të enjten e kemi mbledhjen e Këshillit Drejtues në nivel nacional edhe faktikisht e paralajmëron grevën, nëse Qeveria nuk reflekton”, tha Syla për Telegrafin.
Sipas Sylës, greva mund të nis me një ditë, por ai tha se ka mundësi që të ketë masa më radikale.
“Nëse nuk ka përgjigje të Qeverisë atëherë shkojmë në veprime sindikale, se çfarë do të jenë ato shohim, mund të fillojë një ditë total, kuptohet përveç urgjencës kuptohet. Pastaj mund të shkojmë edhe në masa më radikale”, theksoi Syla.
Ndërkaq, rreth dy javë më parë Qeveria ka miratuar Projektligjin e Buxhetit për vitin 2022, ku kostoja për Ligjin e Pagave nuk është e përfshirë.
Kurse ky Projektligj sot ka marrë dritën e gjelbër nga Komisioni për Buxhet dhe Financa.
Ministri i Financave, Punës dhe Transfereve, Hekuran Murati ka prezantuar para deputeteve Projektbuxhetin për vitin 2022, i cili parashihet të jetë mbi 2.7 miliardë euro. /Telegrafi/
Ndonëse pati kritika dhe kundërshtime nga deputetët e opozitës, Komisioni për Buxhet, Punë dhe Transfere më shumicë votash të mërkurën ka miratuar në lexim të parë projektbuxhetin për vitin 2022.
Ministri i Financave, Punës dhe Transfereve, Hekuran Murati gjatë prezantimit të projektbuxhetit për 2022, i cili parashihet të jetë 2. 7 miliardë 748 milionë euro, ka treguar për mënyrën e mbushjes dhe ndarjes së buxhetit.
Derisa ka thënë se përveç rritjes së buxhetit për disa dikastere, është paraparë vazhdimi i programit të Ringjalljes Ekonomike meqenëse ekonomia e vendit ende ka nevojë për mbështetje.
“Projektligji i buxhetit për vitin 2022 parash një buxhet të përgjithshëm në vlerën prej 2 miliardë e 748 milionë euro si shpenzime, kurse projeksioni për të hyrat është 2 miliardë e 364 milionë, ku shumica janë të hyra tatimore 2 miliardë e 103 milionë… Sa i përket deficitit dhe borxhit publik kemi një ngadalësim të ritmit për sa i përket deficitit… Sa i përket risive që parashihen me këtë projektligj, përveç rritjes pothuajse në të gjitha kategoritë për shumicën e dikastereve qeveritare, ka edhe disa risi të tjera është paraparë vazhdimi i Programit të Ringjalljes Ekonomike, meqenëse konsiderojmë që ekonomia e vendit ende ka nevojë për mbështetje”, theksoi Murati.
Në anën tjetër opozita ka pasur kritika për projektbuxhetin 2022, për çka kanë thënë se nuk është zhvillimor. Nënkryetari i Komisionit, Mërgim Lushtaku ka pasur vërejtje për projektbuxhetin, të cilin e quajti jo zhvillimor dhe pa vizion.
Deputeti Lushtaku po ashtu ngriti edhe çështjen e rritjes së borxhit publik dhe manipulimi siç tha ai me shifra për rritje ekonomike.
“Një projektbuxhet pa vizion e me borxhe të larta publike nuk garanton zhvillim, ministër për më shumë do të jep dëshpërim për fatin e keq të gjithëve. Si opozitë do të abstenojmë për me vazhduar tutje në mes dy leximeve ku do të japim kontributin tonë”, theksoi Lushtaku.
Deputeti Avdullah Hoti nga LDK-ja ngriti çështjen e shkurtimit të buxhetit për Ministrinë e Shëndetësisë, dhe ka pyetur ministrin Murati se a është buxhetuar Ligji për pagat.
“Tek pagat në sektorin publik, cili është projeksioni dhe kur pritni që të miratohet Ligji I pagave, edhe a është buxhetuar rritja e pagave që buron nga ky ligj… Tek ndërmarrjet publike ka pasur nga ana juaj akuza bukur të rënda vazhdimisht për rrjedhje financiare, tash i keni ndal ato rrjedhje apo? I keni ndërruar krejt bordet dhe tash i keni nën kontroll të plotë. Tash kemi prapë një 12 milionë euro subvencione për NP-të. Jeni para për ndërmarrje publike… E keni shkurtuar buxhetin për RTK-në rreth 2 milionë euro. Cili është plan nga do të kompensohet këtë 2 milionë? Dhe nëse e zvogëlojmë këtë ne praktikisht e falimentojmë mediumin publik”, pyet Hoti.
Për këtë ai mori përgjigje nga ministri Murati, se nëse miratohet ky ligj do të mbulojnë me anë të mjeteve nga siç tha ai kontigjenca me 55 milionë euro.
“Sa i përket Ligjit të Pagave, është një kontigjencë që e parasheh, në rast se ka miratim të ligjeve të reja, që mund të kenë kosto buxhetore, kemi paraparë një kontigjencë. Sa i përket suprimimeve nëpër Ministri, por nëse thoni 56 milionë euro shkurtim në buxhetin e Ministrisë së Shëndetësisë, ju siguroj që është gabim, për shkak se diku 60 milionë euro është I tërë buxheti I Ministrisë së Shëndetësisë”, tha Murati.
Derisa Murati për shkurtimin e buxhetit të RTK-së tha se rreth 100 punonjës në këtë medium publik marrin paga më shumë se paga e një ministri. Një buxhet i tillë për RTK, ai tha se është i mjaftueshëm.
“Ndoshta edhe e dini që në RTK janë rreth 100 paga të cilat janë më të larta se paga e një ministri. Kemi kursime rreth 2 milionë euro nga AKP nga ulja e pagave, që e kemi shfrytëzuar për rekrutime në FSK nga AKP. E njëjta gjë mund të bëhet edhe nga RTK. Nëse RTK i ka 100 persona që marrin me shumë se paga e ministrit, kjo për mua nuk është në rregull. Konsideroj që një buxhet i tillë është më se i mjaftueshëm për RTK-në duke marrë parasysh nivelin e pagave që kemi në vend”, tha ai.
Deputeti Pal Lekaj nga AAK kritikoi ministrin Murati për mos përfshirjen e Ligjit të pagave dhe shkurtimin e buxhetit disa dikastere siç tha ai me rëndësi.
Deputeti Lekaj po ashtu shprehi dyshimin e tij për keqpërdorimin e fondit nga kontigjenca prej 50 milionë euro, i cili nuk përjashtoi mundësinë që viti 2022 të jetë vit zgjedhor.
Derisa plasën të qeshurat nga anëtarë e Komisionit për konstatimin e Lekajt për zgjedhjet.
“Më bëri përshtypja çështja për kontigjencën prej 50 milionë euro që me mbetur si rezervë. Ne praktikat e deritashme nuk kemi pasur diçka të tillë. Unë pajtoj për me mbetur një shumë në kuptimin që ndoshta dikush ka shpenzime më të mëdha, dikush më pak, dhe për mos me mbetur në suficit mirë keni menduar. Por, me ligj në praktikë nuk është kjo, sepse mund ta keqpërdorni. Edhe pse ndoshta nuk do të jetë vit zgjedhor, por nëse ka vit zgjedhor kjo mund të keqpërdoret. Nëse, s’e nuk i dihet. Nëse ka, por nuk e di, nuk po e themi as për shaka. Kjo është diçka që ia vlen të diskutohet në thelb”, tha Lekaj./KSP
Ministri i Mbrojtjes, Armend Mehaj ka bërë të ditur se ekipit të tij të këshilltarëve i është bashkuar edhe eksperti amerikan i radhës, këshilltari Joe Duncan.
Mehaj e emëroj atë këshilltar për Planifikim, Programim, Buxhetim dhe Ekzekutim.
Postimi i plotë:
Ekipit tim të këshilltarëve i bashkohet edhe eksperti amerikan i radhës, këshilltari Joe Duncan.
Duke i dëshiruar mirëseardhje, sot prita në takim, këshilltarin tim amerikan për Planifikim, Programim, Buxhetim dhe Ekzekutim, z. Joe Duncan.
Në procesin e reformës ligjore, administrative , organizative dhe funksionale të Ministrisë së Mbrojtjes, sikur edhe në fushat tjera, eksperienca amerikane është jetike për ne.
Mirënjohje e përjetshme për SHBA-në, respektivisht Zyren Amerikane për Bashkëpunimin e Mbrojtjes, përfaqësuar nga shefi i saj, major Ryan Conley, për mbështetjen e vazhdueshme në realizimin e qëllimeve tona strategjike dhe objektivave të mi operacional./FrontOnline
Fëmijët e klinikës së Pediatrisë në QKUK janë surprizuar sot nga “superheronjë” e tyre.
Alpinistë nga klubi Prishtina janë veshur si “superheronjë” të filmave të animuar, e janë lëshuar me litarë në dritaret e klinikës së Pediatrisë, kështu duke befasuar fëmijët. Këta të fundit me padurim përshëndesnin “superheronjtë” e tyre.
Kjo iniciativë e cila sot ka lumturuar fëmijët është ndërmarrë nga Organizata Care for Kosovo Kids dhe Klubi Alpin Prishtina.
Qëllimi i këtij aktiviteti, sipas organizatorëve është sensibilizimi dhe mbledhja e fondeve për nevojat e fëmijëve.
Arlind Sejdiut i ka mjaftuar gjysmë ore lojë për ta lënë shenjën e tij te Përfaqësuesja U21 e Kosovës. Sulmuesi i Lahtit të Finlandës, ka shënuar gol në debutim me fanellën e “Dardanëve” të rinj. Madje, me golin e tij, Sejdiu ia ka siguruar fitoren Kosovës ndaj Shqipërisë në ndeshjen kualifikuese për Kampionatin Evropian të vitit 2023. Kosova U21 e mposhti me rezultatin 2:1 Shqipërinë të martën mbrëma në stadiumin “Fadil Vokrri” në Prishtinë.
Sejdiu e shënoi golin e fitores në minutën e 91-të dhe e ndihmoi ekipin e përzgjedhësit Michael Nees që ta përmbyste rezultatin ndaj Shqipërinë. Ai në këtë ndeshje u inkuadrua në minutën e 62-të, në vend të Valmir Veliut. Sulmuesi Sejdiu, i cili tha se ka refuzuar ftesën e Përfaqësueses U20 të Finlandës për t’iu bashkuar Kosovës, u shpreh shumë i lumtur për triumfin ndaj Shqipërisë. Mbi të gjitha, Sejdiu i është gëzuar pamasë golit të shënuar, i cili doli të ishte i fitores për Kosovën. Madje, ai pranoi se ka pasur ndjenjën se nëse debuton te Kosova, do të shënojë gol, gjë që edhe e bëri. E golin, Sejdiu ua ka dedikuar “Dardanëve” dhe babait të tij, ëndrra e të cilit ishte ta shohë të birin duke luajtur me fanellën e Kosovës.
“Ndihem shumë mirë. Është një ndjenjë shumë e veçantë për mua që shënova gol në debutim me Kosovën. Mbi të gjitha, është shumë me rëndësi që me golin tim e siguruam edhe fitoren, e cila erdhi në fund të ndeshjes ndaj Shqipërisë”, ka thënë Sejdiu pas ndeshjes për KOHËN. “E kam pritur debutimin tim me padurim, por e kam pasur edhe ndjenjën se nëse më vjen rasti të luajë do të shënojë gol. Gjatë tërë kohës sa isha në fushë e kam pritur rastin tim dhe e shfrytëzova në momentin që e pata. Jam tepër i gëzuar si me golin ashtu edhe me fitoren. Pata shumë emocione në ndeshjen e parë dhe golin ua dedikoj ‘Dardanëve’ dhe babait tim, i cili e ka pasur ëndërr të më shohë të luaj për Kosovën dhe të shënoj gol”.
Për Kosovën, kjo ishte fitorja e parë pas tri humbjeve rresht në këto kualifikime dhe fitorja e dytë në total. Golin tjetër për Kosovën, e realizoi Erolind Krasniqi. Ai në minutën e 62-të, e barazoi rezultatin pasi Shqipëria kaloi në epërsi nëpërmjet Bernard Karricës në minutën e 58-të. Për Shqipërinë, kjo ishte humbja e dytë rresht në këto eliminatore dhe e treta në gjashtë ndeshje të luajtura. Pak ditë para Kosovës, Shqipëria pësoi edhe nga Sllovenia (3:0). Zë vendin e tretë në grup me nëntë pikë të mbledhura, tri më shumë se Kosova që renditet e parafundit dhe ka një ndeshje më pak të luajtur.
“Gjithsesi, kur u duk se sfida do të përfundonte në barazim në minutën e 91-të Kosova gjen golin e fitores me anë të Sejdiut”, shkroi Federata Shqiptare e Futbollit (FSHF) në sajtin zyrtar ndër të tjera, në raportin e ndeshjes.
Policia e Kosovës është e gatshme të jetë anëtarë e INTERPOL-it dhe i plotëson të gjitha kriteret e nevojshme por kërkesa për aplikim në INTERPOL varet nga Qeveria e Kosovës.
Kështu tha Besnik Sallahu, Drejtori i Drejtorisë për Bashkëpunim Ndërkombëtar në fushën e Zbatimit të Ligjit, ILECU/NJBNZL në Policinë e Kosovës në takimin e organizuar nga EULEX me temën e “bashkëpunimit policor ndërkombëtar dhe pse është i rëndësishëm ai”.
Ndërsa, sa i takon bashkëpunimit ndërkomnëtar ai tha se Policia e Kosovës ka të gjitha kapacitet teknike dhe ligjore në këtë aspekt.
Sallahu tha se bashkëpunimi policor me pesë vendet që nuk e kanë njohur shtetin e Kosovës është i mirë.
Udhëheqësi i Ekipit të Njësisë së EULEX-it për Bashkëpunim Policor Ndërkombëtar, Vinicio Ceola, tha se EULEX është 24 orë në dispozicion të shkëmbimit të informatave me Policinë e Kosovës.
Ndërkohë që ka theksuar se EULEX vazhdon të jetë i përkushtuar që të mbështes dhe të rris bashkëpunim me Policinë e Kosovës për një Kosovë të sigurt dhe BE të sigurt./KP/
