Kosova është shteti i vetëm në rajon, i cili nuk ka rezerva të arit. Banka Qendrore e Kosovës ka konfirmuar se “për momentin nuk mban në portofolin e saj rezerva ndërkombëtare në ari dhe metalet e tjera të çmuara”. Ndërkaq në pasqyrën e mjeteve financiare të publikuar nga kjo bankë, figurojnë rreth 1 miliard e 847 mijë euro, si rezerva të kapitalit.

Ari, si pasuri, ka një likuiditet dhe stabilitet më të madh të çmimit dhe shtetet që nuk dëshirojnë të pranojnë ndonjë risk të lartë, orientohen që si aset të tyre financiar, ta ruajnë në rezervat e tyre arin.

Ministria e Financave s’është përgjigjur nëse ka në plan të krijojë rezerva të tilla.

Ndërkaq, ish-ministri i Financave, Haki Shatri, për Radion Evropa e Lirë, ka thënë se janë disa arsye pse Kosova s’ka arritur të krijojë rezerva të tilla.

Sipas tij, Kosova ka dalë nga lufta në vitit 1999, pa trashëguar rezerva të tilla nga ish-Jugosllavia. Sipas tij, Kosova, fillimisht, në pesë vjetët e para pas luftës, kishte investuar në krijimin e infrastrukturës institucionale dhe krijimin e parakushteve për të formuar shtetin, me një buxhet shumë formal prej rreth 300 milionë eurove. Pas shpalljes së pavarësisë në shkurt të vitit 2008, ishin nevojitur investimet për ndërtimin e kapaciteteve për zbatimin e ligjeve dhe ndërtimin e institucioneve që merren me inkasim të tatimeve dhe doganat.

“Arsyeja se pse s’kemi (rezerva të arit), fillimisht, është kapaciteti i dobët dhe mundësia e vogël për të pasur më shumë (kapital buxhetor). Nëse do të kishim pasur rezerva më shumë, atëherë në vend se t’i ruanim ato në valutë, shteti do t’i shndërronte ato në rezerva të arit, në qoftë se do të vlerësohej se ecuria e çmimit të arit, kur blihet, është e favorshme. Por, varet edhe nga lëvizjet e çmimit në treg”, ka thënë Shatri.

Përveç mungesës së rezervave të arit, Kosova nuk ka as valutën kombëtare të saj dhe në përdorim ka euron. Në mungesë të valutës kombëtare edhe Mali i Zi e përdorë euron, ndërkaq vendet tjera të dala nga ish-Jugosllavia, i kanë valutat e tyre kombëtare. Mejdi Bektashi, profesor i Ekonomisë në Universitetin e Prishtinës, ka deklaruar që mospasja e valutës kombëtare arsyetohet me mospasjen e rezervave të arit.

Sipas tij, Republika e Serbisë është trashëguese e ish-sistemit të Jugosllavisë. Siç thotë Bektashi, shtetet që kanë dalë nga ish-Jugosllavia, kanë trashëguar pjesë të pasurisë prej mbi 200 tonelata ari që ishin rezerva të ish-shtetit të përbashkët. Por, Kosova ende nuk njihet nga Serbia dhe për pasojë, siç thotë ai, ndërmjet këtyre dy vendeve nuk është kryer sukcesioni financiar dhe ekonomik. Rrjedhimisht, Kosova nuk ka trashëguar pjesë nga pasuria e arit që ka pasur ish-Jugosllavia dhe trashëgimtarja e saj, Serbia.

“Derisa nuk përfundojnë problemet politike, ne nuk mund të fillojmë të kyçemi në sukcesion ekonomik dhe financiar me Serbinë. Arsyeja tjetër pse ne jemi i vetmi shtet që nuk kemi rezerva të arit, ka të bëjë edhe me kufizimet e caktuara që i ka pasur Banka Qendrore në periudhën e caktuar. Ndonëse, sipas një formule, të gjitha shtetet e zhvilluara i ruajnë rezervat në me një të tretën – për ta shpërndarë riskun- në dollarë, euro dhe ari. Ne jemi të vetmit që kemi vetëm euro”, është shprehur ai.

Ish-ministri Shatri shpreh mendimin se duke marrë parasysh kërkesat e mëdha që ka pasur vendi gjatë ndërtimit të shtetësisë, përballë buxhetit, sipas tij, jo të madh, për pamundësia e krijimit të rezervave të arit nuk duhet të fajësohet askush.

“Nuk mund t’ia lë fajin asnjërës prej qeverive dhe as kësaj aktuale sepse nuk është varur prej tyre. Thjesht, nuk ka pasur mundësi dhe ky është potenciali jonë”, ka vlerësuar Shatri.

Ai ka shtuar se mbetet vetëm për të shpresuar që Kosova nuk do të gjendet përballë ndonjë krize, ku rezervat e arit do të ishin të domosdoshme.

Profesor Bektashi thekson se shtete e rajonit të Ballkanit Perëndimor, në vitet e fundit të krizës financiare, i ka shtuar dukshëm rezervat e arit. Por, ai shpreh mendimin se edhe në rast se eventualisht Kosova do të niste të siguronte rezervat e arit, aktualisht nuk është koha për një gjë të tillë.

“Tani çmimi i arit ka arritur për një ons (31.103 gramë) mbi 1,700 dollarë, është me shumë rrezik që me këtë çmim, i cili ndoshta në të ardhmen – nëse tejkalohet kriza financiare dhe kriza energjetike, e cila ka kapluar jo vetëm rajonin, por edhe botën – mund të ulet”, thekson Bektashi.

Aktualisht, rezervat e arit të Serbisë janë 37.2 tonelata. Maqedonia e Veriut ka 6.9 tonelata rezerva të arit, Bosnjë e Hercegovina ka 2.9 tonelata, Shqipëria ka 2.8 tonelata. Ndërkaq Mali i Zi ka 1.9 tonelata rezerva të arit, por ato janë të deponuara për kredi. Së fundmi, Serbia i ka kthyer në vend të gjitha rezervat e arit, të cilat i ruante jashtë vendit. Aktualisht, 37.2 tonelata të arit, sa ka rezerva Serbia, kanë vlerën prej 1.9 miliard euro.

Sipas Bankës Kombëtare të Serbisë, arsyeja për kthimin e shufrave të arit nga kasafortat në Zvicër dhe Angli, është se “në një mjedis të pasigurisë globale të shtuar, ajo dëshironte të rriste më tej sigurinë dhe mundësinë e qasjes të arit të saj”.

Bankat qendrore të botës aktualisht mbajnë më shumë se 35.000 tonelata ar.

Sipas të dhënave të Këshillit Botëror të Arit (World Gold Council), i cili mban shënime sipas vendeve, Shtetet e Bashkuara kanë rezervat më të mëdha të arit – 8,133 tonë, që është pothuajse 78 për qind e totalit të rezervave valutore të vendit.

Pas saj vjen Gjermania me 3,359 tonë dhe Italia dhe Franca me më shumë se 2,000 tonë ar.

Sasi të konsiderueshme ari në dekadën e fundit kanë blerë Rusia dhe Kina, të cilat zënë vendin e pestë dhe të gjashtë në listën botërore.

Banka Qendrore e Rusisë aktualisht zotëron 2,292 tonë ar, gjë që e rriti sasinë e rezervave në më shumë se 20 për qind. Rusia rriti më tej blerjet e saj në vitin 2018, pasi investimet në bono amerikane u reduktuan në minimum pasi Uashingtoni vendosi sanksione ndaj atij vendi për shkak të aneksimit të gadishullit ukrainas të Krimesë, shkruan Reuters. /REL

Ka ende shumë pyetje në lidhje me variantin e ri të COVID-19 të quajtur “Omicron”, i cili po konsiderohet si variant me shumë mutacione. Shkencëtarët po punojnë gjatë gjithë kohës për të zbuluar nëse me të vërtetë përhapet më shpejt, shmang imunitetin ose ndryshon ashpërsinë e sëmundjes.

Nga Organizata Botërore e Shëndetësisë kanë thënë se shumica e njerëzve nuk po sëmuren rëndë nga ky variant, megjithëse ka ende shumë për të mësuar rreth tij.

Ndërkaq, nga Ministria e Shëndetësisë së Kosovës thanë se edhe ky variant, sikurse gjithë të tjerët, duhet të merret seriozisht.

Ata thanë se “Omicron” ka ende shumë të panjohura dhe se çdo shtet është i rrezikuar nga ky variant i virusit COVID-19.

Çdo variant i SARS COV-2 duhet të merret me seriozitet, e gjithashtu edhe varianti “Omicron” për të cilin ende ka shumë të panjohura. Çdo shtet është i rrezikuar nga ky dhe variantet e tjera të virusit SARS COV-2, prandaj duhet ndërmarrë masa parandaluese duke kombinuar qasjen: zbatim i masave ne fuqi dhe vaksinim i popullatës”, thuhet në përgjigjen e MSH-së për Klan Kosova.

Nga kjo ministri thanë se aktualisht në Kosovë është situatë e qetë epidemiologjike, por që duhet të ketë kujdes maksimal.

“Kosova, këtyre ditëve ka një situatë të qetë epidemiologjike sa i përket COVID-19, por kjo situatë mund të jetë e brishtë dhe duhet kujdes maksimal, pa panik, për të qenë të gatshëm për ballafaqim me cilindo skenar të zhvillimit të ngjarjeve”, thuhet në përgjigjen e tyre.

Ata kanë bërë të ditur se MSH-ja është duke bashkëpunuar me të gjitha institucionet për ta mbajtur sistemin shëndetësor sa më të mobilizuar.

“Ecuria e situatës epidemiologjike nuk është gjithmonë e lehtë të përcaktohet me saktësi, për shkak të paraqitjes së varianteve të reja te SARS COV-2 dhe ashpërsisë së virusit. Sidoqoftë, MSH është duke bashkëpunuar me të gjitha institucionet për ta mbajtur sistemin shëndetësor sa më të moblizuar për t’iu përgjigjur çfarëdo situate”, thuhet më tej në përgjigje.

Ministria e Shëndetësisë ndër të tjera u ka bërë thirrje qytetarëve që të vaksinohen.

“Janë ndërmarrë edhe masa të reja të cilat hyjnë në fuqi nga 6 dhjetori, derisa thirrja kryesore për popullatën është që të vaksinohen ata që se kanë bërë ende, ndërsa qytetarët që e kanë marrë vetëm një dozë, ta marrin sa më parë edhe të dytën, derisa pritet që së shpejti të fillojë edhe administrimi i dozës përforcuese dhe dozës së tretë të vaksinës kundër COVID-19”, thanë nga MSH-ja.

Tutje, në përgjigjen e Ministrisë së Shëndetësisë për Klankosova.tv u bëhet thirrje qytetarëve edhe që të zbatojnë me përpikëri të gjitha masat anti-COVID që janë në fuqi.

Ndryshe, në 24 orët e fundit në Kosovë janë konfirmuar edhe katër raste të reja me COVID-19, si dhe katër persona të tjerë janë shëruar.

Ditën e martë të javës së ardhshme në Kosovë, temperaturat do të shkojnë deri në -10 gradë Celsius.

Sipas ‘AccuWeather’, uebfaqja që merret me parashikimin e motit, ka bërë të ditur se në Kosovë, nesër dhe gjatë javës së ardhshme mund të ketë reshje bore.

Sot në vend sipas kësaj uebfaqe, do të ketë mot me vranësira ku temperaturat maksimale do të jetë 5 gradë, ndërsa minimalja -1.

Të dielën në Kosovë pritet të ketë reshje bore, temperaturat maksimale do të jenë 8 gradë, ndërsa minimalet 4 gradë.

Të hënën do të jetë më ftohët dhe pritet vetëm reshje shiu. Temperaturat do të sillen nga 8 deri 0 gradë.

Ndërsa të martën përveç borës që do të bie, temperaturat do të jenë nga -10 gradë Celsius, deri në 1 gradë.

Numri i njerëzve që pësojnë efekte anësore dhe komplikime të shkaktuara nga barnat dhe ilaçet është tronditës.

Sipas të dhënave të Organizatës Botërore të Shëndetit janë më shumë se 1.5 milion raste të regjistruara në botë.

Çdo lloj ilaçi i marrë me recetë mund të shkaktojë një lloj rreziku shëndetësor.

Humbja e kujtesës është një nga efektet anësore më të zakonshme. AgroWeb.org ju sjell një informacion shumë të rëndësishëm mbi gjithçka duhet të dini.

Qetësuesit dhe Ilaçet e Gjumit

Është vërtetuar nga raste të shumta që pilulat e gjumit mund të shkaktojnë humbje të kujtesës. Ambien është një nga ilaçet më të përdorura që shkakton këtë problem madje është quajtur edhe “ilaçi i harresës”.

Njerëzit që përdorin këtë medikament përjetojnë halucinacione; ecin në gjumë, madje ngasin makinën po në gjumë.

Marrja e këtij ilaçi për trajtimin e problemeve të gjumit nuk i jep trurit gjumin ripërtëritës që ka nevojë për të riparuar dhe ruajtur vetë.

Ajo shkakton gjendje të ngjashme me të qenit i dehur ose të qenit në koma.

Mjekimet me Statina

Ilaçet më të këqija për trurin janë barnat statine të cilat përdoren për uljen e niveleve të kolesterolit.

Truri ka nevojë për kolesterolin për funksionimin e duhur, për kujtesën, të mësuarit dhe të menduarit e shpejtë. Këto barna mund të rrezikojnë seriozisht shëndetin e trurit dhe kujtesën.

Mjekimet me Ilaçet ANTI

Antihistaminikët, antibiotikët, antihipertensivët, ilaçetet kundër depresionit, antipsikotikët, antispasmodikët dhe të gjitha medikamentet e tjera që fillojnë me ANTI-ndikojnë në nivelet e acetilkolinës.

20 Ilaçet me efekt anësor Humbjen e Kujtesës

Antidepresantët triciklik • Ilaçet e tensionit të lartë • Metildopa • Mjekimet kundër dhimbjeve me përmbajtje heroine, kodeine, morfine • Ilaçet e kemioterapisë • Interferonet • Antipsikotikë si Haldol ose Mellaril • Epileptikët si Fenitoin ose Dilantin • Ilaçet e ankthit si Seconal, Phenobarbital, Amytal, Nembutal • Antihistaminikët • Quinidine • Beta Bllokuesit sidomos për glaukomën • Antibiotikët • Naproxen • Litium • Steroidet • Insulina • Pilula gjumi si Sonata, Ambien, Lunesta • Ilaçet e Parkinsonit si glikopirrolat, skopolamina, atropina • Ilaçet qetësuese si benzodiazepinat Ativan, Dalmane, Valium, Xanax.

Sipas Mount Sinai School of Medicine në SHBA, këto janë 20 barnat që dihen që shkaktojnë humbje të kujtesës.

Gjithmonë konsultohuni me mjekun tuaj përpara se të merrni ndonjë ilaç, veçanërisht këto lloje të barnave.

Para se të vendosni t’i përdorni ato, përpiquni t’i trajtoni problemet natyrshëm me përbërës dhe mjete natyrale, të keni aktivitet të rregullt fizik dhe të ndryshoni stilin e jetës.

Ministri Rifat Latifi ka thënë së është zhvendosur nga New York’u në Prishtinë për ta vazhduar punën në krye të Ministrisë së Shëndetësisë.

Latifi ka qenë në Nju Jork për disa ditë nga ku është kthyer dhe zhvendosur përfundimisht në Prishtinë për të vazhduar punën si ministër i Shëndetësisë.

“Jam zhvendosur përfundimisht në Prishtinë. Kam dhënë premtimin dhe do ta mbajë”, ka deklaruar Latifi për Gazetën Shneta.

Ai ka demantuar kategorikisht zërat se mund të tërhiqet nga kjo pozitë.

“Absolutisht nuk është e vërtetë. Unë jam bartur tërësisht në Prishtinë dhe një gjë e tillë nuk vjen në konsideratë”, ka deklaruar Latifi.

Kirurgu i njohur u emërua ministër nga kryeministri Albin Kurti më 16 nëntor, pas dorëheqjes së Arben Vitisë i cili kandidoi për kryetar të Prishtinës

Marsi i vitit tjetër parashihet të jetë muaji kur Komisioni i Venecias do të ofrojë opinion për koncept-dokumentin e Ministrisë së Drejtësisë mbi çështjen e vetting-ut. Për këtë të fundit, Qeveria ka marrë edhe vërejtje nga faktorët ndërkombëtar.

Afati për opinionin e Komisionit të Venecias është bërë i ditur në uebfaqen zyrtare të kësaj të fundit, derisa thuhet se më datën 10 ose 11 dhjetor do të jetë edhe pjesë e seancës plenare së këtij komisioni, shkruan lajmi.net.

“Kërkesa për këtë opinion është dorëzuar nga Ministri i Drejtësisë së Kosovës më 26 tetor 2021. Draft opinioni do të jetë në rendin e ditës të seancës plenare të dhjetorit të Komisionit (10-11 dhjetor 2021)”, thuhet në njoftimin e komisionit gjyqësor të BE-së.

Në nëntor, ministrja e Drejtësisë, Albulena Haxhiu, në takimin e parë të grupit punues për hartimin dhe finalizimin e legjislacionit për procesin e Vettingut në sistemin e drejtësisë, pati njoftuar për koncept-dokumentin që e kanë dërguar për vlerësim në Komision të Venecias.

“Koncept-dokumentin e kemi dërguar edhe në Komision e Venecias. Kemi marrë përgjigje pozitive që i njëjti koncept-dokument, me opsionet që i kemi ndjekur do të trajtohet dhe do të na vijnë përgjigje nga Komisioni i Venecias”, pati thënë Haxhiu.

Procesi është kritikuar nga diplomatë ndërkombëtarë që shërbejnë në Kosovë, e së fundmi edhe nga ambasadori britanik në Kosovë, Nicholas Abbott.

“Por në çdo vend ku është vendosur një sistem i tillë vettingu, është gjithmonë një proces delikat që kërkon maturi për t’u zbatuar me sukses. Për këtë arsye, ne kemi inkurajuar qeverinë që të konsultohet me Komisionin e pavarur të Venecias për këtë, dhe të dëgjojnë me kujdes shqetësimet e partnerëve të tjerë ndërkombëtarë”, ka deklaruar ai.

Raporti i Progresit për vitin 2021 në Kosovë ka kritikuar hapat e ndërmarrë për rivlerësimin profesional të gjyqtarëve e prokurorëve, duke e cilësuar si “shqetëim serioz”.

“Qeveria e re ka shqyrtuar disa opsione për një proces për ‘vetting’ të gjyqësorit dhe prokurorisë. Në këtë kontekst, prezantimi i mundshëm i një rivlerësimi të plotë të njëhershëm të të gjithë prokurorëve dhe gjyqtarëve paraqet një burim shqetësimi serioz. Një proces i tillë do të duhej të konsiderohet vetëm si një masë e jashtëzakonshme e mjetit të fundit, pasi të jenë shteruar të gjithë mjetet dhe mekanizmat ekzistues për të siguruar integritetin dhe për të luftuar korrupsionin e titullarëve të detyrave gjyqësore, dhe do të duhej të jetë në përputhje me standardet evropiane dhe ndërkombëtare, si dhe me këshillat e Komisionit të Venecias”, u tha në raportin e Komisionit Evropian.

Përkundër zërave kritik, procesi i vetting-ut ka marrë edhe mbështetjen e presidentes Vjosa Osmani dhe kryeministrit Albin Kurti.

Avokati Arianit Koci, ka thënë se hetuesia e ka humbur momentumin lidhur me zbulimin e autorit të krimit në Gllogjan.

Koci ka thënë se ditën e parë pas krimit gjurmët janë të freskëta dhe se për këtë arsye, ai ka insistuar që të bllokohet tërësisht rrafshi i Dukagjinit, menjëherë pas sulmit.

Shoqata “Jetimat e Ballkanit” ka realizuar edhe një projekt madhor, në bashkëpunim me Komunën e Vushtrrisë. Sot në këtë qytet është vendosur gurthemeli i objektit të Qëndrimit Ditor për të moshuar dhe kuzhinës humanitare për familjet skamnore.

Drejtori i shoqatës “Jetimat e Ballkanit”, Halil Kastrati tha se ky projekt është me standarde të larta dhe do të jetë në shërbim të të moshuarve.

“Ne sot po e nisim më të dashurit tonë për këtë projekt me shpresën që do të qetësohet, do të thotë shpirtërore për të kaluar në këtë objekt.” standardi i mirë”, u shpreh Kastrati.

Edhe kryetari aktual i Vushtrrisë, Xhafer Tahiri e vlerësoi të rëndësishëm projektin në fjalë, teksa falënderoi Kastratin për angazhimin e vazhdueshëm për ndihmë qytetarëve të kësaj komune.

Ky projekt do të ndërtohet në një hapësirë prej më shumë se dy hektarësh, ndërsa kap koston e rreth 1 milion eurove.

Drejtori i “Jetimave të Ballkanit”, Halil Kastrati paralajmëroi projekte të tilla edhe në qytete të tjera të vendit.