Kryeministri i Kosovës, Albin Kurti në fjalimin e tij në mbledhjen e 45-të të Këshillit të Përgjithshëm të Vetëvendosjes, ka kritikuar ish-qeveritë për gjendjen në të cilën gjendet shteti.

Kurti ka thënë se me të marrë pushtetin kanë gjetur një shtet të shtrirë përtokë që gjakonte dhe të papërgatitur për sfidat e shekullit 21.

Ai po ashtu ka folur për krizën energjetike, ku ka thënë se e kupton frustrimin e qytetarëve dhe se edhe vet është i frustruar me mungesën e energjisë. Por ai ka shtuar se kjo duhet shërbejë si rikujtim për gjendjen në të cilën e kanë lënë shtetin qeveritë e kaluara.

“Fitorja e 14 shkurtit e Vetëvendosjes ishte e domosdoshme më shumë sesa e nevojshme për ta shpëtuar vendin. Ajo që gjetëm në shumë pjesë ishte më keq se që e mendonim. Një shtet përtoke që gjakonte në gjitha anët e tërësisht i papërgatitur për sfidat e shekullit të 21-të. E në kulmin e këtyre problemeve këtë vit kishim edhe luftimin e vazhdueshëm me pandeminë COVID-19. Dhe një ndërmarrje masive sikurse vaksinimi i popullsisë, sfidë që e kaluam me sukses duke përmbushur premtimin për vaksinimin e mbi 60 për qind të popullatës së vaksinueshme. Tash po përballemi edhe me një sfidë tjetër, Kriza energjetike e shkaktuar sa nga faktor të jashtëm jashtë kontrollit tonë po aq edhe nga mungesa e vizionit për të marrë vendime për të ardhmen nga ata që qeverisën për më tepër se dy dekada. Derisa kërkesa për energji nga qytetarët e ekonomitë është rritur për çdo vit, prodhimi nga KEK-u ka mbetur i njëjtë e ndërkohë ka pasur edhe vjedhje e vendime të gabuara që e kanë sjellë sektorin energjetik buzë kolapsit”, ka thënë Kurti. “E kuptoj frustrimin e secilit qytetar me mungesën e energjisë elektrike, më besoni edhe vet jam i frustruar. Por, le të jetë ky një rikujtim për gjendjen në të cilën e lanë shtetin ata që qeverisën për dy dekada, sepse si njerëz të territ që ishin e që punët i bënin natën jashtë syve të qytetarëve, ata s’kishin si ta linin Kosovën ndryshe pos në terr e skëterrë”.

Kurti ka thënë se gjatë vitit që vjen do të dilet me propozime për zgjidhje afatgjate të problemit të energjisë. Synimi ai thotë se është që çdo vit të investohet në energji të ripërtritshme.

Shërbimi Korrektues i Kosovës po e përkrah marrëveshjen mes Kosovës dhe Danimarkës për transferimin e 300 të burgosurve nga shteti danez në Qendrën e Paraburgimit në Gjilan.

Megjithatë, kjo marrëveshje është kundërshtuar nga organizatat që monitorojnë qendrat e paraburgimit dhe nga Avokati i Popullit. Arsyetimi i këtyre të fundit është që Shërbimi Korrektues në Kosovë nuk ka kapacitete të mjaftueshme dhe transferimi i 300 të burgosurve do të sjellë probleme të shumta.

Ismail Dibrani, zyrtar i lartë në Shërbimin Korrektues të Kosovës, thotë për KosovaPress se ky institucion do të jetë përfitues i marrëveshjes me shtetin danez.

“Buxheti total i SHKK-së për një vit është afër 18 milionë euro, prej kësaj marrëveshje shteti i Kosovës do të përfitojë diku afër 21 milionë euro. Nga to afër 15 milionë euro do të shfrytëzohen për Shërbimin Korrektues të Kosovës dhe gjashtë milionë euro për energji të ripërtritshme. Do të thotë se ne i pranojmë afër 300 të dënuar dhe e kemi buxhetin me të madh sesa krejt buxheti që është për Shërbimin Korrektues të Kosovës, që janë 1700 të burgosur dhe 1700 staf të angazhuar”, thotë Dibrani.

Sipas tij, stafi korrektues do të jetë nga Kosova, ndërsa stafi menaxhues nga Danimarka.

Megjithatë, Avokati i Popullit deklaron se mbajtja e të burgosurve të vendeve të treta do të shkaktojë shumë probleme.

“Në parim unë dua të qëndroj mbi atë se Avokati i Popullit për vite me radhë ka adresuar si shqetësim tek autoritetet kapacitetet e burgjeve, mungesat e hapësirave dhe mbipopullimin, si njëra prej shqetësimeve shumë serioze me të cilën ballafaqohen të burgosurit që vuajnë dënimin ose janë të paraburgosur në Shërbimin Korrektues të Kosovës dhe padyshim në këtë situatë kur gjendja filloi të përmirësohet dhe raportet kohëve të fundit ishin më të balancuara dhe tregonin për një standard në ngritje, kjo mund të shkaktojë shumë problem, por përveç kësaj për vetë faktin se po lejohet që brenda shtetit të mbahen të burgosur të vendeve të treta padyshim që paraqet një shqetësim dhe ne me kohë do të dalim me qëndrim zyrtar lidhur me këtë temë”, deklaron Naim Çelaj.

Për marrëveshjen e nënshkruar ditë më parë mes Ministrisë së Drejtësisë së Kosovës dhe Danimarkës, ka reaguar edhe Qendra e Kosovës për Rehabilitimin e të Mbijetuarve të Torturës, e cila e ka kundërshtuar këtë marrëveshje. Në reagimin e kësaj qendre thuhet se vendosja e 300 të burgosurve nga Danimarka dhe ri-sistemimi i 200 të burgosurve aktual do të rezulton me mbipopullimin dhe përkeqësimin e kushteve në qendrat tjera korrektuese.

“Sipas Ministrisë së Drejtësisë, brenda Shërbimit Korrektues të Kosovës ka kapacitete të mjaftueshme për të akomoduar përafërsisht 700-800 të burgosur dhe të paraburgosur, gjë që bie ndesh me gjetjet tona të faktuara pas vizitave monitoruese. Hapësira të cilës i referohet Ministria e Drejtësisë do të ishte e disponueshme vetëm nëse të gjitha kapacitetet e qendrave të paraburgimit (pavijonet, blloqet, krahët) të ishin funksionale”, thuhet në këtë reagim.

Edhe Komisioni për Mbrojtjen e të Drejtave dhe Lirive të Njeriut ka kundërshtuar këtë marrëveshje, duke thënë se e njëjta legalizon diskriminim e të dënuarve në Kosovë.

Shërbimi Korrektues i Kosovës ka kapacitet prej 2500 vende, ndërkaq numri i të dënuarve dhe të paraburgosurve është mbi 1600./KSP

Edhe këtë vit bashkatdhetarët janë nisur për festat e fund vitit, sërish po përballen me kolona dhe pritje të gjata në pikën kufitare në Merdare, madje kishte ankesa se në pikën kufitare në Serbi, bashkatdhetarët po u japin të holla policëve në atë pikë që të kalojnë më shpejtë.

Ekipi i KP ka qëndruar dje për disa orë në pikën kufitare të Merdares, ku bashkatdhetarët prisnin deri në katër orë.

Bashkatdhetari nga Gjermania, Leotrim Shabri tregon se në pikën kufitare të Merdarës ka pasur pritje shumë të gjata.

“Deri këtu jo nuk kemi prit shumë, këtu kemi prit rreth 3 orë e gjysmë katër, mirë ka shkuar deri diku, mirëpo po ka shumë kësi thyerje që po hyjnë pa rend si gjithë, edhe pse jemi të vaksinuar nuk na i kanë kërkuar, jo vetëm këtu por nuk i kërkojnë askund nëpër kufi”,  shton ai

Ndërkaq edhe Habit Shatri ka ankesa për atdhetarët që vijnë nga shtetet e huaja, pasi që në kufirin e Serbisë po u japin të holla policëve në atë pikë.

“Një ndjenjë shumë e keqe për neve që presim në rend kur vinë ata që i japin asaj anës serbe i japin të holla, për neve që presim nga dy tri orë shumë ndjenjë e keqe. E kalon krejt kolonën dhe për neve shumë ndjenjë e keqe, le të shohin edhe ata që ju japin atyre se nuk e kanë mirë”, thotë ai.

Arben Sinani tregon se sa i përket sigurimit, vitin e kaluar nuk ka paguar, ndërkaq këtë vit ai u detyrua të paguajë 77 euro për dy javë.

“Ja vjet nuk kam paguar sigurim hiq, kurse tash më than të paguaj siguriom 77 euro, nuk e di për dy javë ditë 77 euro. Në kufi na ka ra me prit 3 orë e gjysmë” ka shtuar ai.

Edhe Sami Morina, mërgimtar nga Zvicra tregon se për kundër viteve të tjera nuk ka pritur më shumë se 1 orë e gjysmë.

“Jo nuk na ka ra shumë me prit madje bash këtë herë jam çudit sa shpejt ka ecur puna, një 1 orë e gjysmë nuk na ka ra ma shumë me prit. Jo askund nuk na kanë lyp përveç këtu që na pyetën nëse jeni të vaksinuar”, ka thënë ai.

Bashkim Vllashniku tregoi për KosovaPress, se nuk ka pritur shumë në asnjërën pikë kufitare, madje ai tregoi se as certifikatat e vaksinimit nuk i kanë kërkuar.

“Hungari-Serbi kam kaluar për një orë, kurse këtu në Merdare kam mbërri në 12:30 qetash, dy orë, askund nuk i kanë kërkuar”, thotë ai.