Ministri i Mbrojtjes, Armend Mehaj ka publikuar fotografi nga stërvitjet gjatë natës të kadetëve të Akademisë së Mbrojtjes.

Përmes një postimi në Facebook, Mehaj ka bërë të ditur mënyrën se si bëhet kalitja fizike e kadetëve në marshim të ngarkuar natën.

Ai bëri të ditur po ashtu se kadetët janë pjesë e Qendrës Studimore Universitare “Wesley Clark”.

“Kalitja fizike e kadetëve tanë në marshim të ngarkuar në kushte nate. Kadetët tanë të Qendrës për Studime Universitare “Wesley Clark” të Akademisë sonë të Mbrojtjes, vazhdojnë suksesshëm realizimin e planprogramit akademik. “Believe you can and you’re halfway there.” – former U.S. President Theodore Roosevelt”, shkroi Mehaj në Facebook.

Dhomat e Specializuara të Kosovës në Hagë kanë bërë të ditur se në gjykimin e së hënës, më 6 dhjetor, dëshminë e tij do ta paraqes i akuzuari Hysni Gucati.

“Mbrojtja e Hysni Gucatit e ka përfunduar deklaratën e saj hyrëse. Seanca e sotme ka përfunduar ndërsa gjykimi do të vazhdojë të hënën, më 6 dhjetor, me dëshminë e dëshmitarit të parë të Mbrojtjes së Gucatit (i akuzuari Gucati)”, thuhet në njoftimin e tyre.

Ndryshe, gjykimi ndaj Gucatit dhe Haradinajt ka filluar në muajin tetor të këtij viti, ndërsa Zyra e Prokurorit të Specializuar e ka mbyllur çështjen e saj në nëntor.

Hysni Gucati së bashku me Nasim Haradinajn, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara, transmeton “Betimi për Drejtësi”.

Gucati dhe Haradinaj ngarkohen se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.

“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së”, thuhej në njoftimin e Dhomave të Specializuara të Kosovës.

Kuvendi i Kosovës përmes një njoftimi për media ka njoftuar se seanca e radhës plenare do të mbahet ditën e hënë.

Në njoftim thuhet se seanca do të fillojë në ora 11:o0, ku në rend dite janë edhe disa pika të papërfunduara nga seancat e kaluara.

Rendi i ditës:

I. Pika e papërfunduar nga Seanca plenare e mbajtur më 22 dhe 28 korrik 2021:

Votimi i Rekomandimeve të Komisionit për Mbikëqyrjen e Financave Publike lidhur me Raportin e Auditimit të pasqyrave vjetore financiare të N.P Hortikultura për vitin 2020.

II. Pikat e papërfunduara nga seanca plenare, e mbajtur më 16, 19, 21, 28 korrik dhe 6 gusht

2021:

4. Votimi i Projektligjit nr.08/L-006 për ratifikimin e amendamentimit të Marrëveshjes ndërkombëtare me Bankën Evropiane për Investime (BEI), për financimin e Projektit për rehabilitimin e linjës hekurudhore 10,

6. Votimi i Projektligjit nr.08/L-008 për ratifikimin e Marrëveshjes së bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Agjencisë Austriake për Zhvillim për zbatimin e Projektit “Hulumtimi dhe shkencat e aplikuara në arsimin e lartë + (HERAS+) (ada numri referues 8116-00-2020)”,

11. Votimi i kërkesës së Komisionit për Bujqësi, Pylltari, Zhvillim Rural, Mjedis, Planifikim Hapësinor dhe Infrastrukturë për ndryshimin e emërtimit të këtij komisioni.

III. Pika e papërfunduar nga seanca plenare, e mbajtur më 19 tetor 2021:

Votimi i Raportit vjetor të Këshillit të Kosovës për Trashëgimi Kulturore për vitin 2020.

IV. Pikat e papërfunduara nga seanca plenare, e mbajtur më 18, 19, 22 dhe 23 nëntor 2021:

21. Votimi i Raportit vjetor të Komisionit të Pavarur të Mediave për vitin 2020,

22. Votimi i Raportit vjetor të Zyrës së Rregullatorit për Energji për vitin 2020,

27. Votimi i Raportit vjetor të Agjencisë Kosovare për Krahasim dhe Verifikim të Pronës për vitin 2020,

29. Votimi i Raportit vjetor Financiar të Buxhetit të Republikës së Kosovës për vitin 2020,

30. Votimi i Raportit vjetor të Autoritetit të Aviacionit Civil të Kosovës për vitin 2020,

32. Shqyrtimi i Propozim-vendimit të Qeverisë për miratimin e rekomandimit të Komisionit Ndërministror për Investime Strategjike për dhënien e statusit Investitor Strategjik për subjektin investues “KOSMONTE FOODS” Sh.P.K,

33. Votimi për emërimin e kryetarit dhe katër (4) anëtarëve të Bordit të Organin Shqyrtues të Prokurimit,

36. Votimi për përzgjedhjen e një (1) kandidati për anëtar jo-ekzekutiv të Bordit të Bankës Qendrore të Republikës së Kosovës,

37. Zgjedhja e anëtarëve të Bordit të Komisionit të Pavarur për Miniera dhe Minerale.

V. Pikat e papërfunduara nga seanca plenare, e mbajtur më 25 dhe 26 nëntor 2021:

5. Shqyrtimi i parë i Projektligjit nr. 08/L-067 për inspektimet,

6. Shqyrtimi i parë i Projektligjit nr. 08/L-065 për Produktet Biocide,

7. Shqyrtimi i dytë i Projektligjit nr. 08-L-022 për identifikimin elektronik dhe shërbimet e besuara në transaksionet elektronike,

8. Shqyrtimi i dytë i Projektligjit nr.08/L-029 për punimet nga metalet e çmuara,

9. Shqyrtimi i Raportit vjetor të Agjencisë së Statistikave të Kosovës për vitin 2020,

11. Zgjedhja e anëtarëve të Bordit të Radiotelevizionit të Kosovës.

Kompania franceze për prodhim të energjisë elektrike “Akuo Energy”, as pas tre vjetësh përpjekjeje, nuk ka arritur t’i përfundojë procedurat për një investim milionësh në Kosovë.

Në shtetin fqinj – Maqedoni të Veriut – procedurat e tilla i ka përfunduar brenda muajsh.

“Akuo Energy” do të ndërtojë atje një park diellor, në vlerë prej 270 milionë eurosh.

Parku “Stipion” pritet të jetë ndër më të mëdhenjtë në Evropë, me kapacitet prodhimi prej 350 deri në 400 megavat rrymë në orë.

Qeveria në Shkup thotë se procedurat e kompanisë për investime në këtë projekt kanë nisur këtë vit dhe kanë përfunduar për disa muaj.

“Vonesat eventuale që mund t’i ketë pasur, kanë qenë të natyrës teknike, apo për shkak të pandemisë së koronavirusit dhe jo për arsye të tjera. Meqë bëhet fjalë për investim strategjik, marrëveshjet përfundojnë në afat sa më të shkurtër të mundshëm kohor”, thuhet në një përgjigje të Qeverisë maqedonase dhënë Radios Evropa e Lirë.

Parku diellor “Stipion” i kompanisë “Akuo Energy” do të ndërtohet gjatë vitit të ardhshëm, thotë Qeveria në Shkup.

Në Kosovë, kjo kompani ka projektin “ÇiçavicaWind Farm” për prodhim të energjisë elektrike me erë.

Projekti i paraparë në Komunën e Vushtrrisë, e cila gjendet rreth 25 kilometra larg Prishtinës, kap vlerën e mbi 100 milionë eurove.

Por, procedurat për investime nuk kanë përfunduar ende.

Agjencia për Investime dhe Përkrahjen e Ndërmarrjeve në Kosovë sqaron se procedurat që duhet t’i ndjekë një investitor i huaj për të investuar në Kosovë, varen nga sektori ku bëhet investimi, pastaj nga vlera e investimit e të tjera.

“Nëse bëhet fjalë për një investim në sektorin e minierave, natyrisht se në atë rast kërkohen pëlqime, leje, licenca, certifikata, vendime, etj., gjë që përfshin më shumë institucione dhe më shumë procedura që duhen ndjekur, për t’u pajisur me të njëjtat. Për agjencinë është e rëndësishme që të sigurohen informatat zyrtare për çdo lloj projekti investues, pastaj vijohet me hapat tjerë, ku, çdo herë, kjo agjenci është në dispozicion të investitorit, për t’ia lehtësuar procesin e plotësimit të dokumentacionit të nevojshëm”, thotë Agjencia për Investime.

Ajo shton se, deri më tash, nuk i është adresuar ndonjë ankesë nga ndonjë investitor i huaj.

Radio Evropa e Lirë ka kontaktuar edhe me kompaninë “Akuo Energy” rreth procedurave të investimit, por nga ajo s’ka marrë përgjigje.

Për zvarritjen e tyre, ish-kryetari i Odës Ekonomike të Kosovës, Safet Gërxhaliu, e hedh fajin te, siç thotë, burokracia, korrupsioni dhe jostabiliteti politik.
Sipas tij, ka pasur disa raste në Kosovë kur procedurat për investime të huaja janë zvarritur.

“Në Kosovë i ke pasur pothuajse të gjitha brendet ndërkombëtare që kanë qenë të interesuara për të investuar, mirëpo burokracia, korrupsioni dhe politizimi i këtyre proceseve me licenca, e kanë dëmtuar Kosovën dhe ata investitorë kanë ikur”, thotë Gërxhaliu për Radion Evropa e Lirë.

Ai përmend në mënyrë specifike rastin e furnizuesit automobilistik gjerman “Draxlmaier”. Kjo kompani ka qenë investuese potenciale në Kosovë, por, siç thotë Gërxhaliu, ajo ka ikur në Maqedoninë e Veriut, ku edhe ka shtrirë biznesin e saj qysh në vitin 2012.

Projekti i kompanisë “Akuo Energy” në sirtarët e Qeverisë

Kompania “Akuo Energy”, për projektin për prodhim të energjisë me erë në Kosovë, ka nisur procesin e studimit të fizibilitetit dhe studimet e tjera të ambientit qysh në fillim të vitit 2018.

Kryetari në largim i Komunës së Vushtrrisë, Xhafer Tahiri, thotë se, në vitin 2019, ka nënshkruar një memorandum me kompaninë “Akuo Energy” dhe se asaj i janë dhënë të gjitha lejet e nevojshme që kanë qenë në kompetencë të komunës.

“Ne, si komunë, i kemi qëndruar afër këtij investitori, pasi është një investim i rëndësishëm për Komunën e Vushtrrisë. Kemi shkuar bashkë me kompaninë edhe tek institucionet, në Ministri të Tregtisë dhe Industrisë dhe në Agjencinë për Investime dhe Përkrahjen e Ndërmarrjeve në Kosovë”, thotë Tahiri.

Sipas tij, procedurat e mëtejshme kanë ngecur në nivelin qendror.

Sipas dokumenteve Komisioni Ndërministror për Investime Strategjike e ka trajtuar kërkesën e këtij investitori në vitin 2020.

Në dhjetor të atij viti, Qeveria e Kosovës – atëbotë me kryeministër Avdullah Hotin – ka marrë vendim që t’ia japë statusin e investitorit strategjik kompanisë “Akuo Energy”.

Ky status, sipas ligjit në Kosovë, i jepet atij që i kontribuon rritjes ekonomike, punësimit dhe zbatimit të teknologjive të reja apo që ndikon në rritjen e mirëqenies dhe kushteve të jetesës së qytetarëve të Republikës së Kosovës.

Vendimi për statusin është dashur të miratohet në Kuvendin e Kosovës, por një gjë e tillë nuk është arritur, pasi, në shkurt të vitit 2021, Kosova ka shkuar në zgjedhje të parakohshme parlamentare.

Fituese në këto zgjedhje ka dalë Lëvizja Vetëvendosje e Albin Kurtit dhe vendimi i Qeverisë së Hotit nuk është jetësuar.

Më 7 shtator, ministrja e Industrisë, Ndërmarrësisë dhe Tregtisë e Kosovës, Rozeta Hajdari, e ka njoftuar kryetarin e Vushtrrisë, Xhafer Tahiri, se do ta rikthejë lëndën e investitorit në shqyrtim dhe vlerësim te Komisioni Ndërministror për Investime Strategjike.

Hajdari e ka arsyetuar vendimin e saj duke thënë se investimi ka të bëjë me tarifa nxitëse të energjisë elektrike.

Përmes këtyre tarifave, prodhuesit e energjisë elektrike nga burime të ripërtërishme kanë garanci që energjia që ata prodhojnë, do t’iu blihet.

Pas lajmit që doli këtë javë në media të ndryshme, se kompania “Akuo Energy” ka investuar në Maqedoni të Veriut dhe se është tërhequr nga Kosova, Ministria e Industrisë, Ndërmarrësisë dhe Tregtisë e Kosovës ka mohuar se ajo është tërhequr nga Kosova dhe ka thënë se kompania franceze ka edhe projekte të tjera në rajon.

Sipas kësaj ministrie, lënda për kompaninë në fjalë do të riprocedohet shpejt në Komisionin Ndërministror për Investime Strategjike dhe, pas shqyrtimit aty, do të trajtohet në Qeverinë dhe në Kuvendin Kosovës.

“Riprocedimi do t’i hapë rrugë realizimit të investimit, në përputhje me legjislacionin në fuqi, sidomos normat për ndihmën shtetërore – pra, pa tarifa nxitëse që mund t’iu faturohen qytetarëve dhe që ndalohen me legjislacionin e Bashkimit Evropian dhe të Republikës së Kosovës”, ka thënë Ministria e Industrisë.

Tahiri: Humbje për Komunën e Vushtrrisë

Kryetari në largim i Komunës së Vushtrrisë, Xhafer Tahiri, thotë se zvarritja e këtij investimi është humbje e madhe për zhvillimin e kësaj komune.

Memorandumi i nënshkruar mes Komunës së Vushtrrisë dhe kompanisë “Akuo Energy”, sipas tij, ka paraparë që investitori t’i paguajë afro 300 mijë euro taksë vjetore Komunës së Vushtrrisë.

Me këtë memorandum është paraparë, gjithashtu, që pesë studentë nga Vushtrria të studiojnë në universitetet franceze për energji të ripërtërishme dhe të njëjtit të kthehen pastaj në Kosovë për të dhënë kontributin e tyre në fushën e kësaj energjie.
“Nuk arrijmë që të kemi shpesh investitorë të tillë seriozë. Sikur të ishin kryer me kohë procedurat ose vetëm të kryhen si në Maqedoni të Veriut, brenda një muaji apo dy, ne sot do ta kishim këtë investim ndoshta të përfunduar”, thotë Tahiri.

Sipas vlerësimeve të Agjencisë së Statistikave të Kosovës (ASK), Komuna e Vushtrrisë ka rreth 62,000 banorë.

Në muajin shtator të këtij viti, afro 1,500 familje kanë qenë me asistencë sociale nga shteti.

ASK-ja nuk ka të dhëna për numrin e të papunëve në këtë komunë.

Buxheti i planifikuar i Komunës së Vushtrrisë për vitin 2021 është 18.9 milionë euro.

Sa janë investimet e huaja në Kosovë?

Sipas të dhënave të Bankës Qendrore të Kosovës, investimet e huaja në vitin 2020 kanë qenë rreth 350 milionë euro, ndërsa brenda gjashtëmujorit të parë të këtij viti ato kanë qenë rreth 230 milionë euro.

Sektori i patundshmërive ka pjesëmarrjen më të lartë në strukturën e investimeve të huaja.

Gjermania është shteti me më së shumti investime të huaja direkte, i pasuar nga Zvicra. /REL/

Policia e Kosovës ka njoftuar se ka vizituar dy qytetarë, të cilët dje raportuan se kishin mbetur të ngujuar nga bora në fshatin Stankaj të Rugovës.

Këtyre të fundit, G.F dhe D.N, iu ofrua ndihma e nevojshme nga policia.

Ky është njoftimi i PK-së:

Dje, më datë 02.12.2021, nga disa media elektronike është raportuar për një qytetar, i cili ka deklaruar se është bllokuar nga bora në fshatin Stankaj në Bjeshkët e Rugovës. Sot, më datë 03.12.2021, në orët e hershme të mëngjesit, Policia Kufitare gjegjësisht Drejtoria e Policisë Kufitare” Perëndimi” në Gjakovë, kanë vizituar qytetarët e bllokuar G.F si dhe D.N me qëllim që të ju dalin në ndihmë bazuar në nevojat që ata mund të kenë. Qytetarët janë ndihmuar nga patrulla kufitare që të lëvizin me veturën e tyre dhe të dalin në rrugë të kalueshme ku pastaj ata kanë vendosur të vazhdojnë qëndrimin e tyre në fshatin Stankaj.

Kryeministri i Kosovës, Albin Kurti, është takuar me komandatin e ri të Forcave të Sigurisë së Kosovës, Bashkim Jashari.

Takimin e ka njoftuar Zyra e Kryeministrit, derisa bëhet e ditur se në takim është diskutuar për fatin e FSK-së.

“Me Komandantin e FSK-së Jashari, kryeministri Kurti bisedoi për rëndësinë e ngritjes së kapaciteteve dhe modernizimit të FSK-së dhe mbështetjen që FSK ka nga Qeveria e Republikës së Kosovës në arritjen e këtyre synimeve”, thuhet në komunikatë.

“Komandanti i FSK-së, gjeneralmajor Bashkim Jashari e falënderoi kryeministrin Kurti për mikpritjen e sotme e edhe më shumë për besimin e tij. Ai e siguroi kryeministrin se do të angazhohet maksimalisht për të plotësuar objektivat e përbashkëta, për ta bërë FSK-në forcë moderne që është e gatshme për të mbrojtur vendin edhe për të kontribuar në paqen dhe sigurinë globale”, thuhet tutje në komunikatën e ZKM-së.

Deputeti shqiptar në Kuvendin e Serbisë Shaip Kamberi i ka reaguar presidentit serb Aleksandar Vuçiqi i cili në përurimin e segmentit të parë të autoudhës Nish-Merdarë tha se “janë të domosdoshme marrëdhëniet shumë më të mira me shqiptarët”.

Kamberi tha se këtë gjë ia kishte thënë presidentit serb në debatin për dialogun me Kosovën në Kuvendin e Serbisë, derisa ia kujtoi se ka reaguar me inat.

“Aleksandër Vuçiq më në fund e paska kuptuar që për Serbinë “janë të domosdoshme marrëdhëniet shumë më të mira me shqiptarët”. Po, z.President, a nuk ju kam thënë të njejtën gjë në debatin parlamentar rreth dialogut me Kosovën? A nuk ju kam thënë me atë rast që “si pjesëtar i popullit shqiptar e shoh perspektivën e popullit tim në anëtarësimin në BE, por në të njejtën kohë edhe në bashkëpunimin e ndërsjellë me popujt e Ballkanit Perëndimor, duke e përshirë edhe popullin serb”.

“A nuk ju kam thënë që “gjuha e urrejtjes dhe riciklimi i terminologjisë së viteve të 80’ta dhe 90’ta nuk ka vend në këtë dialog mbi pajtimin i cili njëkohësisht nënkupton edhe ballafaqimin me të kaluarën” dhe që “ju nevojitet një qasje e re”. Ju kam cituar edhe intelektualin serb, Bogdan Bogdanoviq, që kishte thënë se “Serbia duhet patjetër me sy të huaj ta shikoj veten” dhe përfundimisht ta kuptoj që “krijimi i miqësive është më i rëndësishëm se fitimi i territoreve”. Si keni reagur Ju atëkohë? Me inat keni refuzuar të heqni dorë nga politika e krimeve të luftës”, ka shkruar ai në Facebook.

Deputeti shqiptar në Kuvendin e Serbisë i ka thënë presidentit të këtij shteti se vetëm kur Serbia ta pranojë se çfarë ka bërë në Kosovë mund të ketë miqësi me shqiptarët.

Ai ka thënë po ashtu se rruga e Serbisë drejt Shqipërisë kalon nëpër Kosovë.

“Në fund të fundit ju ka parë i gjithë publiku se si i keni pranuar sugjerimet e ardhura nga unë. Përsëri po ju them që të heqni dorë nga “imagjinatat virtuele rreth Kosovës” dhe të pranoni jo vetëm realitetin, por edhe përgjegjësinë rreth asaj se çfarë ka bërë shteti serb në Kosovë. Vetëm atëherë mund të flisni për miqësinë me shqiptarët. Deri atëherë duhet patjetër ta kuptoni faktin e pamohueshëm që rruga juaj drejt Shqipërisë kalon nëpër Kosovë”.