Përfaqësuesi i Lartë i BE-së për Politikë të Jashtme, Josep Borrell, ka folur për dialogun Kosovë – Serbi në Riga të Letonisë, në takimin e ministrave të jashtme të shteteve anëtare të NATO-s.

Borrell ka thënë se dialogu Kosovë – Serbi duhet vazhduar dhe se nuk ka rrugë tjetër për të stabilizuar situatën.

“Për Kosovën e Serbinë kemi pasur shumë tensione në muajt e fundit. Situata është bërë më e qetë së fundi. Por prapë ka nevojë të rikthehemi në tavolinën e dialogut, të vazhdohet dialogu. S’ka rrugë tjetër për ta stabilizuar situatën”, ka thënë Borrell në prononcim për media.

Ai ka thënë se Ballkani Perëndimor mbetet rajon strategjik për BE-në. Ndërsa ka thënë se për BE-në është shumë i rëndësishëm stabiliteti në rajon dhe ka shprehur shqetësimin për zhvillimet e fundit në Bosnjë-Hercegovinë. Ka thënë se ka pasur tentime për të zhbërë 26 vjet paqe e stabilitet.

Masat kufizuese ndaj coronavirusit i dikton situata epidemiologjike, thonë profesionistët shëndetësorë në Kosovë.

Sipas tyre, ato duhet të ashpërsohen, nëse Kosova regjistron raste me variantin e ri Omicron, i cilësuar si “shqetësues” nga Organizata Botërore e Shëndetësisë.

Qeveria e Kosovës miratoi të martën masa të reja kundër coronavirusit, të cilat, mes tjerash, kërkojnë nga të gjithë personat që do të hyjnë në Kosovë pas datës 3 janar, 2022, të kenë dëshmi të vaksinimit të plotë, ose një dozë të vaksinës bashkë me test negativ PCR, ose një dozë të vaksinës me dëshminë e kalimit të sëmundjes.

Me masat aktuale, hyrja në Kosovë mundësohet me test negativ PCR.

Mbajtja e maskës do të vazhdojë të jetë obliguese edhe me masat e reja, ashtu si edhe kufizimi i lëvizjes nga mesnata deri në orën 05:00.

Gjyle Mulliqi – Osmani, mikrobiologe e pensionuar, thotë se masat e reja janë adekuate, por shton se ato duhet të shtrëngohen në rast të përhapjes së variantit Omicron.

“Lidhur me variantin e ri, ende ka të panjohura. Prandaj, edhe masat ende nuk janë shumë strikte. Ka mundësi që, varësisht nga situata dhe njohuritë e reja për variantin Omicron, këto masa të ndryshojnë dhe të bëhen shumë më të ashpra”, thotë Mulliqi – Osmani.

Infektologu Xhevat Demiri, i cili shërben në qytetin e Gjilanit, thotë se institucionet e Kosovës duhet të jenë vigjilente, marrë parasysh paralajmërimet e OBSH-së se varianti Omicron paraqet rrezik për rritjen e infeksioneve.

“Në Kosovë ende nuk është konfirmuar asnjë rast me variantin Omicron, mirëpo ne jemi të rrethuar nga Evropa [që ka raste të tilla] dhe duhet të jemi më vigjilentë. Meqenëse, të gjitha vendet janë vënë në shërbim të parandalimit të këtij varianti, gjithsesi edhe Kosova duhet të jetë e gatshme për masa parandaluese”, thotë Demiri, pa dhënë detaje se cilat do të mund të ishin ato.

Varianti Omicron është identifikuar për herë të parë në Afrikën e Jugut, muajin e kaluar. Pas disa analizave, OBSH-ja e ka shpallur variant shqetësues, por ka thënë se do të duhen javë për të kuptuar efektin real në popullatë.

“Omicron ka një numër të paprecedentë mutacionesh – disa prej të cilave janë shqetësuese për ndikimin e mundshëm në trajektoren e pandemisë”, tha OBSH-ja në paralajmërimin e lëshuar më 29 nëntor.

Raste të infektimit me këtë variant kanë raportuar tashmë disa vende, përfshirë Kanadanë, Britaninë e Madhe, Portugalinë, Belgjikën, Republikën Çeke dhe Holandën.

Federata e Sindikatave të Shëndetësisë së Kosovës ka njoftuar se nesër do të mbajë sërish grevë tetë orëshe në të gjitha klinikat e ambulancat.

Sipas njoftimit, FSSHK-ja ka pritur institucionet të reflektojnë e të takojnë sindikatat gjatë kohës prej kur u mbajt greva e parë më 25 nëntor.

“Njoftojmë opinionin e gjerë se edhe për kundrejt pritjeve tona që të takohemi me institucionet

shtetërore, këto të fundit nuk kanë reflektuar. Federata e Sindikatave të Shëndetësisë së Kosovës si pasojë e mospërgjigjes nga ana e Qeverisë është e obliguar që nesër më 02.12.2021 të mbajë grevë 8-orëshe pranë institucioneve shëndetësore. Këshilli Qendror Grevist siguron se të gjitha shërbimet emergjente do të jepen konform Ligjit mbi Grevat”, thuhet në njoftimin e FSSHK-së.

FSSHK-ja kërkon procedimin e Ligjit për pagat në Kuvend dhe miratimin e tij. Ka paralajmëruar se do të ashpërsojë grevën ditëve e javëve në vazhdim. Njëjtë kanë kërcënuar edhe sindikatat tjera, si ajo e arsimit e punëtorëve privat.

Është mbajtur takimi i rregullt i grupit koordinues me akterët të cilët merren me trajtimin e rasteve dhe veprave penale të dhunës në familje, brenda kompetencës së kësaj prokurorie.

Në këtë takim thirrur dhe organizuar nga prokurorja dhe koordinatorja për rastet e dhunës në familje, Mehreme Hoxha, dhe mbështetur nga OSCE, ishin të pranishëm përfaqësues nga policia për rajonin e Prizrenit, përfaqësues nga Qendra për Punë Sociale, Qendra e Shëndetit Mendor, mbrojtës të viktimave, përfaqësues nga Zyra për Ndihmë Juridike Falas si dhe përfaqësues nga Njësia për të Drejtat e Njeriut në Regjionin e Prizrenit.

Të gjithë pjesëmarrësit në takim theksuan se gjatë vitit 2021 ka pasur rritje të rasteve të dhunës në familje, në krahasim me vitin 2020.

Prokurorja Mehreme Hoxha, theksoi se në vitin 2021 (deri me 30 nëntor 2021) në Prokurorinë Themelore në Prizren, gjendja statistikore për sa i përket lëndëve të dhunës në familje ka qenë si në vijim: në Departamentin e Përgjithshëm janë pranuar 282 kallëzime penale me 317 persona. Në Departamentin për të Mitur, janë pranuar 4 kallëzime me 4 persona, ndërsa, në Departamentin e Krimeve të Rënda janë pranuar 5 kallëzime penale me 7 persona. Nga të tri departamentet gjatë kësaj periudhe raportuese janë kryer 301 lëndë me 357 persona, duke përfshirë edhe lëndët e trashëguara nga viti paraprak.

Në fund të takimit, të gjithë pjesëmarrësit u dakorduan se do të vazhdojnë bashkëpunimin me kapacitetet ekzistuese për trajtimin me prioritet të rasteve të dhunës në familje.

Kryetari i Aleancës për Ardhmërinë e Kosovës, Ramush Haradinaj, ka vizituar familjen e shoferit që u vra nga një sulm me armë zjarri në Gllogjan të Deçanit.

Haradinaj ka shpërndarë disa fotografi gjatë vizitës së familjes Gjoka në Gjakovë.

“Sot me bashkëpunëtorë, ndamë dhembjen me familjen e Xhafer Gjokës në Skivjan të Gjakovës, pasi i biri i tij Ganiu, humbi jetën tragjikisht në Gllogjan së bashku me dy nxënës të fshatit.

Ai la pas vetes katër fëmijë të vegjël, Erblindin, Erlisen, Elesën dhe Elenën. Lutemi që kjo të jetë hera e fundit që ndodhin tragjedi të tilla. Njëkohësisht apeloj tek institucionet përkatëse që të angazhojnë tërë kapacitetet për kapjen sa më parë të autorit të vrasjes së trefishtë. Ganiu u prehtë në paqe”, ka shkruar Haradinaj.

Ndryshe, para disa ditësh në fshatin Gllogjan të Deçanit është sulmuar me armë zjarri një autobus që po bartke nxënës. Sulmi ka ndodhur rreth orës 19:00, ku të vrarë kanë mbetur tre persona, shoferi i autobusit dhe dy nxënës.

Policia është në kërkim të autorit të krimit, ndërkohë Qeveria ka ofruar 20 mijë euro shpërblim për ata që ofrojnë informacione lidhur me krimin.

Në vitin 2021 në Kosovë janë regjistruar tetë raste të reja me HIV infeksion, prej tyre shtatë janë nga komuniteti meshkujt që bëjnë marrdhënie me meshkuj (MSM) dhe një fëmijë nën moshën 15 vjeç, ndërsa aktualisht në Klinikën Infektive shërbime mjekësore pas infektimit me HIV-AIDS po marrin 41 pacientë.

Në Kosovë gjinia më e atakuar nga ky lloj infektimit është ajo mashkullore, ndërsa me përqindje të infektimit prijnë moshat e reja.

Kështu ka bërë të ditur për KosovaPress shefi i Repartit për HIV brenda Klinikës Infektive të Qendrës Klinike Universitare të Kosovës, Murat Mehmeti.

Ai tha se gjendja e këtyre pacientëve është relativisht e mirë dhe se trajtimi i tyre bëhet në kushte shtëpie.

“Tash për tash në evidencën tonë i kemi 41 raste të cilët trajtohen, marrin terapinë me rregull dhe që në përgjithësi janë pacientë të cilët ndihen mirë dhe nuk kanë ndonjë telashe të veçantë. Këtë vit i kemi pasur deri tani kur po flasim gjithsej 8 raste të reja të cilat sigurisht janë vendosur nën terapi menjëherë dhe janë nën trajtim dhe në përgjithësi janë në gjendje relativisht të mirë shëndetësore”.

Mehmeti thotë se moshat më të prekura nga ky lloj infeksioni për të cilën ende nuk është zbuluar një vaksinë janë kryesisht të rinjtë.

“Sikurse çdo ku sigurisht që mosha më e prekur është mosha seksualisht aktive dhe në përgjithësi janë moshat e reja dhe këto rastet e reja që i përmenda i takojnë kryesisht moshës së re”.

Shefi i Repartit për HIV brenda Klinikës Infektive pranë QKUK-së, Murat Mehmeti po ashtu theksoi se kjo Klinik është e furnizuar mirë me këtë terapia mjekësore për të infektuarit me këtë virus.

Ai madje u shpreh se barnat ofrohen falas për këta pacientë.

“Ne tash për tash jemi të furnizuar mirë me këtë terapi, për koston nuk kam ndonjë shifër të caktuar për faktin se kjo terapi sigurohet nga ministria e Shëndetësisë dhe për pacientët është terapi falas”.

Duke qenë që edhe në vitin 2021 Kosova vazhdon të ballafaqohet edhe me pandeminë COVID-19 të gjithë pacientët e infektuar me HIV/AIDS kanë marr të gjitha shërbimet mjekësore të duhura.

“Duke qenë se kem qenë në pandemi dhe kemi pas një fluks jashtëzakonisht të madh klinika realisht ka qenë e stërmbushur me pacientë ne megjithatë kemi arritur që personat me HIV t’i mbikëqyrim brenda mundësive që kemi pasur ajo çka është më e rëndësishme se këta persona që pavarësisht pandemisë dhe COVID-it nuk kanë mbetur në asnjë moment pa terapi që është gjëja më e rëndësishme dhe po ashtu sa i përket edhe analizave që ne i planifikojmë për këta persona I kemi realizuar. Me një fjalë nuk është që i kemi anashkaluar edhe personat me HIV përkundër pandemisë”.

Ndërsa, Instituti Kombëtar I Shëndetit Publik të Kosovës thonë se në Kosovë deri më tani janë raportuar 139 raste me HIV dhe AIDS.

Përqindja më e lartë I takon gjinisë mashkullore me gjithsej 73%.

“Që nga viti 1986 deri me 1 dhjetor te vitit 2021, në Kosovë janë raportuar 139 raste me HIV dhe AIDS. Numri më i madh i takon gjinisë mashkullore (73%). Grup mosha më e atakuar është 25-34 vjeç (31%) dhe grup mosha 35-44 po ashtu 31%. Deri më tani 50 kanë vdekur si pasojë e AIDS-it. Në vitin 2021, janë raportuar 8 raste me HIV infeksion, prej tyre 7 janë nga komuniteti MSM dhe një fëmijë nën moshën 15 vjeç”, thuhej në njoftimin e IKSHP-së.

Gjatë ditës së sotme edhe ministria e Shëndetësisë ka bërë thirrje për tu testuar në kohë për virusin HIV.

Nga ministria e Shëndetësisë deklarohen po ashtu se për trajtimin e pacientëve të infektuar me HIV është arritur të sigurohet terapia ARV.

“Ministria e Shëndetësisë po ndërmerr masa jo vetëm sa i takon trajtimit të personave me HIV por edhe për të parandaluar infeksionin, veçanërisht tek popullata kyçe. Ministria e Shëndetësisë siguron terapinë ARV për të gjithë te infektuarit me HIV. Trajtimi i rasteve me HIV bëhet në Kliniken Infektive të QKUK-së. Edhe gjatë këtij viti, edhe përkundër pandemisë në asnjë rast nuk është ndërprerë dhënia e kësaj terapie”, thuhet në thirrjen e MSh-së.

Rasti i parë i infektimit me HIV/AIDS në Kosovë është regjistruar në vitin 1986. Transmetimi i HIV-it mund të ndodhë nëpërmjet shkëmbimit të një shumëllojshmërie lëngjesh të infektuara të trupit të njeriut si gjaku./KP

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj po vlerëson se Qeveria ka thyer akullin e barrikadave për dialogim për kërkesat e tyre të kamotshme.

Jasharaj tha për Klankosova.tv se pas takimit që kanë pasur gjatë së martës me ministrin e Punëve të Brendshme dhe Administratës Publike Xhelal Sveçla e Arbërie Nagavci kanë marrë zotim se Ligji i Pagave është duke u punuar në mënyrë intensive nga institucionet përgjegjëse.

Ai thotë se kanë marrë zotim se Ligji nuk do të shkojë në Qeveri pa marrë edhe miratimin e sindikatave.

“Është mirë që ndodhi ky takim dhe më në fund besoj që ai akulli i barrikadave të Qeverisë kundër dialogut është thyer dhe uroj të vazhdohet me dialogun. Kemi biseduar për “Ligjin e pagave” dhe e mira e gjithë këtij takimi është se më në fund nga njeriu i parë i kësaj çështje ministri Sveçla jemi informuar se Ligji është duke u punuar, por edhe ekipi i ekspertëve që ai e ka krijuar janë duke punuar në përpjekje për t’i hequr defektet qe i ka cekur Kushtetuesja dhe ministri Sveçla na premtoi që me të hequr këto defekte në pjesën e dytë të këtij ligji do të ftohen edhe sindikatat dhe na premtoi se versioni final nuk do të shkoj në Qeveri për t’u votuar pa u bërë bashkëbiseda dhe angazhimet me sindikatat”.

Rrahman Jasharaj thekson se nëse nuk realizohen kërkesat do të vazhdojnë me veprime sindikale, duke mos përjashtuar grevën e përgjithshme në muajin janar.

“Nesër do ta mbajmë një takim online me kryetar dhe ata që do ta thonë fjalën e fundit. Problem tjetër na doli sepse masat e reja po kufizojnë numrin e pjesëmarrësve qoftë edhe në ambiente të hapura dhe kjo e keqëson situatën dhe mbase kryetarët do të mendojnë për një ide tjetër të cilën nuk e dëshirojmë e që është greva”.