Ministrja e Drejtësisë, Albulena Haxhiu, ka thënë se vetingu në drejtësi është shumë i domosdoshëm dhe se duhet gjetur vetëm mënyrën se si të shtyhet para ky proces.

Haxhiu në emisionin “Tempus” në KTV, ka thënë se dy zotimet kryesore të Vetëvendosjes kanë qenë drejtësia dhe punësimi.

“Pikërisht dy prej problemeve më të mëdha që i kanë qytetarët në Kosovë është mungesa e drejtësisë dhe mungesa e punësimit, këto ndërlidhen mes vete. Ne kemi marrë mbështetje të madhe qytetare dhe unë nuk mund të pajtohem me atë që sot ka diskutime a duhet të ketë veting apo jo. Më nuk ka dilema se në Kosovë vetingu është i domosdoshëm. Nuk ka diskutime a duhet të ketë a jo, por cila është mënyra që duhet ta shtyjmë vetingun para, duke marrë parasysh se nevojiten edhe ndryshime kushtetuese, marrë parasysh kompetencat e këshillit gjyqësor dhe këshillit prokuroria në raport me propozimin për emërim apo shkarkim të gjyqtarëve”, ka thënë Haxhiu.

Ajo ka shtuar se për veting është shumë me rëndësi të ketë konsensus të gjerë politik, por edhe me institucione të tjera të drejtësisë dhe me shoqërinë civile.

Ministri i Shëndetësisë Rifat Latifi thotë se aktualisht gjendja me COVID-19 është e qëndrueshme por nuk mund të ketë lehtësim masash kufizuese.

“Vendet në Evropë kanë një numër shumë të rritur me COVID-19 kanë probleme të jashtëzakonshme nëpër spitale, ndonëse e kanë sistemin shëndetësor shumë më të zhvilluar se ne. Ne për fat e kemi një gjendje shumë stabile epidemiologjike por ne duhet të jemi të kujdesshëm që kjo të mos na keqësohet ngase mund të keqësohet brenda ditës prandaj ne jemi gati për çdo ditë duke analizuar gjendjen epidemiologjike edhe me marr masa tjera nëse ka nevojë, tash për tash jemi mirë”, tha ai.

Ministri Latifi thotë se deri më sot nuk është regjistruar asnjë rast me variantin e ri Omicron të koronavirusit.

“Ne i marrim mostrat epidemiologjike që i dërgojmë jashtë vendit edhe ndoshta mund të kemi tani por deri më tash nuk kemi asnjë, shancat janë shumë të mëdha që edhe ne të kemi sikurse vendet e botës”, tha ai për Zërin e Amerikës.

Aktualisht në Kosovë ka filluar vaksinimi edhe me dozë përforcuese apo dozën e tretë për të mbrojtur qytetarët nga variantet e reja të COVID-19. Ministri Latifi thotë se vaksinimi është e vetmja mënyrë për të parandaluar vdekjet dhe shtrirjet në spital./VOA

Prokurori i Shtetit i ka reaguar ministrit të Punëve të Brendshme, Xhelal Sveçla, i cili pak orë më parë lavdëroi aksionin e sotëm në disa qendra, e ku u arrestuan 10 zyrtarë, përfshirë edhe ish-kryetarin e Shtërpcës, Bratislav Nikoliq.

Prokurori i Shtetit e ka akuzuar Sveçlën se nuk bën që aksioneve të prokuriorisë t’u jep ngjyrime politike, ndërkohë e ka ftuar që çdokush të shohë punët e veta, sipas kompetencave që kanë.

Sveçla në postimin e tij në Facebook lavdëroi Policinë në këtë aksion të koduar “Brezovica”.

“Prokurori i Shtetit reagon ndaj deklaratës së Ministrit të Punëve të Brendshme, i cili ashtu si edhe aksioneve të tjera të prokurorisë edhe rastin e ditës së sotme të zhvilluar me urdhër të Prokurorisë Themelore në Ferizaj në komunën e Shtërpcës dhe më gjerë, mundohet që t’iu jap karakter politik. Hetimi dhe ndjekja e rasteve penale nuk është punë e Ministrisë së Punëve të Brendshme e as e sektorëve tjerë qeveritar, por është kompetencë ekskluzive e Prokurorit të Shtetit”, thuhet në reagimin e Porokurorisë së Shtetit.

Po ashtu, në reagim ka edhe një ftesë për ministrin Sveçla.

“Hetimet dhe rastet penale nuk kanë konotacion politik dhe nuk duhet të komentohen nga organet politike. Në këtë kontekst, secili institucion duhet të sillet konform përgjegjësive ligjore dhe kushtetuese, pa u përzier në punët dhe kompetencat respektive. Aksioni i ditës së sotme është punë dhe angazhim disavjeçar i Prokurorisë i mbështetur nga organet tjera ligjzbatuese, për më tepër është në vazhdën e përpjekjeve të Prokurorit të Shtetit për forcimin e sundimin e ligjit në Republikën e Kosovës dhe vënien para drejtësisë të të gjithë atyre individëve që kryejnë vepra penale pavarësisht pozitës, funksionit apo etnisë që ata kanë”, thuhet në reagim.

Sveçla në postimin e tij tha se aksioni nuk ka të bëjë me asnjë emër të përveçëm e as me etni të caktuara.

Kryeministrit i Republikës së Kosovës, Albin Kurti, i shoqëruar nga ministrja e Ekonomisë, Artane Rizvanolli vizitoi Komisionin e Pavarur për Miniera dhe Minerale (KPMM).

Në këtë takim, kryeministri Kurti tha se qeveria është e angazhuar për një zhvillim të qëndrueshëm të vendit dhe sektori minerar historikisht e ka dëshmuar se ai është i rëndësishëm për zhvillimin ekonomik të vendit.

Ndërsa, ministrja Rizvanolli shtoi se përveç prodhimit të energjisë elektrike, resurset minerare që posedon Kosova janë potencial edhe për ekonominë e tregut dhe ngritjen e mirëqenies socio-ekonomike.

“Krahas fuqizimit dhe zhvillimit të këtij sektori nëpërmjet hartimit të kornizës adekuate ligjore, sektori minerar kërkon angazhim të mëtutjeshëm për ofrimin e kushteve të përshtatshme për investime të mundshme dhe bashkëpunim ndërkombëtar në fushën e minierave”, u tha gjatë takimit.

Në takim gjithashtu u diskutua edhe për sfidat e këtij sektori dhe nevojën për përmirësimin e teknologjisë, ngritjen e kapaciteteve profesionale, hulumtime të reja për identifikimin e resurseve minerale, zhvillimin e industrisë përpunuese dhe ngritjen e sigurisë në punë.

Të pranishëm aty ishin edhe kryesuesja e Bordit, Selvete Grajçevci-Pllana dhe anëtarët e tjerë të bordit të KPMM-së u diskutua mbi rëndësinë dhe rolin e sektorit minerar në vend.

Dy ditët e ardhshme do të mbajë mot kryesisht i ngjashëm, por më i ftohët.

Në mëngjes dhe gjatë natës parashihen ngrica, prandaj apelohet te ngasësit e automjeteve që të kenë kujdes të shtuar në trafik.

Temperaturat minimale do të lëvizin ndërmjet -8 deri -5 gradë Celsius, ndërsa maksimalet e ditës parashihen të lëvizin ndërmjet 1-2 gradë Celsius. Do të fryjë erë drejtimesh të ndryshme e lehtë deri mesatare.

Kryeministri i Kosovës, Albin Kurti, e ka marrë edhe dozën e tretë të vaksinës kundër COVID-19 dhe vaksinën kundër gripit sezonal.

Kurti tha se mundësia për t’i marrë dyjat në një vend ofron mundësi për t’u mbrojtur nga dyja sëmundjet.

“Mundësia për të marrë të dyja vaksinat njëkohësisht na jep mundësinë të mbrohemi nga të dyja sëmundjet, për të mbrojtur veten dhe të tjerët”.