Kryeministri i Kosovës, Albin Kurti njëherësh kryetar i Lëvizjes Vetëvendosje, në mbledhjen e Këshillit të Përgjithshëm të partisë, mes tjerash, ka folur edhe për shtetasit afganë që janë strehuar në Kosovë.

Kurti ka bërë të ditur se përkohësisht, deri më tani janë strehuar 1 mijë e 341 shtetas afganë në Kosovë.

Ai njoftoi se 1 mijë prej tyre tashmë e kanë lëshuar Kosovën.

“Me kërkesë të ShBA-së, kemi strehuar përkohësisht 1,341 shtetas afganë ku mbi 1000 tyre tashmë lëshuar Kosovën”, ka thënë Kurti.

Gjatë këtij fjalimi Kurti ka folur para bashkëpartiakëve për mënyrën e qeverisjes.

Kryeministri foli edhe për krizën me energjinë elektrike në vend për çka tha se e kupton frustrimin e qytetarëve dhe se edhe ai vetë është i frustruar me mungesën e energjisë elektrike.

Ministria e Shëndetësisë ka njoftuar mbrëmë se Instituti Kombëtar i Shëndetësisë Publike i Kosovës ka detektuar 9 raste me variantin Omicron të virusit SARS-COV-2 në Kosovë.

MSH ka njoftuar se 2 raste janë të importuara nga SHBA-të, 2 raste janë të importuara nga Londra, Mbretëria e Bashkuar, 1 rast është i importuar nga Franca dhe 4 raste me variantin Omicron të detektuar janë në komunën e Mitrovicës.

Mbetet të shihet nëse Qeveria e vendit do të shtrëngojë apo jo masat, pas mbrërritjes së virusit Omicron në vendin tonë.

Njoftimi i plotë:

IKSHPK detekton 9 raste të variantit Omicron të SARS-COV-2

Prishtinë, 26 dhjetor 2021

Instituti Kombëtar i Shëndetësisë Publike i Kosovës ka bërë të ditur se, sot, më 26 dhjetor 2021, në laboratorin e Mikrobiologjisë molekulare, Departamenti i Mikrobiologjisë të IKShPK, janë testuar 22 mostra pozitive në SARS-CoV-2, të periudhës kohore 15-25 dhjetor 2021.

Nga këto mostra, nëntë (9) prej tyre kanë rezultuar pozitive në prani të variantit Omicron (B.1.1.529).

Nga hulumtimi epidemiologjik, ka rezultuar se nga këto raste:

· 2 raste janë të importuara nga SHBA-të,

· 2 raste janë të importuara nga Londra, Mbretëria e Bashkuar,

· 1 rast është i importuar nga Franca; dhe

· 4 raste me variantin Omicron të detektuar janë në komunën e Mitrovicës, të cilët mohojnë historine e udhëtimit dhe se kanë pasur kontakte me dikë nga jashtë.

Testimi është kryer me RT PCR dhe kit-e shtesë të pranuar përmes OBSh-së.
Pas paraqitjes së variantit Omicron (B.1.1.529) në botë, Evropë, rajon e tashmë edhe në Kosovë, parashikohet që të rëndoj situatën epidemiologjike.

Ky variant, në bazë të të dhënave të deritanishme nga bota, ka një përhapje edhe më të shpejtë se varianti Delta Plus.

Ministria e Shëndetësisë dhe Instituti Kombëtar i Shëndetësisë Publike të Kosovës u bëjnë thirrje qytetarëve që ti zbatojnë me përpikëmëri masat në fuqi dhe që të vaksinohen dhe ti inkurajonë tjerët për vaksinim. Kosova disponon me vaksina të miratuara për përdorim nga trupat më relevant botërorë. Vaksinimi mund të bëhet kurdo, pa termin, pavarësisht vendbanimit e shtetësisë.

Qytetarët janë përballur me reduktime të energjisë elektrike edhe gjatë së dielës. Për frustrimin e qytetarëve me këtë situatë, kryeministri Albin Kurti tha se i kupton plotësisht, por, sipas tij, kjo është shkak i qeverisjeve të mëhershme. Ndërkohë në KEK ka filluar riparimi i turbinës së bllokut “B2” të termocentralit “Kosova B”. KOHA merr vesh se eksperti gjerman ka arritur të shtunën dhe se brenda pak ditësh do të dihet se sa do të zgjasë riparimi në këtë bllok

Ka nisur puna në riparimin e turbinës së bllokut “B2” në termocentralin “Kosova B”. Burime të KOHËS brenda Korporatës Energjetike të Kosovës (KEK) kanë bërë të ditur se eksperti gjerman që do të merret me sanimin e dëmeve në këtë bllok, ka arritur të shtunën dhe se brenda pak ditësh do të dihet se sa do të zgjasin riparimet.

Brenda pak ditësh do të dihen edhe shkaktarët që dëmtuan flatrat e turbinës së B2-shit.