Gjatë muajit dhjetor, përkatësisht për festat e fundvitit, duke e shfrytëzuar Aeroportin Ndërkombëtar “Adem Jashari”, në vendin tonë kanë fluturuar 1,423 aeroplanë.

Lajmin për Telegrafin e ka konfirmuar zëdhënësja e ANP-së, Valentina Gara duke shtuar se numri i mërgimtarëve që kanë udhëtuar në vend është 180 mijë.

“Nga data 1 deri 28 dhjetor kanë fluturuar 1,423 aeroplanë me 180 mijë pasagjerë. Deri në fund të 2021 presim të përmbyllim vitin me 2.1 milionë pasagjerë”, tha Gara.

Mërgata vazhdon të jetë njëri nga burimet kryesore të financimit të shpenzimeve familjare në Kosovë. Që nga shpallja e pavarësisë, dërgesat e tyre kanë vazhduar të shënojnë rritje.

Të dhënat e Bankës Botërore tregojnë se brenda kësaj periudhe janë dërguar 12.6 miliardë euro.

Vlera më e madhe e remitencave është ajo e vitit 2020, ku pavarësisht pandemisë COVID-19 mërgata ka dërguar 1.18 miliard euro, përcjell Telegrafi.

BB thekson se diaspora kosovare është renditur e treta në botë sa i përket dërgimit të parave në vendin e origjinës në vitin 2021.

Sipas Bankës Qendrore të Kosovës, nga muaji janar deri në muajin tetor 2021, vlera e remitencave në Kosovë ka arritur në 956 milionë euro, me një rritje prej 20 për qind nga viti i kaluar.

“Viti 2021 shënoi një ritëm më të shpejtë të rritjes edhe për remitencat e dërguara nga diaspora në Kosovë, ku vlera e tyre deri në fund të muajit tetor është 956 milionë euro, që paraqet rritje vjetore prej 20 për qind”, ka treguar guvernatori Fehmi Mehmeti gjatë një konference për medie.

Numri i qytetarëve të Kosovës që jetojnë jashtë vendit, sipas të dhënave të Agjencisë së Statistikave, deri në fund të vitit 2018, vlerësohet të jetë më shumë se 850 mijë banorë.

Numër i madh i tyre jetojnë në Gjermani, Zvicër, Austri, por edhe në Shtetet e Bashkuara të Amerikës. /Telegrafi/

Policia Rajonale e Prizrenit në një komunikatë për media ka njoftuar se Policia, përveç detyrave zyrtare që ka në ruajtjen e rendit dhe sigurisë publike ne parandalim të aktiviteteve kriminale, në theks te veçantë është duke i realizuar urdhëresat dhe kërkesat e Gjykatës Themelore në Prizren.

Në aktivitetin e policisë, njësiti i zbatimit të urdhëresave nga data 20 dhjetor 2021 deri me datë 28 dhjetor 2021, ka realizuar gjithsej 51 urdhëresa, në Prizren dhe Dragash.

Zbatimi i urdhëresave ka të bëjë më sjelljen me dhunë, personat e dënuar si dhe 9 raste të cilat kanë qenë në listën e personave të kërkuar.

Njësiti i urdhëresave në drejtorinë rajonale në Prizren dhe njësitë tjera policore edhe në të ardhmen duke zbatuar urdhëresat do të jenë në nivelin më të lartë profesional, për të siguruar një klimë të qete dhe siguri për qytetarët e rajonit të Prizrenit, thuhet në njoftim

Të hënën mbrëma, Ministria e Shëndetësisë mori një vendim të ri, atë për shkurtimin e periudhës për marrjen e dozës përforcuese.

Tani, çdo qytetar mund të imunizohet me dozën përforcuese pas tre muajve të marrjes të dozës së dytë të kurës anti-COVID.

Derisa një vendim i tillë ka bërë që të rritet interesimi në Qendrën e Vaksinimit në Prishtinë.

Edhe Ministria e Shëndetësisë po iu gëzohet shifrave sa i përket administrimit të dozës përforcuese dhe asaj të tretë, derisa presin më shumë muajin në vijim.

Ata qytetarë të cilët janë injektuar me dy vaksina, nuk patën telashe ta bëjnë edhe kësaj radhe.

Deri më tani, ekipet e vaksinimit kudo në vend kanë arritur të administrojnë mbi një milion e 600 mijë vaksina.