Një person ka vdekur mbrëmjen e së mërkurës në një poligon të shenjëtarisë në Obiliq.

Policia ka dalë në vendin e ngjarjes dhe mbështetur në të dhënat e para, janë ngritur dyshimet se një 24 vjeçar, ka marrë plagë arme zjarri, kanë thënë nga Policia e Kosovës.

Viktima është dërguar në QKUK për të marrë trajtimin e nevojshëm mjekësor, mirëpo nuk u ka mbijetuar plagëve, ka konfirmuar mjeku kujdestar në Emergjencën e QKUK-së, Naser Syla..

Aktualisht hetuesit policorë kanë nisur hetim për sqarimin e rrethanave që karakterizojnë rastin.

Rritje të çmimit të energjisë prej 7 për qind që nga 1 dhjetori i këtij viti ka kërkuar KEDS-i nga Zyra e Rregullatorit të Energjisë.

Nëpërmjet kërkesës për shqyrtim të jashtëzakonshëm të tarifave, KEDS-i po kërkon që rritja prej 7 për qind të jetë deri në fund të marsit, kur bëhet shqyrtimi i rregullt tarifor.

“Kjo do të vlejë deri në shqyrtimin e rregullt tarifor, i cili bëhet në fillim të vitit të ardhshëm me tarifa që hyn në fuqi nga data 1 prill pasi vit energjetik që e themi ne fillon me 1 prill dhe përfundon me 31 mars të vitit vijues, aty ne do të aplikojmë për të hyrat tona të lejuara dhe për tarifat që i mbulojnë kostot pasi dihet që kemi të bëjmë me çmime astronomike të importit të cilat shkojnë në 300 euro megavat apo 5-6 fish më të larta se vitin e kaluar dhe këto çmime duhet të mbulohen”, thotë zëdhënësi i KEDS-it, Viktor Buzhala.

Kërkesa e KEDS-it është duke u shqyrtuar nga ZRRE-ja dhe ende nuk ka një vendim lidhur me atë se a do të ketë rritje të çmimit këtë muaj.

“Nuk mund të flasim për ndryshim të çmimeve pa u zhvilluar proces i shqyrtimit tarifor, qoftë ai edhe i jashtëzakonshëm. Procesi i shqyrtimit tarifor nënkupton aplikimin e operatorëve për shqyrtim të të hyrave të lejuara maksimale, në përputhje me legjislacionin në fuqi, si dhe hapje të diskutimit publik pas vlerësimeve të ZRRE-së në lidhje me kërkesat për ndryshim të këtyre të hyrave. ZRRE-ja aktualisht është duke shqyrtuar kërkesën e KEDS-it, si dhe përmbushjen e kushteve për hapjen e shqyrtimit të jashtëzakonshëm. Në rast se ZRRE-ja vlerëson se janë përmbushur këto kushte do të njoftojë operatorët dhe publikun me kohë”, thuhet nga ZRRE.

Rritja e mundshme e çmimit të energjisë ka alarmuar qytetarët, të cilët thonë se do të kenë vështirësi për t’i përballuar rritjet e vazhdueshme të çmimeve.

“Të gjitha çmimet janë rrit është diçka që popullata e ka vështirë ta përballojë, edhe rryma me rrit problem ka me qenë tek populli ynë. Kemi vështirësi dikush është vetë me një pension, dikush është vetëm me një social, dikush është pa rrogë, nuk e kanë lehtë, vështirë është me u përballu gjithë ky shtrenjtim”, thotë qytetari Musli Krasniqi.

“Ndikon negativisht, qysh po mendon me të ardhura me pensione të vogla, kjo shumë katastrofë. Kështu dhe mezi me ia dal e le ma me i rrit, kjo është tepër diçka. Valla nuk i dilet, duket me u dorëzua, asgjë më shumë”, thotë qytetari Shefqet Vokrri.

“Rritja e rrymës normal që do të ketë efekt anësor për gjithë popullatë, duke marrë parasysh që globalizimi do të thotë që çmimet janë rritur gjithkund në botë, por duke e marrë parasysh që na prodhimin e energjisë e kemi me qymyr nuk po shohim naj arsye me u ba rritja, por këto janë kalkulime ndërkombëtare dhe ne populli po pësojmë, por nuk kemi çka me ba tash”, thotë qytetari Kreshnik Sopi.

ZRRE-ja më 27 tetor të këtij viti kishte vendosur që të mos ndryshohen tarifat e energjisë deri më 31 mars të vitit të ardhshëm.

Por KEDS-i thotë se çmimet e importit janë pesëfishuar.

“Kjo i takon ZRRE-së ne bëjmë vetëm analizimin e të dhënave shqyrtimin e tyre, trendët, çmimet gjitha këto i analizojmë dhe ZRRE-ja është ajo që vendos për çmime, sigurisht që kalkulimi është që do të ketë një rritje të konsiderueshme, a do të ketë a jo kjo i takon ZRRE-së dhe bëhet fjalë për shuma deri në 30-40 për qind”, tha Buzhala.

Pas rritjes së çmimeve të energjisë që importohet, qytetarëve u është bërë apel që ta kursejnë rrymën.

Kryetari i ri i Prishtinës, Përparim Rama ka folur për miqësinë e tij me kryeministrin e Kosovës, Albin Kurti.

Rama ka pohuar se nuk do të mungojë bashkëpunimi mes tyre, duke treguar se Kurti ka qëndruar edhe në shtëpinë e tij në Londër, transmeton Telegrafi.

“Edhe Albini ka qenë në shtëpinë time, ka festuar ditëlindjen, kemi kontakte, mendoj që ka me qenë një bashkëpunim i mirëfilltë. Kurti është kryeministër unë jam kryetar i komunës, dhe duhet të bashkëpunojmë për të mirën e popullit. Ai mendon për të mirën e popullit, edhe unë mendoj po ashtu. Nuk mendoj që ka me mungu bashkëpunimi mes neve”, deklaroi ai në kanal 10.

Rama ka fituar mandatin e kryetarit të Prishtinës në raundin e dytë të zgjedhjeve lokale, ndërsa ende nuk e ka marrë zyrtarisht detyrën e të parit të kryeqytetit.

Ish-kryeministri Sali Berisha ka komentuar edhe marrëveshjen ndërmjet Këshillit të Ministrave të Shqipërisë dhe Qeverisë së Kosovës për rregullat e regjimit të trafikut lokal të kufirit.

Marrëveshja parashikonte që banorët do kenë mundësi të lëvizin lirshëm me leje kalimi të veçantë deri në 30 km në secilën anë të kufirit. Berisha e ka konsideruar qesharake këtë marrëveshje.

“Leja ishte qesharake. Qeveria shqiptare do bëjë gjithçka që dogana të largohet për qytetin e Kukësit, Hasin, Tropojën, Kukësin në Kalimash, për Nikaj Mërturin dhe zonën tjetër, por ju duhet dhe do qarkulloni pa doganë. Këtë nuk e bën një njeri shpirtkazmë si Rama. Po të kuptojë burimet e të ardhurave në këto zona, kjo është një gjë e domosdoshme. Në 2013 kur erdhi në qeveri si akt ndëshkimi në zonën e Tropojës hoqi 20 mijë familje nga ndihma ekonomike. Kjo e doganës do të merret parasysh. Rruga e Alpeve po se bëri PD nuk e bën askush atë rrugë, padiskutim që do bëhet”, u shpreh Berisha.

Ish-kryeministri Sali Berisha komentoi edhe marrëveshjen e firmosur së fundmi mes qeverisë së Shqipërisë dhe qeverisë së Kosovës për njohjen e ndërsjellët të diplomave dhe ambicien për të njësuar abetaren në të dyja vendet, njofton Top Channel.

Sa i përket kësaj marrëveshje, Berisha u shpreh se të dyja qeveritë kanë gënjyer si në Kosovë dhe Shqipëri, sepse abetarja është njësuar që në vitin 2012 dhe në kohën kur PS erdhi në pushtet, ish-kryeministri theksoi se Rama e sulmoi si njeri injorant.

“8 vite jo vetëm që ndaloi ora në Shqipëri, por ora shkoi mbrapa. Rama ndërsa zotohet të firmosë marrëveshjet pa dogana me Rusinë e vogël që është Serbia, nuk e bën këtë me Kosovën.

Çfarë ishte marrëveshja e fundit, e turpshme. Abetarja që nxorën këta dhe ky e sulmoi në 2014 kur erdhi në pushtet. E sulmoi si njeri injorant, primitiv. Abetarja ka hyrë në fuqi dhe në mbarë Kosovën është abetarja unike me Shqipërinë dhe që në vitin 2012 është bërë realitet.

Ata mashtruan. Mashtruan në Shqipëri, mashtruan në Kosovë dhe mashtrimet janë të turpshme. Kemi një detyrë shumë të madhe. Ajo është që këtë narkoshtet, ta përmbysim njëlloj siç përmbysëm diktaturën komuniste. Por për të realizuar këtë mision ne duhet të shndërrohemi në opozitë të vërtetë”, tha Berisha.

Hysen Sogojeva, kryetar i Odës së Hotelerisë dhe Turizmit të Kosovës, ka thënë se Qeveria e Kosovës duhet ta lejojë gastronominë të punojë pas orës 11:00 e po ashtu duhet t’i lejojë dasmat dhe ahengjet.

Sogojeva ka thënë në “60 Minuta” të KTV-së se gastronomët dhe sektori i hotelerisë e turizmit garanton se do të punojë konform rregullave të përcaktuara nga ekzekutivi.

Ai ka thënë se 90% e punonjësve të këtyre dy sektorëve tashmë janë vaksinuar.

“Ne në çdo takim edhe tani e themi, ju garantojmë që do të punohet konform rregullave. 1000 metër katrorë i ka një sallë dasmash, 150 persona a e din sa pak janë, nëse e bëjmë këtë krahasim. Në 10 metër katror 4 veta do të jenë në hapësira të mbyllura. Shteti duhet të ketë mekanizmat e kontrollit. Nëse i lëshojmë masat tash dhe e shohim se po rriten rastet, mund ta ndalim prapë punën. 90% e punonjësve të gastronomisë e hotelerisë sipas informatave që kemi janë vaksinuar. Në sektorin privat, shumica absolute e stafit të gastronomisë, hotelerisë dhe turizmit janë të vaksinuar. Nuk ka logjikë edhe pronari ta pranojë një kamarier i cili nuk është i vaksinuar”, ka thënë Sogojeva.

Sipas tij, Qeveria e Kosovës po tregohet selektive sa i përket masave anti-COVID.

Ai po ashtu ka thënë se vendimi i një dite më parë për masat është marrë pa u konsultuar me gastronominë dhe hotelerinë e turizmin.

“Pse të mos bisedohet qysh kemi biseduar, çdo vendim që e kemi marrë bashkë me Ministrinë e Shëndetësisë ka dalë më i mirë. Ndërsa nëse merret një vendim pa u konsultuar është i njëanshëm dhe çdo vendim i njëanshëm ka pasoja”, ka thënë Sogojeva.

Grupi Parlamentar i Aleancës për Ardhmërinë e Kosovës (AAK) ka bërë të ditur se ka iniciuar dy debate parlamentare për rritjen e çmimeve dhe Ligjin e pagave.

Ky Grupi Parlamentar mbetet i shqetësuar me ngritjen enorme të çmimeve dhe jo stabilitetit ekonomik në vend, ku me ç’rast ka kërkuar nga qeveria të marrë masa urgjente.

Shefi i GP të AAK-së Besnik Tahiri në tryezën me temën “Ngritja enorme e çmimeve dhe jo stabiliteti ekonomik”, theksoi se për gjendjen e rëndë të krijuar pas rritjes së çmimeve, ky subjekt ka iniciuar dy debate parlamentare.

“Ne kemi ngritur dy debat parlamentare, debati i parë ka të bëjë me Ligjin e pagave, i cili është me rëndësi, pasi që edhe rritja e pagave e forcon konsumin dhe fuqinë blerëse. Po ashtu, edhe tema e rritjes së çmimeve të cilën deputeti Lekaj ka iniciuar një debat të tillë. Ne para se të shkojmë në seancë kemi dashur të kemi një bashkëbisedim me të gjithë hisedarët dhe janë të prekur drejtpërdrejt”, tha Tahiri.

Deputeti tjetër nga AAK-ja Pal Lekaj tha se rritja e çmimeve është bërë e papërballueshme për qytetarët. Përkundër rritjes së çmimeve, ai tha se në vend ka kohë që pagat dhe pensionet nuk janë ngritur.

“Kjo gjendje ka prekur dukshëm shumë sektor, dhe në mënyrë zinxhirore përmes rritjes së çmimeve të produkteve të importuara janë rritur, edhe shërbimet duke ndikuar drejtpërdrejt në sektorët e prodhimit, ndërtimit, shitjes dhe transportit. Qeveria duket se është zënë në befasi dhe nuk është treguar e shkathët që i përgjigjet me masat e duhura kësaj situate. Situata shkon edhe më keq kur rritja e çmimeve është paralajmëruar deri në janar të vitit 2022, ndërsa deri më tani kjo rritje e çmimeve sipas ekspertëve po shihet si e papërballueshme për qytetarët. Këto rritje nuk mund të mbulohemi me paga të tilla në nivel vendi, shto kësaj që ende jemi në kohë pandemie”, tha Lekaj.

Sakip Imeri nga Autoriteti i Konkurrencës tha se mandati i këtij autoriteti është të mbajë konkurrencën e lirë në treg, pra jo siç tha ai për ngritjen e çmimeve. Derisa për ngritjen e çmimeve, ai tha se kjo ka ardhur si rrjedhojë e importit mallrave.

“Shumica e ngritjes së çmimeve posaçërisht te sektori i shitjes me shumicë ka qenë i imponuar nga importuesit, sepse ekonomia e Kosovës është ekonomi që më shumë varet prej importit. Ndërsa, keqpërdorime ka pasur ndoshta edhe te bizneset e shitjes me pakicë që e kanë shfrytëzuar situatën”, tha ai.

Kryetari i Shoqatës së Naftëtarëve, Fadil Berjani tha se është një lajm i mirë që në tregjet e ndërkombëtare ka filluar një rënie e lehtë e çmimeve të naftës, por ai ka akuzuar marketet e mëdha për abuzim me çmimet.

“E themi se është lajm i mirë që në tregjet botërore ka filluar të ketë një rënie të lehtë. Por, mua çka më brengosë dhe nuk pajtohem, kur shumë markete të mëdha e lidhin dhe thonë se është shtrenjtuar nafta. Kjo nuk është normale çka është duke u bërë. Marketet janë abuzuesit më të mëdhenj në Republikën e Kosovës. E kemi rastin konkret në vitin 2020, ku një litër naftë ka kushtuar 0.75 centë, por abuzimi nuk është ndalur. Atëherë s’kanë pasur arsye me thënë se nafta u shtrenjtua dhe çmimet po i rrisim. Ky është skandal. Prandaj, duhet të merren masa ndaj abuzuesve me çmimet në Kosovë”, tha Berjani.

Kritikat e kryetarit Berjani, i ka mbështetur edhe kryetari i Shoqatës “Konsumatori”, Selatin Kaçaniku, I cili tha se këto biznese kanë abuzuar me çmime.

“Prodhimi dhe tregtimi shërbimeve të ushqimeve është sektori më I ngarkuar socio-ekonomik me problemet e çmimeve spekulative. E tha dikush se marketet janë abuzues, duke u nisur nga dualizmi i çmimeve të dyfishta, manipulimi i peshës, i vëllimit, manipulimi me afatin e skadencës, mashtrimet me emrat e brendeve. Kur të gjitha këto I marrim parasysh, përqindja e çmimeve është më e lartë dhe shkalla e inflacionit është më e lartë”, tha ai.

Në fund, shefi i GP të AAK-së Besnik Tahiri ka lexuar tetë rekomandime nga ky debat, ku njëra ndër to është mos shfrytëzimi i pandemisë për ngritjen e çmimeve nga bizneset dhe vazhdimi i zbatimit të Ligjit për rimëkëmbje ekonomike.